Oʻzbekiston Respublikasi Prezidentining “Oʻzbekiston Respublikasining Tiklanish va taraqqiyot jamgʻarmasini tashkil etish toʻgʻrisida” 2006-yil 11-maydagi PF–3751-sonli Farmoniga muvofiq hamda ustuvor investitsiya loyihalarini samarali moliyalashtirishni taʼminlash maqsadida:

1. Quyidagilar belgilansin:

Jamgʻarmaning ijro etuvchi direksiyasi Jamgʻarma ijroiya organi va uning mablagʻlarini tasarruf etuvchi hisoblanadi;

Jamgʻarmaning ijro etuvchi direksiyasi tarkibida tegishli loyihalarni moliyalashtirish boʻyicha tavsiyanomalar berilishi uchun masʼul boʻlgan ekspert guruhi tashkil qilinadi;

Jamgʻarmaning ijro etuvchi direktori Oʻzbekiston Respublikasi Vazirlar Mahkamasi tomonidan lavozimga tayinlanadi va undan ozod qilinadi, maqomi boʻyicha esa Vazir oʻrinbosariga tenglashtiriladi;

Jamgʻarmaning ijro etuvchi direksiyasi faoliyati Jamgʻarmani boshqarish boʻyicha Kengash tomonidan tasdiqlanadigan xarajatlar smetasi asosida Jamgʻarma mablagʻlari hisobidan taʼminlanadi.

2. Quyidagilar:

boshqaruv xodimlarining cheklangan soni 32 nafardan iborat boʻlgan Jamgʻarmaning ijro etuvchi direksiyasi.

Oʻzbekiston Respublikasining Tiklanish va taraqqiyot jamgʻarmasi, Jamgʻarma mablagʻlarini shakllantirish va ulardan foydalanish prinsiplari toʻgʻrisidagi nizom 2-ilovaga muvofiq tasdiqlansin.

3. Belgilansinki, quyidagilar har oyda Jamgʻarma hisobiga oʻtkazib turiladi:

Oʻzbekiston Respublikasining asosiy makroiqtisodiy koʻrsatkichlari prognozi va Davlat budjeti parametrlarini tasdiqlash vaqtida Oʻzbekiston Respublikasi Prezidentining qarorlari bilan strategik resurslarga belgilanadigan chegara narxdan jahon narxining oshishi natijasida tushadigan mablagʻlar;

davlat mulkini xorijiy investorlarga chet el valyutasiga sotishda Oʻzbekiston Respublikasining Davlat budjeti daromadlarini shakllantirishda hisobga olingan hajmlardan ortiqcha tushadigan mablagʻlar;

Jamgʻarmaning aktivlarini boshqarishdan, shu jumladan Jamgʻarma mablagʻlarining boʻsh qoldiqlarini joylashtirishdan keladigan daromadlar;

qonun hujjatlariga muvofiq boshqa manbalar.

4. Quyidagilar belgilansin:

Oʻzbekiston Respublikasi Tiklanish va taraqqiyot jamgʻarmasining mablagʻlari uning Oʻzbekiston Respublikasi Markaziy bankida ochilgan hisobvaraqlarida xorijiy valyutada shakllantiriladi.

Jamgʻarma tijorat banklarni moliyalashtirishni taklif etiladigan investitsiya loyihalari hamda ochiladigan kredit liniyalarining samaradorligi va oʻzini qoplash muddatlarini hisobga olgan holda moliyalashtirish shartlari va Jamgʻarma mablagʻlarini qaytarish mexanizmi toʻgʻrisida imzolanadigan bosh bitimlar asosida amalga oshiradi.

Jamgʻarma tomonidan beriladigan kredit resurslari boʻyicha foiz stavkasi yiliga 6 foizgacha tabaqalashtirilgan miqdorlarda belgilanadi.

Jamgʻarma hisobvaragʻiga tushgan milliy valyutadagi mablagʻlar ular tushgan sanadagi Oʻzbekiston respublika valyuta birjasining savdo sessiyalarida oʻrnatilgan joriy kurs boʻyicha chet el valyutasiga konvertatsiya qilinadi va Jamgʻarmaning valyuta hisobvaragʻiga oʻtkaziladi;

Jamgʻarma hisobidan moliyalashtiriladigan (qoʻshma moliyalashtiriladigan) import kontraktlari Davlat budjeti mablagʻlari hisobiga moliyalashtiriladigan import kontraktlari uchun belgilangan tartibda ekspertizadan oʻtadi.

Oʻzbekiston Respublikasi Tiklanish va taraqqiyot jamgʻarmasi hisobidan kreditlar berish va kredit liniyalarini ochish, shuningdek, kreditlar va kredit liniyalar tarkibini oʻzgartirish faqat Oʻzbekiston Respublikasi Prezidentining qarorlari asosida amalga oshiriladi.

5. Jamgʻarma aktivlarining barqarorligi va ularning daromadliligini taʼminlash uchun Oʻzbekiston Respublikasi Markaziy banki Jamgʻarma bilan ishonchli boshqaruv toʻgʻrisidagi bosh bitim asosida Jamgʻarma mablagʻlarining boʻsh qoldiqlarini yuqori likvidli, ishonchli xorijiy moliya vositalariga joylashtirishni amalga oshirsin.

Oʻzbekiston Respublikasi Moliya vazirligi va Markaziy banki bir oy muddatda:

Jamgʻarmaning boʻsh qoldiqlarini xorijiy moliya vositalariga, investitsiya operatsiyalariga joylashtirish tartibini, jumladan Jamgʻarma mablagʻlarining bir qismini ishonchli tashqi boshqaruvchi tomonidan boshqarishga topshirishni belgilab beradigan meʼyoriy hujjatlarni ishlab chiqsin va Jamgʻarmani boshqarish boʻyicha Kengashga tasdiqlash uchun kiritsin;

Jamgʻarma manbalaridan biri sifatida — alohida soliq stavkalari boʻyicha Oʻzbekiston Respublikasining Tiklanish va taraqqiyot jamgʻarmasi mablagʻlarini shakllantirish Tartibini ishlab chiqsin va tasdiqlasin.

6. Jamgʻarmaning ijro etuvchi direksiyasi zarur aloqa vositalari bilan taʼminlangan holda Oʻzbekiston Respublikasi Tashqi iqtisodiy faoliyat milliy banki binosiga joylashtirilsin.

Tiklanish va taraqqiyot jamgʻarmasi ijrochi direksiyasi Oʻzbekiston Respublikasi Milliy statistika qoʻmitasi, Iqtisodiyot va moliya vazirligi, Investitsiyalar, sanoat va savdo vazirligi, Raqobatni rivojlantirish va isteʼmolchilar huquqlarini himoya qilish qoʻmitasining statistik axborotnomalari yuborilishi shart boʻlgan roʻyxatga kiritilsin.

7. Oʻzbekiston Respublikasi Adliya vazirligi Moliya vazirligi, Markaziy banki, boshqa manfaatdor vazirliklar va idoralar bilan birgalikda bir oy muddatda idoraviy normativ hujjatlarga ushbu qarordan kelib chiqadigan oʻzgarishlar kiritilishini taʼminlasin.

8. Mazkur qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.

1. Oʻzbekiston Respublikasining Tiklanish va taraqqiyot jamgʻarmasi (keyingi oʻrinlarda “Jamgʻarma” deb yuritiladi) Oʻzbekiston Respublikasi Prezidentining “Oʻzbekiston Respublikasining Tiklanish va taraqqiyot Jamgʻarmasini tashkil etish toʻgʻrisida”gi 2006-yil 11-maydagi PF–3751-sonli Farmoniga muvofiq tashkil etilgan. Jamgʻarma Vazirlar Mahkamasi huzuridagi moliyaviy muassasa boʻlib, faoliyatining asosiy maqsadi iqtisodiyotning yetakchi, eng avvalo bazaviy tarmoqlarini modernizatsiyalash va texnikaviy qayta qurollantirish boʻyicha loyihalarning amalga oshirilishini taʼminlash, shuningdek mamlakatni muttasil, barqaror va mutanosib ravishda ijtimoiy-iqtisodiy rivojlantirishga erishish hamda samarali tarkibiy va investitsiyaviy siyosatni amalga oshirishdan iborat.

2. Jamgʻarma oʻz faoliyatini Oʻzbekiston Respublikasi Konstitutsiyasi, Oʻzbekiston Respublikasi qonunlari, Oʻzbekiston Respublikasi Oliy Majlisi palatalari qarorlari, Oʻzbekiston Respublikasi Prezidenti farmonlari, qarorlari va farmoyishlari, Oʻzbekiston Respublikasi Vazirlar Mahkamasi qaror va farmoyishlari, Oʻzbekiston Respublikasining boshqa qonun hujjatlari va ushbu Nizomga muvofiq amalga oshiradi.

3. Jamgʻarma Oʻzbekiston Respublikasi Vazirlar Mahkamasi huzurida tashkil etilib, yuridik shaxs huquqlariga, oʻzining mustaqil balansiga, Oʻzbekiston Respublikasi Markaziy bankida hisobvaraq, shu jumladan xorijiy valyutadagi hisobvaragʻiga, Oʻzbekiston Respublikasi Davlat gerbi tushirilgan muhriga ega boʻladi.

4. Oʻzbekiston Respublikasi Hukumati Oʻzbekiston Respublikasi Moliya vazirligi timsolida Jamgʻarma muassisi hisoblanadi.

5. Jamgʻarma mablagʻlari Oʻzbekiston Respublikasi Markaziy bankining Toshkent shahar Bosh boshqarmasi QKKMda Jamgʻarmaning maxsus hisobvaraqlarida jamlanadi.

6. Jamgʻarma loyihalarni moliyalashtirish (qoʻshma moliyalashtirish) quyidagi yoʻllar bilan amalga oshiriladi:

Jamgʻarmani boshqarish boʻyicha Kengash qarori bilan tasdiqlanadigan roʻyxatga kiritilgan tijorat banklarning (keyingi oʻrinlarda — tijorat banklari) buyurtmanomalariga binoan — muddatli, toʻlovli va qaytarish asosida kreditlar berish va kredit liniyalarini ochish;

Oʻzbekiston Respublikasi Prezidentining qarorlari boʻyicha ayrim investitsiya loyihalarining dastlabki yoki yakuniy texnik-iqtisodiy asoslarini ishlab chiqish uchun Iqtisodiy taraqqiyot va kambagʻallikni qisqartirish vazirligi buyurtmanomalariga binoan — grantlar yoki foizsiz kreditlar berish (yiliga Jamgʻarmaning oʻtgan yildagi foydasining 5 foizidan koʻp boʻlmagan miqdorda);

Oʻzbekiston Respublikasi Moliya vazirligi bilan kelishilgan tijorat banklari va qarz oluvchining buyurtmanomalari boʻyicha hamda Oʻzbekiston Respublikasi Prezidenti qarorlari asosida — Davlat budjeti mablagʻlari hisobidan qoplanadigan imtiyozli kreditlar berish;

tashkil etilayotgan korxona va tashkilotlarning taʼsis hujjatlariga va ularni tashkil etish toʻgʻrisidagi Hukumat qarorlariga muvofiq — yangi tashkil etilayotgan moliyaviy institutlar hamda iqtisodiyotning bazaviy tarmoqlarida xorijiy investitsiyalar ishtirokida strategik ahamiyatga ega boʻlgan korxonalarning ustav kapitaliga investitsiya kiritish (korxona yoki tashkilot ustav kapitali (fondi)ning 25 foizidan koʻp boʻlmagan miqdorda).

Shuningdek, Jamgʻarma mablagʻlari quyidagilarga ishlatilishi mumkin:

Moliya vazirligining buyurtmanomalari boʻyicha va tegishli Oʻzbekiston Respublikasi Prezidenti qarorlariga asosan — davlatning tashqi qarzlari boʻyicha xalqaro moliya institutlari va xorijiy kreditorlar oldidagi majburiyatlarni muddatidan oldin toʻlash;

tasdiqlangan davlat dasturlariga muvofiq Oʻzbekiston Respublikasi Prezidenti qarorlari boʻyicha — yangi zamonaviy xorijiy texnologiyalar, texnika va uskunalar hamda strategik ahamiyatga ega boʻlgan boshqa tovarlarni xarid qilish uchun imtiyozli kreditlar berish.

7. Jamgʻarmaning ijro etuvchi direksiyasi Jamgʻarma mablagʻlarini tasarruf etuvchi hisoblanadi.

8. Jamgʻarma manzili: Oʻzbekiston Respublikasi, Toshkent shahri, Amir Temur koʻchasi, 101-uy.

9. Jamgʻarmaning asosiy vazifalari quyidagilardan iborat:

davlatning Jamgʻarmaga yoʻnaltiriladigan moliyaviy mablagʻlarini jamlash;

iqtisodiyotni rivojlantirish hamda ishlab chiqarishni tarkibiy jihatdan oʻzgartirish va modernizatsiya qilishdagi ustuvor vazifalarni amalga oshirishda hal qiluvchi ahamiyatga ega boʻlgan gʻoyat muhim loyihalarni moliyalashtirish;

strategik jihatdan muhim ahamiyatga ega boʻlgan korxonalarni, birinchi navbatda iqtisodiyotning bazaviy tarmoqlarini yangilash va texnik jihatdan qayta qurollantirish dasturlarini kreditlash;

yoqilgʻi-energetika kompleksi, kimyo sanoati, mashinasozlik va rangli metallurgiya tarmoqlarini texnik jihatdan qayta qurollantirishga hamda ishlab chiqarish surʼat va hajmlarini oshirishga yoʻnaltirilgan loyihalar moliyalashtirilishini taʼminlash;

yetakchi tarmoqlarni modernizatsiya qilish uchun muhim ustuvor ahamiyatga ega investitsiya loyihalarini birgalikda moliyalashtirish, eksportga moʻljallangan va import oʻrnini bosadigan ishlab chiqarishlar uchun xorijiy texnologiyalar va uskunalarni sotib olishga mablagʻlarni maqsadli yoʻnaltirgan holda respublikaning tijorat banklariga Jamgʻarmani boshqarish boʻyicha Kengash qarori bilan belgilangan tartibda kredit liniyalarini ochish.

birinchi navbatda istiqbolli, ammo yetarlicha rivojlanmagan hududlarda ishlab chiqarish va noishlab chiqarish infratuzulmasini shakllantirish boʻyicha ijtimoiy jihatdan ahamiyatli milliy davlat dasturlari va loyihalarning amalga oshirilishini moliyalashtirish;

kelajakda, birinchi navbatda qishloq hududlarida, yangi sanoat ishlab chiqarishlarini joylashtirish uchun ishlab chiqarish infratuzilmasini rivojlantirish va tiklash loyihalarini imtiyozli asosda, shu jumladan keyinchalik Davlat budjeti mablagʻlari hisobidan qoplash yoʻli bilan moliyalashtirish;

respublikaning xalqaro kommunikatsiyalar tarmogʻiga integratsiyalashuvi uchun shart-sharoitlar yaratadigan, xalqaro transport yoʻlaklari va jahon bozorlariga eng qisqa yoʻl bilan chiqishni taʼminlaydigan transport hamda telekommunikatsiyalar infratuzilmasini modernizatsiyalash va rivojlantirishni moliyalashtirish;

davlatning tashqi qarzlari boʻyicha xalqaro moliya institutlari va xorijiy kreditorlar oldidagi majburiyatlarni muddatidan oldin toʻlashni moliyalashtirish;

xalqaro moliya institutlari, respublika va xorijiy mamlakatlarning kredit muassasalari bilan loyihalarning qoʻshma moliyalashtirilishini tashkil etishni taʼminlash.

10. Yuklatilgan vazifalardan kelib chiqqan holda Jamgʻarma quyidagi funksiyalarni bajaradi:

navbatdagi yil uchun moʻljallangan makroiqtisodiy va pul-kredit koʻrsatkichlari, Davlat budjeti hamda rivojlanish davlat dasturlarining asosiy parametrlari bilan bogʻliq holda Jamgʻarma mablagʻlarining kelib tushish va ulardan foydalanish prognozlarini ishlab chiqadi va belgilangan muddatlarda Jamgʻarmani boshqarish boʻyicha Kengashga taqdim etadi;

kelajakda, birinchi navbatda qishloq hududlarida, yangi sanoat ishlab chiqarishlarini joylashtirish uchun ishlab chiqarish infratuzilmasini rivojlantirish va tiklash loyihalarini tuziladigan shartnomalar asosida kreditlaydi;

davlatning tashqi qarzlari boʻyicha xalqaro moliya institutlari va xorijiy kreditorlar oldidagi majburiyatlarni muddatidan oldin toʻlash uchun Oʻzbekiston Respublikasi Moliya vazirligiga qaytarib bermaslik asosida mablagʻlarni beradi;

yangi tashkil etilayotgan moliyaviy institutlar hamda iqtisodiyotning bazaviy tarmoqlarida xorijiy investitsiyalar ishtirokida strategik ahamiyatga ega boʻlgan korxonalarning ustav kapitaliga investitsiya kiritadi (korxona yoki tashkilot ustav kapitali (fondi)ning 25 foizidan koʻp boʻlmagan miqdorda);

Oʻzbekiston Respublikasi Prezidentining qarorlari boʻyicha va Iqtisodiy taraqqiyot va kambagʻallikni qisqartirish vazirligi buyurtmanomalariga binoan ayrim investitsiya loyihalarining dastlabki yoki yakuniy texnik-iqtisodiy asoslarini ishlab chiqish uchun grantlar hamda foizsiz kreditlar beradi, ajratilgan kreditlar miqdori keyinchalik loyihaning umumiy qiymatiga va loyiha Jamgʻarma kreditini jalb qilish yoʻli bilan amalga oshirilgan taqdirda, ajratilayotgan kreditning umumiy qiymatiga qoʻshiladi;

yangi zamonaviy xorijiy texnologiyalar, texnika va uskunalar hamda strategik ahamiyatga ega boʻlgan boshqa tovarlarni tasdiqlangan davlat dasturlariga muvofiq xarid qilish uchun Oʻzbekiston Respublikasi Prezidenti qarorlari boʻyicha imtiyozli kreditlar beradi;

moliyalashtirish shartlari va Jamgʻarma mablagʻlarini qaytarish mexanizmi toʻgʻrisida imzolanadigan bosh bitimlar asosida, har bir tijorat banki uchun har yili belgilanadigan limitlar doirasida tijorat banklarini moliyalashtirishni amalga oshiradi;

Jamgʻarma mablagʻlaridan maqsadli va samarali foydalanilishi va tijorat banklariga berilgan mablagʻlarning oʻz vaqtida qaytarilishi ustidan doimiy ravishda monitoring olib boradi hamda kelib tushish manbalari va ulardan foydalanishning asosiy yoʻnalishlari boʻyicha Jamgʻarma mablagʻlarining hisobini yuritadi;

tijorat banklarida ochilgan hisobvaraqlar va ular boʻyicha amalga oshirilayotgan operatsiyalar toʻgʻrisidagi har qanday maʼlumotni olish huquqiga ega boʻlgan holda, tijorat banklari va qarz oluvchi korxonalar zimmasiga yuklatilgan majburiyatlarning bajarilishi yuzasidan ularning faoliyatini oʻrganadi.

Jamgʻarma mablagʻlarini shakllantirish va ulardan foydalanish tartibini takomillashtirish boʻyicha aniq maqsadli ishlarni amalga oshiradi;

Jamgʻarma faoliyatini takomillashtirish yuzasidan oʻz vakolatlari doirasida choralar koʻradi yoki belgilangan tartibda takliflar kiritadi;

Oʻzbekiston Respublikasi Markaziy banki bilan Jamgʻarma mablagʻlarining boʻsh qoldiqlarini ishonchli boshqarish toʻgʻrisida shartnomalar tuzadi;

Jamgʻarma zimmasiga yuklatilgan vazifalarni bajarish bilan bogʻliq boʻlgan boshqa funksiyalarni amalga oshiradi.

11. Jamgʻarmani boshqarish boʻyicha Kengash Jamgʻarmaning yuqori boshqaruv organi hisoblanadi, uning tarkibi Oʻzbekiston Respublikasi Prezidenti tomonidan tasdiqlanadi.

12. Jamgʻarmani boshqarish boʻyicha Kengash:

Jamgʻarma faoliyatining asosiy yoʻnalishlarini ishlab chiqadi;

Jamgʻarmaning eʼlon qilingan ustav kapitalini qayta koʻrib chiqish toʻgʻrisida qaror qabul qiladi, biroq u Oʻzbekiston Respublikasi Prezidentining “Oʻzbekiston Respublikasining Tiklanish va taraqqiyot jamgʻarmasini tashkil etish toʻgʻrisida” 2006-yil 11-maydagi PF-3751-son Farmonida belgilangan darajadan past boʻlmasligi kerak;

Jamgʻarmaga mablagʻlar kelib tushishi va ulardan foydalanish prognozlarini koʻrib chiqadi hamda ularni navbatdagi yilga moʻljallangan makroiqtisodiy va pul-kredit koʻrsatkichlarining asosiy parametrlari, Davlat budjeti hamda rivojlanish davlat dasturlari bilan bogʻliq holda belgilangan tartibda tasdiqlash uchun kiritadi;

qarz olgan korxonalarni qayta moliyalashtirish (qoʻshma moliyalashtirish) uchun tijorat banklariga Jamgʻarma mablagʻlarini berish muddatlari va shartlari boʻyicha qarorlar qabul qiladi, xalqaro sarmoya bozorlarida amal qilayotgan foiz stavkalaridan kelib chiqib Jamgʻarma tomonidan berilayotgan mablagʻlar boʻyicha foiz stavkalarining aniq miqdorlarini tasdiqlaydi;

kelajakda, birinchi navbatda qishloq hududlarida, yangi sanoat ishlab chiqarishlarini joylashtirish uchun ishlab chiqarish infratuzilmasini rivojlantirish va tiklash loyihalarini moliyalashtirish uchun imtiyozli kreditlarni berish muddatlari va shartlari boʻyicha qarorlar qabul qiladi;

davlatning tashqi qarzlari boʻyicha xalqaro moliya institutlari va xorijiy kreditorlar oldidagi majburiyatlarni muddatidan oldin toʻlash uchun Oʻzbekiston Respublikasi Moliya vazirligiga mablagʻlar ajratib berish toʻgʻrisida qarorlar qabul qiladi;

yangi tashkil etilayotgan moliyaviy institutlar hamda iqtisodiyotning bazaviy tarmoqlarida xorijiy investitsiyalar ishtirokida strategik ahamiyatga ega boʻlgan korxonalarning ustav kapitaliga Jamgʻarma mablagʻlaridan investitsiya kiritish boʻyicha qarorlar qabul qiladi;

ayrim loyihalarning dastlabki yoki yakuniy texnik-iqtisodiy asoslarini ishlab chiqish uchun grantlar va foizsiz kreditlarni ajratish toʻgʻrisida qarorlar qabul qiladi;

yangi zamonaviy xorijiy texnologiyalar, texnika va uskunalar hamda strategik ahamiyatga ega boʻlgan boshqa tovarlarni tasdiqlangan davlat dasturlariga muvofiq xarid qilish uchun Oʻzbekiston Respublikasi Prezidenti qarorlari boʻyicha imtiyozli kreditlar berish toʻgʻrisida qaror qabul qiladi;

Jamgʻarmaning ijro etuvchi direksiyasi faoliyati, ayniqsa Jamgʻarma mablagʻlarining maqsadli yoʻnaltirilganligi, tijorat banklariga moliyalashtirishni oʻz vaqtida ochish hamda ularga berilgan mablagʻlarning qaytarilishini taʼminlash ustidan nazoratni amalga oshiradi;

Jamgʻarma mablagʻlarining ishlatilishi toʻgʻrisida Jamgʻarma ijro etuvchi direktorining hamda qarz olgan korxonalar tomonidan Jamgʻarma mablagʻlaridan samarali foydalanilishini taʼminlashga qaratilgan chora-tadbirlar toʻgʻrisida manfaatdor vazirliklar, idoralar va tashkilotlar rahbarlarining hisobotlarini muntazam ravishda eshitib boradi;

Jamgʻarmaga aktivlarni boshqarish, ekspertiza qilish va investitsiya loyihalarini moliyalashtirish sohasidagi yuqori malakali mutaxassislarni jalb qiladi.

13. Ijro etuvchi direksiya Jamgʻarmaning ijroiya organi hisoblanadi, uning tarkibi va soni oʻrnatilgan tartibda belgilanadi.

14. Jamgʻarmaning ijro etuvchi direksiyasi faoliyati bilan bogʻliq xarajatlar Jamgʻarmani boshqarish boʻyicha Kengash tomonidan tasdiqlangan xarajatlar smetasi asosida Jamgʻarma mablagʻlari hisobidan qoplanadi.

15. Ijro etuvchi direksiya:

Jamgʻarmaga mablagʻlarning kelib tushish va ulardan foydalanish prognozlarini ishlab chiqadi;

qarz oluvchi korxonalarni qayta moliyalashtirish uchun muddatli, toʻlovli va qaytarish shartlari asosida tijorat banklariga moliyaviy mablagʻlarni taqdim etadi;

kelajakda, birinchi navbatda qishloq hududlarida, yangi sanoat ishlab chiqarishlarini joylashtirish uchun ishlab chiqarish infratuzilmasini rivojlantirish va tiklash loyihalarini moliyalashtirish uchun imtiyozli kreditlar berish toʻgʻrisida shartnomalar tuzadi;

davlatning tashqi qarzlari boʻyicha xalqaro moliya institutlari va xorijiy kreditorlar oldidagi majburiyatlarni muddatidan oldin toʻlash uchun Moliya vazirligiga mablagʻlar ajratadi;

yangi tashkil etilayotgan moliyaviy institutlar hamda iqtisodiyotning bazaviy tarmoqlarida xorijiy investitsiyalar ishtirokida strategik ahamiyatga ega boʻlgan korxonalarning ustav kapitaliga Jamgʻarma mablagʻlaridan investitsiya kiritadi;

ayrim investitsiya loyihalarining dastlabki yoki yakuniy texnik-iqtisodiy asoslarini ishlab chiqish uchun loyiha tashabbuskorlariga grantlar va foizsiz kreditlarni, ajratilgan kreditlar miqdorini keyinchalik loyihaning umumiy qiymatiga va loyiha Jamgʻarma kreditini jalb qilish yoʻli bilan amalga oshirilgan taqdirda ajratilayotgan kreditning umumiy qiymatiga qoʻshish sharti bilan berish toʻgʻrisida bitimlar tuzadi;

yangi zamonaviy xorijiy texnologiyalar, texnika va uskunalar hamda strategik ahamiyatga ega boʻlgan boshqa tovarlarni tasdiqlangan davlat dasturlariga muvofiq Oʻzbekiston Respublikasi Prezidenti qarorlari boʻyicha xarid qilish uchun imtiyozli kreditlar beradi;

Jamgʻarma mablagʻlaridan maqsadli va samarali foydalanilishi, tijorat banklariga berilgan mablagʻlarning oʻz vaqtida qaytarilishi ustidan tizimli ravishda monitoring olib boradi;

tijorat banklarida ochilgan hisobvaraqlar holati va ular boʻyicha amalga oshirilayotgan operatsiyalar toʻgʻrisidagi har qanday maʼlumotni olish huquqiga ega boʻlgan holda, qarz oluvchi korxonalar tomonidan Jamgʻarma kreditlari boʻyicha majburiyatlarining bajarilishi masalalari yuzasidan ular faoliyatining monitoringini olib boradi.

Jamgʻarma daromadlari va xarajatlarining ijrosi toʻgʻrisidagi hisobotni ishlab chiqadi va Jamgʻarmani boshqarish boʻyicha Kengash tomonidan maqullangandan soʻng uni belgilangan muddatlarda Oʻzbekiston Respublikasi Moliya vazirligi, Iqtisodiy taraqqiyot va kambagʻallikni qisqartirish vazirligi va Hisob palatasiga taqdim etadi.

16. Jamgʻarmaning ijro etuvchi direktori Oʻzbekiston Respublikasi Vazirlar Mahkamasi tomonidan lavozimga tayinlanadi va lavozimidan ozod etiladi, maqomi boʻyicha vazir oʻrinbosariga tenglashtiriladi;

17. Jamgʻarmaning ijro etuvchi direktori:

Jamgʻarmaga yuklatilgan vazifa va funksiyalarga binoan ijrochi direksiyaning faoliyatini tashkil etadi va shaxsan masʼul boʻladi, xodimlarning belgilangan cheklangan umumiy soni doirasida ijrochi direksiyaning shtat jadvalini shakllantiradi, Jamgʻarma nomidan kredit, xoʻjalik va mehnat shartnomalarini imzolaydi;

Jamgʻarmani boshqarish boʻyicha Kengash bilan kelishgan holda Jamgʻarma mablagʻlaridan maqsadli va samarali foydalanilishi ustidan belgilangan tartibda tekshiruvlar tashkil qiladi, ularning natijalarini koʻrib chiqadi va ular boʻyicha qarorlar qabul qiladi hamda aniqlangan kamchiliklarni bartaraf etish yuzasidan zarur choralarni koʻradi;

qonun hujjatlarida koʻzda tutilgan boshqa vakolatlarni amalga oshiradi.

18. Jamgʻarma apparati tarkibida tegishli loyihalarni moliyalashtirish boʻyicha xulosa yoki tavsiyalar berishga masʼul boʻlgan yuqori malakali ekspertlar guruhi tashkil qilinadi.

19. Jamgʻarma mablagʻlarini shakllantirish manbalari quyidagilardan iborat:

Oʻzbekiston Respublikasining asosiy makroiqtisodiy koʻrsatkichlari prognozi va Davlat budjeti parametrlarini tasdiqlash vaqtida Oʻzbekiston Respublikasi Prezidentining qarorlari bilan strategik resurslarga belgilanadigan chegara narxdan jahon narxining oshishi natijasida tushadigan mablagʻlar;

davlat mulkini xorijiy investorlarga chet el valyutasiga sotishda Oʻzbekiston Respublikasining Davlat budjeti daromadlarini shakllantirish chogʻida hisobga olingan hajmlardan ortiqcha tushadigan mablagʻlar;

Jamgʻarmaning aktivlarini boshqarishdan, shu jumladan Jamgʻarma mablagʻlarining boʻsh qoldiqlarini joylashtirishdan keladigan daromadlar;

qonun hujjatlariga muvofiq boshqa manbalar.

20. Jamgʻarmaning mablagʻlari uning Oʻzbekiston Respublikasi Markaziy bankida ochilgan hisobvaraqlarida xorijiy valyutada shakllantiriladi.

Oʻzbekiston Respublikasi Markaziy banki Jamgʻarma hisobvaragʻiga tushgan milliy valyutadagi mablagʻlarni ular tushgan sanadagi Oʻzbekiston respublika valyuta birjasining savdo sessiyalarida oʻrnatilgan joriy kurs boʻyicha chet el valyutasiga konvertatsiya qiladi va Jamgʻarmaning valyuta hisobvaragʻiga oʻtkazadi.

21. Soliq va toʻlovlarning ayrim turlari boʻyicha mablagʻlarni Jamgʻarma hisobvaragʻiga oʻtkazish belgilangan tartibda amalga oshiriladi.

22. Jamgʻarma mablagʻlari tushumi manbalari va ulardan foydalanish yoʻnalishlari har yili belgilangan tartibda Oʻzbekiston Respublikasi rivojlanish davlat dasturlariga kiritiladi va Jamgʻarma balansida aks ettiriladi.

23.Jamgʻarma mablagʻlari quyidagi maqsadlar uchun foydalaniladi:

a) avvalo yoqilgʻi-energetika kompleksi, kimyo sanoati, mashinasozlik, rangli metallurgiya va iqtisodiyotning boshqa bazaviy tarmoqlarida, shuningdek transport va telekommunikatsiya sohasida rivojlanish davlat dasturlariga kiritilgan gʻoyat muhim loyihalarni moliyalashtirish, shu jumladan xalqaro va xorijiy moliyaviy institutlar ishtirokidagi loyihalarda Oʻzbekiston Respublikasi ulushini qoʻshma moliyalashtirish;

b) kelajakda, birinchi navbatda qishloq hududlarida, yangi sanoat ishlab chiqarishlarini joylashtirish uchun ishlab chiqarish infratuzilmasini rivojlantirish va tiklash loyihalarini moliyalash maqsadida, shu jumladan Davlat budjeti mablagʻlari hisobidan qoplanadigan imtiyozli kreditlar berish;

v) yangi tashkil etilayotgan moliyaviy institutlar hamda iqtisodiyotning bazaviy tarmoqlarida xorijiy investitsiyalar ishtirokida strategik ahamiyatga ega boʻlgan korxonalarning ustav kapitaliga investitsiya kiritish;

g) davlatning tashqi qarzlari boʻyicha xalqaro moliya institutlari va xorijiy kreditorlar oldidagi majburiyatlarni muddatidan oldin toʻlash;

d) Oʻzbekiston Respublikasi Prezidenti tomonidan tasdiqlangan modernizatsiyalash, texnik va texnologik qayta jihozlash dasturlari doirasida tijorat banklariga xorijiy valyutada ochilayotgan kredit liniyalari orqali investitsiya loyihalarini jadal moliyalashtirish hamda amalga oshirish;

e) ayrim loyihalarning dastlabki yoki yakuniy texnik-iqtisodiy asoslarini ishlab chiqishni grant asosida yoki foizsiz kreditlar ajratish yoʻli bilan moliyalashtirish;

j) yangi zamonaviy xorijiy texnologiyalar, texnika va uskunalar hamda strategik ahamiyatga ega boʻlgan boshqa tovarlarni tasdiqlangan davlat dasturlariga muvofiq xarid qilish uchun imtiyozli kreditlar berish;

z) birinchi navbatda istiqbolli, ammo yetarlicha rivojlanmagan hududlarda ishlab chiqarish va noishlab chiqarish infratuzilmasini shakllantirish boʻyicha ijtimoiy jihatdan ahamiyatli milliy davlat dasturlari va loyihalarini, Davlat budjeti va rivojlanish davlat dasturlarining tasdiqlangan parametrlari doirasida, grant asosida moliyalashtirish (qoʻshma moliyalashtirish);

i) tijorat banklari bilan birgalikda qarz oluvchi korxonalarning investitsiya dasturi (biznes-rejalari)ni, shu jumladan ishlab chiqarishni texnik jihatdan qayta jihozlash, ishlab chiqarish quvvatlarining ishlatilishini koʻpaytirish, raqobatbardosh mahsulot ishlab chiqarish va uni eksport qilish hajmlarini oshirish hamda qoʻshilgan qiymat oʻsishini taʼminlashga imkoniyat beruvchi loyihalarni qoʻshma moliyalashtirish;

k) Jamgʻarma boshqaruvi va ijro etuvchi apparatining taʼminoti bilan bogʻliq boʻlgan xarajatlarni qoplashga.

24. Mablagʻlarni berish muddati va shartlari Jamgʻarmani boshqarish boʻyicha Kengash qarori bilan belgilanadi. Jamgʻarma tomonidan beriladigan kredit resurslari boʻyicha foiz stavkasi yiliga 6 foizgacha tabaqalashtirilgan miqdorlarda belgilanadi.

Jamgʻarmaning kredit resurslari shartnomada belgilangan chet el valyutasida ajratiladi.

Tijorat banki marjasining eng yuqori chegarasi Jamgʻarma va tijorat banki oʻrtasida tuziladigan kredit shartnomasida har bir loyiha boʻyicha alohida belgilanadi.

Ajratilgan mablagʻlarning qaytarilishi tijorat banklari tomonidan kechiktirilgan holatlarda har bir kechiktirilgan kun uchun muddati kechiktirilgan toʻlovlar boʻyicha qarzdorlik summasining 0,01 foizi miqdorida (qarzga olingan mablagʻlar hajmining 10 foizidan oshmagan holda) penya undiriladi.

Jamgʻarma mablagʻlari hisobidan birgalikda moliyalashtiriladigan import kontraktlari boʻyicha avans toʻlovlarini toʻlash, qoidaga koʻra, yetkazib beruvchi tomonidan qayta moliyalashtiruvchi tijorat bankiga birinchi darajali xorijiy bank tomonidan, avans toʻlovini qaytarishga berilgan kafolatnomani taqdim etgan holda amalga oshiriladi.

25. Tijorat banklariga ajratiladigan kredit mablagʻlarining hajmi ularning buyurtmanomalari asosida belgilanadi va ushbu buyurtmanomalarda qarz oluvchi korxonalarning kredit olish uchun tijorat banki tomonidan maʼqullangan loyihalar mablagʻlarining umumiy miqdori aks ettiriladi.

Tijorat banklariga har bir loyiha (modernizatsiya, qayta qurish yoki ishlab chiqarishni texnik jihatdan qayta qurollantirish) uchun beriladigan kredit hajmi loyiha qiymati umumiy miqdorining 75 foizidan oshmasligi kerak.

Qarz oluvchi korxonalar (tashkilotlar)ga kredit berish Jamgʻarmani boshqarish boʻyicha Kengash tomonidan tasdiqlanadigan Oʻzbekiston Respublikasining Tiklanish va taraqqiyot jamgʻarmasi mablagʻlari hisobidan moliyalashtirish uchun investitsiya loyihalarini tanlab olish shartlari, koʻrib chiqish tartibi va ekspertizasi toʻgʻrisidagi Nizom va Oʻzbekiston Respublikasi Markaziy bankning hujjatlari va boshqa qonun hujjatlariga muvofiq amalga oshirib boriladi.

26. Jamgʻarmani boshqarish boʻyicha Kengash tomonidan tijorat banklarining buyurtmanomalarini koʻrib chiqish muddati ariza olingan kundan boshlab 30 kundan oshmasligi lozim. Ushbu muddatda Jamgʻarmani boshqarish boʻyicha Kengash tijorat banki tomonidan taklif qilingan loyihani moliyalashtirish toʻgʻrisida ijobiy qaror chiqaradi yoki tijorat bankiga yozma ravishda asoslangan raddiyanoma beradi.

27. Jamgʻarmani boshqarish boʻyicha Kengashning ijobiy xulosasi qabul qilinganidan soʻng Jamgʻarmaning ijro etuvchi direksiyasi 5 ish kuni mobaynida tijorat banki bilan kredit shartnomasini tuzadi.

Kredit shartnomasida tijorat bankiga berilayotgan kredit resurslarining miqdori, foiz stavkasi va maqsadi (yoʻnaltirish manzili), muddati va shartlari, shuningdek tomonlarning qonun hujjatlari talablariga muvofiq huquq va burchlari hamda boshqa masalalar aks ettiriladi.

28. Jamgʻarmani boshqarish boʻyicha Kengash tomonidan Oʻzbekiston Respublikasi Moliya vazirligi va Iqtisodiy taraqqiyot va kambagʻallikni qisqartirish vazirligining buyurtmanomalarini koʻrib chiqish muddati buyurtmanoma olingan sanadan boshlab 15 kundan oshmasligi lozim.

Jamgʻarmani boshqarish boʻyicha Kengashning ijobiy qarori qabul qilinganidan soʻng Jamgʻarmaning ijro etuvchi direksiyasi 5 ish kuni mobaynida taqdim etilgan buyurtmanoma va Kengash qaroriga binoan:

1) Moliya vazirligi bilan — qaytarib bermaslik asosida buyurtmanomada va ushbu Nizomda belgilangan maqsadlar uchun mablagʻ ajratish toʻgʻrisida bitim;

2) Iqtisodiy taraqqiyot va kambagʻallikni qisqartirish vazirligi va tegishli loyihaning tashabbuskori bilan — buyurtmanomada va ushbu Nizomda belgilangan maqsadlar uchun grant asosida mablagʻ ajratish yoki foizsiz kredit berish toʻgʻrisida bitim tuzadi.

29. Jamgʻarmaning vaqtincha boʻsh mablagʻlari ularni birinchi darajali xalqaro moliya vositalariga joylashtirish maqsadida Oʻzbekiston Respublikasi Markaziy bankiga ishonchli boshqaruv uchun belgilangan tartibda oʻtkaziladi.

Jamgʻarma mablagʻlari boʻsh qoldiqlarining umumiy hajmi uning jami aktivlarining kamida qirq foizini tashkil etishi lozim.

Oʻzbekiston Respublikasi Markaziy banki har chorakda Jamgʻarmani boshqarish boʻyicha Kengashga Jamgʻarma mablagʻlarini ishonchli boshqarish natijalari, jumladan operatsiyalar boʻyicha daromadlilik, hisobot davrida olingan daromad miqdori, joylashtirilgan Jamgʻarma mablagʻlari portfeli tarkibi, foiz stavkalarining joriy holati toʻgʻrisidagi maʼlumotlarni taqdim etadi.

30. Jamgʻarmaning ijro etuvchi direksiyasi har yili Oʻzbekiston Respublikasi Moliya vazirligi, Iqtisodiy taraqqiyot va kambagʻallikni qisqartirish vazirligi, Markaziy banki, tijorat banklari va boshqa idoralardan olingan dastlabki maʼlumotlar hamda hisobot davrida oʻtkazilgan tizimli monitoring asosida keyingi kalendar yil uchun Jamgʻarmaga mablagʻlar kelib tushishi va ulardan foydalanish prognozi loyihasini ishlab chiqadi hamda uni Jamgʻarmani boshqarish boʻyicha Kengash tasdiqlashi uchun taqdim etadi.

31. Jamgʻarma mablagʻlarining kelib tushishi va ulardan foydalanishning prognoz loyihalarini tayyorlash, koʻrib chiqish va tasdiqlashda Oʻzbekiston Respublikasi Davlat budjeti va rivojlanish davlat dasturlarining kelgusi yil parametrlarini ishlab chiqish va tasdiqlash bilan uzviy bogʻliq holda amalga oshiriladi.

Respublikaning strategik resurslari boʻyicha jahon bozorlaridagi qulay narxlar natijasida hosil boʻladigan prognozdan yuqori tushumlarning pul massasi hajmiga va inflyatsiya darajasiga taʼsirini bartaraf qilish maqsadida Jamgʻarma mablagʻlaridan foydalanishning yuqori chegarasi asosiy makroiqtisodiy va pul-kredit koʻrsatkichlarining prognoz parametrlaridan kelib chiqqan holda ishlab chiqiladi va tasdiqlanadi.

32. Jamgʻarma mablagʻlari kelib tushishi va ulardan foydalanish prognozlarida umuman prognoz qilinayotgan yil uchun, shu jumladan choraklar boʻyicha quyidagilar aks ettiriladi:

jumladan, har bir manba boʻyicha mablagʻ tushumlarining umumiy hajmi;

ustuvor investitsiyaviy va ijtimoiy yoʻnaltirilgan loyihalarni, qarz oluvchi korxonalarning investitsiya dasturlarini moliyalashtirish, olinayotgan uzoq muddatli kredit va investitsiyalarga xizmat koʻrsatish hamda Jamgʻarmaning ijro etuvchi direksiyasi faoliyatini moliyaviy taʼminlash bilan bogʻliq xarajatlarni qoplashga mablagʻlar ajratib berish boʻyicha sarf-xarajatlar.

33. Jamgʻarmaning huquqlari:

a) tijorat banklari hamda qarz olgan tashkilotlarda Jamgʻarma mablagʻlaridan maqsadli va samarali foydalanish ustidan tekshiruvlar oʻtkazish;

b) Jamgʻarma mablagʻlarining maqsadli foydalanilishi monitoringini olib borish uchun zarur boʻladigan maʼlumotlarni, jumladan, Jamgʻarma tomonidan ajratilgan mablagʻlar ishlatilishining holati va prognozi toʻgʻrisidagi hamda boshqa maʼlumotlarni tijorat banklaridan olish;

v) loyihalarning birlamchi texnik-iqtisodiy asoslanganligini koʻrib chiqish, shu jumladan Jamgʻarma mablagʻlarining maqsadli va samarali foydalanilishi monitoringi hamda tekshiruvini olib borish maqsadida yuqori malakali mustaqil ekspertlar va soha mutaxassislarini jalb qilish.

34. Jamgʻarma majburiyatlari:

a) yuklatilgan vazifalarga muvofiq holda:

Jamgʻarma mablagʻlarini jalb etish va jamlashga qaratilgan ishlarning olib borilishini;

Jamgʻarma mablagʻlarining aniq belgilangan maqsadlarga yoʻnaltirilishini taʼminlash.

b) Jamgʻarmani boshqarish boʻyicha Kengashga choraklik va yillik hisobotlarni belgilangan tartibda va muddatlarda taqdim etish.

35. Jamgʻarmaning ijro etuvchi direksiyasi zimmasiga Jamgʻarma mablagʻlarining qatʼiyan maqsadli va qonuniy yoʻnaltirilishi, shuningdek buxgalterlik hisobining yuritilishi va Jamgʻarma faoliyati boʻyicha hisobotlarning tuzilishi uchun javobgarlik yuklanadi.

36. Tijorat banklari Jamgʻarma mablagʻlaridan toʻgʻri va maqsadli foydalanish hamda ularni oʻz vaqtida qaytarish uchun masʼuldirlar.

37. Jamgʻarmaning ijro etuvchi direksiyasi Jamgʻarma mablagʻlarining maqsadli yoʻnaltirilishi monitoringini doimiy ravishda belgilangan tartibda oʻtkazib boradi.

Tijorat banklari tomonidan Jamgʻarma mablagʻlarining maqsadga muvofiq boʻlmagan holda foydalanish holatlari aniqlanganda, maqsadga nomuvofiq foydalanilgan mablagʻlarning umumiy hajmi muddatidan oldin undirib olinib, Jamgʻarma hisobvaragʻiga oʻtkaziladi hamda Jamgʻarma va tijorat banki oʻrtasida tuzilgan shartnomada belgilangan jarima sanksiyalari qoʻllaniladi.

38. Jamgʻarma mablagʻlarining Jamgʻarma ijro etuvchi direksiyasi tomonidan qonuniy va qatʼiyan maqsadli yoʻnaltirilishi ustidan nazorat Jamgʻarmani boshqarish boʻyicha Kengash tomonidan amalga oshiriladi.

39. Jamgʻarmaning har yilgi auditi mustaqil xalqaro auditor tomonidan amalga oshiriladi, Jamgʻarma mablagʻlarining shakllantirilishi va foydalanilishi Oʻzbekiston Respublikasi hisob palatasi tomonidan tekshirib turiladi.

40. Tijorat banklari tomonidan oʻz vaqtida qaytarilmagan Jamgʻarma mablagʻlari qonun hujjatlarida belgilangan tartibda undiriladi.

41. Jamgʻarmani qayta tuzish va tugatish qonun hujjatlarida belgilangan tartibda amalga oshiriladi.