Raqamli texnologiyalar va elektron to‘lovlarning barcha sohalarga jadal kirib borishi odamlar hayotini ijobiy tomonga o‘zgartirish bilan bir qatorda tavakkalchilikka asoslangan onlayn o‘yinlarning tarqalishiga turtki bo‘ldi.

Shu bilan birga, tavakkalchilikka asoslangan onlayn o‘yinlar o‘tkazish bo‘yicha milliy provayderlarning faoliyatini tashkil etish bo‘yicha mavjud taqiqlar va bu boradagi huquqiy tartibga solishning yo‘qligi, fuqarolarning mazkur sohaga doimiy qiziqishlari ularning xorijiy va noqonuniy servislardan faol foydalanishiga olib kelmoqda.

Mazkur holat o‘yinlarga haddan tashqari qaram bo‘lgan fuqarolarning o‘yinlarda ishtirok etishini cheklash mexanizmlari mavjud emasligiga, o‘yin ishtirokchilariga nisbatan firibgarlik va ularning huquqlarini poymol qilish xavfiga, chet el valyutasining mamlakatdan chiqib ketishiga olib kelmoqda.

Lotereya va tavakkalchilikka asoslangan o‘yinlarni tashkil etish faoliyatini tartibga solish sohasiga ilg‘or xorijiy tajribani va zamonaviy texnologiyalarni joriy etish maqsadida:

1. Vazirlar Mahkamasi, Istiqbolli loyihalar milliy agentligi (keyingi o‘rinlarda — Agentlik), Iqtisodiyot va moliya vazirligining:

2025-yil 1-yanvardan boshlab O‘zbekiston Respublikasida Internet butunjahon axborot tarmog‘ida tavakkalchilikka asoslangan o‘yinlarni (keyingi o‘rinlarda — internet tarmog‘ida o‘yinlar) tashkil etish faoliyatini va bukmekerlik faoliyatini amalga oshirishga ruxsat etish;

lotereya, internet tarmog‘ida o‘yinlar va bukmekerlikni tashkil etish faoliyatlarini qonunchilikka muvofiq Agentlik tomonidan beriladigan litsenziyalar asosida amalga oshirish haqidagi takliflari ma’qullansin.

2. Belgilansinki:

Agentlik lotereya hamda internet tarmog‘ida o‘yinlarni tashkil etish faoliyatini va bukmekerlik faoliyatini tartibga solish va litsenziyalash bo‘yicha vakolatli organ hisoblanadi (keyingi o‘rinlarda — litsenziyalovchi organ);

Agentlik lotereya hamda internet tarmog‘ida o‘yinlarni tashkil etish faoliyatini va bukmekerlik faoliyatini litsenziyalash tartibini belgilaydi;

davlat organlari va tashkilotlari, mahalliy davlat hokimiyati organlari hamda xayriya jamg‘armalari va tashkilotlari faqat tuziladigan shartnomalarga asosan lotereya tashkilotchilari orqali lotereyalar o‘tkazishga haqli;

litsenziyalar asosida tashkillashtirilgan lotereya, internet tarmog‘idagi o‘yinlar va bukmekerlik garovlarida faqat 18 yoshga to‘lgan O‘zbekiston Respublikasi rezidenti va norezidentlari qatnashishi mumkin;

lotereya va internet tarmog‘ida o‘yinlar, bukmekerlik faoliyati tashkilotchilarining jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurollarini tarqatishni moliyalashtirishga qarshi kurashish to‘g‘risidagi qonunchilik hujjatlariga rioya etishini monitoring va nazorat qilish funksiyalari Agentlik va Bosh prokuratura huzuridagi Iqtisodiy jinoyatlarga qarshi kurashish departamenti tomonidan amalga oshiriladi.

3. 2026-yil 1-iyuldan boshlab uch yil muddatga huquqiy eksperiment tariqasida lotereyalarni tashkil etish, Internet tarmog‘idagi o‘yinlar va bukmekerlik faoliyatini soliqqa tortishning quyidagi tartiblari o‘rnatilsin:

lotereya, internet tarmog‘ida o‘yinlarni tashkil etish faoliyatini yoki bukmekerlik faoliyatini amalga oshirayotgan yuridik shaxslar lotereya, internet tarmog‘ida o‘yinlarni tashkil etish faoliyatidan yoki bukmekerlik faoliyatidan olingan jami daromadidan to‘langan yutuqlar va qaytarilgan stavkalar chegirilgan holda 4 foiz stavkasida aylanmadan olinadigan soliq to‘lovchilari hisoblanishi;

jismoniy shaxslarning Agentlik tomonidan berilgan litsenziyalar asosida o‘tkaziladigan lotereyalar hamda internet tarmog‘idagi o‘yinlardan va bukmekerlik garovidan olingan yutuqlar sifatidagi daromadlari jismoniy shaxslar daromad solig‘i to‘lashdan ozod etilishi.

Agentlik Iqtisodiyot va moliya vazirligi, Soliq qo‘mitasi hamda boshqa manfaatdor vazirlik va idoralar bilan birgalikda 2027-yil 1-yanvarga qadar O‘zbekiston Respublikasining Soliq kodeksiga lotereyalarni tashkil etish, Internet tarmog‘idagi o‘yinlar va bukmekerlik faoliyatini soliqqa tortish mexanizmini belgilashga qaratilgan o‘zgartirish va qo‘shimchalar kiritishni nazarda tutuvchi qonun loyihasini Vazirlar Mahkamasiga kiritsin.

4. Mazkur Farmon talablarini inobatga olgan holda Agentlik manfaatdor vazirlik va idoralar bilan birgalikda:

a) ikki oy muddatda quyidagilarni nazarda tutuvchi hukumat qarori loyihasini:

lotereya hamda internet tarmog‘ida o‘yinlarni va bukmekerlik faoliyatini tashkil etish tartibi, shu jumladan litsenziya talab va shartlarini;

stavkalar va o‘yinchilar yagona davlat registrini yaratish, uni litsenziyalovchi organ tomonidan yuritish tartibini;

b) uch oy muddatda O‘zbekiston Respublikasining “Davlat boji to‘g‘risida”, “Litsenziyalash, ruxsat berish va xabardor qilish tartib-taomillari to‘g‘risida”, “Reklama to‘g‘risida”gi va boshqa qonunlariga o‘zgartirish va qo‘shimchalar kiritishni nazarda tutuvchi qonun loyihasini Vazirlar Mahkamasiga kiritsin.

5. O‘zbekiston Respublikasi Prezidentining va O‘zbekiston Respublikasi Hukumatining ayrim hujjatlariga ilovaga muvofiq o‘zgartirish va qo‘shimchalar kiritilsin.

6. Agentlik manfaatdor idoralar bilan birgalikda uch oy muddatda qonunchilik hujjatlariga ushbu Farmondan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

7. Mazkur Farmon ijrosini nazorat qilish O‘zbekiston Respublikasi Bosh vaziri A.N. Aripov va O‘zbekiston Respublikasi Istiqbolli loyihalar milliy agentligi direktori D.R. Li zimmasiga yuklansin.

1. O‘zbekiston Respublikasi Prezidentining 2017-yil 24-iyuldagi “O‘zbekiston Respublikasida loyiha boshqaruvi tizimini joriy etish chora-tadbirlari to‘g‘risida”gi PF-5120-son Farmonida:

a) 2-bandning uchinchi — oltinchi xatboshilari quyidagi mazmundagi uchinchi — yettinchi xatboshilar bilan almashtirilsin:

“kripto-aktivlar aylanmasi, kapital bozori va sug‘urta bozori sohalarini, elektron tijorat, lotereya hamda Internet butunjahon axborot tarmog‘ida tavakkalchilikka asoslangan o‘yinlarni tashkil etish va bukmekerlik faoliyatlari sohalarida yagona davlat siyosatini ishlab chiqish va amalga oshirish;

kripto-aktivlar aylanmasi va kapital bozori sohalarida investorlarning huquqlari va qonuniy manfaatlariga rioya etilishini ta’minlash;

sug‘urta bozorining professional ishtirokchilarining sug‘urta munosabatlari ishtirokchilarining huquqlari va qonuniy manfaatlarini himoya qilishni ta’minlashga qaratilgan faoliyati ustidan nazoratni amalga oshirish;

jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurollarini tarqatishni moliyalashtirishga qarshi kurashish bo‘yicha choralarni ishlab chiqish va amalga oshirishda ishtirok etish;

davlat boshqaruvi va turli ijtimoiy-iqtisodiy sohalarga ma’lumotlarning taqsimlangan reyestri texnologiyasini va boshqa eng yangi texnologiyalarni joriy etish bo‘yicha loyihalarni tashabbus qilish va ilgari surishga ko‘maklashish”;

b) 3-bandda:

uchinchi xatboshidagi “ikki” so‘zi “uch” so‘zi bilan almashtirilsin;

to‘rtinchi xatboshi quyidagi tahrirda bayon etilsin:

“Agentlik direktori, uning birinchi o‘rinbosari va o‘rinbosarlari maqomi, tibbiy va transport ta’minoti shartlari bo‘yicha tegishli ravishda vazirga, vazirning birinchi o‘rinbosariga va vazir o‘rinbosarlariga tenglashtiriladi”.

2. O‘zbekiston Respublikasi Prezidentining 2020-yil 24-avgustdagi “Litsenziyalash va ruxsat berish tartib-taomillarini tubdan takomillashtirish chora-tadbirlari to‘g‘risida”gi PF-6044-son Farmoniga 5-ilovada:

a) 3 va 8-pozitsiyalar chiqarib tashlansin;

b) 5-pozitsiyaning “Tartib-taomillarni qisqartirish va soddalashtirish chora-tadbirlari” ustuni 2-bandi chiqarib tashlansin.

3. O‘zbekiston Respublikasi Prezidentining 2017-yil 18-martdagi “Moliya organlari faoliyatini yanada takomillashtirish chora-tadbirlari to‘g‘risida”gi PQ-2847-son qarorida:

a) 1-bandda:

o‘ninchi xatboshi quyidagi tahrirda bayon etilsin:

“buxgalterlik hisobi va hisobotining yagona metodologiyasini shakllantirish va amalga oshirish, auditorlik faoliyatini tartibga solish, mamlakatning moliya bozorlarini rivojlantirish bo‘yicha davlat siyosatini amalga oshirishda ishtirok etish”;

o‘n to‘rtinchi xatboshi chiqarib tashlansin;

b) 7-ilovaning rus tilidagi matnida:

2-bandning birinchi xatboshisidagi “straxovaniya,” so‘zi chiqarib tashlansin;

8-bandda:

o‘ninchi xatboshidan “osushestvleniye kontrolya za deyatelnostyu straxovix organizatsiy, napravlennogo na obespecheniye zashiti prav i zakonnix interesov vsex uchastnikov straxovix otnosheniy,” so‘zlari chiqarib tashlansin;

o‘n to‘rtinchi xatboshi chiqarib tashlansin;

9-bandda:

7-kichik bandda:

birinchi xatboshi quyidagi tahrirda bayon etilsin:

“7) v sfere regulirovaniya finansovix rinkov i institutov:”;

beshinchi — o‘n to‘qqizinchi xatboshilar chiqarib tashlansin;

yigirmanchi va yigirma birinchi xatboshilar tegishli ravishda beshinchi va oltinchi xatboshilar deb hisoblansin;

15-kichik bandning ikkinchi-uchinchi xatboshilari quyidagi tahrirda bayon etilsin:

“razrabativayet i utverjdayet v ustanovlennom poryadke pravila vnutrennego kontrolya dlya organizatsiy, okazivayushix lizingovie uslugi, organizatsiy, osushestvlyayushix operatsii s dragotsennimi metallami i dragotsennimi kamnyami i auditorskix organizatsiy, a takje osushestvlyayet monitoring i kontrol za ix soblyudeniyem;

izuchayet, analiziruyet i otsenivayet riski legalizatsii doxodov, poluchennix ot prestupnoy deyatelnosti, finansirovaniya terrorizma i finansirovaniya rasprostraneniya orujiya massovogo unichtojeniya v sfere okazaniya lizingovix uslug, osushestvleniya auditorskoy deyatelnosti, oborota dragotsennix metallov i dragotsennix kamney i prinimayet meri po snijeniyu viyavlennix riskov”;

16-kichik band o‘z kuchini yo‘qotgan deb hisoblansin;

11-bandda:

o‘n to‘qqizinchi va yigirma birinchi xatboshilari chiqarib tashlansin;

yigirmanchi, yigirma ikkinchi — o‘ttiz ikkinchi xatboshilar tegishincha o‘n to‘qqizinchi — o‘ttizinchi xatboshilar deb hisoblansin.

4. O‘zbekiston Respublikasi Prezidentining 2017-yil 27-iyuldagi “O‘zbekiston Respublikasi Istiqbolli loyihalar milliy agentligi faoliyatini tashkil etish to‘g‘risida”gi PQ-3150-son qarorida:

a) 1-band quyidagi tahrirda bayon etilsin:

“1. O‘zbekiston Respublikasi Istiqbolli loyihalar milliy agentligi to‘g‘risidagi nizom ilovaga muvofiq tasdiqlansin”;

b) 2-bandning ikkinchi xatboshisi quyidagi tahrirda bayon etilsin:

“Agentlik tuzilmasi va shtat birliklarini tasdiqlash, Agentlik xodimlarining mehnatiga haq to‘lash shartlarini mustaqil ravishda belgilash”;

v) 3-bandda:

“b” kichik band quyidagi tahrirda bayon etilsin:

“b) Agentlik kripto-aktivlar aylanmasini, kapital bozori va sug‘urta bozorini, elektron tijoratni, lotereya hamda Internet butunjahon axborot tarmog‘ida tavakkalchilikka asoslangan o‘yinlarni tashkil etish va bukmekerlik faoliyatini tartibga solish, shu jumladan litsenziyalash, ruxsat berish va xabardor qilish tartib-taomillari bo‘yicha vakolatli organ hisoblanadi”;

“d” kichik bandning uchinchi xatboshisidagi “litsenziya, ruxsat berish” so‘zlari “litsenziya, ruxsat berish va xabardor qilish” so‘zlari bilan almashtirilsin;

“e” kichik banddan “O‘zbekiston Respublikasi norezidentlariga” so‘zlari chiqarib tashlansin;

“z” kichik band quyidagi tahrirda bayon etilsin:

“z) Agentlik kripto-aktivlar aylanmasi sohasiga texnologiyalarni joriy qilayotgan yuridik shaxslar uchun maxsus tashkiliy-huquqiy sharoit yaratishni nazarda tutuvchi Kripto-aktivlar aylanmasi sohasida tartibga solish maxsus rejimini (“Tartibga solish qumdoni” maxsus rejimi) hamda kapital bozori sohasida “Tartibga solish qumdoni” maxsus huquqiy rejimini ta’minlash tartibini belgilaydi”;

g) 5-bandning uchinchi xatboshisi quyidagi tahrirda bayon etilsin:

“Agentlik kripto-aktivlar aylanmasi, kapital bozori, sug‘urta bozori va elektron tijorat sohalarida, lotereya hamda Internet butunjahon axborot tarmog‘ida tavakkalchilikka asoslangan o‘yinlarni tashkil etish va bukmekerlik faoliyati sohalarida litsenziya, ruxsat berish va xabardor qilish tartib-taomillari va shartlariga rioya etilishi borasida tekshiruvlarni o‘tkazadi, belgilangan tartibda jarima sanksiyalarini qo‘llaydi, shu jumladan, jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurollarini tarqatishni moliyalashtirishga qarshi kurashish sohasidagi qonunchilik hujjatlari talablariga rioya etilmaganligi uchun jarima sanksiyalarini qo‘llaydi”;

d) 1-ilova o‘z kuchini yo‘qotgan deb hisoblansin;

e) 2-ilova quyidagi tahrirda bayon etilsin:

1. Ushbu Nizom O‘zbekiston Respublikasi Istiqbolli loyihalar milliy agentligining (keyingi o‘rinlarda — Agentlik) maqomi, asosiy vazifalari, funksiyalari, huquq va majburiyatlari, faoliyatining tashkiliy asoslarini belgilaydi.

2. Agentlik o‘z faoliyatida O‘zbekiston Respublikasi Prezidentiga hisobdordir.

3. Agentlik yuridik shaxs huquqiga ega davlat muassasasi hisoblanadi, O‘zbekiston Respublikasi Davlat gerbi tasvirlangan va o‘z nomi yozilgan muhr va blankaga, budjet hamda qonunchilikda belgilangan davlat bojlari va boshqa yig‘imlar hisobiga shakllanadigan budjetdan tashqari mablag‘lari bo‘yicha Yagona g‘azna hisobvarag‘ida shaxsiy g‘azna hisobvaraqlariga, grantlar, kreditlar, qarz va homiylik xayriyalari bo‘yicha O‘zbekiston Respublikasi tijorat banklarida hisob raqamlariga ega bo‘ladi.

Agentlik kripto-aktivlar aylanmasini, kapital bozori va sug‘urta bozorini, elektron tijoratni, lotereya hamda Internet butunjahon axborot tarmog‘ida tavakkalchilikka asoslangan o‘yinlarni tashkil etish va bukmekerlik faoliyatini tartibga solish, shu jumladan litsenziyalash, ruxsat berish va xabardor qilish tartib-taomillari bo‘yicha vakolatli organ hisoblanadi.

4. Agentlik o‘z faoliyatida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, ushbu Nizom va boshqa qonunchilik hujjatlariga amal qiladi.

5. Agentlikka yuklatilgan vazifalarni bajarishda davlat organlari, xo‘jalik boshqaruvi organlari, davlat korxonalari va tashkilotlari (keyingi o‘rinlarda — davlat organlari va boshqa tashkilotlar), nodavlat notijorat tashkilotlar, yetakchi loyiha institutlari, ilmiy-ta’lim muassasalari, tadbirkorlik subyektlari, shuningdek, xorijiy davlatlarning O‘zbekiston Respublikasidagi diplomatik vakolatxonalari va konsullik muassasalari, xalqaro tashkilotlar, chet el kompaniyalari va mutaxassislari bilan, jumladan, ish yozishmalarini olib borish, tadbirlarni tashkil etish va hadli kelishuvlarni tuzish orqali o‘zaro hamkorlik qiladi.

6. Agentlikning o‘z vakolatlari doirasida qabul qilgan qarorlari mulkchilik shakllari va idoraviy bo‘ysunishidan qat’i nazar, davlat organlari va boshqa tashkilotlar, xo‘jalik yurituvchi subyektlar, jismoniy shaxslar tomonidan bajarilishi majburiy hisoblanadi.

7. Agentlikning rasmiy nomi:

a) davlat tilida:

to‘liq nomi — O‘zbekiston Respublikasi Istiqbolli loyihalar milliy agentligi, qisqartirilgan nomi — Istiqbolli loyihalar agentligi;

b) ingliz tilida:

to‘liq nomi — National Agency of Perspective Projects of the Republic of Uzbekistan, qisqartirilgan nomi — Perspective Projects Agency;

v) rus tilida:

to‘liq nomi — Natsionalnoye agentstvo perspektivnix proyektov Respubliki Uzbekistan, qisqartirilgan nomi — Agentstvo perspektivnix proyektov.

8. Quyidagilar Agentlikning asosiy vazifalari hisoblanadi:

kripto-aktivlar aylanmasi, kapital bozori va sug‘urta bozori sohalarini, elektron tijorat, lotereya hamda Internet butunjahon axborot tarmog‘ida tavakkalchilikka asoslangan o‘yinlarni tashkil etish va bukmekerlik faoliyatlari sohalarida (keyingi o‘rinlarda — tartibga solinadigan sohalar) yagona davlat siyosatini ishlab chiqish va amalga oshirish;

kripto-aktivlar aylanmasi va kapital bozori sohalarida investorlarning huquqlari va qonuniy manfaatlariga rioya etilishini ta’minlash;

sug‘urta bozorining professional ishtirokchilarining sug‘urta munosabatlari ishtirokchilarining huquqlar va qonuniy manfaatlarini himoya qilishni ta’minlashga qaratilgan faoliyati ustidan nazoratni amalga oshirish;

jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurollarini tarqatishni moliyalashtirishga qarshi kurashish bo‘yicha choralarni ishlab chiqish va amalga oshirishda ishtirok etish;

davlat boshqaruvi va turli ijtimoiy-iqtisodiy sohalarga ma’lumotlarning taqsimlangan reyestri texnologiyasini va boshqa eng yangi texnologiyalarni joriy etish bo‘yicha loyihalarni tashabbus qilish va ilgari surishga ko‘maklashish.

9. Agentlik o‘ziga yuklatilgan vazifalarga muvofiq quyidagi funksiyalarni amalga oshiradi:

a) kripto-aktivlar aylanmasi, kapital bozori va sug‘urta bozori sohalarini, elektron tijorat, lotereya hamda Internet butunjahon axborot tarmog‘ida tavakkalchilikka asoslangan o‘yinlarni tashkil etish va bukmekerlik faoliyatlari sohalarida yagona davlat siyosatini ishlab chiqish va amalga oshirish sohasida:

tartibga solinadigan sohalarda qonunchilikni takomillashtirish va kelgusida rivojlanishning ustuvor yo‘nalishlarini aniqlash borasida takliflarni ishlab chiqadi;

tartibga solinadigan sohalarda davlat dasturlarini va boshqa dasturlarni ishlab chiqadi va ularni amalga oshirishga ko‘maklashadi;

sohalarni huquqiy tartibga solish bo‘yicha normativ-huquqiy hujjatlar loyihalarini ishlab chiqadi;

tartibga solinadigan sohalar masalalariga oid normativ-huquqiy hujjatlar loyihalarini ekspertizadan o‘tkazadi;

tartibga solinadigan sohalarda litsenziyalash, ruxsat berish va xabardor qilish tartib-taomillari tartibini belgilaydi va amalga oshiradi, shuningdek, litsenziya va ruxsat berish talab va shartlariga rioya etilishi yuzasidan nazoratni amalga oshiradi;

mazkur Nizomga ilovaga muvofiq faoliyat olib boradigan Kripto-aktivlar aylanmasi sohasida tartibga solish maxsus rejimini (“Tartibga solish qumdoni” maxsus rejimi) belgilaydi;

tartibga solinadigan sohalarda qoidalar, normalar va standartlarni ishlab chiqadi va tasdiqlaydi;

davlat organlari va boshqa tashkilotlar xodimlarining tartibga solinadigan sohalardagi masalalari bo‘yicha o‘qishlarini tashkil etadi;

ilmiy-ta’lim muassasalari bilan davlat organlari va boshqa tashkilotlar xodimlarini tartibga solinadigan sohalari bo‘yicha tayyorlash masalalarida hamkorlik qiladi;

tartibga solinadigan sohalarda xalqaro hamkorlikni amalga oshiradi;

qimmatli qog‘ozlar bozori, aksiyadorlik jamiyatlari va aksiyadorlarning huquqlarini himoya qilish to‘g‘risidagi qonunchilik hujjatlariga rioya qilinishini nazorat qiladi;

mahalliy kapital bozorining rivojlanish holati va uning professional qatnashchilari haqida, shu jumladan, qonunchilikda nazarda tutilgan ma’lumotlar oshkoraligini ta’minlash orqali investorlar va jamoatchilikni xabardor qiladi;

kapital bozori sohasida “Tartibga solish qumdoni” maxsus huquqiy rejimini ta’minlash tartibini belgilaydi;

qimmatli qog‘ozlar bozori professional ishtirokchilarning mutaxassislarini attestatsiyadan o‘tkazadi va malaka guvohnomalarini beradi;

qimmatli qog‘ozlarni chiqarish va ro‘yxatdan o‘tkazish, ular yuzasidan hisobot berish hamda qimmatli qog‘ozlar egalarining reyestrlarini va qimmatli qog‘ozlarga doir bitimlarni hisobga olish reyestrini yuritish talablarini belgilaydi;

o‘z mablag‘lari yetarli darajada bo‘lishiga doir majburiy normativlarni va qimmatli qog‘ozlarga doir operatsiyalar bo‘yicha tavakkalchiliklarni cheklovchi ko‘rsatkichlarni o‘rnatadi;

qonunchilik hujjatlarini tizimli tahlil qiladi hamda tartibga solinadigan sohalarni takomillashtirish bo‘yicha takliflar tayyorlaydi;

O‘zbekiston Respublikasi Prezidentining topshiriqlari bo‘yicha va o‘z tashabbusiga ko‘ra normativ-huquqiy hujjatlar loyihalarini ishlab chiqadi va ularni ko‘rib chiqish uchun belgilangan tartibda kiritadi;

b) kripto-aktivlar aylanmasi va kapital bozori sohalarida investorlarning huquqlari va qonuniy manfaatlariga rioya etilishini ta’minlash sohasida:

kripto-aktivlar aylanmasi va kapital bozori sohalarida investorlarning huquq va qonuniy manfaatlarini himoya qilish borasida chora-tadbirlar ko‘radi;

kripto-aktivlar aylanmasi va kapital bozori sohalarida qonun buzilishlari aniqlanganda, qonunchilik hujjatlariga muvofiq chora-tadbirlarni qo‘llaydi;

kripto-aktivlar aylanmasi va kapital bozori sohalarining rivojlanish holati to‘g‘risida investorlarni va jamoatchilikni keng xabardor qilishni tashkil etadi, shu jumladan, ommaviy axborot vositalari va (yoki) rasmiy veb-saytida kripto-aktivlar aylanmasi va kapital bozori sohalarining rivojlanish holati yuzasidan doimiy ravishda ma’lumotlarni chop etadi, hamda aholining kripto-aktivlar aylanmasi va kapital bozori sohalarida savodxonligi darajasini oshirish chora-tadbirlarini ko‘radi;

v) sug‘urta bozorining professional ishtirokchilarining sug‘urta munosabatlari ishtirokchilarining huquqlari va qonuniy manfaatlarini himoya qilishni ta’minlashga qaratilgan faoliyati ustidan nazoratni amalga oshirish sohasida:

o‘z vakolati doirasida sug‘urta faoliyati sohasini tartibga solish bo‘yicha normativ-huquqiy hujjatlar loyihalarini ishlab chiqadi va qabul qiladi;

qonunchilikda o‘rnatilgan tartibda, sug‘urta xizmatlari iste’molchilarining huquqlari va qonuniy manfaatlarini himoya qilish choralarini ko‘radi;

sug‘urtalovchilar (qayta sug‘urtalovchilar) va sug‘urta brokerlarining sug‘urta faoliyatini litsenziyalash, sug‘urta bozori sohasida ruxsat etish tartib-taomillari amalga oshiradi hamda litsenziya va ruxsat etish talab va shartlariga rioya etilishi yuzasidan nazoratni amalga oshiradi;

ijro etilishi majburiy bo‘lgan to‘lovga qobiliyatlilik normativlarini hamda ularni aniqlash tartibini, ayrim tavakkalchiliklar bo‘yicha sug‘urtalovchilar (qayta sug‘urtalovchilar) majburiyatlarining yo‘l qo‘yiladigan eng ko‘p hajmi va jami majburiyatlarning yo‘l qo‘yiladigan ko‘p hajmini hisoblab chiqarish uslubini, sug‘urtalovchilarning (qayta sug‘urtalovchilarning) to‘lovga qobiliyatini aks ettiruvchi axborotlarni taqdim etish tartibi va muddatlarini belgilaydi;

sug‘urtalovchilarning (qayta sug‘urtalovchilarning) sug‘urta zaxiralari mablag‘larini shakllantirish hamda joylashtirish tartibi va shartlarini, shuningdek bunday mablag‘larning hisobini yuritish va ular bo‘yicha hisobotlar tuzish tartibini belgilaydi;

sug‘urtalovchining (qayta sug‘urtalovchining), sug‘urta brokerining hamda ular alohida bo‘linmalarining rahbariga va bosh buxgalteriga qo‘yiladigan malaka talablarini belgilaydi;

sug‘urtalovchilar (qayta sug‘urtalovchilar) tomonidan taqdim etiladigan moliyaviy hisobotlarning va ular tomonidan e’lon qilinadigan yillik moliyaviy hisobotning shaklini, shuningdek uni taqdim etish hamda e’lon qilish tartibi va muddatlarini belgilaydi;

sug‘urtalovchilarning (qayta sug‘urtalovchilarning) investitsiya faoliyatini amalga oshirishi va aktuar xizmatlari ko‘rsatishi tartibi va shartlarini belgilaydi;

aktuariy malaka sertifikatini olish uchun o‘quv dasturlarini hamda malaka imtihonlari topshirish tartibini ishlab chiqadi va tasdiqlaydi, mazkur sertifikatni olish huquqi uchun malaka imtihonini o‘tkazadi, qonunchilikda belgilangan tartibda aktuariy malaka sertifikatini beradi, uning amal qilishini tugatadi va uni bekor qiladi;

sug‘urtalovchilarning (qayta sug‘urtalovchilarning) va sug‘urta brokerlarining sug‘urta faoliyatini amalga oshirish huquqini beruvchi litsenziya va sug‘urtalovchini (qayta sug‘urtalovchini) qayta tashkil etishga berilgan ruxsatnomalarning, shuningdek malaka sertifikatiga ega bo‘lgan aktuariylarning reyestrini yuritadi;

qonunchilikka muvofiq sug‘urta bozori professional ishtirokchilarining faoliyatini tekshirishni amalga oshiradi va ularga aniqlangan qoidabuzarliklarni bartaraf etish to‘g‘risida ijro qilinishi majburiy bo‘lgan ko‘rsatmalar kiritadi;

sug‘urta bozorining professional ishtirokchilari tomonidan sug‘urta faoliyati to‘g‘risidagi qonunchilikka rioya etilishini, to‘lovga qobiliyatlilikning belgilangan normativlari va ularning moliyaviy barqarorligining boshqa talablari ta’minlanishini nazorat qiladi;

sug‘urtalovchi (qayta sug‘urtalovchi) tomonidan sug‘urta faoliyati to‘g‘risidagi qonunchilik, shu jumladan belgilangan iqtisodiy normativlar buzilganligi uchun sug‘urtalovchining (qayta sug‘urtalovchining) ustav fondi (ustav kapitali) eng kam miqdorining 0,1 foizigacha miqdorida, belgilangan tartibda jarima soladi;

sug‘urtalovchilar (qayta sug‘urtalovchilar) va sug‘urta brokerlari litsenziyalarining amal qilishini qonunchilikda belgilangan tartibda to‘liq yoki ayrim sug‘urta turlariga (klasslariga) nisbatan to‘xtatib turadi, shuningdek ularning faoliyatini tugatish to‘g‘risida sudga murojaat qiladi;

sug‘urta faoliyatini tartibga solish va uni nazorat qilish borasidagi faoliyat to‘g‘risida yillik hisobotlarni, shuningdek sug‘urta bozorining moliya yili davomidagi faoliyati haqidagi statistik ma’lumotlarni har bir moliya yili tugaganidan keyin olti oy ichida e’lon qiladi;

g) jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurollarini tarqatishni moliyalashtirishga qarshi kurashish bo‘yicha choralarni ishlab chiqish va amalga oshirishda ishtirok etish sohasida:

jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurollarini tarqatishni moliyalashtirishga qarshi kurashish bo‘yicha choralarni ishlab chiqish va amalga oshirishda ishtirok etadi;

tartibga solinadigan sohalarida faoliyatni amalga oshiruvchi shaxslar uchun ichki nazorat qoidalarini belgilangan tartibda ishlab chiqadi va tasdiqlaydi, shuningdek, ularga rioya etilishi ustidan monitoring va nazoratni amalga oshiradi;

jinoiy faoliyatdan olingan daromadlarni legallashtirish, terrorizmni moliyalashtirish va ommaviy qirg‘in qurollarini tarqatishni moliyalashtirish yuzasidan ehtimol tutilgan xavflarni o‘rganadi, tahlil qiladi va baholaydi hamda aniqlangan xavflarni kamaytirishga doir choralar ko‘radi;

belgilangan tartibda jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurollarini tarqatishni moliyalashtirishga qarshi kurashish sohasida xalqaro hamkorlikda ishtirok etadi;

Jinoiy daromadlarni legallashtirishga va terrorizmni moliyalashtirishga qarshi kurashish bo‘yicha Yevroosiyo guruhi to‘g‘risidagi Bitimdan kelib chiquvchi majburiyatlarning bajarilishini ta’minlaydi;

jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurollarini tarqatishni moliyalashtirishga qarshi kurashish to‘g‘risidagi qonunchilik hujjatlari buzilganligi aniqlangan taqdirda, qonunchilik hujjatlariga muvofiq choralar qo‘llaydi;

tartibga solinadigan sohalardagi amalga oshirilgan operatsiyalar to‘g‘risidagi hisobot va ma’lumotlar to‘liqligi va haqqoniyligi ustidan nazoratni amalga oshiradi;

yuklatilgan vazifalarni bajarish maqsadida tartibga solinadigan sohalardagi faoliyatni amalga oshiruvchi shaxslardan beg‘araz shartlar asosida hujjatlar, ma’lumotlar va materiallarni talab qilib oladi;

jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurollarini tarqatishni moliyalashtirishga qarshi kurashish masalalari bo‘yicha maxsus vakolatli davlat organi bilan o‘zaro hamkorlikni amalga oshiradi;

d) davlat boshqaruvi va turli ijtimoiy-iqtisodiy sohalarga ma’lumotlarning taqsimlangan reyestri texnologiyasini va boshqa eng yangi texnologiyalarni joriy etish bo‘yicha loyihalarni tashabbus qilish va ilgari surishga ko‘maklashish sohasida:

davlat organlari va boshqa tashkilotlar bilan ma’lumotlarning taqsimlangan reyestri texnologiyasini joriy etish borasida hamkorlikni amalga oshiradi;

davlat organlari faoliyatiga ma’lumotlarning taqsimlangan reyestri texnologiyasini joriy etishni nazarda tutadigan normativ-huquqiy hujjatlarning va texnik topshiriqlarning loyihalarini kelishadi;

davlat organlari va boshqa tashkilotlar xodimlarining ma’lumotlarning taqsimlangan reyestri texnologiyasini joriy etish borasida professional tayyorgarlik darajasini oshirishda ko‘maklashadi;

ma’lumotlarning taqsimlangan reyestri texnologiyasini ishlab chiqish va joriy etish borasida xorijiy davlatlarning yuqori malakali mutaxassislarini jalb qilishda ko‘maklashadi;

ijtimoiy-iqtisodiy rivojlanish sohalarida ilg‘or xalqaro tajribani o‘rganish asosida ma’lumotlarning taqsimlangan reyestri texnologiyasidan va boshqa eng yangi texnologiyalardan foydalangan holda loyihalarni ishlab chiqishni ta’minlaydi;

iqtisodiyotning turli sohalarida ma’lumotlarning taqsimlangan reyestri texnologiyasidan va boshqa eng yangi texnologiyalardan foydalangan holda loyihalarni amalga oshirish haqidagi takliflarni kiritadi;

davlat hokimiyati organlari, vazirliklar, idoralar, tashkilotlar, biznes hamjamiyatlar, ekspertlar va xalqaro tashkilotlar bilan ijtimoiy-iqtisodiy rivojlanish sohasida ma’lumotlarning taqsimlangan reyestri texnologiyasidan va boshqa eng yangi texnologiyalardan foydalangan holda loyihalarni ishlab chiqish va amalga oshirish masalalari bo‘yicha hamkorlik qiladi.

10. Agentlik quyidagi vakolatlarga egadir:

o‘z vakolatlari doirasida, shu jumladan, boshqa davlat organlari bilan birgalikda davlat organlari va tashkilotlari, jismoniy va yuridik shaxslar uchun majburiy bo‘lgan normativ-huquqiy hujjatlarni qabul qilish;

davlat organlari va boshqa tashkilotlardan Agentlik zimmasiga yuklatilgan vazifalarni bajarish uchun zarur bo‘lgan material va ma’lumotlarni belgilangan tartibda so‘rab olish;

sug‘urta bozorining professional ishtirokchilaridan sug‘urta faoliyati to‘g‘risidagi ma’lumotlarni va sug‘urta faoliyati bilan bog‘liq boshqa ma’lumotlarni belgilangan shaklda olish;

o‘z vakolatlari doirasida qonun buzilishi holatlari yuzasidan jismoniy, shu jumladan, mansabdor shaxslardan yozma tushuntirishlar va ma’lumotlarni olish;

Agentlikning vakolatiga tegishli masalalar bo‘yicha sudga da’vo taqdim etish;

Agentlik zimmasiga yuklatilgan vazifalarni bajarish doirasida davlat organlari va boshqa tashkilotlar, nodavlat notijorat tashkilotlar, yetakchi loyiha institutlari, ilmiy-ta’lim muassasalari, shuningdek, xalqaro tashkilotlar, chet el kompaniyalarining yuqori malakali xodimlarini va mutaxassislarni jalb qilish;

tartibga solinadigan sohalarda xorijiy investitsiyalarni jalb qilish bilan bog‘liq tadbirlarni amalga oshirish;

xorijiy davlatlarning O‘zbekiston Respublikasidagi diplomatik vakolatxonalari va konsullik muassasalari, xalqaro tashkilotlar, chet el kompaniyalari bilan ish yozishmalarini olib borish, tadbirlarni tashkil etish va hadli kelishuvlarni tuzish;

belgilangan tartibda noshirlik faoliyatini amalga oshirish, axborot materiallari, davriy nashrlar va boshqa bosma mahsulotlarni chiqarish hamda tarqatish;

O‘zbekiston Respublikasi Davlat budjetidan bo‘lmagan mablag‘lar hisobiga xarid qilingan va o‘z balansida hisobi yuritilgan mol-mulkni, shu jumladan, ko‘chmas mulkni, mustaqil ravishda hisobdan chiqarish yoki boshqa tarzda boshqarish;

homiylik xayriyalari, grantlar, kreditlar va qarzlar sifatida qabul qilingan, Kripto-aktivlar aylanmasi sohasida innovatsion texnologiyalarni o‘rganish va sinovdan o‘tkazish bo‘yicha maxsus laboratoriya faoliyati davomida olingan, shuningdek, sud qaroriga asosan davlat foydasiga o‘tkazilgan kripto-aktivlarni to‘g‘ridan-to‘g‘ri shartnomalar asosida milliy kripto-birjada sotish kunida shakllangan kurs bo‘yicha sotish;

o‘z vakolati doirasida litsenziya, ruxsat berish va xabardor qilish tartib-taomillari talab va shartlariga hamda jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurollarini tarqatishni moliyalashtirishga qarshi kurashish sohasidagi qonunchilik hujjatlari talablariga rioya etilishi borasida tekshiruvlar o‘tkazish va natijasi bo‘yicha qonunchilik hujjatlariga muvofiq choralar ko‘rish;

o‘z vakolati doirasida qonun buzilishi holatlari yuzasidan ma’muriy huquqbuzarliklar to‘g‘risida bayonnomalar tuzish va sudga yuborish;

aniqlangan qonun buzilishi holatlari va Agentlik vakolatiga kiradigan boshqa masalalar bo‘yicha davlat organlari va boshqa tashkilotlarga ogohlantirish, xulosa va ijro uchun majburiy bo‘lgan ko‘rsatmalar kiritish;

Agentlik vakolatiga kiradigan masalalar bo‘yicha davlat organlari va boshqa tashkilotlar mutaxassislarini jalb qilib, belgilangan tartibda yig‘ilishlar o‘tkazish;

tartibga solinadigan sohalari bo‘yicha xalqaro tashkilotlarda mamlakat manfaatlarini ifoda etish hamda belgilangan tartibda va xalqaro huquq normalariga muvofiq boshqa davlatlarning vakolatli tashkilotlari, shuningdek, ilmiy institutlari bilan hamkorlik to‘g‘risida shartnomalar tuzish.

Agentlik qonunchilik hujjatlariga muvofiq boshqa vakolatlarga ham ega bo‘lishi mumkin.

11. Agentlik o‘ziga yuklangan vazifalar va funksiyalarning samarali bajarilishi uchun javob beradi.

12. Agentlikka O‘zbekiston Respublikasi Prezidenti tomonidan lavozimga tayinlanadigan va lavozimdan ozod etiladigan direktor rahbarlik qiladi.

Agentlik direktori O‘zbekiston Respublikasi Prezidenti bilan kelishilgan holda Agentlik direktori tomonidan lavozimga tayinlanadigan va lavozimdan ozod etiladigan uch nafar o‘rinbosarga, shu jumladan birinchi o‘rinbosarga ega bo‘ladi.

Agentlik direktori, uning birinchi o‘rinbosari va o‘rinbosarlari maqomi, tibbiy va transport ta’minoti shartlari bo‘yicha tegishli ravishda vazirga, vazirning birinchi o‘rinbosariga va vazir o‘rinbosarlariga tenglashtiriladi.

13. Agentlik xodimlari Agentlik direktori tomonidan lavozimga tayinlanadi va lavozimdan ozod etiladi.

14. Agentlik xodimlari mehnatiga haq to‘lash shartlari Agentlik direktori tomonidan belgilanadi.

Agentlikda Xizmatchilarning asosiy lavozimlari va ishchilar kasblari klassifikatori hamda Mehnatga haq to‘lash bo‘yicha yagona tarif setkasining tarif koeffitsiyentlarini qo‘llash tavsiyaviy tusga ega.

15. Quyidagilar:

grantlar, kreditlar va qarzlar, shu jumladan, kripto-aktivlar;

qonunchilik hujjatlarda belgilangan miqdordagi Agentlik tomonidan amalga oshiriladigan litsenziya, ruxsat berish va xabardor qilish tartib-taomillaridan ajratmalar;

jismoniy va yuridik shaxslarning, shu jumladan, chet el jismoniy va yuridik shaxslarining homiylik xayriyalari, shu jumladan, kripto-aktivlar;

yuridik shaxslar ustav fondi (kapitali)da Agentlikka tegishli aksiyalar (ulushlar, paylar) bo‘yicha qonunchilikda belgilangan miqdorda olinadigan daromadlar;

davlat-xususiy sheriklik shartlarida loyihalarni amalga oshirishdan olinadigan daromadlar;

Agentlikning vaqtincha bo‘sh turgan mablag‘larini banklarga joylashtirishdan olinadigan daromadlar;

qonunchilik hujjatlarida taqiqlanmagan boshqa daromadlar Agentlik faoliyatini moliyalashtirish manbalari hisoblanadi.

16. Agentlik direktori:

Agentlik faoliyatiga umumiy rahbarlikni amalga oshiradi hamda Agentlikka yuklatilgan vazifa va funksiyalarning bajarilishi bo‘yicha shaxsan javob beradi;

Agentlikning shtatlar jadvali va xarajatlar smetasini tasdiqlaydi;

Agentlik tuzilmasi va shtatlar birligini tasdiqlaydi;

Agentlik xodimlari mehnatiga haq to‘lash shartlarini belgilaydi;

Agentlikning tarkibiy tuzilmalari hamda Kripto-aktivlar aylanmasi sohasida innovatsion texnologiyalarni o‘rganish va sinovdan o‘tkazish bo‘yicha maxsus laboratoriya to‘g‘risidagi nizomlarni tasdiqlaydi;

Agentlik xodimlarining lavozim vazifalarini tasdiqlaydi;

Agentlik xodimlarini belgilangan tartibda lavozimga tayinlaydi va lavozimdan ozod qiladi;

chet el davlatlari vakolatli organlari, xalqaro tashkilotlar, xorijiy ilmiy-ta’lim muassasalari va kompaniyalari bilan hamkorlik to‘g‘risida kelishuvlar va boshqa shartnomalar tuzadi;

o‘z vakolati doirasida Agentlik xodimlari tomonidan bajarilishi majburiy bo‘lgan buyruqlar, qarorlar va farmoyishlar chiqaradi hamda ko‘rsatmalar beradi.

1. Ushbu Nizom Kripto-aktivlar aylanmasi sohasidagi tartibga solish maxsus rejimining (“Tartibga solish qumdoni” maxsus rejimi) umumiy qoidalarini belgilaydi.

2. Kripto-aktivlar aylanmasi sohasidagi tartibga solish maxsus rejimi (“Tartibga solish qumdoni” maxsus rejimi) deganda kripto-aktivlar aylanmasi sohasidagi texnologiyalarni (keyingi o‘rinlarda — tajriba-sinov loyihalari) joriy etayotgan yuridik shaxslar uchun alohida tashkiliy-huquqiy shart-sharoitlar yaratish, tajriba-sinov loyihalarini sinovdan o‘tkazish va amaliyotga joriy etish jarayonida yuzaga keladigan huquqiy munosabatlarda yengillik yaratish tushuniladi (keyingi o‘rinlarda — maxsus rejim).

3. Maxsus rejim doirasida O‘zbekiston Respublikasi hududida kripto-aktivlardan to‘lov vositasi sifatida foydalanish yoki to‘lovni qabul qilish bilan bog‘liq loyihalarni amalga oshirish taqiqlanadi.

4. Maxsus rejimni taqdim etish tartibi O‘zbekiston Respublikasi Istiqbolli loyihalar milliy agentligi (keyingi o‘rinda — Agentlik) tomonidan tasdiqlanadi.

5. Maxsus rejimni taqdim etishning asosiy maqsadlari quyidagilardan iborat:

kripto-aktivlar aylanmasi sohasidagi yangi texnologiyalarni sinovdan o‘tkazish va tajriba tariqasida amalga oshirish uchun maydoncha yaratish;

amaldagi talablarga javob bermaydigan me’yorlar aniqlangan taqdirda, yangi tartibga solish mexanizmlarini shakllantirish va sinovdan o‘tkazish;

kripto-aktivlar aylanmasi sohasidagi zamonaviy texnologiyalarni, shu jumladan, investitsiyalarni jalb qilish maqsadida tokenlarni chiqarish yuzasidan tajriba-sinov loyihalarini amalga oshirishda ko‘maklashish;

kripto-aktivlar aylanmasi sohasidagi mahsulotlar va xizmatlar turlarini, shu jumladan, eksportga mo‘ljallangan yechimlarni kengaytirish;

kripto-aktivlar aylanmasi sohasidagi yangi texnologiyalarni joriy etish jarayonlarida tegishli nazoratni ta’minlash;

maxsus rejim doirasida o‘tkazilgan tajribalar asosida yangi tartibga solish uslublarini ishlab chiqish hamda normativ-huquqiy bazani takomillashtirish;

respublika bozoriga kripto-aktivlar aylanmasi sohasidagi yangi texnologiyalarni olib chiqish muddatini va sarf-xarajatlarni qisqartirish;

kripto-aktivlar aylanmasi sohasidagi tadqiqotlarni tashkil qilish va o‘tkazish hamda tahliliy materiallarni tayyorlash.

6. Agentlik:

maxsus rejimni taqdim etish, ishtirokchilarni maxsus rejimda ro‘yxatdan o‘tkazish tartibini, ular faoliyatiga qo‘yiladigan talablarni, tajriba-sinov loyihalarini amalga oshirish doirasida ularni qo‘llab-quvvatlash chora-tadbirlarini belgilovchi normativ-huquqiy hujjatlarni, shu jumladan, tegishli vakolatli organlar bilan maslahatlashuvlar o‘tkazgan holda qonunosti hujjatlarining tegishli normalarini tajriba-sinov loyihalarini amalga oshirish muddatida istisno qilish haqida qarorlar qabul qiladi;

maxsus rejim ishtirokchilarini ro‘yxatdan o‘tkazadi;

maxsus rejim ishtirokchilari tomonidan amalga oshirilayotgan ishlarning o‘z vaqtida bajarilishini tizimli nazorat qiladi;

tegishli vakolatli davlat organi bilan tuzilgan shartnomalar asosida maxsus rejim ishtirokchilari tomonidan shaxsga doir egasizlashtirilgan ma’lumotlarni qayta ishlash tartibi va shartlarini, shuningdek, ularga qo‘yiladigan talablarni belgilaydi;

maxsus rejim ishtirokchilarini tajriba-sinov loyihalari muddati davomida tashkiliy-huquqiy, konsultativ qo‘llab-quvvatlaydi.

7. Agentlikning o‘z vakolatlari doirasida qabul qilgan qarorlari mulkchilik shakllari va idoraviy bo‘ysunishidan qat’i nazar, davlat va xo‘jalik boshqaruvi organlari, mahalliy davlat hokimiyati organlari, davlat korxonalari va tashkilotlari, xo‘jalik yurituvchi subyektlar, jismoniy shaxslar tomonidan bajarilishi majburiy hisoblanadi.

8. Maxsus rejim ishtirokchilari belgilangan tartibda ro‘yxatdan o‘tganlaridan so‘ng tajriba-sinov loyihalarini kripto-aktivlar aylanmasi sohasida litsenziya yoki ruxsat etish xususiyatiga ega hujjatlarni olmasdan amalga oshiradi.

9. Maxsus rejim ishtirokchilarining faoliyati, shuningdek, ularning tajriba-sinov loyihalarini amalga oshirish doirasida boshqa subyektlar bilan tuzilgan shartnomaviy munosabatlari Agentlikning normativ-huquqiy hujjatlari bilan belgilanadigan huquqiy rejimlar bilan tartibga solinadi.

Maxsus rejim ishtirokchilarining O‘zbekiston Respublikasi rezidentlari yoki norezidentlari — subyektlar bilan xizmat ko‘rsatish bo‘yicha tuziladigan shartnomalar (ofertalar, bitimlar)ning maksimal qiymati, shuningdek, maxsus rejimda amalga oshiriladigan tajriba-sinov loyihalari doirasida mijozlarning cheklangan soni Agentlik bilan kelishilishi shart.

10. Maxsus rejimda tajriba-sinov loyihalarini amalga oshirish doirasida qonunchilik hujjatlari bilan belgilangan imtiyozlar va preferensiyalar tatbiq etiladi.

11. Tajriba-sinov loyihalarini maxsus rejim doirasida amalga oshirish muddati uch yildan oshmasligi lozim.

Belgilangan muddat o‘tgach Agentlik tajriba-sinov loyihalarini maxsus rejim doirasidan chiqarish maqsadida amaldagi qonunchilik hujjatlariga o‘zgartirish va qo‘shimchalar kiritish hamda O‘zbekiston Respublikasining butun hududida (tajriba-sinov loyihalarini amalga oshirish natijalari ijobiy baholangan taqdirda) tegishli munosabatlarni tartibga solish uchun tegishli normalarni tarqatish yoxud tegishli asoslarni ko‘rsatgan holda tajriba-sinov loyihasini tugatish to‘g‘risida qaror qabul qiladi”.

5. O‘zbekiston Respublikasi Prezidentining 2022-yil 17-yanvardagi “Kapital bozorini qo‘llab-quvvatlashning samarali mexanizmlarini joriy etishga doir qo‘shimcha chora-tadbirlar to‘g‘risida”gi PQ-90-son qarorida:

a) 2-band quyidagi tahrirda bayon etilsin:

“2. Shunday tartib o‘rnatilsinki, unga muvofiq:

aksiyadorlar umumiy yig‘ilishi tomonidan jamiyat aksiyalarini fond birjasining birja kotirovka varag‘idan chiqarish to‘g‘risida qaror qabul qilinganda, ushbu jamiyat ovoz beruvchi aksiyalarining egalari bo‘lgan aksiyadorlarga o‘zlariga tegishli aksiyalarning jamiyat tomonidan qaytarib sotib olinishini talab qilish huquqi beriladi;

qimmatli qog‘ozlarning birjadan tashqari uyushgan savdosida qimmatli qog‘ozlarga doir bitimlar tuzilganda sotuvchi (emitent bundan mustasno) tomonidan foyda solig‘i va daromad solig‘i o‘rniga bitim summasining 0,3 foizi miqdorida yig‘im O‘zbekiston Respublikasi Istiqbolli loyihalar milliy agentligiga to‘lanadi”;

b) 3-bandning ikkinchi xatboshisi quyidagi tahrirda bayon etilsin:

“Davlat aktivlarini xususiylashtirish va xususiylashtirish jarayonlarini muvofiqlashtirish davlat komissiyasiga Davlat aktivlarini boshqarish agentligi, Iqtisodiyot va moliya vazirligi va O‘zbekiston Respublikasi Istiqbolli loyihalar milliy agentligining asoslantirilgan takliflariga muvofiq, shu jumladan, bozor holati va anderrayterlar xulosalarini inobatga olib, O‘zbekiston Respublikasi Prezidenti qarorlariga asosan birlamchi (IPO) va (yoki) ikkilamchi (SPO) ommaviy taklif etiladigan aksiyalar paketining hajmini va savdoga chiqarish muddatini belgilash, ularning ro‘yxatiga o‘zgartirish va qo‘shimchalar kiritish vakolati berilsin”.

6. Vazirlar Mahkamasining 2007-yil 16-avgustdagi “Qimor o‘yinlarini tashkil etish va o‘tkazishni yanada tartibga solish chora-tadbirlari to‘g‘risida”gi 176-son qarorida:

a) 1-bandda:

ikkinchi xatboshidagi “tirajli, bir lahzali va raqamli” so‘zlari “O‘zbekiston Respublikasi qonunchiligiga muvofiq tashkil etiladigan Internet butunjahon axborot tarmog‘idagi tavakkalchilikka asoslangan o‘yinlar, bukmekerlik faoliyati va” so‘zlari bilan almashtirilsin;

uchinchi xatboshi “, mazkur faoliyatni O‘zbekiston Respublikasi qonunchiligiga muvofiq tashkil etish hollari bundan mustasno” so‘zlari bilan to‘ldirilsin;

b) ilovaning 2, 3 va 4-bandlari o‘z kuchini yo‘qotgan deb hisoblansin.