So‘nggi yillarda oliy ta’lim muassasalariga kirish test sinovlarini topshiruvchi abituriyentlar sonining oshib borishi yiliga o‘rtacha 10 foizni tashkil etmoqda. Xususan, 2016-yilda 663 ming, 2017-yilda 729 mingdan ortiq abituriyentlar oliy ta’lim muassasalariga hujjat topshirgan. Tahlillarga ko‘ra, 2018-yilda oliy ta’lim muassasalariga 810 mingdan ortiq abituriyentlarning hujjat topshirishi kutilmoqda.

Abituriyentlar sonining keskin o‘sishi tegishli ravishda test sinovlari jarayoniga davlat boshqaruvi organlari bilan kelishilgan holda jalb etilayotgan nazoratchilar soni va test materiallarini sifatli tayyorlash bilan bog‘liq ishlar hajmi ortib borishiga sabab bo‘lmoqda.

Test sinovlari jarayoniga jalb etilayotgan ishtirokchilar soni va test materiallarini sifatli tayyorlash bilan bog‘liq ish hajmining ortib borishi tanlangan bino va auditoriyalarning jihozlanishi belgilangan talablarga javob bermasligiga, binolar oliy ta’lim muassasalarida tashkil etilgan bosh shtabdan uzoq masofada va tarqoq joylashishiga olib keldi. Buning natijasida test sinovlarini nazorat qilish sifatining tushib ketishi, amaldagi tartibda test sinovlarini o‘tkazishda qator muammolar yuzaga kelishi kuzatildi.

O‘zbekiston Respublikasi Prezidentining “Respublika oliy ta’lim muassasalari bakalavriatiga kirish test sinovlarini o‘tkazish tartibini takomillashtirish to‘g‘risida” 2017-yil 16-noyabrdagi PQ-3389-son qarori bilan 2018/2019 o‘quv yilidan boshlab kirish test sinovlarining ochiqligi va shaffofligini ta’minlash, ularni katta sig‘imdagi binolarda videokuzatuvlar orqali keng jamoatchilikka onlayn rejimda kuzatib borish imkoniyatini yaratgan holda o‘tkazish, test sinovlari natijalarini test o‘tkazilgan kunning ertasiga rasmiy veb-saytda e’lon qilish belgilandi.

Test sinovlari bilan bog‘liq bo‘lgan ishlarni sifatli, o‘z vaqtida va samarali amalga oshirish O‘zbekiston Respublikasi Vazirlar Mahkamasi huzuridagi Davlat test markazining (keyingi o‘rinlarda Davlat test markazi deb ataladi) vazifalari va funksiyalarini, tashkiliy tuzilmasini qayta ko‘rib chiqishni, shuningdek, uning hududlardagi bo‘limlarini tashkil etishni taqozo etmoqda.

Davlat test markazining faoliyatini yanada takomillashtirish va unga yuklangan vazifalarning ijrosini yuqori darajada ta’minlash maqsadida Vazirlar Mahkamasi qaror qiladi:

1. Davlat test markazi ta’lim muassasalariga o‘qishga qabul qilishda test sinovi orqali tanlab olishga oid davlat siyosatini amalga oshiruvchi yagona vakolatli davlat boshqaruvi organi deb hisoblansin.

2. Quyidagilar Davlat test markazining asosiy vazifalari etib belgilansin:

test sinovlarini tashkil etish, o‘tkazish, natijalarini tahlil etish va e’lon qilish;

test texnologiyalarini rivojlantirish, pedagogik o‘lchov vositalarini takomillashtirish;

umumta’lim fanlarini bilish darajasini baholashning milliy test tizimini rivojlantirish;

rahbar kadrlar hamda mas’ul lavozimlarga tayinlanadigan shaxslarning davlat tilini bilish darajasini aniqlash va ularga davlat tilini bilish bo‘yicha daraja sertifikatini berish.

3. Davlat test markazining markaziy apparati tuzilmasida Test sinovlarini tashkil etish va muvofiqlashtirish bosh boshqarmasi, Test sinovlarining kompyuter tahlili va axborotlashtirish boshqarmasi hamda uning Qoraqalpog‘iston Respublikasi va viloyatlardagi bo‘limlari tashkil etilsin.

4. Quyidagilar:

O‘zbekiston Respublikasi Vazirlar Mahkamasi huzuridagi Davlat test markazining tuzilmasi 1-ilovaga muvofiq;

O‘zbekiston Respublikasi Vazirlar Mahkamasi huzuridagi Davlat test markazi to‘g‘risidagi nizom 2-ilovaga muvofiq tasdiqlansin.

Davlat test markazi direktoriga, zarur hollarda, tuzilmaga xodimlarning belgilangan umumiy cheklangan soni doirasida o‘zgartirishlar kiritish, shuningdek, markaz faoliyatini rivojlantirish jamg‘armasi mablag‘lari hisobidan qo‘shimcha shtat birliklarini joriy etish huquqi berilsin.

5. O‘zbekiston Respublikasining Davlat budjeti mablag‘lari, budjetdan tashqari mablag‘lar, abituriyentlardan test sinovlarida ishtirok etish uchun undiriladigan yig‘im va qonun hujjatlarida taqiqlanmagan boshqa manbalar Davlat test markazi faoliyatini moliyalashtirishning asosiy manbalari etib belgilansin.

6. Belgilansinki:

O‘zbekiston Respublikasi Moliya vazirligi Davlat test markaziga 5 ta, shu jumladan, 3 ta biriktirilgan, 1 ta navbatchi va 1 ta maxsus avtotransport vositasini saqlash uchun limit ajratadi;

Davlat test markazi Toshkent shahri, Yunusobod tumani, Bog‘ishamol ko‘chasi, 12-uy manzilida joylashadi.

7. Qoraqalpog‘iston Respublikasi Vazirlar Kengashi va viloyatlar hokimliklari bir oy muddatda Davlat test markazining bo‘limlari uchun hudud markazlarida joylashgan, kommunikatsiya tizimlariga ega bo‘lgan binolardan 3 tadan alohida xona ajratsin hamda ularning zarur moddiy-texnika vositalari bilan to‘liq jihozlanishini ta’minlasin.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari 2023-yil 1-yanvarga qadar respublikaning barcha hududlarida Davlat test markaziga tegishli namunaviy tipdagi pavilyonlarning qurilishi uchun belgilangan tartibda yer uchastkalari ajratilishi hamda 2023-yil 1-iyunga qadar mazkur pavilyonlar qurib bitkazilishi va foydalanishga topshirilishini ta’minlasin.

8. Davlat test markazi va boshqa manfaatdor vazirliklar va idoralar bir oy muddatda o‘zlari tomonidan qabul qilingan normativ-huquqiy hujjatlarni ushbu qarorga muvofiqlashtirsinlar.

9. Vazirlar Mahkamasining “O‘zbekiston Respublikasi Vazirlar Mahkamasi huzuridagi Davlat test markazi faoliyatini yanada takomillashtirish to‘g‘risida” 2017-yil 17-iyuldagi 508-son qarori (O‘zbekiston Respublikasi QHT, 2017-yil, 29-son, 697-modda) o‘z kuchini yo‘qotgan deb hisoblansin.

10. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari Q.V. Akmalov va O‘zbekiston Respublikasi Vazirlar Mahkamasi huzuridagi Davlat test markazi direktori M.M. Karimov zimmasiga yuklansin.

1. Ushbu Nizom O‘zbekiston Respublikasi Vazirlar Mahkamasi huzuridagi Davlat test markazining (keyingi o‘rinlarda Davlat test markazi deb ataladi) maqomi, asosiy vazifalari, funksiyalari, huquqlari, majburiyatlari va javobgarligi, faoliyatini tashkil etish hamda hisobot berish tartibini belgilaydi.

2. Davlat test markazi ta’lim muassasalariga o‘qishga qabul qilishda test sinovi orqali tanlab olishga oid davlat siyosatini ishlab chiqish va amalga oshirish hamda test sinovlarini o‘tkazish tartibiga rioya etilishi ustidan nazorat qilish uchun javob beradigan vakolatli davlat boshqaruvi organi hisoblanadi.

3. Davlat test markazi o‘z faoliyatida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek, ushbu Nizomga va boshqa qonun hujjatlariga amal qiladi.

4. Davlat test markazining o‘z vakolatlari doirasida qabul qilingan qarorlari davlat va xo‘jalik boshqaruvi organlari, mahalliy davlat hokimiyati organlari, boshqa tashkilotlar va ularning mansabdor shaxslari, shuningdek, fuqarolar tomonidan bajarilishi majburiydir.

5. Davlat test markazi tizimiga uning markaziy apparati va Qoraqalpog‘iston Respublikasi va viloyatlarda joylashgan bo‘limlari kiradi.

6. Davlat test markazi yuridik shaxs hisoblanadi, O‘zbekiston Respublikasining Davlat gerbi tasviri tushirilgan va o‘z nomi davlat tilida yozilgan muhrga hamda blankalarga, mustaqil balansga, O‘zbekiston Respublikasi Moliya vazirligining G‘aznachiligida shaxsiy g‘azna hisobvaraqlariga, bank hisob raqamlariga, shu jumladan, chet el valyutasidagi bank hisob raqamlariga ega bo‘ladi.

Davlat test markazining Qoraqalpog‘iston Respublikasi va viloyatlardagi bo‘limlari yuridik shaxs hisoblanmaydi.

7. Davlat test markazining rasmiy nomi:

davlat tilida:

to‘liq nomi — O‘zbekiston Respublikasi Vazirlar Mahkamasi huzuridagi Davlat test markazi, qisqartmasi — DTM;

rus tilida:

to‘liq nomi — Gosudarstvenniy sentr testirovaniya pri Kabinete Ministrov Respubliki Uzbekistan, qisqartmasi — GST;

ingliz tilida:

to‘liq nomi — State test center under the Cabinet of Ministers of the Republic of Uzbekistan, qisqartmasi — STC.

8. Quyidagilar Davlat test markazining asosiy vazifalari hisoblanadi:

1) test sinovlarini tashkil etish, o‘tkazish, natijalarini tahlil etish va e’lon qilish;

2) test texnologiyalarini rivojlantirish, pedagogik o‘lchov vositalarini takomillashtirish;

3) umumta’lim fanlarini bilish darajasini baholashning milliy test tizimini rivojlantirish;

4) rahbar kadrlar hamda mas’ul lavozimlarga tayinlanadigan shaxslarning davlat tilini bilish darajasini aniqlash va ularga davlat tilini bilish bo‘yicha daraja sertifikatini berish.

9. Davlat test markazi o‘ziga yuklangan vazifalarga muvofiq quyidagi funksiyalarni amalga oshiradi:

1) test sinovlarini tashkil etish, o‘tkazish, natijalarini tahlil etish va e’lon qilish sohasida:

ta’lim muassasalariga o‘qishga qabul qilish bo‘yicha test sinovi orqali tanlab olish tartiblarini ishlab chiqish;

bino va inshootlarni test sinovlarini o‘tkazish uchun jihozlash borasida qo‘yiladigan talablarni tegishli vazirliklar va idoralar bilan ishlab chiqish;

test sinovi ishtirokchilari bankini shakllantirish, test sinovini o‘tkazish tartibi bo‘yicha ular uchun amaliy seminarlar tashkil qilish;

manfaatdor vazirliklar va idoralar hamda ta’lim muassasalari bilan hamkorlikda test topshiruvchilar haqida ma’lumotlar bankini shakllantirish, ularning yo‘nalishlar va guruhlar bo‘yicha taqsimotini amalga oshirish;

amaldagi va rivojlangan mamlakatlar tajribasi asosida test sinovlarini tashkil etishni takomillashtirib borish;

test topshiruvchilar uchun test sinovi tartibi bo‘yicha ko‘rsatmalar ishlab chiqish;

test sinovlarining shaffofligini ta’minlash uchun test sinovlari ishtirokchilarini belgilangan vazifalariga ko‘ra guruhlarga taqsimlash;

test sinovlarining belgilangan tartib va qoidalar asosida o‘tkazilishini nazorat qilish;

test sinovlari nazoratini amalga oshiruvchi mas’ul shaxslarning bilim, ko‘nikma va malakasini shakllantiruvchi dastur ishlab chiqish, rivojlangan mamlakatlar tajribasi asosida takomillashtirib borish;

test sinovlarini tashkil etish va o‘tkazish bo‘yicha o‘quv-metodik qo‘llanmalarni ishlab chiqish;

test sinovlari nazoratini amalga oshiruvchi mas’ul shaxslarning bilim, ko‘nikma va malakasini shakllantiruvchi amaliy seminarlar tashkil qilish hamda metodik qo‘llanmalarni yaratish va chop etish.

test topshiriqlari asosida ko‘p variantli savollar kitobini shakllantirish hamda ularning maxfiyligini ta’minlagan holda nashr qilish;

test sinovlarida ishlatiladigan javoblar varaqalariga ishlov berish, tekshirish;

manfaatdor vazirliklar va idoralar bilan birgalikda test sinovlari natijalarini baholash mezonlarini ishlab chiqish va tasdiqlash;

test sinovi natijalarini hisoblash, har xil shakllarda tahlil qilish va natijalarni e’lon qilish;

buyurtmachilarning buyurtmanomalariga muvofiq test sinovlarini o‘tkazish, to‘lov normativlarini ishlab chiqish va belgilangan tartibda tasdiqlash;

2) test texnologiyalarini rivojlantirish, pedagogik o‘lchov vositalarini takomillashtirish sohasida:

yuqori malakali mutaxassislardan iborat umumta’lim va maxsus fanlar ekspertlari haqidagi ma’lumotlar bankini shakllantirish;

pedagogik o‘lchov vositalarini ishlab chiqish va ekspertizadan o‘tkazish talablari bo‘yicha metodik ko‘rsatmalarni ishlab chiqish, ekspertlar uchun testologiya asoslari bo‘yicha seminarlar tashkil etish;

davlat ta’lim standartlariga muvofiq bo‘lgan fanlar bo‘yicha turli xil murakkablik darajasidagi test topshiriqlarini ishlab chiqish, ular bosqichma-bosqich takomillashtirib borilishini tashkil etish;

amaldagi va rivojlangan mamlakatlarning tajribasini o‘rganish asosida test topshiriqlari bankini shakllantirish texnologiyasini takomillashtirish;

test topshiriqlari bankini shakllantirish sohasida xalqaro hamkorlikni amalga oshirish;

test topshiriqlari maxfiyligini saqlash chora-tadbirlari kompleksini amalga oshirish;

manfaatdor vazirliklar va idoralar hamda ta’lim muassasalari bilan hamkorlikda test topshiriqlari bankini shakllantirish;

pedagogik o‘lchov vositalarini takomillashtirish bo‘yicha mutaxassislar uchun o‘quv seminarlari tashkil etish;

3) umumta’lim fanlarini bilish darajasini baholashning milliy test tizimini rivojlantirish sohasida:

xalqaro e’tirof etilgan baholash standartlari asosida umumta’lim fanlari bo‘yicha test topshiriqlari tuzilmasini ishlab chiqish va sinovdan o‘tkazish;

umumta’lim fanlarini bilish va egallash darajasini aniqlash bo‘yicha xalqaro e’tirof etilgan baholash standartlari talablariga muvofiq to‘lov asosida test sinovlarini o‘tkazish;

rivojlangan mamlakatlarning tajribasiga tayangan holda umumta’lim fanini bilish ko‘nikmalarini baholash mezonlarini ishlab chiqish va sinovdan o‘tkazish;

oylik ish haqiga ustama belgilangan umumta’lim fanlari o‘qituvchilarini ko‘p komponentli test sinovlaridan o‘tkazish;

umumta’lim fanlarini bilish darajasiga davlat namunasidagi sertifikatni berish;

umumta’lim fanlaridan test sinovlaridan o‘tuvchi shaxslar uchun o‘quv-metodik qo‘llanmalarni ishlab chiqish va nashr qilish;

rivojlangan mamlakatlar tajribasini o‘rganish asosida test sinovlari texnologiyasini takomillashtirish;

test materiallarini ishlab chiqishda hamda ulardan foydalanishda ta’lim muassasalariga va boshqa muassasalarga metodik yordam ko‘rsatish.

4) rahbar kadrlar hamda mas’ul lavozimlarga tayinlanadigan shaxslarning davlat tilini bilish darajasini aniqlash va ularga davlat tilini bilish bo‘yicha daraja sertifikatini berish sohasida:

xalqaro e’tirof etilgan baholash standartlari asosida rahbar kadrlar hamda mas’ul lavozimlarga tayinlanadigan shaxslarning davlat tilini bilish bo‘yicha test topshiriqlari tuzilmasini ishlab chiqish va sinovdan o‘tkazish;

rahbar kadrlar hamda mas’ul lavozimlarga tayinlanadigan shaxslarning davlat tilini bilish va egallash darajasini aniqlash bo‘yicha xalqaro e’tirof etilgan baholash standartlari talablariga muvofiq test sinovlarini o‘tkazish;

rivojlangan chet el mamlakatlarining ilg‘or tajribasini hisobga olgan holda, rahbar kadrlar hamda mas’ul lavozimlarga tayinlanadigan shaxslarning davlat tilini bilish ko‘nikmalarini baholash mezonlarini ishlab chiqish va sinovdan o‘tkazish;

rahbar kadrlar hamda mas’ul lavozimlarga tayinlanadigan shaxslarning davlat tilini bilish bo‘yicha test sinovlaridan o‘tuvchi shaxslar uchun o‘quv-metodik qo‘llanmalarni ishlab chiqish va nashr qilish;

davlat tilini bilish darajasini aniqlash bo‘yicha test sinovlaridan muvaffaqiyatli o‘tgan talabgorlarga elektron shaklda davlat tilini bilish bo‘yicha daraja sertifikatini berish.

10. Davlat test markazi o‘ziga yuklangan vazifalar va funksiyalarni amalga oshirish uchun quyidagi huquqlarga ega:

normativ-huquqiy hujjatlar loyihalarini, shuningdek, o‘ziga yuklangan vazifalar va funksiyalarni bajarish bilan bog‘liq bo‘lgan boshqa hujjatlarni belgilangan tartibda Vazirlar Mahkamasiga yoki O‘zbekiston Respublikasi Prezidenti Administratsiyasiga kiritish;

ta’lim muassasalariga o‘qishga qabul qilishda test sinovlarini o‘tkazish jarayonida ta’lim muassasalari rahbarlari tomonidan ta’lim to‘g‘risidagi qonun hujjatlari buzilgan holda qabul qilingan buyruqlar, farmoyishlar va boshqa qarorlarning amal qilishini to‘xtatib qo‘yish;

o‘z vakolatiga kiradigan masalalarni hal etish uchun davlat va xo‘jalik boshqaruvi organlaridan, mahalliy davlat hokimiyati organlaridan zarur axborotni belgilangan tartibda so‘rash va olish;

Davlat budjeti hisobidan xarajatlar smetasida nazarda tutilgan va Davlat test markazining budjetdan tashqari mablag‘lari hisobidan unga yuklangan vazifalarni bajarish uchun to‘lov asosida mustaqil ekspertlarni va imtihon oluvchilarni jalb etish;

vakolatiga kiradigan masalalar bo‘yicha O‘zbekiston Respublikasining xalqaro shartnomalarini belgilangan tartibda ishlab chiqishda ishtirok etish, idoralararo tusdagi xalqaro shartnomalarni belgilangan tartibda tuzish;

shartnoma bo‘yicha jismoniy va yuridik shaxslarga ilmiy-metodik, axborot-konsalting hamda namunaviy test topshiriqlari asosida diagnostik test sinovlari o‘tkazish xizmatlari ko‘rsatish;

o‘z vakolatlari doirasida normativ-huquqiy hujjatlar qabul qilish, zarur hollarda davlat boshqaruvi boshqa organlari bilan birgalikda qarorlar va boshqa hujjatlarni birgalikda qabul qilish;

o‘ziga yuklangan vazifalarni hal etish uchun olimlar, yetakchi pedagog-mutaxassislar va xorijiy ekspertlarni jalb etish, shuningdek, ixtisoslashtirilgan, maqsadli va vaqtinchalik ilmiy-tadqiqot guruhlari va ijodiy guruhlar tashkil etish;

o‘z vakolatlari doirasida xalqaro va xorijiy tashkilotlar bilan hamkorlik qilish;

Davlat test markazi faoliyatini keng yoritish maqsadida ijtimoiy tarmoqlarda rasmiy veb-saytlar, shuningdek, sahifalar yaratish;

o‘z vakolatlari doirasida konferensiyalar, seminarlar, simpoziumlar, ko‘rgazmalar, yarmarkalar o‘tkazish, shuningdek, boshqa tashkilotlar tomonidan tashkil etilgan shunga o‘xshash tadbirlarda ishtirok etish;

o‘z vakolatiga kiradigan masalalar bo‘yicha metodik materiallar va tavsiyalar ishlab chiqish;

noshirlik faoliyati bilan shug‘ullanish.

Davlat test markazi qonun hujjatlariga muvofiq boshqa huquqlarga ham ega bo‘lishi mumkin.

11. Quyidagilar Davlat test markazining majburiyatlari hisoblanadi:

o‘ziga yuklangan vazifalar va funksiyalarning samarali bajarilishi, shuningdek, ta’lim muassasalariga o‘qishga qabul qilishda test sinovi orqali tanlab olishga oid davlat siyosatini hamda test sinovlarini o‘tkazish tartibiga rioya etilishi ustidan nazoratni samarali amalga oshirish;

Vazirlar Mahkamasiga va O‘zbekiston Respublikasi Prezidenti Administratsiyasiga kiritiladigan normativ-huquqiy hujjatlar va boshqa hujjatlar loyihalari, shuningdek, Davlat test markazi tomonidan qabul qilinadigan buyruqlar ijrosini samarali amalga oshirish;

ta’lim muassasalariga o‘qishga qabul qilishda test sinovi natijalarining xolisonaligi va ishonchliligini ta’minlash sohasida dasturlar, chora-tadbirlar rejasi, “yo‘l xaritalari” va boshqa dasturiy hujjatlarni samarali amalga oshirish.

12. Quyidagilar Davlat test markazi direktorining asosiy funksional vazifalari hisoblanadi:

1) O‘zbekiston Respublikasi Konstitutsiyasi va qonunlari, shuningdek, boshqa normativ-huquqiy hujjatlar talablariga rioya qilish;

2) Davlat test markazining faoliyatiga umumiy rahbarlik qilish, O‘zbekiston Respublikasi Prezidenti, Vazirlar Mahkamasining qarorlari va boshqa qonun hujjatlari bilan Davlat test markaziga yuklangan vazifalar va funksiyalar bajarilishini tashkil etish;

3) O‘zbekiston Respublikasi Prezidenti va Vazirlar Mahkamasining qarorlari bilan tasdiqlangan Davlat test markazi faoliyatini yanada takomillashtirish bo‘yicha kompleks dasturlar va tadbirlar ijrosini chuqur tahlil qilish;

4) O‘zbekiston Respublikasi Prezidenti Administratsiyasi tarkibiy bo‘linmalari va Vazirlar Mahkamasi, shuningdek, tegishli vazirliklar va idoralar bilan hamkorlik qilish, Vazirlar Mahkamasi va uning Rayosati majlislarida masalalarni ko‘rib chiqishda ishtirok etish;

5) O‘zbekiston Respublikasi Prezidenti, O‘zbekiston Respublikasining Bosh vaziri va uning o‘rinbosarlari topshiriqlarini bajarish;

6) o‘z o‘rinbosarlari va Davlat test markazining boshqa mansabdor shaxslari vakolatlarini belgilash, Davlat test markazining tegishli boshqarma, bo‘limlari, Qoraqalpog‘iston Respublikasi va viloyatlardagi bo‘limlari (keyingi o‘rinlarda bo‘linma deb ataladi) mansabdor shaxslarining shaxsiy javobgarligi darajasini belgilash;

7) Davlat test markazining faoliyatini rejalashtirishni tashkil etish, Davlat test markazining va o‘z o‘rinbosarlarining ish rejasini tasdiqlash, ularning bajarilishi ustidan nazoratni ta’minlash;

8) O‘zbekiston Respublikasi Prezidenti va Vazirlar Mahkamasining qarorlari va topshiriqlari ijrosini tashkil etish va monitoring olib borishning amaliy tizimini yaratish, Davlat test markazi faoliyatida ijro intizomini mustahkamlash bo‘yicha kompleks amaliy chora-tadbirlarni bajarish, shuningdek, O‘zbekiston Respublikasi Prezidentining “O‘zbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun O‘zbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xo‘jalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi to‘g‘risida” 2017-yil 11-apreldagi PQ-2881-son qaroriga va Vazirlar Mahkamasining “Ijro intizomini mustahkamlash chora-tadbirlari to‘g‘risida” 1999-yil 12-yanvardagi 12-son qaroriga muvofiq bo‘linmalar rahbarlarining shaxsiy mas’uliyatini oshirish chora-tadbirlarini ko‘rish;

9) Davlat test markazi xodimlarining tizimli ravishda malakasini oshirishni tashkil etish;

10) Davlat test markazining xodimlarini tanlab olish va lavozimga tayinlash, ularning samarali ishlashi uchun zarur sharoitlarni yaratish, xodimlar zaxirasini tashkil etish;

11) O‘zbekiston Respublikasi Prezidenti, O‘zbekiston Respublikasi Prezidenti Administratsiyasi va Vazirlar Mahkamasi nomenklaturasiga kiradigan bo‘sh lavozimlarga taklif etilgan kadrlarning, shuningdek, Davlat test markaziga ishga qabul qilinayotgan boshqa kadrlarning professional, o‘z ishini bilishi, amaliy tajribaga, yuksak darajada ishlash xususiyatlariga va ma’naviy-axloqiy fazilatlarga ega ekanligi kafolatini ta’minlash;

12) faoliyat sohasi masalalari bo‘yicha normativ-huquqiy hujjatlar loyihalari sifatli ishlab chiqilishini, ular “Normativ-huquqiy hujjatlar to‘g‘risida”, “Qonunlar loyihalarini tayyorlash va ularni O‘zbekiston Respublikasi Oliy Majlisi Qonunchilik palatasiga kiritish tartibi to‘g‘risida”gi O‘zbekiston Respublikasi qonunlari, Vazirlar Mahkamasining Reglamenti va O‘zbekiston Respublikasi Prezidenti Administratsiyasining Reglamenti talablariga qat’iy muvofiq ravishda o‘z vaqtida kiritilishini tashkil etish, ularning Vazirlar Mahkamasi apparatida puxta ishlanishida, Vazirlar Mahkamasi rahbariyati huzurida himoya qilinishida va O‘zbekiston Respublikasi Prezidenti Administratsiyasida ko‘rib chiqilishida ishtirok etish;

13) Davlat test markaziga taqdim etilgan takliflar va normativ-huquqiy hujjatlar loyihalari to‘liq va o‘z vaqtida ko‘rib chiqilishini ta’minlash, shuningdek, O‘zbekiston Respublikasi Prezidenti Administratsiyasining Reglamenti va Vazirlar Mahkamasining Reglamentida belgilangan muddatlarda kelishish (viza qo‘yish);

14) Davlat test markazi rahbarlari va xodimlarining xizmat safarlarini O‘zbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari to‘g‘risida” 2014-yil 5-martdagi PQ-2142-son va “Xorijiy xizmat safarlarida bo‘lishning samaradorligi va xorijiy delegatsiyalarning O‘zbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari to‘g‘risida” 2017-yil 3-avgustdagi PQ-3170-son qarorlari talablariga muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablag‘lardan maqsadli va oqilona foydalanishni ta’minlash;

15) o‘z o‘rinbosarlari, bo‘linmalar faoliyatining samaradorligi va natijadorligini tizimli ravishda tanqidiy tahlil qilish, bo‘linmalar ish rejalarini tasdiqlash, hisobotlarini eshitish, ularning yakunlari bo‘yicha zarur chora-tadbirlar ko‘rish;

16) Davlat test markazi xodimlarini rag‘batlantirish va intizomiy javobgarlikka tortish masalalarini hal qilish, o‘z o‘rinbosarlarini rag‘batlantirish va intizomiy javobgarlikka tortish, shuningdek, uning egallab turgan lavozimida qolish masalasini ko‘rib chiqish bo‘yicha taklif kiritish, uning shaxsiy javobgarligini oshirish bo‘yicha tizimli chora-tadbirlarni amalga oshirish;

17) Davlat test markazi xodimlari tomonidan Vazirlar Mahkamasining 2016-yil 2-martdagi 62-son qarori bilan tasdiqlangan Davlat boshqaruvi organlari va mahalliy ijro etuvchi hokimiyat organlari xodimlarining odob-axloq namunaviy qoidalari asosida tasdiqlangan Davlat test markazi xodimlarining odob-axloq qoidalari talablariga rioya etilishini ta’minlash;

18) “Korrupsiyaga qarshi kurashish to‘g‘risida”gi O‘zbekiston Respublikasi Qonuni talablariga muvofiq Davlat test markazi tizimida korrupsiya va boshqa huquqbuzarliklarning oldini olish choralarini ko‘rish, shuningdek, huquqni qo‘llash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga ko‘maklashuvchi sabablar va shart-sharoitlarni aniqlash, tahlil qilish, bartaraf etish;

19) Davlat test markazining hamda bo‘linmalarining ishlari zamonaviy shakllarda tashkil etilishini ta’minlash;

20) O‘zbekiston Respublikasining “Elektron hukumat to‘g‘risida”gi Qonunini amalga oshirish doirasida zamonaviy axborot-kommunikatsiya texnologiyalaridan foydalangan holda davlat xizmatlarini ko‘rsatish samaradorligini, sifatini va foydalanish imkoniyatini oshirish;

21) jismoniy va yuridik shaxslarning murojaatlarini ko‘rib chiqishga doir samarali ishlarni tashkil etish, aholi bilan to‘g‘ridan-to‘g‘ri va ochiq muloqotni yo‘lga qo‘yish, “Jismoniy va yuridik shaxslarning murojaatlari to‘g‘risida”gi O‘zbekiston Respublikasi Qonunida belgilangan muddatlarda va tartibda jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan, joylarga borib qabul qilish;

22) O‘zbekiston Respublikasi Prezidentining Xalq qabulxonalari bilan samarali hamkorlikni, ularning faoliyatida Davlat test markazi xodimlari va rahbarlarining faol ishtirok etishini tashkil etish, jismoniy va yuridik shaxslarning O‘zbekiston Respublikasi Prezidenti Virtual qabulxonasidan tushgan murojaatlari o‘z vaqtida va to‘liq ko‘rib chiqilishini ta’minlash;

23) davlat siriga kiritilgan ma’lumotlar va maxfiy axborot bilan ishlashda qonun hujjatlari talablariga rioya qilish;

24) Davlat test markazi faoliyatiga umumiy rahbarlik qilish;

25) Davlat test markazi xodimlarini qonun hujjatlarida belgilangan tartibda lavozimga tayinlash va lavozimdan ozod etish;

26) Davlat test markazi xodimlari bajarishi majburiy bo‘lgan buyruqlar chiqarish va ko‘rsatmalar berish, shuningdek, ularning ijrosini belgilangan tartibda nazorat qilish;

27) Davlat test markazi tuzilmasi va shtat jadvalini Vazirlar Mahkamasi tomonidan tasdiqlangan xodimlarning soni doirasida belgilangan tartibda tasdiqlash;

28) Davlat test markazi bo‘linmalarining nizomlarini tasdiqlash.

13. Quyidagilar Davlat test markazi direktori o‘rinbosarlarining asosiy funksional vazifalari hisoblanadi:

1) O‘zbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya qilish;

2) Davlat test markazi direktori vaqtincha bo‘lmaganda uning vazifasini tegishli buyruq asosida bajarish;

3) Davlat test markazining bo‘linmalari faoliyatini muvofiqlashtirish, nazorat qilish va majburiyatlarni xodimlari o‘rtasida taqsimlash;

4) Davlat test markazi bo‘linmalarining faoliyatini yanada rivojlantirish maqsadida O‘zbekiston Respublikasi Prezidentining farmonlari, qarorlari va farmoyishlari va Vazirlar Mahkamasining qarorlari bilan tasdiqlangan konsepsiya, kompleks dasturlar va tadbirlarning bajarilishini chuqur tahlil qilish;

5) bo‘linmalarga yuklangan vazifalar bajarilishini so‘zsiz ta’minlash chora-tadbirlarini ko‘rish, bo‘linmalar rahbarlarining hisobotlarini eshitish va ushbu vazifalarni sifatli bajarish uchun ularning shaxsiy javobgarligini oshirish;

6) O‘zbekiston Respublikasi Prezidenti va Vazirlar Mahkamasining qarorlari va topshiriqlari ijrosini ta’minlash, Davlat test markazining mutasaddilik qilinadigan tarkibiy bo‘linmalarida ijro intizomi bo‘yicha kompleks amaliy chora-tadbirlarni amalga oshirish, shuningdek, O‘zbekiston Respublikasi Prezidentining “O‘zbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun O‘zbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xo‘jalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi to‘g‘risida” 2017-yil 11-apreldagi PQ-2881-son qaroriga va Vazirlar Mahkamasining “Ijro intizomini mustahkamlash chora-tadbirlari to‘g‘risida” 1999-yil 12-yanvardagi 12-son qaroriga muvofiq topshiriqlar o‘z vaqtida va sifatli ijro etilishi uchun tarkibiy bo‘linmalar rahbarlarining shaxsiy mas’uliyatini oshirish chora-tadbirlarini ko‘rish;

7) Davlat test markazi direktorining buyruqlari va topshiriqlarini o‘z vaqtida va sifatli bajarilishini ta’minlash;

8) bo‘linmalarga xodimlarni tanlash va lavozimga tayinlash bo‘yicha Davlat test markazi direktoriga takliflar kiritish, o‘z kasbining ustasi ekanligiga, yuqori kasbiy malakaga, amaliy ish tajribasiga va yuksak ma’naviy-axloqiy fazilatlarga egaligiga kafolat berish, ularning kasbiy malakalarini oshirish chora-tadbirlarini ishlab chiqish, xodimlar zaxirasini shakllantirish;

9) bo‘linmalar tomonidan normativ-huquqiy hujjatlar loyihasining sifatli ishlab chiqilishini tashkil etish, Davlat test markazi direktori ko‘rib chiqishi va imzolashi uchun ko‘rib chiqib imzolash, shuningdek, Davlat test markazi direktorining topshirig‘iga muvofiq Vazirlar Mahkamasi ijro apparatida normativ-huquqiy hujjatlarni qayta ishlashda ishtirok etish;

10) Davlat test markaziga taqdim etilgan normativ-huquqiy hujjatlar loyihalarini belgilangan tartibda ko‘rib chiqish;

11) xizmat safarlarini O‘zbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish chora-tadbirlari to‘g‘risida” 2014-yil 5-martdagi PQ-2142-son va “Xorijiy xizmat safarlarida bo‘lishning samaradorligi va xorijiy delegatsiyalarning O‘zbekiston Respublikasiga tashrifini tashkil etish uchun mansabdor shaxslarning shaxsiy mas’uliyatini yanada oshirish chora-tadbirlari to‘g‘risida” 2017-yil 3-avgustdagi PQ-3170-son qarorlari talablariga to‘liq muvofiq amalga oshirish, xizmat safarlarining asoslanganligi, samaradorligi va natijadorligini, safar uchun ajratiladigan mablag‘lardan maqsadli va oqilona foydalanishni ta’minlash;

12) bo‘linmalar boshliqlari faoliyatining samaradorligini va natijadorligini tizimli ravishda tanqidiy tahlil qilish, ularning shaxsiy hisobotlarini eshitish, uning yakunlari bo‘yicha zarur chora-tadbirlar ko‘rish;

13) ta’lim muassasalariga o‘qishga qabul qilishda test sinovi orqali tanlab olish faoliyati samaradorligini oshirish bo‘yicha Amaliy chora-tadbirlarni belgilash, qonunchilikni takomillashtirish yuzasidan takliflar ishlab chiqish va uni Davlat test markazi direktoriga kiritish;

14) bo‘linmalar rahbarlari va xodimlarini rag‘batlantirish va intizomiy javobgarlikka tortish, shu jumladan, ularning egallab turgan lavozimda qolishi maqsadga muvofiqlik masalasini ko‘rib chiqish bo‘yicha takliflarni direktorga kiritish, funksional va yuklangan vazifalar bajarilishi uchun ularning shaxsiy mas’uliyatini oshirish bo‘yicha tizimli chora-tadbirlar ko‘rish;

15) xodimlarning odob-axloq qoidalari talablariga rioya qilishini, mutasaddilik qilinadigan tarkibiy bo‘linmalar rahbarlari va xodimlarining ushbu qoidalarga rioya etishini ta’minlash;

16) huquqni qo‘llash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali “Korrupsiyaga qarshi kurashish to‘g‘risida”gi O‘zbekiston Respublikasi Qonuni talablariga muvofiq korrupsiya va boshqa huquqbuzarliklarning oldini olish choralarini ko‘rish, shuningdek, ularning sodir etilishiga ko‘maklashuvchi sabablar va shart-sharoitlarni aniqlash, tahlil qilish, bartaraf etish;

17) Davlat test markazi direktoriga davlat xizmatlarini ko‘rsatish samaradorligini, sifatini va foydalanish imkoniyatlarini oshirish bo‘yicha takliflar kiritish;

18) davlat xizmatlari samaradorligi, sifati va ulardan erkin foydalanishni oshirishga doir takliflarni direktorga kiritish;

19) jismoniy va yuridik shaxslarning murojaatlarini “Jismoniy va yuridik shaxslarning murojaatlari to‘g‘risida”gi O‘zbekiston Respublikasi Qonunida belgilangan muddatlarda va tartibda ko‘rib chiqish bo‘yicha samarali ishlarni tashkil etish, aholi bilan to‘g‘ridan-to‘g‘ri va ochiq muloqotni yo‘lga qo‘yish, jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan, joylarga borib qabul qilish;

20) O‘zbekiston Respublikasi Prezidentining Xalq qabulxonalari bilan samarali hamkorlik qilish, ularning faoliyatida faol ishtirok etish, jismoniy va yuridik shaxslar vakillarining O‘zbekiston Respublikasi Prezidentining Virtual qabulxonasidan tushgan murojaatlari o‘z vaqtida va to‘laqonli ko‘rib chiqilishini ta’minlash;

21) davlat siriga kiritilgan ma’lumotlar va maxfiy axborot bilan ishlashda qonun hujjatlari talablariga rioya qilish.

14. Quyidagilar Davlat test markazi bo‘linma boshliqlarining asosiy funksional vazifalari hisoblanadi:

1) O‘zbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya etish;

2) bo‘linmalar faoliyatiga bevosita rahbarlik qilish, ushbu bo‘linmalarga yuklangan vazifalar va funksiyalar bajarilishini tashkil etish;

3) tegishli tarkibiy bo‘linmalar faoliyatini o‘z vakolatlari doirasida muvofiqlashtirish;

4) prognoz ko‘rsatkichlarining bajarilishini tahlil qilish hamda tarkibiy bo‘linmalar ushbu ko‘rsatkichlarga so‘zsiz erishishini ta’minlashga qaratilgan qo‘shimcha chora-tadbirlar ko‘rish bo‘yicha takliflarni direktor o‘rinbosariga kiritish;

5) O‘zbekiston Respublikasi Prezidenti va Vazirlar Mahkamasi qarorlari va topshiriqlari ijrosini ta’minlash, Davlat test markazi bo‘linmalari xodimlarining ijro intizomini mustahkamlash bo‘yicha kompleks amaliy chora-tadbirlarni amalga oshirish, O‘zbekiston Respublikasi Prezidentining “O‘zbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun O‘zbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xo‘jalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi to‘g‘risida” 2017-yil 11-apreldagi PQ-2881-son qaroriga va Vazirlar Mahkamasining “Ijro intizomini mustahkamlash chora-tadbirlari to‘g‘risida” 1999-yil 12-yanvardagi 12-son qaroriga muvofiq topshiriqlarning o‘z vaqtida va sifatli bajarilishi uchun tarkibiy bo‘linmalar xodimlarining shaxsiy mas’uliyatini oshirish chora-tadbirlarini ko‘rish;

6) Davlat test markazi rahbarlarining buyruqlari hamda topshiriqlari o‘z vaqtida va sifatli bajarilishini ta’minlash;

7) bo‘linmaning ish rejasi ishlab chiqilishini ta’minlash, ularni tasdiqlash uchun kiritish, unda ko‘rsatilgan vazifalar va tadbirlarning o‘z vaqtida va sifatli bajarilishi ta’minlash;

8) bo‘linmaga yuklangan vazifalar bajarilishini nazorat qilish va muvofiqlashtirish;

9) bo‘linma faoliyatiga oid masalalar yuzasidan qonun hujjatlarini takomillashtirish bo‘yicha takliflarni ishlab chiqish va ularni ko‘rib chiqish uchun rahbarlarga kiritish;

10) bo‘linmaga kadrlarni tanlash yuzasidan direktor o‘rinbosariga takliflar taqdim etish, professional, o‘z ishini bilishi, amaliy tajribaga, yuksak darajada ishlash xususiyatlariga va ma’naviy-axloqiy fazilatlarga ega ekanligi kafolatini ta’minlash, ularning kasb malakasini oshirish choralarini ko‘rish, bo‘linmada kadrlar zaxirasini shakllantirish;

11) bo‘linma tomonidan normativ-huquqiy hujjatlar loyihalarini sifatli ishlab chiqilishini tashkil etish, Davlat test markazining bo‘linmalarida tayyorlangan hujjatlar loyihalarini keyinchalik rahbariyat tomonidan ko‘rib chiqish, imzolash (viza qo‘yish) uchun ko‘rib chiqish va viza qo‘yish, ularning O‘zbekiston Respublikasi Prezidenti Administratsiyasining Reglamenti va Vazirlar Mahkamasi Reglamenti talablariga qat’iy muvofiq ravishda Vazirlar Mahkamasiga o‘z vaqtida kiritilishini ta’minlash, rahbariyatning topshirig‘i bo‘yicha normativ-huquqiy hujjatlar loyihalarini Vazirlar Mahkamasi apparatida ishlab chiqishda ishtirok etish;

12) Davlat test markaziga taqdim etilgan normativ-huquqiy hujjatlar loyihasini to‘liq va har tomonlama ko‘rib chiqish;

13) xizmat safarlarini O‘zbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish chora-tadbirlari to‘g‘risida” 2014-yil 5-martdagi PQ-2142-son va “Xorijiy xizmat safarlarida bo‘lishning samaradorligi va xorijiy delegatsiyalarning O‘zbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari to‘g‘risida” 2017-yil 3-avgustdagi PQ-3170-son qarorlari talablariga muvofiq amalga oshirish, xizmat safarlari asoslanganligi, samaradorligi va natijadorligini, safar uchun ajratiladigan mablag‘lardan maqsadli va oqilona foydalanishni ta’minlash;

14) bo‘linma xodimlari faoliyati samaradorligi va natijadorligini tizimli ravishda tanqidiy tahlil qilish, yig‘ilishlarda ularning shaxsiy hisobotlarini eshitish, ularning yakunlari bo‘yicha zarur chora-tadbirlar ko‘rish;

15) xodimlarning odob-axloq qoidalari talablariga rioya qilishini ta’minlash;

16) “Korrupsiyaga qarshi kurashish to‘g‘risida”gi O‘zbekiston Respublikasi Qonuni talablariga muvofiq Davlat test markazi tizimida korrupsiya va boshqa huquqbuzarliklarning oldini olish choralarini ko‘rish, shuningdek, huquqni qo‘llash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga ko‘maklashuvchi sabablar va shart-sharoitlarni aniqlash, tahlil qilish, bartaraf etish;

17) davlat xizmatlarining samaradorligi, sifati va ulardan erkin foydalanishni oshirishga doir takliflar kiritish;

18) jismoniy va yuridik shaxslarning murojaatlarini “Jismoniy va yuridik shaxslarning murojaatlari to‘g‘risida”gi O‘zbekiston Respublikasi Qonuni bilan belgilangan muddatlarda va tartibda ko‘rib chiqish, aholi bilan to‘g‘ridan-to‘g‘ri va ochiq muloqotni yo‘lga qo‘yish, jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan, joylarga borib qabul qilish;

19) O‘zbekiston Respublikasi Prezidentining Xalq qabulxonalari bilan samarali hamkorlik qilish, ularning faoliyatida faol ishtirok etish, jismoniy va yuridik shaxslarning O‘zbekiston Respublikasi Prezidentining Virtual qabulxonasidan tushgan murojaatlarini o‘z vaqtida va to‘laqonli ko‘rib chiqish;

20) davlat siriga kiritilgan ma’lumotlar va maxfiy axborot bilan ishlashda qonun hujjatlari talablariga rioya qilish.

15. Davlat test markazi direktori:

1) Davlat test markaziga yuklangan vazifalar va funksiyalarning samarali va o‘z vaqtida bajarilishiga;

2) ushbu Nizomning 11-bandida nazarda tutilgan majburiyatlar bo‘yicha;

3) ushbu Nizomning 12-bandida ko‘rsatilgan funksional vazifalarning sifatli bajarilishiga shaxsan javob beradi.

16. Davlat test markazi direktori o‘rinbosari:

1) Davlat test markaziga yuklangan vazifalar va funksiyalarning samarali bajarilishiga;

2) ushbu Nizomning 11-bandida nazarda tutilgan majburiyatlar bo‘yicha;

3) ushbu Nizomning 13-bandida ko‘rsatilgan funksional vazifalarning sifatli bajarilishiga shaxsan javob beradi.

17. Bo‘linma boshliqlari:

1) bo‘linmaga yuklangan vazifalar va funksiyalarning amalga oshirilishiga;

2) ushbu Nizomning 11-bandida nazarda tutilgan majburiyatlar bo‘yicha;

3) ushbu Nizomning 14-bandida ko‘rsatilgan funksional vazifalarning sifatli bajarilishi uchun shaxsan javob beradi.

18. Davlat test markaziga O‘zbekiston Respublikasi Prezidenti tomonidan lavozimga tayinlanadigan va lavozimdan ozod etiladigan direktor boshchilik qiladi.

Davlat test markazi direktori maqomiga ko‘ra vazirning birinchi o‘rinbosariga tenglashtiriladi.

19. Davlat test markazi direktorining ikki nafar o‘rinbosari bo‘ladi va ular Vazirlar Mahkamasi tomonidan lavozimga tayinlanadi hamda lavozimdan ozod etiladi.

Davlat test markazi direktorining ikki nafar o‘rinbosari maqomiga ko‘ra tibbiy xizmat ko‘rsatish shart-sharoitlaridan tashqari vazir o‘rinbosariga tenglashtiriladi.

20. Davlat test markazi direktori bo‘lmagan vaqtda uning vakolatlarini direktorning o‘rinbosari bajaradi.

21. Davlat test markazining bosh boshqarmasi boshlig‘i, boshqarma boshliqlari, bo‘lim boshliqlari va xodimlari, Qoraqalpog‘iston Respublikasi va viloyatlardagi bo‘lim boshliqlari va xodimlari direktor tomonidan lavozimga tayinlanadi va lavozimdan ozod etiladi.

22. Davlat test markazi o‘z vazifa va funksiyalarini mahalliy davlat hokimiyati organlari va boshqa tashkilotlar bilan hamkorlikda amalga oshiradi.

23. Davlat test markazining Qoraqalpog‘iston Respublikasi va viloyatlardagi bo‘limlari o‘z vakolati doirasida boshqa davlat va xo‘jalik boshqaruvi organlari, mahalliy davlat hokimiyati organlari va boshqa tashkilotlarning hududiy bo‘linmalari bilan hamkorlikda faoliyat yuritadi.

24. Davlat test markazida uning direktori (hay’at raisi), direktorning o‘rinbosarlari, shuningdek, Davlat test markazi faoliyatining asosiy yo‘nalishlarini muvofiqlashtiruvchi tarkibiy bo‘linmalar rahbarlaridan iborat tarkibda hay’at tuziladi.

Hay’at tarkibining soni va shaxsiy tarkibi Davlat test markazi direktorining taqdimnomasiga muvofiq Vazirlar Mahkamasi tomonidan tasdiqlanadi.

25. Hay’atga quyidagi vazifalar yuklanadi:

Davlat test markazi faoliyatining asosiy yo‘nalishlarini ishlab chiqish va amalga oshirish;

qonun hujjatlarida belgilangan vazifalar o‘z vaqtida va sifatli amalga oshirilishini ta’minlash uchun Davlat test markazining bo‘linmalari rahbar va xodimlarining shaxsiy javobgarligini oshirish bo‘yicha chora-tadbirlar ko‘rgan holda ularning hisobotlari muntazam ravishda eshitilishini tashkil etish;

joylarda sohaga oid dolzarb masalalar muhokama qilinishi ta’minlangan holda hay’atning kengaytirilgan sayyor majlislari o‘tkazilishini tashkil etish, shuningdek, yuzaga kelgan muammolarni bartaraf etish bo‘yicha tegishli qarorlarni ishlab chiqish va qabul qilish;

Davlat test markazi markaziy apparatiga va uning tizimiga kiradigan lavozimlar nomenklaturasini ko‘rib chiqish va tasdiqlash;

Davlat test markazi nomenklaturasiga kiradigan lavozimlarga kadrlarni tanlash, joy-joyiga qo‘yish masalasini ko‘rib chiqish;

O‘zbekiston Respublikasi Prezidenti va Vazirlar Mahkamasining qarorlari va topshiriqlari bilan belgilangan vazifalar o‘z vaqtida va sifatli bajarilishini ta’minlash uchun Davlat test markazining bo‘linmalari rahbar va xodimlarining ijro intizomini mustahkamlash va shaxsiy javobgarligini oshirish.

Hay’at Davlat test markazi vakolatiga kiritilgan boshqa masalalarni ham ko‘rib chiqishga haqlidir.

26. Hay’at majlisiga Davlat test markazi vakolatiga kiradigan masalalar yuzasidan davlat va xo‘jalik boshqaruvi organlari, boshqa tashkilotlar vakillari taklif etilishi mumkin.

27. Hay’at, agar uning majlisida tarkibining yarmidan ko‘pi qatnashsa, vakolatli hisoblanadi. Ko‘rib chiqilayotgan masalalar yuzasidan qarorlar oddiy ko‘pchilik ovoz berish yo‘li bilan qabul qilinadi.

28. Hay’at qarorlari Davlat test markazi direktorining buyrug‘i bilan amalga oshiriladi.

29. Davlat test markazi direktori va hay’at a’zolari o‘rtasida kelishmovchiliklar yuzaga kelgan taqdirda, direktor yuzaga kelgan kelishmovchiliklar haqida Vazirlar Mahkamasiga axborot bergan holda mustaqil ravishda qaror qabul qiladi. Shuningdek, hay’at a’zolari ham Vazirlar Mahkamasiga o‘z fikrini ma’lum qilishi mumkin.

30. Hay’at faoliyati tartibi hay’at tomonidan tasdiqlanadigan uning reglamenti bilan belgilanadi.

31. Davlat test markazida direktor o‘rinbosari (ilmiy-metodik kengash raisi), bosh boshqarma, boshqarma va bo‘lim boshliqlari hamda Davlat test markazining yuqori malakali xodimlaridan iborat tarkibda ilmiy-metodik kengash tuziladi.

Ilmiy-metodik kengash a’zolarining soni va shaxsiy tarkibi Davlat test markazi direktorining buyrug‘i bilan tasdiqlanadi.

32. Nizomga muvofiq, Davlat test markaziga yuklangan vazifalarning sifatli amalga oshirilishi, Davlat test markazi faoliyatiga oid ilmiy, metodik va normativ-huquqiy hujjatlarni ko‘rib chiqish va loyihalarini tayyorlash hamda hay’at kun tartibiga dolzarb masalalar bo‘yicha takliflar kiritish ilmiy-metodik kengashning asosiy vazifasi hisoblanadi.

33. Ilmiy-metodik kengash, agar uning majlisida tarkibining uchdan ikki qismi qatnashsa, vakolatli hisoblanadi. Ko‘rib chiqilayotgan masalalar yuzasidan qarorlar oddiy ko‘pchilik ovoz berish yo‘li bilan qabul qilinadi.

34. Ilmiy-metodik kengash qarorlari Davlat test markazi direktorining buyrug‘i bilan amalga oshiriladi.

35. Ilmiy-metodik kengash faoliyati tartibi ilmiy-metodik kengash tomonidan tasdiqlanadigan uning reglamenti bilan belgilanadi.

36. Davlat test markazi faoliyatining samaradorligi va natijadorligi muntazam baholanishi lozim.

37. Davlat test markazi faoliyati samaradorligi va natijadorligiga berilgan baholar O‘zbekiston Respublikasi Prezidenti Administratsiyasining tegishli tarkibiy bo‘linmalari va O‘zbekiston Respublikasi Bosh vazirining ijtimoiy rivojlantirish masalalari bo‘yicha o‘rinbosari tomonidan tasdiqlanadigan Davlat test markazi faoliyati samaradorligi va natijadorligini baholash mezonlari va ish indikatorlariga asoslanadi.

38. Davlat test markazining faoliyati samaradorligi va natijadorligini baholash yakunlari bo‘yicha:

Davlat test markazi rahbarlari va xodimlarini rag‘batlantirish (mukofotlash) yoki intizomiy javobgarlikka tortish;

Davlat test markazi faoliyatida aniqlangan kamchiliklarni bartaraf etish va uning faoliyatini yanada takomillashtirish chora-tadbirlari ko‘riladi.

Davlat test markazining faoliyati samaradorligi va natijadorligini baholash tartibi va metodikasi qonun hujjatlariga ko‘ra belgilanadi.

39. Davlat test markazini moddiy-texnik ta’minlash va xodimlar mehnatiga haq to‘lash — O‘zbekiston Respublikasi respublika budjeti mablag‘lari, Davlat test markazi faoliyatini rivojlantirish jamg‘armasi, shuningdek, qonun hujjatlarida taqiqlanmagan boshqa manbalar hisobiga moliyalashtiriladi.

40. Davlat test markazi xodimlarining ish haqi lavozim maoshi, mukofotlar, qo‘shimcha haqlar, ustamalardan va qonun hujjatlarida nazarda tutilgan boshqa to‘lovlardan iborat.

Davlat test markazi xodimlari lavozim maoshlariga har oyda qo‘shiladigan rag‘batlantirish xususiyatiga ega bo‘lgan qo‘shimcha haqlar va ustamalar Davlat test markazi direktori tomonidan tasdiqlangan nizomga muvofiq to‘lanadi.

41. Davlat test markazi xodimlariga ish haqi to‘lash va ularni moddiy rag‘batlantirish manbalari mehnatga haq to‘lash jamg‘armasi, budjetdan tashqari jamg‘armalar mablag‘laridan va qonun hujjatlarida taqiqlanmagan boshqa manbalardan iborat.

42. Direktor Davlat test markazining faoliyati to‘g‘risida Vazirlar Mahkamasiga, O‘zbekiston Respublikasi Prezidenti Administratsiyasining tegishli tarkibiy bo‘linmasiga va O‘zbekiston Respublikasi Prezidentiga muntazam ravishda hisobot beradi.

43. O‘zbekiston Respublikasi Bosh vazirining ijtimoiy rivojlantirish masalalari bo‘yicha o‘rinbosari Davlat test markazi rahbarlariga yuklangan vazifalar samarali bajarilishi uchun ular faoliyati ustidan monitoring olib boradi, Davlat test markazi faoliyati samaradorligiga xolisona baho beradi.

44. Monitoring va baholash yakunlari bo‘yicha Davlat test markazining alohida o‘rnak ko‘rsatgan rahbarlari, mansabdor shaxslari va xodimlari rag‘batlantiriladi yoki yo‘l qo‘yilgan jiddiy kamchiliklar uchun egallab turgan lavozimidan ozod etishgacha bo‘lgan javobgarlikka tortiladi.

45. Davlat test markazini qayta tashkil etish va tugatish qonun hujjatlarida belgilangan tartibda amalga oshiriladi.