O‘zbekiston Respublikasi Prezidentining “O‘zbekiston Respublikasining Intellektual mulk agentligini tashkil etish to‘g‘risida” 2011-yil 24-maydagi PQ-1536-son qarorini bajarish yuzasidan Vazirlar Mahkamasi qaror qiladi:

1. O‘zbekiston Respublikasi Intellektual mulk agentligi to‘g‘risidagi nizom 1-ilovaga muvofiq tasdiqlansin.

2. Quyidagilar O‘zbekiston Respublikasi Intellektual mulk agentligi faoliyatini moliyalashtirishning asosiy manbalari etib belgilansin:

O‘zbekiston Respublikasi Davlat budjeti mablag‘lari;

patent bojlari, asarlarni va turdosh huquqlar obyektlarini ro‘yxatdan o‘tkazganlik uchun to‘lov tushumlari hisobiga qonun hujjatlarida belgilangan tartibda shakllantiriladigan budjetdan tashqari mablag‘lar, shuningdek qonun hujjatlarida taqiqlanmagan boshqa manbalar.

3. O‘zbekiston Respublikasi Davlat patent idorasi huzuridagi “Patent-Press” shu’ba korxonasi belgilangan tartibda O‘zbekiston Respublikasi Intellektual mulk agentligi huzuridagi “Intellekt Ekspert” davlat unitar korxonasiga aylantirilsin.

4. O‘zbekiston Respublikasi Hukumatining 2-ilovaga muvofiq ayrim qarorlari o‘z kuchini yo‘qotgan deb hisoblansin.

5. O‘zbekiston Respublikasi Intellektual mulk agentligi Adliya vazirligi hamda manfaatdor vazirliklar va idoralar bilan birgalikda bir oy muddatda:

qonun hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida takliflar kiritsin;

idoraviy normativ-huquqiy hujjatlarni ushbu qarorga muvofiqlashtirsin.

6. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari A.N. Aripov zimmasiga yuklansin.

1. Ushbu Nizom O‘zbekiston Respublikasi Intellektual mulk agentligining (keyingi o‘rinlarda Agentlik deb ataladi) asosiy vazifalari, funksiyalari, huquqlari, javobgarligini va faoliyatining tashkiliy masalalarini belgilaydi.

2. Agentlik intellektual mulk obyektlarini huquqiy muhofaza qilish va ularga bo‘lgan huquqlarni himoya qilish sohasidagi yagona davlat siyosati amalga oshirilishini ta’minlovchi davlat boshqaruvi organi hisoblanadi.

Agentlik mulkiy huquqlarni jamoaviy asosda boshqaradigan tashkilotlarni davlat ro‘yxatidan o‘tkazuvchi va ularning faoliyatini nazorat qiluvchi maxsus vakolatli davlat organi hisoblanadi.

Agentlik o‘z faoliyatida O‘zbekiston Respublikasi Vazirlar Mahkamasiga hisobot beradi.

3. Agentlik o‘z faoliyatida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi palatalari qarorlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, boshqa qonun hujjatlariga hamda mazkur Nizomga amal qiladi.

4. Agentlik o‘z faoliyatini davlat va xo‘jalik boshqaruvining boshqa organlari, mahalliy davlat hokimiyati organlari, nodavlat notijorat tashkilotlar va boshqa tashkilotlar bilan o‘zaro hamkorlikda amalga oshiradi.

5. Quyidagilar Agentlikni moliyalashtirishning asosiy manbalari hisoblanadi:

O‘zbekiston Respublikasi Davlat budjeti mablag‘lari;

patent bojlari, asarlarni va turdosh huquqlar obyektlarini ro‘yxatdan o‘tkazganlik uchun to‘lov tushumlari hisobiga qonun hujjatlarida belgilangan tartibda shakllantiriladigan budjetdan tashqari mablag‘lar, shuningdek qonun hujjatlarida taqiqlanmagan boshqa manbalar.

Bunda Agentlik xodimlari mehnatiga haq to‘lash xarajatlari O‘zbekiston Respublikasi Davlat budjeti mablag‘lari hisobiga qoplanadi, xodimlarni moddiy rag‘batlantirish va Agentlikning joriy ta’minoti budjetdan tashqari mablag‘lar hisobiga amalga oshiriladi.

6. Agentlik yuridik shaxs hisoblanadi, mustaqil balansga, O‘zbekiston Respublikasi Davlat gerbi tasviri tushirilgan va o‘z nomi yozilgan dumaloq muhrga, boshqa zarur muhr va shtamplarga, bank, shu jumladan valyuta hisob raqamlariga ega bo‘ladi.

7. Quyidagilar Agentlikning asosiy vazifalari hisoblanadi:

intellektual mulk obyektlarini huquqiy muhofaza qilish va ularga bo‘lgan huquqlarni himoya qilish sohasida yagona davlat siyosati amalga oshirilishini ta’minlash, ixtirolar, sanoat namunalari, foydali modellar, tovar belgilari va boshqa intellektual mulk obyektlarini huquqiy muhofaza qilish, intellektual mulk obyektlariga bo‘lgan huquq egalari huquqlarini himoya qilish;

ixtirolar, foydali modellar, sanoat namunalari va boshqa intellektual mulk obyektlarini ekspertizadan hamda davlat ro‘yxatidan o‘tkazish;

innovatsiya texnologiyalari va ixtirolarni, ilmiy-texnika va sanoat ishlanmalarini, seleksiya yutuqlarini, badiiy-konstruktorlik va ijodiyot ishlarining boshqa turlarini ishlab chiqarishga keng joriy etishga har tomonlama ko‘maklashish;

patent hujjatlarining davlat fondini va intellektual mulkning rasman ro‘yxatdan o‘tkazilgan obyektlari to‘g‘risidagi ma’lumotlar bazasini shakllantirish, ularni saqlash va ulardan foydalanish uchun shart-sharoitlarni ta’minlash;

intellektual mulk obyektlarini huquqiy muhofaza qilish va ularga bo‘lgan huquqlarni himoya qilish to‘g‘risidagi qonun hujjatlari talablariga qat’iy rioya etilishini qat’iy nazorat qilish, vakolatli davlat organlari bilan birgalikda kontrafakt tovarlarning respublika hududiga noqonuniy olib kirilishi va aylanishining oldini olish chora-tadbirlarini ko‘rishda qatnashish;

audiovizual asarlar, fonogrammalar va EHM uchun yaratilgan dasturlarni takrorlash, sotish, prokatga berish, shuningdek fonogrammalarni tayyorlash faoliyatini litsenziyalashni amalga oshirish;

intellektual mulkni muhofaza qilish sohasida xalqaro hamkorlikni rivojlantirish;

davlat va xo‘jalik boshqaruvi organlari, tadbirkorlik subyektlari uchun intellektual mulk sohasida kadrlar malakasini oshirish va ularni qayta tayyorlash.

8. Agentlik o‘ziga yuklangan vazifalarni bajarish uchun quyidagi funksiyalarni amalga oshiradi:

O‘zbekiston Respublikasi Vazirlar Mahkamasiga intellektual mulk obyektlarini huquqiy muhofaza qilish va ularga bo‘lgan huquqlarni himoya qilish sohasida davlat siyosatini ishlab chiqish va takomillashtirish bo‘yicha takliflar kiritadi hamda ularni amalga oshirishda bevosita qatnashadi;

intellektual mulk obyektlarini huquqiy muhofaza qilish va ularga bo‘lgan huquqlarni himoya qilish sohasidagi qonun hujjatlarini takomillashtirish masalalari bo‘yicha takliflar ishlab chiqadi hamda ko‘rib chiqish uchun ularni belgilangan tartibda O‘zbekiston Respublikasi Vazirlar Mahkamasiga taqdim etadi;

innovatsiya texnologiyalari va ixtirolar, ilmiy-texnika va sanoat ishlanmalari yaratilishini, seleksiya yutuqlarini, badiiy-konstruktorlik hamda ijodiyot ishlarining boshqa turlarini rag‘batlantirish, ularni, shu jumladan ishlab chiqarishni mahalliylashtirish va modernizatsiya qilish doirasida ishlab chiqarishga keng joriy etishni ta’minlash bo‘yicha takliflar ishlab chiqadi;

ixtirolar, foydali modellar, sanoat namunalari, seleksiya yutuqlari, tovar belgilari, xizmat ko‘rsatish belgilari, tovarlarning kelib chiqish joylari nomiga nisbatan muhofaza hujjatlari berish yuzasidan buyurtmanomalarni ko‘rib chiqish uchun qabul qiladi;

ixtirolar, foydali modellar, sanoat namunalari, seleksiya yutuqlari, tovar belgilari, xizmat ko‘rsatish belgilari, tovarlarning kelib chiqish joylari nomlari, integral mikrosxemalar topologiyalari davlat ekspertizasini amalga oshiradi, arizada ko‘rsatilgan obyektlarning ustuvorligini belgilaydi;

ixtirolar, foydali modellar, sanoat namunalari, seleksiya yutuqlari, tovar belgilari, xizmat ko‘rsatish belgilari, tovarlarning kelib chiqish joylari nomlarini, integral mikrosxemalar topologiyalarini davlat ro‘yxatidan o‘tkazadi, muhofaza hujjatlarini beradi, O‘zbekiston Respublikasidagi barchaga ma’lum bo‘lgan tovar belgilarining tegishli reyestrlarini va Ro‘yxatini yuritadi;

O‘zbekiston Respublikasi Qishloq va suv xo‘jaligi vazirligining ixtisoslashtirilgan tashkilotlari xulosalari asosida arizada ko‘rsatilgan seleksiya yutuqlarining patentga loyiqlik shartlariga muvofiqligini belgilash natijalariga ko‘ra muhofaza hujjatlarini berish yoki berishni rad etish to‘g‘risida qarorlar qabul qiladi;

berilgan buyurtmanomalarning belgilangan talablarga muvofiqligini tekshirish natijalariga ko‘ra ixtiro, foydali model, sanoat namunasi, tovar belgisi, xizmat ko‘rsatish belgisi, tovarlarning kelib chiqish joylari nomiga, integral mikrosxemalar topologiyalariga nisbatan muhofaza hujjatlarini berish yoki berishni rad etish to‘g‘risida qarorlar qabul qiladi;

muhofaza va boshqa zarur hujjatlarning yagona shakllarini belgilaydi;

intellektual mulk obyektlaridan foydalanishga huquqlar berish to‘g‘risidagi litsenziya shartnomalarini, shuningdek ularni o‘zgaga to‘liq yoki qisman berish haqida yoxud ularning garov huquqi to‘g‘risidagi shartnomalarni ro‘yxatdan o‘tkazadi hamda tegishli reyestrlarni yuritadi;

intellektual mulkning rasman ro‘yxatdan o‘tkazilgan obyektlari to‘g‘risidagi ma’lumotlar bazasini shakllantiradi, ularning saqlanishi va foydalanilishi uchun shart-sharoitlarni ta’minlaydi;

fan, adabiyot va san’at asarlarini, aralash huquqlar obyektlarini, shuningdek aralash huquqlar mualliflari va subyektlarini ro‘yxatdan o‘tkazadi, ro‘yxatdan o‘tkazilganligi to‘g‘risida belgilangan namunada guvohnoma beradi;

O‘zbekiston Respublikasi hududida intellektual mulk obyektlaridan foydalanadigan yuridik va jismoniy shaxslar hisobini yuritadi;

Agentlikning byulletenlari va boshqa rasmiy nashrlarini, shuningdek intellektual mulk obyektlarini huquqiy muhofaza qilish hamda ularga bo‘lgan huquqlarni himoya qilish masalalari bo‘yicha boshqa ma’lumotlar va materiallarni nashr etishni tashkil qiladi va amalga oshiradi;

patent bo‘yicha vakolatli xodimlarni attestatsiyadan va ro‘yxatdan o‘tkazadi, patent bo‘yicha vakolatli vakillarning davlat reyestrini yuritadi;

mulkiy huquqlarni jamoaviy asosda boshqaradigan tashkilotlarning faoliyatini nazorat qiladi va ularning faoliyatiga ko‘maklashadi;

intellektual mulk obyektlariga bo‘lgan huquqlar bo‘yicha qonun buzilishlariga yo‘l qo‘ymaslik va buzilgan huquqlarni tiklash, intellektual mulk obyektlaridan noqonuniy foydalanishning oldini olish, shu jumladan nohalol raqobatga yo‘l qo‘ymaslik bo‘yicha zarur chora-tadbirlar ko‘radi;

intellektual mulk sohasidagi huquq buzilishlarini aniqlash va ularning oldini olish, kontrafakt mahsulotlarning respublika hududiga olib kirilishi va aylanishining oldini olish borasida huquqni muhofaza qilish, bojxona, soliq va boshqa davlat organlari bilan hamkorlik qiladi;

intellektual mulk subyektlari huquqlarini amalga oshirishga ko‘maklashadi;

patent hujjatlarining davlat fondini to‘ldirish ishlarini tashkil qiladi va amalga oshiradi, uning saqlanishini ta’minlaydi va shu asosda manfaatdor tashkilotlar, mansabdor shaxslar va fuqarolarga kutubxona-bibliografiya, ma’lumotnoma-axborot xizmatlari ko‘rsatishni tashkil qiladi;

patent-axborot xizmatlari va boshqa xizmatlar ko‘rsatganlik uchun to‘lovlar miqdorini belgilangan tartibda tasdiqlaydi;

intellektual mulk obyektlaridan qonunga muvofiq foydalanilishini belgilaydi va ekspert xulosalari beradi;

intellektual mulk sohasidagi faoliyatni rivojlantirish va takomillashtirish muammolari bo‘yicha ilmiy-tadqiqot ishlarini amalga oshirishda qatnashadi;

intellektual mulk obyektlarini yaratish va joriy etish, ularni huquqiy muhofaza qilish va himoya qilishning mamlakatni ijtimoiy-iqtisodiy rivojlantirish uchun ahamiyatini keng yoritish tadbirlarini amalga oshiradi;

tadbirkorlik subyektlari, davlat va xo‘jalik boshqaruvi mansabdor shaxslarining, keng aholi qatlamlarining intellektual mulk sohasidagi bilimlari va huquqiy savodxonligini oshirish chora-tadbirlarini amalga oshiradi, intellektual mulk sohasida kadrlar tayyorlash uchun o‘quv-metodik bazaning rivojlantirilishini ta’minlaydi;

intellektual mulk obyektlarini huquqiy muhofaza qilish va ularga bo‘lgan huquqlarni himoya qilish sohasida mutaxassislar tayyorlash va ularning malakasini oshirishni tashkil etadi;

intellektual mulk obyektlarini huquqiy muhofaza qilish va ularga bo‘lgan huquqlarni himoya qilish sohasida manfaatdor shaxslarga metodik yordam ko‘rsatadi;

fuqarolar va yuridik shaxslarning intellektual mulk obyektlarini huquqiy muhofaza qilish va ularga bo‘lgan huquqlarni himoya qilish masalalari bo‘yicha ariza va shikoyatlarini qonun hujjatlariga muvofiq ko‘rib chiqadi;

intellektual mulk masalalari bo‘yicha ilmiy anjumanlar, simpoziumlar, konferensiyalar, seminarlar va boshqa tadbirlarni tashkil qiladi va ularda qatnashadi.

tuzilgan shartnomalarning mualliflik huquqi va turdosh huquqlar to‘g‘risidagi qonun hujjatlariga muvofiqligi to‘g‘risida xulosa beradi;

audiovizual asarlar, fonogrammalar va EHM uchun yaratilgan dasturlarni takrorlash, sotish, prokatga berish, shuningdek fonogrammalarni tayyorlash faoliyatini litsenziyalashni belgilangan tartibda amalga oshiradi

audiovizual asarlar, fonogrammalar va EHM uchun yaratilgan dasturlarni takrorlash, sotish, prokatga berish, shuningdek fonogrammalarni tayyorlash sohasida litsenziatlar tomonidan litsenziya talablari va shartlariga rioya qilinishi ustidan nazoratni amalga oshiradi.

9. Agentlik Jahon intellektual mulk tashkilotida hamda intellektual mulk sohasidagi boshqa xalqaro va mintaqaviy tashkilotlarda O‘zbekiston Respublikasi nomidan vakillik qiluvchi vakolatli organ hisoblanadi.

10. Agentlik:

intellektual mulk obyektlarini huquqiy muhofaza qilish va ularga bo‘lgan huquqlarni himoya qilish sohasida xalqaro shartnomalar tuzish to‘g‘risida belgilangan tartibda takliflar kiritadi, O‘zbekiston Respublikasining xalqaro shartnomalari loyihalarini tayyorlashda qatnashadi hamda Vazirlar Mahkamasi topshirig‘iga binoan, ko‘rsatib o‘tilgan shartnomalarni imzolaydi;

intellektual mulk obyektlarini huquqiy muhofaza qilish va ularga bo‘lgan huquqlarni himoya qilish sohasida tegishli xalqaro, mintaqaviy va xorijiy tashkilotlar bilan muzokaralar olib boradi, belgilangan tartibda idoralararo shartnomalar tuzadi;

xorijiy patent idoralari, xalqaro, mintaqaviy va xorijiy tashkilotlar bilan patent hujjatlari va patentga oid huquqiy adabiyotlarni xalqaro ayirboshlashni amalga oshiradi, intellektual mulk obyektlarini huquqiy muhofaza qilish va ularga bo‘lgan huquqlarni himoya qilish sohasidagi chet el tajribasini o‘rganish va undan foydalanishni tashkil qiladi;

intellektual mulk sohasida xalqaro hamkorlikni belgilangan tartibda amalga oshiradi, ushbu hamkorlik doirasida intellektual mulk obyektlarini huquqiy muhofaza qilish va ularga bo‘lgan huquqlarni himoya qilish masalalari bo‘yicha xalqaro va mintaqaviy tashkilotlar ishida qatnashadi;

O‘zbekiston Respublikasining tegishli xalqaro shartnomalaridan kelib chiqadigan majburiyatlarning bajarilishini o‘z vakolatlari doirasida ta’minlaydi.

11. Agentlik o‘ziga yuklangan vazifalar va funksiyalarni bajarish uchun quyidagi huquqlarga ega:

davlat organlari, nodavlat notijorat va boshqa tashkilotlar, mansabdor shaxslardan zarur axborotlar, hujjatlar va materiallarni belgilangan tartibda so‘rash va olish;

intellektual mulk obyektlarini huquqiy muhofaza qilish va ularga bo‘lgan huquqlarni himoya qilish sohasidagi qonun hujjatlari buzilishlari to‘g‘risida sudga da’vo arizasi bilan murojaat qilish;

ixtirochilik va ijodiyotning boshqa turlari sohasidagi ulkan yutuqlar uchun O‘zbekiston Respublikasining faxriy unvonlarini berish to‘g‘risida belgilangan tartibda takliflar kiritish;

ixtirolar, foydali modellar, sanoat namunalari, seleksiya yutuqlari, tovar belgilari, xizmat ko‘rsatish belgilari, tovarlarning kelib chiqish joylari nomi, integral mikrosxemalar topologiyasi yuzasidan buyurtmanomalarni ko‘rib chiqish va davlat ekspertizasidan o‘tkazish uchun zarur bo‘lgan qo‘shimcha materiallarni buyurtmachilardan belgilangan tartibda so‘rash;

intellektual mulk obyektlari yuzasidan buyurtmanomalarni ko‘rib chiqish bilan bog‘liq masalalarning muhokamasini tashkil etish va o‘tkazish, ko‘rsatib o‘tilgan masalalarni ko‘rib chiqishda qatnashish uchun buyurtmachilarni va ularning vakillarini taklif etish;

belgilangan tartibda noshirlik faoliyatini amalga oshirish, intellektual mulk sohasidagi ilmiy-metodik va axborot materiallarini, davriy nashrlarni hamda boshqa matbaa mahsulotlarini chop etish va tarqatish;

intellektual mulk obyektlarini huquqiy muhofaza qilish va ularga bo‘lgan huquqni himoya qilish bilan bog‘liq masalalarni hal etish uchun mamlakatimizdagi va xorijiy mutaxassislarni shartnoma asosida jalb etish;

budjetdan tashqari mablag‘lar jamg‘armalarini qonun hujjatlarida belgilangan tartibda shakllantirish;

o‘z xodimlarini ijtimoiy muhofaza qilish chora-tadbirlarini amalga oshirish.

Agentlik qonun hujjatlariga muvofiq boshqa huquqlarga ham ega bo‘lishi mumkin.

12. Agentlik o‘z vakolatlari doirasida vazirliklar, davlat qo‘mitalari, idoralar, mahalliy davlat hokimiyati organlari, boshqa tashkilotlar, mansabdor shaxslar va fuqarolar uchun majburiy bo‘lgan normativ-huquqiy hujjatlar qabul qiladi.

Agentlik, zarur hollarda, boshqa vazirliklar, davlat qo‘mitalari va idoralar bilan birgalikda qo‘shma qarorlar va boshqa hujjatlar chiqarishga haqlidir.

13. Agentlik:

o‘z zimmasiga yuklangan vazifalar va funksiyalarning samarali bajarilishi;

ixtirolar, foydali modellar, sanoat namunalari, seleksiya yutuqlari, tovar belgilari, xizmatlar ko‘rsatish belgilari, tovarlarning kelib chiqish joylari nomi, integral mikrosxemalar topologiyalari bo‘yicha buyurtmanomalarni davlat ekspertizasidan o‘tkazishning o‘z vaqtidaligi, sifati va maxfiyligi;

budjet mablag‘laridan va patent bojlari undirish mablag‘laridan, asarlarni va turdosh huquqlar obyektlarini ro‘yxatdan o‘tkazganlik uchun to‘lov tushumlaridan hamda Agentlik tasarrufida qoladigan boshqa nosoliq to‘lovlardan maqsadli foydalanilishi yuzasidan javob beradi.

14. Agentlikka O‘zbekiston Respublikasi Prezidenti qarori bilan lavozimga tayinlanadigan va lavozimdan ozod qilinadigan Bosh direktor (keyingi o‘rinlarda Bosh direktor deb ataladi) boshchilik qiladi.

Bosh direktorning O‘zbekiston Respublikasi Vazirlar Mahkamasi tomonidan belgilangan tartibda lavozimga tayinlanadigan va lavozimdan ozod qilinadigan o‘rinbosari bo‘ladi.

15. Bosh direktor:

Agentlik faoliyatiga umumiy rahbarlik qiladi hamda Agentlikka yuklangan vazifalar va funksiyalarning bajarilishi uchun shaxsan javob beradi;

Agentlik tuzilmasiga xodimlarning umumiy soni doirasida o‘zgartirishlar kiritadi, Agentlikning shtatlar jadvalini, shuningdek xarajatlari smetasini tasdiqlaydi;

Agentlikning tarkibiy bo‘linmalari to‘g‘risidagi nizomlarni tasdiqlaydi;

Agentlik xodimlarining lavozim vazifalarini tasdiqlaydi;

Agentlik xodimlarini belgilangan tartibda lavozimga tayinlaydi va lavozimdan ozod qiladi;

o‘z vakolatlari doirasida Agentlik xodimlari tomonidan bajarilishi majburiy bo‘lgan buyruqlar, farmoyishlar va yo‘riqnomalar chiqaradi, ko‘rsatmalar beradi;

respublikada va chet davlatlarda Agentlik manfaatlarini ifodalaydi.

Bosh direktor qonun hujjatlariga muvofiq boshqa vakolatlarni ham amalga oshiradi.

16. Agentlikda Bosh direktor (hay’at raisi), uning o‘rinbosari (lavozimiga ko‘ra), shuningdek Agentlik faoliyatining asosiy yo‘nalishlarini muvofiqlashtiruvchi tarkibiy bo‘linmalari rahbarlaridan iborat tarkibda hay’at tashkil etiladi.

Hay’atning a’zolari soni va shaxsiy tarkibi Bosh direktor taqdimnomasiga binoan O‘zbekiston Respublikasi Vazirlar Mahkamasi tomonidan tasdiqlanadi.

Hay’at quyidagilar bilan bog‘liq masalalarni ko‘rib chiqadi:

Agentlik faoliyatining intellektual mulk obyektlarini huquqiy muhofaza qilish va ularga bo‘lgan huquqlarni himoya qilish sohasida yagona davlat siyosatini yanada takomillashtirish va amalga oshirish bo‘yicha ushbu Nizomda belgilangan asosiy yo‘nalishlarini tayyorlash va amalga oshirish;

innovatsiya texnologiyalari va ixtirolar, ilmiy-texnika, sanoat ishlanmalari, seleksiya yutuqlari, badiiy-konstruktorlik va ijodiyot ishlarining boshqa turlarini yaratish, rivojlantirish va keng joriy etishga ko‘maklashish;

Agentlik nomenklaturasiga kiradigan lavozimlarga kadrlarni tanlash, joy-joyiga qo‘yish, tayyorlash va qayta tayyorlash;

O‘zbekiston Respublikasi Prezidentining farmonlari, qarorlari va farmoyishlarida, O‘zbekiston Respublikasi Vazirlar Mahkamasi qarorlari va farmoyishlarida belgilangan vazifalarni amalga oshirish bo‘yicha ijro intizomini mustahkamlash, ularning o‘z vaqtida va sifatli amalga oshirilishini ta’minlash yuzasidan Agentlik rahbarlari va xodimlarining shaxsiy javobgarligini oshirish.

Hay’at Agentlik vakolatiga taalluqli boshqa masalalarni ham ko‘rib chiqish huquqiga ega.

Hay’at majlisiga Agentlik vakolatiga kiradigan masalalar bo‘yicha boshqa vazirliklar, davlat qo‘mitalari, idoralar, mahalliy davlat hokimiyati organlari va boshqa tashkilotlar rahbarlari taklif etilishi mumkin.

Hay’at uning majlisida tarkibining yarmidan ko‘pi qatnashgan taqdirda vakolatli bo‘ladi. Ko‘rib chiqilayotgan masalalar bo‘yicha qarorlar oddiy ko‘pchilik ovoz bilan qabul qilinadi.

Hay’at qarorlari Bosh direktorning buyruqlari bilan amalga oshiriladi.

Bosh direktor va hay’at a’zolari o‘rtasida kelishmovchiliklar paydo bo‘lgan taqdirda, Bosh direktor paydo bo‘lgan kelishmovchiliklar to‘g‘risida O‘zbekiston Respublikasi Vazirlar Mahkamasiga axborot bergan holda, mustaqil ravishda qaror qabul qiladi. Hay’at a’zolari ham o‘z fikr-mulohazalarini O‘zbekiston Respublikasi Vazirlar Mahkamasiga yozma shaklda ma’lum qilishlari mumkin.

Hay’at faoliyati tartibi uning hay’at tasdiqlaydigan reglamentida belgilanadi.

17. Agentlikda ixtirolar, foydali modellar, sanoat namunalari, seleksiya yutuqlari, integral mikrosxemalar topologiyalari, tovar belgilari, xizmat ko‘rsatish belgilari, tovarning kelib chiqish joylari nomini huquqiy muhofaza qilish bilan bog‘liq apellatsiyalarni, shuningdek tovar belgilarini O‘zbekiston Respublikasida umumiy e’tirof etilgan deb tan olish to‘g‘risidagi arizalarni sudgacha ko‘rib chiqish uchun Apellatsiya kengashi tuziladi.

Apellatsiya kengashi tarkibiga Bosh direktor, uning o‘rinbosari, Agentlikning eng malakali va tajribali xodimlari, shuningdek intellektual mulk sohasidagi mustaqil olimlar va mutaxassislar kiradi.

O‘zbekiston Respublikasi Intellektual mulk agentligining Apellatsiya kengashi to‘g‘risidagi Nizom O‘zbekiston Respublikasi Vazirlar Mahkamasi tomonidan tasdiqlanadi.

18. Intellektual mulk obyektlarini huquqiy muhofaza qilishning muhim masalalari bo‘yicha muammolarni ilmiy tahlil qilish, ko‘rib chiqish va tavsiyalar ishlab chiqish uchun Agentlikda uning yuqori malakali xodimlaridan, shuningdek davlat va xo‘jalik boshqaruvi organlari, korxonalar va tashkilotlar vakillari, intellektual mulk sohasidagi yetakchi olimlar va mutaxassislardan Ilmiy-texnika kengashi tuziladi.

Ilmiy-texnika kengashi to‘g‘risidagi Nizom va uning shaxsiy tarkibi Agentlik bosh direktori tomonidan tasdiqlanadi.

19. Davlat va xo‘jalik boshqaruvi organlari, korxonalar va tashkilotlar rahbarlari va xodimlarini, ta’lim muassasalarining o‘qituvchilar tarkibini, patent sohasidagi vakolatli xodimlarni, tadbirkorlik subyektlarini va intellektual mulk sohasidagi boshqa manfaatdor shaxslarni o‘qitish, qayta tayyorlash va ularning malakasini oshirish maqsadida Agentlik huzurida Intellektual mulk sohasidagi kadrlarni qayta o‘qitish va mutaxassislar malakasini oshirish bo‘yicha o‘quv markazi tashkil etiladi.

Intellektual mulk sohasidagi kadrlarni qayta o‘qitish va mutaxassislar malakasini oshirish bo‘yicha o‘quv markazi to‘g‘risidagi nizom Agentlik bosh direktori tomonidan tasdiqlanadi.

20. Agentlikni qayta tashkil etish va tugatish qonun hujjatlarida belgilangan tartibda amalga oshiriladi.

1. Vazirlar Mahkamasining “O‘zbekiston Respublikasi Davlat patent idorasi faoliyatini tashkil etish to‘g‘risida” 2002-yil 14-iyundagi 209-son qarorining (O‘zbekiston Respublikasi QT, 2002-y., 6-son, 32-modda) 1-bandi hamda qarorga 1 va 2-ilovalar.

2. Vazirlar Mahkamasining “O‘zbekiston mualliflik huquqini himoya qilish respublika agentligi faoliyatini takomillashtirish to‘g‘risida” 2004-yil 16-iyundagi 286-son qarori (O‘zbekiston Respublikasi QT, 2004-y., 6-son, 58-modda).

3. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida (“Tovar belgilari, xizmat ko‘rsatish belgilari va tovar kelib chiqqan joy nomlari to‘g‘risida”gi O‘zbekiston Respublikasi Qonuniga o‘zgartish va qo‘shimchalar kiritish haqida”gi O‘zbekiston Respublikasining 2007-yil 19-sentabrdagi O‘RQ–111-sonli Qonuni) 2008-yil 7-maydagi 89-son qaroriga (O‘zbekiston Respublikasi QT, 2008-y., 5-son, 16-modda) ilova 1-bandining 1-kichik bandi.

4. Vazirlar Mahkamasining “O‘zbekiston Respublikasi Hukumatining vazirliklar, davlat qo‘mitalari va idoralar to‘g‘risidagi nizomlarni tasdiqlash bo‘yicha qarorlariga o‘zgartirish va qo‘shimchalar kiritish haqida” 2010-yil 5-iyundagi 108-son qaroriga (O‘zbekiston Respublikasi QT, 2010-y., 6-son, 27-modda) ilovaning 21 va 43-bandlari.