Oʻzbekiston Respublikasining “Dori vositalari va farmatsevtika faoliyati toʻgʻrisida”gi Qonuniga hamda Oʻzbekiston Respublikasi Prezidentining 2018-yil 14-fevraldagi PQ-3532-son “Farmatsevtika tarmogʻini jadal rivojlantirish boʻyicha qoʻshimcha chora-tadbirlar toʻgʻrisida”gi qaroriga muvofiq buyuraman:

1. Dori vositalarining qoʻllanilishi chogʻida nojoʻya reaksiyalar aniqlangan holatlar toʻgʻrisida xabardor qilishi tartibi toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasining “Dori vositalari va farmatsevtika faoliyati toʻgʻrisida”gi Qonuni hamda Oʻzbekiston Respublikasi Prezidentining 2018-yil 14-fevraldagi PQ-3532-son “Farmatsevtika tarmogʻini jadal rivojlantirish boʻyicha qoʻshimcha chora-tadbirlar toʻgʻrisida”gi qaroriga muvofiq dori vositalarining qoʻllanilishi chogʻida nojoʻya reaksiyalar aniqlangan barcha holatlar toʻgʻrisida davolash-profilaktika muassasalari, dorixonalar hamda dori vositalarini ishlab chiqaruvchi, realizatsiya qiluvchi va qoʻllovchi tashkilotlar tomonidan Sogʻliqni saqlash vazirligini xabardor qilishi tartibini belgilaydi.

1. Mazkur Nizomning talablari davolash-profilaktika muassasalari, dorixonalar hamda dori vositalarini ishlab chiqaruvchi, realizatsiya qiluvchi va qoʻllovchi tashkilotlarga nisbatan tatbiq etiladi.

2. “Dori vositalari va farmatsevtika faoliyati toʻgʻrisida”gi Oʻzbekiston Respublikasi Qonunining 13-moddasiga asosan davolash-profilaktika muassasalari, dorixonalar hamda dori vositalarini ishlab chiqaruvchi, realizatsiya qiluvchi va qoʻllovchi tashkilotlar dori vositalarining qoʻllanilishi chogʻida nojoʻya reaksiyalar aniqlangan barcha holatlar toʻgʻrisida Oʻzbekiston Respublikasi Sogʻliqni saqlash vazirligini yozma shaklda xabardor qilishi shart.

3. Dori vositalarining qoʻllanilishi chogʻida nojoʻya reaksiyalar aniqlangan barcha holatlar toʻgʻrisida mazkur Nizomning ilovasiga muvofiq yozma shaklda Dori vositasining qoʻllanilishi chogʻida nojoʻya reaksiya aniqlangan holat toʻgʻrisidagi xabarnoma (bundan buyon matnda xabarnoma deb yuritiladi) rasmiylashtiriladi va u mazkur Nizomda belgilangan muddatlarda Oʻzbekiston Respublikasi Sogʻliqni saqlash vazirligiga yuboriladi.

4. Davolash-profilaktika muassasasida davolanayotgan (shu jumladan statsionar yoki ambulator sharoitda davolanayotgan) shaxsga nisbatan dori vositasini qoʻllash chogʻida yoki dori vositasi qoʻllanilgandan keyin unda nojoʻya reaksiyalar kuzatilgan yoki aniqlangan hollarda ushbu holatni kuzatgan yoki aniqlagan davolash-profilaktika muassasasining xodimi bu haqda zudlik bilan davolovchi vrachga xabar berishi zarur.

Davolovchi vrach qoʻllanilgan dori vositasining nojoʻya reaksiyasi kuzatilganligi yoki aniqlanganligiga ishonch hosil qilsa ushbu holat boʻyicha 10 kun ichida xabarnomani rasmiylashtiradi va uning Oʻzbekiston Respublikasi Sogʻliqni saqlash vazirligiga yuborilishini taʼminlaydi, mazkur Nizomning 7-bandida koʻrsatilgan hollar bundan mustasno.

5. Uy sharoitida davolangan bemor oʻzi isteʼmol qilgan dori vositasining nojoʻya reaksiyasi yuzasidan davolash-profilaktika muassasasiga murojaat qilganda, bemorni qabul qilgan vrach unda kuzatilgan yoki aniqlangan nojoʻya reaksiyaning aynan u qoʻllagan dori vositasining qoʻllanilishi oqibatida yuzaga kelganligiga ishonch hosil qilsa ushbu holat boʻyicha 10 kun ichida xabarnomani rasmiylashtiradi va uning Oʻzbekiston Respublikasi Sogʻliqni saqlash vazirligiga yuborilishini taʼminlaydi, mazkur Nizomning 7-bandida koʻrsatilgan hollar bundan mustasno.

Bunda xabarnomaning murojaat qilgan shaxsga qirqib berilishi lozim boʻlgan qismi toʻliq toʻldirgan holda murojaat qilgan shaxsga berib yuborilishi lozim.

6. Dorixona hamda dori vositalarini ishlab chiqaruvchi, realizatsiya qiluvchi tashkilotlar oʻzi tomonidan ishlab chiqarilgan yoki realizatsiya qilingan dori vositasining qoʻllanilishi chogʻida nojoʻya reaksiya aniqlanganligi (kuzatilganligi) haqida maʼlumot olganda ular bu haqda 10 kun ichida xabarnoma rasmiylashtiradi va uning Oʻzbekiston Respublikasi Sogʻliqni saqlash vazirligiga yuborilishini taʼminlaydi, mazkur Nizomning 7-bandida koʻrsatilgan hollar bundan mustasno.

Bunda dorixona, dori vositalarini ishlab chiqaruvchi va realizatsiya qiluvchi tashkilot xodimiga ushbu tashkilot tomonidan ishlab chiqarilgan yoki realizatsiya qilingan dori vositasining qoʻllanilishi chogʻida nojoʻya reaksiya kuzatilganligi yoki aniqlanganligi haqida xabar berilganda, u bu haqda zudlik bilan tashkilot rahbariga, u boʻlmaganda esa, uning oʻrnini bosuvchi shaxsga maʼlum qiladi.

Dorixona, dori vositalarini ishlab chiqaruvchi va realizatsiya qiluvchi tashkilot rahbari yoki uning oʻrnini bosuvchi shaxs dori vositasining nojoʻya reaksiyasi kuzatilganligi yoki aniqlanganligi haqidagi xabarga asoslanib xabarnoma rasmiylashtiradi va uning Oʻzbekiston Respublikasi Sogʻliqni saqlash vazirligiga yuborilishini taʼminlaydi.

7. Qoʻllanilgan dori vositasining nojoʻya reaksiyasi anafilaktik reaksiya, Layell sindromi yoki Stivens-Djonson sindromi bilan bogʻliq deb xulosa qilinsa yoxud bu haqda maʼlumot kelib tushsa, shuningdek uning oqibatida inson vafot etganligi aniqlansa xabarnoma 1 kun ichida rasmiylashtirilishi va Oʻzbekiston Respublikasi Sogʻliqni saqlash vazirligiga yuborilishi lozim.

8. Davolash-profilaktika muassasasi tomonidan yuboriladigan xabarnoma davolash-profilaktika muassasasi vrachi tomonidan, dorixona hamda dori vositalarini ishlab chiqaruvchi, realizatsiya qiluvchi tashkilotlar tomonidan yuboriladigan xabarnoma esa, ushbu tashkilot rahbari tomonidan imzolangan boʻlishi shart.

9. Xabarnomada koʻrsatilgan maʼlumotlarning toʻgʻriligi hamda uning oʻz vaqtida rasmiylashtirilishi va yuborilishi uchun xabarnomani imzolagan shaxs masʼul hisoblanadi.

10. Dori vositalarini qoʻllovchi boshqa tashkilotlar dori vositalarining qoʻllanilishi chogʻida nojoʻya reaksiyalar aniqlangan barcha holatlar toʻgʻrisida faoliyatining xususiyatiga koʻra mazkur Nizomda tegishlicha davolash-profilaktika muassasalari yoxud dorixona, dori vositalarini ishlab chiqaruvchi va realizatsiya qiluvchi tashkilot uchun belgilangan tartibda xabar beradi.

11. Mazkur Nizomning talablari buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.

12. Mazkur Nizom Oʻzbekiston Respublikasi Savdo-sanoat palatasi bilan kelishilgan.