O‘zbekiston Respublikasi Prezidentining “Davlat va xo‘jalik boshqaruvi organlari tuzilmasini yanada takomillashtirish va boshqaruv xodimlari sonini maqbullashtirish chora-tadbirlari to‘g‘risida” 2010-yil 20-dekabrdagi PQ-1444-son qaroriga muvofiq hamda iqtisodiyot tarmoqlarini modernizatsiyalash, texnik va texnologik qayta jihozlash jarayoniga innovatsiyaviy texnologiyalar hamda ilmiy-texnikaviy ishlanmalarni keng tatbiq etishni rag‘batlantirishni kuchaytirish, shuningdek intellektual mulk obyektlariga bo‘lgan huquqni ishonchli muhofaza qilish maqsadida:

1. O‘zbekiston Respublikasi Davlat patent idorasi hamda O‘zbekiston mualliflik huquqini himoya qilish respublika agentligi negizida O‘zbekiston Respublikasining Intellektual mulk agentligi tashkil etilsin.

3. O‘zbekiston Respublikasining Intellektual mulk agentligi bosh direktoriga boshqaruv xodimlarining umumiy belgilangan soni doirasida markaziy apparatning tuzilmasiga zarur hollarda o‘zgartishlar kiritish huquqi berilsin.

4. Belgilab qo‘yilsinki, O‘zbekiston Respublikasining Intellektual mulk agentligi:

O‘zbekiston Respublikasi Davlat patent idorasi hamda O‘zbekiston mualliflik huquqini himoya qilish respublika agentligining huquqlari va majburiyatlari bo‘yicha huquqiy vorisi;

Butunjahon intellektual mulk tashkilotida hamda intellektual mulk sohasidagi boshqa xalqaro va mintaqaviy tashkilotlarda O‘zbekiston Respublikasini ifodalovchi vakolatli organ hisoblanadi.

5. O‘zbekiston Respublikasining Intellektual mulk agentligi bir oy muddatda:

Vazirlar Mahkamasiga O‘zbekiston Respublikasining Intellektual mulk agentligi to‘g‘risidagi nizomni tasdiqlash uchun kiritsin;

intellektual mulk sohasida kadrlarni qayta tayyorlash va malakasini oshirish bo‘yicha O‘quv markazining tuzilmasini hamda Ustavini belgilangan tartibda ishlab chiqsin va tasdiqlasin, uning yuqori malakali mutaxassislar va zarur moddiy-texnika bazasi bilan butlanishini ta’minlasin.

6. O‘zbekiston Respublikasining Intellektual mulk agentligi intellektual mulk obyektlari huquqiy egalarining huquqlarini muhofaza qilish yuzasidan sudlarga beriladigan da’vo arizalari bo‘yicha davlat boji to‘lashdan ozod etilsin.

7. O‘zbekiston Respublikasining Intellektual mulk agentligi Toshkent shahri, Mustaqillik xiyoboni, 59-uy manziliga joylashtirilsin.

9. O‘zbekiston Respublikasining Intellektual mulk agentligi Adliya vazirligi hamda boshqa manfaatdor vazirliklar va idoralar bilan hamkorlikda bir oy muddatda qonun hujjatlariga ushbu qarordan kelib chiqadigan o‘zgartish va qo‘shimchalar to‘g‘risida takliflar kiritsin.

10. Mazkur qarorning ijrosini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosari A.N. Aripov zimmasiga yuklansin.