O‘zbekiston Respublikasi “Davlat soliq xizmati to‘g‘risida”gi Qonunining 7-moddasiga va “Davlat bojxona xizmati to‘g‘risida”gi Qonunining 6 va 7-moddalariga, O‘zbekiston Respublikasi Prezidentining 2009-yil 29-yanvardagi PQ-1051-son “Uy-joy fondini foydalanishga tayyor holda topshirish shartlarida rekonstruksiya qilish va ta’mirlash bo‘yicha pudrat ishlarini kengaytirishni rag‘batlantirishga doir qo‘shimcha chora-tadbirlar to‘g‘risida”gi, 2009-yil 3-avgustdagi PQ-1167-son “Qishloq joylarda uy-joy qurilishi ko‘lamini kengaytirishga oid qo‘shimcha chora-tadbirlar to‘g‘risida”gi hamda 2015-yil 7-yanvardagi PQ-2282-sonli “2015-yilda qishloq joylarda namunaviy loyihalar bo‘yicha yakka tartibdagi uy-joy qurilishi dasturi va 2016-yilgi qurilishning asosiy parametrlari to‘g‘risida”gi qarorlariga muvofiq O‘zbekiston Respublikasi Davlat soliq qo‘mitasi, Moliya vazirligi va Davlat bojxona qo‘mitasi qaror qiladi:

1. “Qishloq qurilish invest” IK MChJ, pudrat va yordamchi pudratchi tashkilotlar, shuningdek qurilish materiallari va uskunalari ishlab chiqaruvchi korxonalar tomonidan imtiyozlarni qo‘llash tartibi to‘g‘risidagi nizom ilovaga muvofiq tasdiqlansin.

2. O‘zbekiston Respublikasi Davlat soliq qo‘mitasi, Moliya vazirligi va Davlat bojxona qo‘mitasining 2010-yil 20-iyuldagi 2010-28, 54 va 01-02/8-13-son “Qishloq qurilish invest” ixtisoslashtirilgan injiniring kompaniyasi va “Qishloq qurilish invest” injiniring kompaniyasi bilan tuzilgan shartnomalar bo‘yicha foydalanishga tayyor holda topshirish shartlari bilan yakka tartibda uy-joy qurish doirasida ular tomonidan amalga oshiriladigan ishlar hajmlari bo‘yicha pudrat tashkilotlari tomonidan imtiyozlarni qo‘llash tartibi to‘g‘risidagi nizomni tasdiqlash haqida”gi qarori (ro‘yxat raqami 2133, 2010-yil 16-avgust) (O‘zbekiston Respublikasi qonun hujjatlari to‘plami, 2010-y., 33-son, 281-modda) o‘z kuchini yo‘qotgan deb hisoblansin.

3. Mazkur qaror rasmiy e’lon qilingan kundan e’tiboran kuchga kiradi.

Mazkur Nizom O‘zbekiston Respublikasi Prezidentining 2009-yil 29-yanvardagi PQ-1051-son “Uy-joy fondini foydalanishga tayyor holda topshirish shartlarida rekonstruksiya qilish va ta’mirlash bo‘yicha pudrat ishlarini kengaytirishni rag‘batlantirishga doir qo‘shimcha chora-tadbirlar to‘g‘risida”gi, 2009-yil 3-avgustdagi PQ-1167-son “Qishloq joylarda uy-joy qurilishi ko‘lamini kengaytirishga oid qo‘shimcha chora-tadbirlar to‘g‘risida”gi hamda 2015-yil 7-yanvardagi PQ-2282-son “2015-yilda qishloq joylarda namunaviy loyihalar bo‘yicha yakka tartibdagi uy-joy qurilishi dasturi va 2016-yilgi qurilishning asosiy parametrlari to‘g‘risida”gi qarorlariga muvofiq “Qishloq qurilish invest” IK MChJ, pudrat va yordamchi pudratchi tashkilotlar, shuningdek qurilish materiallari va uskunalari ishlab chiqaruvchi korxonalar tomonidan imtiyozlarni qo‘llash tartibini belgilaydi.

1. O‘zbekiston Respublikasi Prezidentining 2009-yil 3-avgustdagi PQ-1167-son “Qishloq joylarda uy-joy qurilishi ko‘lamini kengaytirishga oid qo‘shimcha chora-tadbirlar to‘g‘risida”gi qaroriga muvofiq “Qishloq qurilish invest” IK MChJ 2017-yilning 1-yanvarigacha barcha turdagi soliq to‘lovlaridan hamda O‘zbekiston Respublikasi Moliya vazirligi huzuridagi Respublika yo‘l jamg‘armasi va budjetdan tashqari Umumta’lim maktablari, kasb-hunar kollejlari, akademik litseylar va sog‘liqni saqlash muassasalarini rekonstruksiya qilish, mukammal ta’mirlash va jihozlash jamg‘armasiga majburiy ajratmalar to‘lashdan ozod qilinadi.

2. O‘zbekiston Respublikasi Prezidentining 2009-yil 29-yanvardagi PQ-1051-son “Uy-joy fondini foydalanishga tayyor holda topshirish shartlarida rekonstruksiya qilish va ta’mirlash bo‘yicha pudrat ishlarini kengaytirishni rag‘batlantirishga doir qo‘shimcha chora-tadbirlar to‘g‘risida”gi qaroriga muvofiq yangidan tashkil etilayotgan ixtisoslashtirilgan ta’mirlash-qurilish tashkilotlari va “Qishloq qurilish invest” IK MChJ bilan tuzilgan shartnomalar bo‘yicha foydalanishga tayyor holda topshirish shartlari bilan yakka tartibda uy-joy qurish doirasida ular tomonidan amalga oshiriladigan ishlar hajmlari bo‘yicha pudrat tashkilotlari 2017-yilning 1-yanvarigacha:

soliqlarning barcha turlarini va davlat maqsadli jamg‘armalariga majburiy ajratmalarni to‘lashdan, budjetdan tashqari Pensiya jamg‘armasi bundan mustasno;

Vazirlar Mahkamasi tomonidan tasdiqlanadigan ro‘yxatlar bo‘yicha O‘zbekiston Respublikasi hududiga olib kiriladigan qurilish texnikasi va kichik mexanizatsiyalash vositalari uchun bojxona to‘lovlari to‘lashdan (bojxona rasmiylashtiruvi yig‘imlari bundan mustasno) ozod qilinadi.

3. O‘zbekiston Respublikasi Prezidentining 2015-yil 7-yanvardagi PQ-2282-son “2015-yilda qishloq joylarda namunaviy loyihalar bo‘yicha yakka tartibdagi uy-joy qurilishi dasturi va 2016-yilgi qurilishning asosiy parametrlari to‘g‘risida”gi qaroriga muvofiq 2017-yilning 1-yanvarigacha:

yordamchi pudratchi tashkilotlar — tayyor holda topshirish sharti bilan qishloq joylarda namunaviy loyihalar bo‘yicha yakka tartibdagi uy-joylar qurilishi doirasida “Qishloq qurilish invest” IK MChJ bilan shartnomalar tuzgan pudrat tashkilotlari bilan shartnoma asosida o‘zlari bajaradigan ishlar hajmi bo‘yicha yagona soliq to‘lovini to‘lashdan;

qurilish materiallari va uskunalari ishlab chiqaruvchi korxonalar — Vazirlar Mahkamasi tomonidan tasdiqlanadigan ro‘yxat asosida Dastur doirasida “Qishloq qurilish invest” IK MChJga sotiladigan qurilish materiallari va uskunalari hajmi bo‘yicha qo‘shilgan qiymat solig‘i to‘lashdan, davlat maqsadli jamg‘armalariga majburiy ajratmalardan va yagona soliq to‘lovidan ozod qilinadi.

4. Mazkur Nizomning 2 va 3-bandlarida ko‘rsatilgan imtiyozlarni qo‘llashga:

pudrat tashkilotlari uchun — tayyor holda topshirish sharti bilan qishloq joylarda namunaviy loyihalar bo‘yicha yakka tartibdagi uy-joylar qurilishi doirasida “Qishloq qurilish invest” IK MChJ bilan tuzilgan shartnoma;

yordamchi pudratchi tashkilotlar uchun — tayyor holda topshirish sharti bilan qishloq joylarda namunaviy loyihalar bo‘yicha yakka tartibdagi uy-joylar qurilishi doirasida “Qishloq qurilish invest” IK MChJ bilan shartnomalar tuzgan pudrat tashkilotlari bilan tuzilgan shartnoma;

qurilish materiallari va uskunalari ishlab chiqaruvchi korxonalar uchun — Vazirlar Mahkamasi tomonidan tasdiqlanadigan ro‘yxat bo‘yicha qurilish materiallari va uskunalarini realizatsiya qilish uchun “Qishloq qurilish invest” IK MChJ bilan tuzilgan shartnomaning mavjudligi asos bo‘ladi.

5. Yangidan tashkil etilayotgan ixtisoslashtirilgan ta’mirlash-qurilish tashkilotlari tomonidan soliq va bojxona imtiyozlarini qo‘llash tartibi Yangidan tashkil etilayotgan ixtisoslashtirilgan ta’mirlash-qurilish tashkilotlari tomonidan soliq va bojxona imtiyozlarini qo‘llash tartibi to‘g‘risidagi nizom (ro‘yxat raqami 2009, 2009-yil 19-sentabr) bilan tartibga solinadi.

6. Mazkur Nizomning 2 va 3-bandlarida ko‘rsatilgan imtiyozlarni qo‘llash uchun korxonalar qishloq joylarda namunaviy loyihalar bo‘yicha foydalanishga tayyor holda topshirish shartlari asosida yakka tartibda uy-joy qurish doirasida amalga oshirilgan ishlar va “Qishloq qurilish invest” IK MChJga realizatsiya qilingan qurilish materiallari va uskunalari bo‘yicha alohida hisob yuritishlari lozim.

7. Yuridik shaxslarga soliqlar, bojxona va majburiy to‘lovlarni budjetga to‘lash bo‘yicha berilgan imtiyozlarni rasmiylashtirish va buxgalterlik hisobida aks ettirish tartibi to‘g‘risidagi nizomga muvofiq (ro‘yxat raqami 1463, 2005-yil 2-aprel), bo‘shayotgan mablag‘larni maqsadli ishlatish nazarda tutilmagan soliqlar va bojxona imtiyozlari berilganda budjetga to‘lanadigan soliqlar, bojxona va majburiy to‘lovlar mahsulot (tovarlar, ishlar, xizmatlar) hamda boshqa xil mol-mulkning sotish (xarid) qiymatiga hisoblab yozilmaydi va kiritilmaydi.

Bo‘shayotgan mablag‘lardan maqsadli foydalanishni nazarda tutmaydigan soliqlar va bojxona imtiyozlarini buxgalterlik hisobida aks ettirish tartibi yuqorida qayd etilgan Nizom bilan tartibga solinadi.

8. Soliq va bojxona imtiyozlarining to‘g‘ri qo‘llanilishi ustidan nazorat davlat soliq xizmati va davlat bojxona xizmati organlari tomonidan amalga oshiriladi.

9. Mazkur Nizom “Qishloq qurilish invest” IK MChJ bilan kelishilgan.