Vazirlar Mahkamasi qaror qiladi:

Soliq va toʻlov intizomini mustahkamlash boʻyicha Hukumat komissiyasi toʻgʻrisidagi Nizom ilovaga muvofiq tasdiqlansin.

1. Vazirlar Mahkamasining 1996-yil 5-dekabrdagi 431-son qaroriga muvofiq tuzilgan Soliq va toʻlov intizomini mustahkamlash boʻyicha Hukumat Komissiyasi (keyingi oʻrinlarda — komissiya deb ataladi) oʻz faoliyatini soliqlar, majburiy toʻlovlarning budjetga va budjetdan tashqari fondlarga oʻz vaqtida tushishini taʼminlash, soliq va toʻlov intizomini mustahkamlash yoʻli bilan vaqtida toʻlanmagan toʻlovlarni qisqartirish, soliqlar, toʻlovlarning budjet va budjetdan tashqari fondlarga toʻliq yigʻilishini taʼminlash maqsadida amalga oshiradi.

2. Komissiya oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Prezidentining farmonlariga, Oʻzbekiston Respublikasi Vazirlar Mahkamasining qarorlariga, shuningdek, mazkur Nizomga amal qiladi.

3. Komissiyaning oʻz vakolatlari doirasida qabul qilingan qarorlari va yozma koʻrsatmalari vazirliklar, idoralar, qoʻmitalar, mahalliy hokimiyat va boshqaruv organlari, xoʻjalik yurituvchi subyektlar va ularning birlashmalari (xoʻjalik uyushmalari), mansabdor shaxslar va fuqarolar tomonidan bajarilishi majburiy hisoblanadi.

4. Quyidagilar Komissiyaning asosiy vazifalari va faoliyat yoʻnalishlari hisoblanadi:

xoʻjalik yurituvchi subyektlar tomonidan soliq qonunchiligiga rioya etilishi, soliqlar va majburiy toʻlovlarning oʻz vaqtida va toʻliq toʻlanishini nazorat qilish;

budjetga vaqtida toʻlanmagan toʻlovlarni qisqartirish va amaldagi qonunchilikka muvofiq belgilangan soliqlar va majburiy toʻlovlarning toʻliq undirilishini taʼminlashga oid chora-tadbirlar ishlab chiqish.

5. Asosiy vazifalari va faoliyat yoʻnalishlariga muvofiq Komissiyaga quyidagilar yuklanadi:

amaldagi qonunchilikka muvofiq soliqlar, budjetga va budjetdan tashqari fondlarga ajratmalar toʻlovchi xoʻjalik yurituvchi subyektlarni toʻla qamrab olish, shuningdek, ularni toʻlashdan bosh tortgan yuridik va jismoniy shaxslarni aniqlash;

xoʻjalik yurituvchi subyektlar tomonidan budjet va budjetdan tashqari fondlarga soliqlar va boshqa majburiy toʻlovlarni oʻz vaqtida va toʻliq toʻlanishi;

moliya, soliq va bojxona organlari tomonidan xoʻjalik yurituvchi subyektlarning budjet va budjetdan tashqari fondlar oldidagi qarzdorligini qisqartirish va bartaraf etishga doir qonunchilikda nazarda tutilgan chora-tadbirlarni toʻliq va oʻz vaqtida qoʻllash;

xoʻjalik yurituvchi subyektlarning budjetga va budjetdan tashqari fondlarga toʻlovlarni oʻz vaqtida va toʻliq toʻlash masalalariga oid amaldagi qonunchilikka rioya etishlari masalalari yuzasidan tekshiruvlar oʻtkazish toʻgʻrisida qarorlar qabul qilish mexanizmini takomillashtirish va nazorat qilish;

xoʻjalik yurituvchi subyektlarning budjet va budjetdan tashqari fondlar oldida qarzdorligining yuzaga kelishi sabablarini tahlil etish;

iqtisodiyotni rivojlantirishning belgilangan ustuvorliklariga muvofiq, vaqtida toʻlanmagan toʻlovlarga penya qoʻshishni toʻxtatgan holda, toʻlovni kechiktirish va (yoki) boʻlib-boʻlib toʻlash imkoni berilishi mumkin boʻlgan toʻlovlarni vaqtida toʻlamagan korxonalar va tashkilotlar roʻyxatini belgilash;

budjetga oʻz vaqtida toʻlanmagan toʻlovlarni kechiktirish va (yoki) boʻlib-boʻlib toʻlash imkonini berishning asosiy prinsiplari, shartlari va tartibini belgilash;

toʻlovni kechiktirish va boʻlib-boʻlib toʻlash shartlari va tartibiga xoʻjalik yurituvchi subyektlar tomonidan rioya etilishini nazorat qilish;

budjet va budjetdan tashqari fondlarga toʻlovlar toʻliq va oʻz vaqtida toʻlanishi va budjetga qoʻshilishi masalalari boʻyicha vazirliklar va idoralarning faoliyatini muvofiqlashtirish;

budjetga vaqtida toʻlanmagan toʻlovlarni qisqartirish va amaldagi qonunchilikka muvofiq belgilangan soliqlar va majburiy toʻlovlarning toʻliq undirilishini taʼminlash chora-tadbirlarini belgilash;

budjetga va budjetdan tashqari fondlarga vaqtida toʻlanmagan toʻlovlarni qisqartirish boʻyicha topshiriqlarning bajarilishini nazorat qilish;

Moliya vazirligi tomonidan respublika budjetining daromadlari va xarajatlariga oid pul hisoblarini oʻtkazish yakunlarini koʻrib chiqish.

6. Komissiya quyidagi huquqlarga ega:

Davlat soliq qoʻmitasi va Moliya vazirligining taklifiga binoan budjet va budjetdan tashqari fondlarga vaqtida toʻlanmagan toʻlovlarni, penya qoʻshishni toʻxtatgan holda, kechiktirish va (yoki) boʻlib-boʻlib toʻlashga ruxsat berish;

belgilangan topshiriqlarning bajarilmasligida aybdor boʻlgan shaxslarni amaldagi qonunchilikka muvofiq javobgarlikka tortgan holda, tarmoq va hududlar boʻyicha vaqtida toʻlanmagan toʻlovlarni qisqartirish yuzasidan har oyda topshiriqlar belgilash;

belgilangan tartibda moliya, soliq va bojxona organlari faoliyati tekshirilishini tashkil etish;

soliq qonunchiligini buzganligi va budjetga va budjetdan tashqari fondlarga toʻlovlar oʻz vaqtida va toʻliq toʻlanishini taʼminlamaganligi uchun idoralar, mulkchilik shaklidan qatʼi nazar, korxonalar va tashkilotlar, joylardagi davlat hokimiyati va boshqaruvi organlarining rahbarlarini egallab turgan lavozimidan boʻshatishgacha boʻlgan javobgarlikka tortish toʻgʻrisidagi takliflarni Oʻzbekiston Respublikasi Hukumatining koʻrib chiqishi uchun kiritish;

vazirliklar, idoralar, banklar, korxonalar, birlashmalar (xoʻjalik uyushmalari), mahalliy hokimiyat va boshqaruv organlari rahbarlarining soliqlar hamda majburiy toʻlovlarning budjetga va budjetdan tashqari fondlarga oʻz vaqtida kelib tushishi masalalari boʻyicha hisobotlarini tinglash;

qoʻyilgan vazifalarni bajarish uchun tegishli vazirliklar, idoralar, korxonalar va tashkilotlarning, joylardagi davlat hokimiyati va boshqaruvi organlarining mutaxassislarini jalb etish.

7. Komissiya ishi Komissiya raisi tomonidan tasdiqlanadigan ish rejalariga muvofiq muntazam majlislar (bir oyda kamida bir marta) oʻtkazish yoʻli bilan amalga oshiriladi.

8. Komissiya tarkibi Oʻzbekiston Respublikasi Vazirlar Mahkamasi qarori bilan tasdiqlanadi.

9. Komissiya oʻz faoliyatida Oʻzbekiston Respublikasi Vazirlar Mahkamasiga hisob beradi.

10. Komissiya kotibiyati funksiyasi Vazirlar Mahkamasining Umumiqtisodiyot boʻlimiga yuklanadi.