O‘zbekiston Respublikasi Oliy Kengashining “O‘zbekiston Respublikasidagi ma’muriy-hududiy birliklar, aholi punktlari, korxonalar, muassasalar, tashkilotlar, fizik-jug‘rofiy, geologik va boshqa toponimik obyektlarning nomlarini tartibga solish to‘g‘risida” 1993-yil 3-sentabrdagi qarorini bajarish maqsadida Vazirlar Mahkamasi qaror qiladi:

1. O‘zbekiston Respublikasidagi toponimik obyektlarga mashhur kishilarning nomini berish masalalarini muvofiqlashtiruvchi Respublika komissiyasi 1-ilovaga* muvofiq tarkibda tuzilsin va ushbu komissiya to‘g‘risidagi Nizom 2-ilovaga muvofiq tasdiqlansin.

2. Respublika komissiyasi manfaatdor tashkilotlar bilan birgalikda 1994-yilning II choragi oxirigacha tabiiy-jo‘g‘rofiy va boshqa toponimik obyektlarning nomlarini umumdavlat, milliy manfaatlardan, tarixiy, tabiiy-jo‘g‘rofiy sharoitlardan kelib chiqqan va mehnatkashlarning istaklarini hisobga olgan holda tartibga solish ishlarini asosan tugallashni ta’minlasin.

3. O‘zbekiston SSR Ministrlar Sovetining 1981-yil 27-maydagi 457-son qarori o‘z kuchini yo‘qotgan deb hisoblansin.

4. Ushbu qarorning bajarilishini nazorat qilish Vazirlar Mahkamasining Ijtimoiy masalalar, fan va madaniyat bo‘limi hamda Hududiy-tashkiliy bo‘limiga yuklansin.

1. O‘zbekiston Respublikasining barcha hududidagi tabiiy-jo‘g‘rofiy va boshqa toponimik obyektlarga mashhur kishilarning nomini qo‘yish, ilgari ular sharafiga berilgan nomlarni o‘zgartirish masalalarini tartibga solib borish, bu ishda suiiste’molchilikka, tanish-bilishchilikka, noilmiylikka va boshqa tarzdagi buzilishlarga yo‘l qo‘ymaslik choralarini ko‘rish, mamlakatimiz xalqlarining tarixi va an’analari bilan bog‘liq toponimlarni muhofaza etish choralarini ko‘rish toponimik obyektlarga mashhur kishilarning nomini berish masalalarini muvofiqlashtiruvchi Respublika komissiyasining asosiy vazifalaridir.

2. Komissiya amaldagi qonun hujjatlari va Hukumat qarorlari asosida ish olib boradi.

3. Komissiya o‘ziga yuklatilgan vazifalarga muvofiq:

— mashhur kishining nomini qo‘yish taklifini kiritgan barcha darajadagi tashkilotlardan uning xizmatlarini tavsiflovchi hamma kerakli hujjatlarni talab qilib oladi;

— mashhur kishilarning xotiralarini abadiylashtirish masalalari bo‘yicha tegishli hokimiyat organlariga tavsiyalar beradi, zarur bo‘lgan hollarda vaqtinchalik ekspertlar guruhini tuzadi;

— o‘z vakolatiga kiruvchi masalalar bo‘yicha hokimliklar, vazirliklar va idoralar rahbarlarining hisobotlarini eshitib boradi.

4. Komissiya toponimik obyektlarga kishilarning nomlarini berish va ilgari mashhur kishilar sharafiga qo‘yilgan nomlarni o‘zgartirish haqidagi Qoraqalpog‘iston Respublikasi Oliy Kengashi Rayosati, xalq deputatlari viloyatlar va Toshkent shahar Kengashlarining, vazirliklar va idoralarning takliflarini tarixchilarni, tilshunoslarni, me’morchilarni va boshqa sohalarning mutaxassislarini bu ishga jalb qilgan holda ko‘rib chiqadi. Komissiya o‘z xulosalarini belgilangan tartibda taklif kiritgan tashkilotlarga, mamlakat ahamiyatiga molik obyektlar bo‘yicha esa O‘zbekiston Respublikasi Vazirlar Mahkamasiga ma’lum qiladi.

5. Nom berish haqidagi takliflarni ko‘rib chiqishda komissiya:

— nomini berish tavsiya etilayotgan kishining mamlakat xalqi oldidagi xizmatlari, nomi qo‘yilayotgan sohani, joyni rivojlantirishga qo‘shgan hissasini;

— davlat va jamoat tashkilotlari hamda mehnat jamoalarining mulohazalarini;

— xalqning tarixiy-milliy an’analar his-tuyg‘ulari hamda axloqiy qadriyatlarini va aholining istaklarini hisobga oladi va bunda umumdavlat manfaatlaridan kelib chiqadi.

6. Komissiya zaruratga qarab o‘z majlislarini o‘tkazib turadi va qarorlarini bayon shaklida rasmiylashtiradi. Komissiya a’zolarining yarmidan ko‘pi qatnashgan komissiya majlisi qaror qabul qilishga vakolatli hisoblanadi. Qaror qabul qilish uchun majlisda qatnashayotgan komissiya a’zolarining kamida uchdan ikki qismi uni ma’qullashi kerak.

Ayrim hollarda komissiya qarorlari so‘rov yo‘li bilan rasmiylashtirilishi mumkin.