Oʻzbekiston Respublikasining Fuqarolik kodeksi, “Prokuratura toʻgʻrisida”gi, “Davlat bojxona xizmati toʻgʻrisida”gi, “Umumiy harbiy majburiyat va harbiy xizmat toʻgʻrisida”gi, “Ichki ishlar organlari toʻgʻrisida”gi, “Oʻzbekiston Respublikasi Milliy gvardiyasi toʻgʻrisida”gi hamda “Qoʻriqlash faoliyati toʻgʻrisida”gi qonunlari, Oʻzbekiston Respublikasi Prezidentining 2024-yil 19-apreldagi PF-68-son “Lotereyalar va tavakkalchilikka asoslangan oʻyinlarni tashkil etish va oʻtkazishni tartibga solishni takomillashtirish chora-tadbirlari toʻgʻrisida”gi Farmoni va Oʻzbekiston Respublikasi Vazirlar Mahkamasining 2024-yil 6-dekabrdagi 814-son “Oʻzbekiston Respublikasi Prezidentining “Lotereyalar va tavakkalchilikka asoslangan oʻyinlarni tashkil etish va oʻtkazishni tartibga solishni takomillashtirish chora-tadbirlari toʻgʻrisida” 2024-yil 19-apreldagi PF-68-son Farmoni ijrosini taʼminlash chora-tadbirlari toʻgʻrisida”gi qaroriga ​​​​​​​muvofiq buyuraman:

1. Internet tarmogʻidagi tavakkalchilikka asoslangan oʻyinlar, lotereya va bukmekerlik garovlarida qatnashishi taqiqlangan Oʻzbekiston Respublikasining fuqarolari va chet el fuqarolarining toifalari roʻyxati ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

1. Sud tomonidan muomalaga layoqatsiz deb topilgan yoki muomala layoqati cheklangan shaxslar.

2. Ijtimoiy reyestrga kiritilgan shaxslar va ularning oila aʼzolari.

3. “Temir daftar”, “Yoshlar daftari” va (yoki) “Ayollar daftari”ga kiritilgan shaxslar.

4. Voyaga yetmagan shaxslar.

5. Prokuratura organlari, ichki ishlar, milliy gvardiya va bojxona organlari xodimlari.

6. Harbiy xizmatchilar.

7. Xizmatni oʻtash vaqtida qoʻriqlash boʻlinmalarining harbiy xizmatchilari, xodimlari, ishchilari va xizmatchilari.

8. Oʻzbekiston Respublikasi Istiqbolli loyihalar milliy agentligining xodimlari.

9. Chet el fuqarolari — xorijiy davlatlar vakolatli organlarining Oʻzbekiston Respublikasi Tashqi ishlar vazirligi orqali ularning fuqarolarini Oʻzbekiston Respublikasi hududida tashkil etilgan Internet tarmogʻidagi tavakkalchilikka asoslangan oʻyinlar, lotereya va bukmekerlik garovlarida qatnashishini taqiqlash boʻyicha soʻrovlari asosida.