Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi va Ozarbayjon Respublikasi Davlat bojxona qoʻmitasi, keyingi oʻrinlarda “Tomonlar” deb ataluvchilar,

1996-yil 27-maydagi Oʻzbekiston Respublikasi Hukumati bilan Ozarbayjon Respublikasi Hukumati oʻrtasida bojxona ishlarida hamkorlik va oʻzaro yordam toʻgʻrisidagi Bitim qoidalariga amal qilgan holda,

Oʻzbekiston Respublikasi va Ozarbayjon Respublikasi iqtisodiy operator institutlari Tomonlar davlatlarining qonunchiligida belgilangan xavfsizlik talablariga, shuningdek, Jahon bojxona tashkilotining savdo xavfsizligi va yengillashtirish standartlari (keyingi oʻrinlarda — “Hadli standartlar” deb yuritiladi) doirasida belgilangan xavfsizlik va muvofiqlik xalqaro standartlariga asoslanganligini tan olib,

Tomonlar davlat chegarasini boshqarish jarayonlari, tartiblari, mexanizmlarining oʻziga xos xususiyatlarini, vakolatli iqtisodiy operator institutlarini tartibga soluvchi milliy qonunchiliklarini anglagan holda,

Tomonlar qabul qilgan iqtisodiy operator institutlari va boshqa chora-tadbirlar yetkazib beruvchidan oluvchigacha boʻlgan zanjir xavfsizligini taʼminlashga va Tomonlar davlatlari qonunchiligiga rioya qilishga sezilarli hissa qoʻshishini hisobga olib,

quyidagilar toʻgʻrisida kelishib oldilar:

Mazkur Bitimda foydalanilgan atamalar quyidagilarni anglatadi:

“toʻgʻridan-toʻgʻri yetkazib berish” — bir Tomon davlati hududidan boshqa Tomon davlati hududiga tovarlarni olib oʻtish, bunda tovar sotuvchisi va eksportchisi (deklaranti) vakolatli iqtisodiy operator, va (yoki) bunday tovarlarning xaridori va importchisi (deklaranti) vakolatli iqtisodiy operator boʻlsa;

“vakolatli iqtisodiy operator” — Tomonlar davlatining qonun hujjatlariga, shuningdek ularning davlatlari ishtirokchi boʻlgan xalqaro shartnomalariga muvofiq vakolatli iqtisodiy operator maqomi berilgan yuridik shaxs;

“soddalashtirishlar” — har bir Tomon davlatining qonunchiligiga, shuningdek, Tomonlar davlati ishtirokchi boʻlgan xalqaro shartnomalarga muvofiq qoʻllaniladigan vakolatli iqtisodiy operatorlarga nisbatan bojxona operatsiyalari va bojxona nazoratining xususiyatlari.

Mazkur Bitim quyidagilarga nisbatan amal qiladi:

Ozarbayjon Respublikasi Davlat bojxona qoʻmitasi tarafidan vakolatli iqtisodiy operator maqomini taqdim etish toʻgʻrisidagi qaror qabul qilingan yuridik shaxslarga;

Oʻzbek tomoni tarafidan vakolatli iqtisodiy operatorlar reyestriga kiritilgan yuridik shaxslarga.

1. Tomonlar davlatlarining vakolatli iqtisodiy operator institutlari quyidagi sohalarda solishtirish mumkin ekanligini tan oladilar:

vakolatli iqtisodiy operator maqomini berish, toʻxtatib turish va undan mahrum qilish tartibi va shartlari;

vakolatli iqtisodiy operatorlarga nisbatan tekshirish faoliyatini amalga oshirish tartibi, shuningdek, vakolatli iqtisodiy operatorlarning faoliyati ustidan nazorat.

2. Tomonlar davlatlarida vakolatli iqtisodiy operator maqomini berish, toʻxtatib turish va undan mahrum qilish tartib-taomillari Hadli standartlar prinsiplari va normalariga asoslanadi.

1. Tomonlarning har biri boshqa Tomonning yuridik shaxsga vakolatli iqtisodiy operator maqomini berish toʻgʻrisidagi qarorini tan oladi, shu bilan birga, boshqa Tomondan vakolatli iqtisodiy operator maqomini berish bilan bogʻliq qoʻshimcha maʼlumotlarni soʻrash huquqini oʻzida saqlab qoladi.

2. Tomonlarning har biri import qilinadigan tovarlarga nisbatan bojxona nazorati doirasida Tomonlar davlatlari bojxona qonunchiligining buzilishi xavfini baholashda boshqa Tomon davlati yuridik shaxsining vakolatli iqtisodiy operatori maqomi mavjudligini hisobga oladi.

3. Tomonlar boshqa Tomon davlatining vakolatli iqtisodiy operatorini uning roʻyxat raqamini (vakolatli iqtisodiy operatorning guvohnoma raqami yoki vakolatli iqtisodiy operator maqomini taqdim etish toʻgʻrisidagi qaror raqami) tovarlar olib kirilgan davlatda ularni chiqarish uchun qoʻllaniladigan bojxona deklaratsiyasi va (yoki) boshqa hujjatda qayd etish orqali identifikatsiyalaydi.

4. Tomonlarning har biri tovarlarni toʻgʻridan-toʻgʻri yetkazib berishda bojxona deklaratsiyasi va tovarlarni chiqarish bosqichida quyidagi soddalashtirishlarni taʼminlashga intiladi:

bojxona operatsiyalarini ustuvor tartibda amalga oshirish;

birinchi navbatda bojxona koʻrigidan oʻtkazish yoki tekshirish;

xavflarni boshqarish tizimining talablari bilan belgilanadigan minimal darajada hujjatli va bojxona nazoratini amalga oshirish.

5. Yetkazib berish vaqtida bunday yetkazib berish taraflaridan biri vakolatli iqtisodiy operatori boʻlmagan hollarda, Tomonlarning milliy qonunchiligi va (yoki) Tomonlar davlatlari ishtirokchi boʻlgan xalqaro shartnomalarida nazarda tutilgan qoʻshimcha soddalashtirishlarni taqdim etishlari mumkin.

6. Tomonlarning har biri, asoslar mavjud boʻlgan taqdirda, vakolatli iqtisodiy operatorlarga nisbatan taqdim etilgan soddalashtirishlarning bir qismini yoki barchasini toʻxtatib turish yoki bekor qilishga haqli.

7. Bunda koʻrsatilgan Tomon boshqa Tomonni tegishli qaror qabul qilingandan keyin 5 (besh) ish kuni ichida qarorning sabablarini koʻrsatgan holda xabardor qilishi lozim.

1. Basharti Tomonlardan biri boshqa Tomonning vakolatli iqtisodiy operatori tarafidan bojxona qonunchiligi buzilganligi belgilarini aniqlasa, bunday holat aniqlagan Tomon boshqa Tomonni tasdiqlovchi hujjatlar va maʼlumotlarni taqdim etgan holda, bunday subyektga nisbatan tekshirish faoliyatini amalga oshirish yuzasidan yozma ravishda xabardor qiladi.

2. Koʻrsatilgan vakolatli iqtisodiy operator tomonidan Tomonlar davlatlaridan birining bojxona qonunchiligi buzilganligi holati tasdiqlangan hollarda, koʻrsatilgan vakolatli iqtisodiy operator Tomoni oʻz davlatining qonunchiligiga muvofiq uni vakolatli iqtisodiy operator maqomidan mahrum qilish toʻgʻrisidagi masalani koʻrib chiqish majburiyatini oladi.

1. Tomonlar vakolatli iqtisodiy operator toʻgʻrisidagi maʼlumotlar, shu jumladan, yuridik shaxsning nomi, uning roʻyxatga olish raqami (vakolatli iqtisodiy operatorning guvohnoma raqami yoki vakolatli iqtisodiy operator maqomini taqdim etish toʻgʻrisidagi qaror raqami), manzili va unga vakolatli iqtisodiy operator maqomi berilgan sana toʻgʻrisidagi maʼlumotlarning yozma shakldagi muntazam almashinuvini taʼminlaydilar.

2. Ushbu moddaning 1-bandida koʻrsatilgan uzatiladigan maʼlumotlarning shakli va tuzilishi, shuningdek, uni uzatish tartibi alohida texnik shartlar bilan belgilanadi, uni Tomonlar mazkur Bitim kuchga kirgan kundan boshlab 6 oydan kechiktirmay tasdiqlaydilar.

3. Tomonlar bir-birlarini vakolatli iqtisodiy operator instituti faoliyati toʻgʻrisidagi huquqiy tartibga solishga kiritilgan oʻzgartirishlar toʻgʻrisida xabardor qiladilar va vakolatli iqtisodiy operator maqomini berish sohasida tajriba almashadilar.

1. Axborotni uzatish, foydalanish va oshkor qilish har bir Tomon davlatining qonunchiligiga, shuningdek, Tomonlar davlatlari ishtirok etuvchi xalqaro shartnomalarga muvofiq amalga oshiriladi. Tomonlar mazkur Bitimni amalga oshirish doirasida olingan maʼlumotlarning har bir Tomon davlatining qonunchiligiga muvofiq tegishli tarzda himoya qilinishini taʼminlaydilar.

2. Mazkur Bitimga muvofiq olingan maʼlumotlardan faqat bojxona maqsadlarida foydalaniladilar. Mazkur Bitimga muvofiq olingan maʼlumotlar boshqa uchinchi tomonga ularni taqdim qilgan Tomonning oldindan yozma roziligisiz berilishi mumkin emas.

1. Mazkur Bitim boʻyicha Tomonlar tarafidan amalga oshiriladigan barcha tadbirlar Tomonlarning har bir davlatining qonunchiligiga, shuningdek, Tomonlar davlatlari ishtirokchi boʻlgan xalqaro shartnomalarga muvofiq amalga oshiriladi.

2. Mazkur Bitimni amalga oshirish maqsadida Tomonlar bojxona operatsiyalarini amalga oshirish jarayonida vakolatli iqtisodiy operatorlarida yuzaga keladigan muammolarni hal qilish maqsadida oʻzaro tezkor hamkorlik uchun masʼul boʻlgan Tomonlarning vakolatli mansabdor shaxslarini belgilaydilar.

Mazkur Bitim qoidalarini talqin qilish va amalga oshirishdan kelib chiqadigan nizolar Tomonlar oʻrtasidagi maslahatlashuvlar va muzokaralar orqali hal etiladi.

Tomonlarning oʻzaro yozma kelishuviga koʻra, mazkur Bitimga uning ajralmas qismi hisoblanadigan alohida bayonnomalar bilan rasmiylashtiriladigan va mazkur Bitimning 11-moddasiga muvofiq kuchga kiradigan oʻzgartirishlar kiritilishi mumkin.

1. Mazkur Bitim nomuayyan muddatga tuziladi va uning kuchga kirishi uchun zarur boʻlgan davlat ichki protseduralari ozarbayjon tomoni tarafidan bajarilganligi toʻgʻrisidagi yozma xabarnoma oʻzbek tomoni tarafidan diplomatik kanallar orqali qabul qilingan sanadan boshlab kuchga kiradi.

2. Mazkur Bitim Tomonlardan biri boshqa Tomonning uni tugatish niyati toʻgʻrisidagi yozma xabarnomasini olgan kundan boshlab 3 (uch) oy oʻtgunga qadar amal qiladi.

3. Mazkur Bitim tugatilgan hollarda, Tomonlarning har biri uni amalga oshirish doirasida olingan maʼlumotlarning himoyasini taʼminlashda davom etadi.

Boku shahrida, 2025-yil 2-iyulda, ikki asl nusxada, har biri oʻzbek, ozarbayjon va rus tillarida tuzildi, bunda barcha matnlar teng autentikdir.

Matnlar oʻrtasida tafovut yuzaga kelgan hollarda, Tomonlar rus tilidagi matnga murojaat qiladilar.