Oʻzbekiston Respublikasining “Adliya organlari va muassasalari faoliyati takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Qonuni (Oʻzbekiston Respublikasi qonun hujjatlari toʻplami, 2010-y., 37-son, 313-modda) va Oʻzbekiston Respublikasi Prezidentining 2018-yil 13-apreldagi PQ-3666-son “Oʻzbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar toʻgʻrisida”gi qaroriga muvofiq buyuraman:

1. Oʻzbekiston Respublikasi Adliya vazirligi huzuridagi Oliy malaka komissiyasi toʻgʻrisidagi nizom ilovaga muvofiq tasdiqlansin.

2. Mazkur buyruq davlat roʻyxatidan oʻtkazilsin va Idoraviy meʼyoriy hujjatlarni davlat roʻyxatidan oʻtkazish boshqarmasi (B. Boliyev) Oʻzbekiston Respublikasi vazirliklari, davlat qoʻmitalari va idoralari normativ-huquqiy hujjatlarining davlat reyestriga tegishli yozuv kiritsin.

3. Qonun hujjatlarini turkumlash va huquqiy axborot boshqarmasi (S. Nuriyev) va Notariat, FHDY va advokatura boshqarmasi (D. Yakubova) ushbu normativ-huquqiy hujjatni oʻn kun muddat ichida barcha manfaatdor shaxslarga yetkazilishi va “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da nashr etilishini taʼminlasin.

4. Mazkur buyruq 2011-yil 1-yanvardan boshlab kuchga kiradi.

5. Mazkur buyruq ijrosini nazorat qilish vazir oʻrinbosari E. Kanyazov zimmasiga yuklansin.

Mazkur Nizom “Notariat toʻgʻrisida”gi Oʻzbekiston Respublikasi Qonunining 3¹-moddasiga muvofiq, Oʻzbekiston Respublikasi Adliya vazirligi huzuridagi Oliy malaka komissiyasining (bundan keyingi oʻrinlarda Oliy malaka komissiyasi deb yuritiladi) faoliyatini tartibga soladi.

1. Oliy malaka komissiyasi notariuslikka talabgorlar uchun yagona tanlovni oʻtkazish toʻgʻrisidagi masalani hal etish, notarius qasamyodini qabul qilish, Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari huzuridagi malaka komissiyalarining (bundan keyingi oʻrinlarda malaka komissiyalari deb yuritiladi) qarorlari ustidan berilgan apellyatsiyalarni koʻrib chiqish, shuningdek malaka komissiyalarining ish amaliyotini umumlashtirish va tahlil qilish uchun tuziladi.

2. Oliy malaka komissiyasi oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga hamda boshqa qonunchilik hujjatlariga, shuningdek mazkur Nizomga amal qiladi.

Notariuslikka talabgorlar uchun yagona tanlovni oʻtkazishda hamda notarius qasamyodini qabul qilishda Notariuslikka talabgorlar uchun yagona tanlov oʻtkazish tartibi toʻgʻrisidagi nizomda (roʻyxat raqami 3773, 2026-yil 11-fevral) tartibga solinmagan qismi boʻyicha mazkur Nizom qoidalari qoʻllaniladi.

3. Davlat organlari va boshqa manfaatdor shaxslarning Oliy malaka komissiyasining faoliyatiga aralashishiga yoʻl qoʻyilmaydi.

4. Oliy malaka komissiyasi oʻz vakolatlari doirasida qarorlar qabul qiladi. Oliy malaka komissiyasining qabul qilgan qarorlari Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari (bundan keyingi oʻrinlarda adliya boshqarmalari deb yuritiladi) hamda malaka komissiyalari tomonidan bajarilishi majburiydir.

5. Oliy malaka komissiyasining moddiy-texnika taʼminoti Oʻzbekiston Respublikasi Adliya vazirligi tomonidan amalga oshiriladi.

6. Oliy malaka komissiyasi oʻn bir kishidan iborat tarkibda uch yil muddatga tuziladi.

Oliy malaka komissiyasi tarkibiga Oʻzbekiston Respublikasi Konstitutsiyaviy sudining, Oʻzbekiston Respublikasi Oliy sudining sudyalari, Oʻzbekiston Respublikasi Notarial palatasi vakillari, notariuslar hamda adliya organlarining boshqa xodimlari, shuningdek advokatlar kiradi. Oliy malaka komissiyasining tarkibi Oʻzbekiston Respublikasi adliya vaziri tomonidan tasdiqlanadi.

Oliy malaka komissiyasi raisi, uning oʻrinbosari va masʼul kotibi komissiya tarkibidan tayinlanadi.

7. Oliy malaka komissiyasi rais rahbarligida faoliyat koʻrsatadi.

8. Bir shaxs bir vaqtning oʻzida Oliy malaka komissiyasi va malaka komissiyasining aʼzosi boʻlishi mumkin emas.

9. Oliy malaka komissiyasida ishlar komissiyaning ishchi organi va masʼul kotibi tomonidan yuritiladi.

Oliy malaka komissiyasi ishchi organining (bundan keyingi oʻrinlarda ishchi organ deb yuritiladi) tarkibi Oʻzbekiston Respublikasi Adliya vazirligi Inson resurslari boshqarmasi hamda Notariat, advokatura va mediatsiya boshqarmasining notariat sohasi boʻyicha masʼul xodimlari orasidan shakllantiriladi va komissiya raisi tomonidan tasdiqlanadi. Ishchi organ oʻz faoliyatini Oliy malaka komissiyasi raisining rahbarligida amalga oshiradi.

10. Oliy malaka komissiyasi yigʻilishi zaruratga qarab, lekin bir yilda kamida ikki marta oʻtkaziladi.

Oliy malaka komissiyasining raisi majlis oʻtkazilishidan kamida yetti kun oldin majlisning sanasi, vaqti va joyini belgilaydi.

Oliy malaka komissiyasining majlisi, agar unda komissiya aʼzolarining kamida uchdan ikki qismi qatnashsa, vakolatli (kvorumga ega) hisoblanadi.

Oliy malaka komissiyasi aʼzolari notariuslikka talabgorlar uchun yagona tanlovda talabgor sifatida ishtirok etgan vaqtlarida komissiya majlislarida qatnashmaydi.

11. Oliy malaka komissiyasining qarori ochiq ovoz berish yoʻli bilan majlisda qatnashgan komissiya aʼzolarining koʻpchilik ovozi bilan qabul qilinadi. Ovozlar teng boʻlganda, komissiya raisining ovozi hal qiluvchi hisoblanadi.

12. Oliy malaka komissiyasining qarori rais tomonidan imzolanadi.

Oliy malaka komissiyasining qaroridan norozi boʻlgan komissiya aʼzosi oʻzining fikr-mulohazalarini yozma shaklda taqdim etishga haqli.

14. Oliy malaka komissiyasi quyidagi huquqlarga ega:

kun tartibiga kiritilgan masalalar yuzasidan tegishli tashkilotlardan zarur boʻlgan hujjatlarni soʻrab olish;

apellyatsiya hamda malaka komissiyalarining ish amaliyotini umumlashtirish va tahlil qilish yuzasidan tegishli adliya boshqarmalaridan zarur boʻlgan hujjatlarni talab qilib olish;

malaka komissiyasining qarorini oʻzgarishsiz qoldirish va apellyatsiyani qanoatlantirishni rad etish;

malaka komissiyasi qarorini bekor qilish va hududiy adliya boshqarmasi yoki Oʻzbekiston Respublikasi Notarial palatasining hududiy boshqarmasi rahbarining taqdimnomasini qayta koʻrib chiqish uchun yuborish toʻgʻrisida qaror qabul qilish;

apellyatsiyani koʻrib chiqish jarayonida apellyatsiyada koʻrsatilmagan, lekin toʻgʻri qaror qabul qilish uchun ahamiyatli boʻlgan boshqa holatlarni oʻrganib chiqish;

malaka komissiyasining tarkibini oʻzgartirish yoki qayta tasdiqlash boʻyicha Oʻzbekiston Respublikasi adliya vaziriga takliflar kiritish;

malaka komissiyalari tomonidan qonunchilik hujjatlarini buzgan holda qabul qilingan qarorlari boʻyicha aybdor boʻlgan mansabdor shaxslarni javobgarlikka tortish toʻgʻrisida Oʻzbekiston Respublikasi adliya vaziriga takliflar kiritish;

malaka komissiyalariga ularning ish amaliyotini umumlashtirish va tahlil qilish natijalari boʻyicha tavsiyalar berish;

notarius lavozimida boʻlishning eng yuqori yosh chegarasini oltmish besh yoshdan yetmish yoshga uzaytirish toʻgʻrisidagi murojaatlarni koʻrib chiqish;

malaka komissiyalari faoliyatini yanada takomillashtirish boʻyicha Oʻzbekiston Respublikasi adliya vaziriga takliflar kiritish.

15. Oliy malaka komissiyasi:

koʻrib chiqish uchun kiritilgan masalalarni har tomonlama va xolisona koʻrib chiqishga;

qonunchilik hujjatlariga qatʼiy rioya etishga majburdir.

16. Oliy malaka komissiyasi qonunchilik hujjatlariga muvofiq boshqa huquq va majburiyatlarga ega boʻlishi mumkin.

17. Notarius malaka komissiyasining qaroridan norozi boʻlgan taqdirda, u yigʻilish bayonnomasi nusxasini olgan kundan boshlab oʻn kun ichida Oliy malaka komissiyasiga apellyatsiya berish huquqiga ega.

Adliya boshqarmasi yoki Oʻzbekiston Respublikasi Notarial palatasining tegishli hududiy boshqarmasi rahbari malaka komissiyasining qarori qonunchilik talablari buzilgan holda qabul qilinganligi haqida yetarli asoslarga ega boʻlgan hollarda Oliy malaka komissiyasiga apellyatsiya kiritishi mumkin.

18. Apellyatsiya Oliy malaka komissiyasiga notarius tomonidan bevosita yoki adliya boshqarmasi yoxud Notarial palataning tegishli hududiy boshqarmasi orqali yuboriladi.

Apellyatsiya adliya boshqarmasi yoki Notarial palataning tegishli hududiy boshqarmasi orqali berilganda, adliya boshqarmasi yoki Notarial palataning tegishli hududiy boshqarmasi uch kunlik muddat ichida apellyatsiyani u bilan bogʻliq barcha hujjatlarni ilova qilgan holda Oliy malaka komissiyasiga yuboradi.

19. Oliy malaka komissiyasiga kelib tushgan apellyatsiya ishchi organ tomonidan Oʻzbekiston Respublikasi Adliya vazirligi devonxonasidan roʻyxatdan oʻtkaziladi. Apellyatsiya bergan notariusga apellyatsiyani koʻrib chiqish kuni haqida komissiya majlisi oʻtkazilishidan kamida besh kun oldin xabar qilinadi.

Apellyatsiyalar Oliy malaka komissiyasining navbatdagi majlisida koʻrib chiqiladi.

21. Oliy malaka komissiyasi qabul qilgan qarori haqida komissiya majlisi yakunida eʼlon qilinadi.

22. Oliy malaka komissiyasi qabul qilgan qaroridan koʻchirma tegishli adliya boshqarmasiga notariusga hamda Notarial palataning tegishli hududiy boshqarmasiga yuboriladi.

23. Oliy malaka komissiyasi qabul qilgan qarorning ijrosi toʻgʻrisida ushbu qaror tegishli adliya boshqarmasiga kelib tushgandan boshlab uch kun muddat ichida adliya boshqarmasi tomonidan Oliy malaka komissiyasi va notarius yozma ravishda xabardor qilinishi lozim.

23¹. Notarius lavozimida boʻlishning eng yuqori yosh chegarasini oltmish besh yoshdan yetmish yoshga uzaytirish istagidagi notarius bu haqda Oliy malaka komissiyasiga bevosita yoki adliya boshqarmalari orqali yozma yoki elektron shaklda murojaat qilishi mumkin.

Bunda ushbu notarius oltmish besh yoshga toʻlgan kundan boshlab bir oy muddat ichida murojaat qilishi lozim.

Oliy malaka komissiyasiga kelib tushgan murojaat Oʻzbekiston Respublikasi Adliya vazirligi devonxonasidan roʻyxatdan oʻtkaziladi hamda Oliy malaka komissiyasining navbatdagi majlisida koʻrib chiqiladi.

Murojaat Oliy malaka komissiyasining navbatdagi majlisida koʻrib chiqiladi.

Murojaat qilgan notariusga suhbat oʻtkazilish kuni haqida ishchi organ tomonidan komissiya majlisi oʻtkazilishidan kamida besh kun oldin yozma yoki elektron shaklda xabar qilinadi.

23². Oliy malaka komissiyasi tomonidan murojaat qilgan notarius bilan suhbat oʻtkaziladi.

Suhbat davomida notariusdan faoliyatini yetmish yoshga qadar davom ettirish haqidagi oʻz qarorining mohiyatini toʻliq anglayotganligi (bunga qarori qatʼiyligi), shuningdek sogʻligʻining holati qoniqarliligi haqida soʻraladi.

Bunda notarius faoliyatini yetmish yoshga qadar davom ettirish haqidagi qarorining mohiyatini toʻliq anglayotganligini (qarori qatʼiyligini) bildirsa hamda sogʻligʻining holati qoniqarliligi boʻyicha Oliy malaka komissiyasi aʼzolarida shubha tugʻilmasa, Oliy malaka komissiyasi notarius faoliyatini yetmish yoshgacha davom ettirishi mumkinligi haqida qarori qabul qiladi. Agar notariusning sogʻligʻi holati boʻyicha komissiya aʼzolarida shubha paydo boʻlsa, qaror qabul qilish navbatdagi majlisga qoldirilib, ishchi organ tomonida notariusning sogʻligʻi holatini aniqlash maqsadida Sogʻliqni saqlash vazirligi tizimidagi tegishli tibbiyot muassasasidan soʻrov yuborgan holda tibbiy maʼlumot olinadi.

Tibbiy maʼlumotga koʻra notariusning sogʻligʻi holati qoniqarli boʻlsa, Oliy malaka komissiyasining navbatdagi majlisida notarius faoliyatini yetmish yoshgacha davom ettirishi mumkin yoki aksincha boʻlsa, mumkin emasligi yuzasidan qaror qabul qilinadi.

23³. Qaror qabul qilish ovoz berish yoʻli bilan majlisda qatnashgan komissiya aʼzolarining koʻpchilik ovozi asosida qabul qilinadi.

Ovoz berish natijasiga koʻra komissiya aʼzolarining kamida uchdan ikki qismi notarius faoliyatini yetmish yoshgacha davom ettirishi mumkin deb hisoblagan taqdirda notarius oʻz faoliyatini yetmish yoshgacha davom ettirishi mumkin deb topiladi.

Komissiya aʼzolarining uchdan ikki qismidan kam ovoz olgan notarius faoliyatini yetmish yoshgacha davom ettirishi mumkin emas deb topiladi.

Ovozlar teng boʻlganda, komissiya raisining ovozi hal qiluvchi hisoblanadi.

Oliy malaka komissiyasining qarori komissiya majlisi yakunida notariusga eʼlon qilinadi.

23⁴. Oliy malaka komissiyasining qaroridan koʻchirma notariusga va tegishli adliya boshqarmasiga yuboriladi.

Adliya boshqarmasi tomonidan notariusning lavozimda boʻlish yoshi uzaytirilganligi toʻgʻrisidagi maʼlumotlar Notariatning yagona avtomatlashtirilgan axborot tizimiga kiritiladi.

23⁵. Tegishli adliya boshqarmasi Oliy malaka komissiyasining qarori kelib tushgan kundan boshlab uch kun ichida uni ijro qiladi va bu haqida notariusni yozma yoki elektron shaklda xabardor qiladi.

24. Ishchi organ Oliy malaka komissiyasining topshirigʻiga yoki oʻzining tashabbusiga koʻra malaka komissiyalarining ish amaliyotini umumlashtirish va tahlil qilish maqsadida ularning faoliyatini oʻrganadi.

Malaka komissiyalarining faoliyatini oʻrganish yakunlari boʻyicha ishchi organ tomonidan malaka komissiyalarining ish amaliyotini umumlashtirish va tahlil qilish natijalari, shuningdek, tavsiyalarni oʻz ichiga olgan maʼlumotnomalar tayyorlanadi.

25. Malaka komissiyalarining faoliyatiga doir maʼlumotnomalar Oliy malaka komissiyasining majlisida koʻrib chiqiladi va uning qarori bilan tasdiqlanadi.

26. Oliy malaka komissiyasining qaroriga binoan maʼlumotnomalar tegishli adliya boshqarmalari, malaka komissiyalariga hamda Notarial palataga maʼlumot uchun yuboriladi.

28. Oliy malaka komissiyasiga apellyatsiya bergan notarius oʻz apellyatsiyasini yozma murojaati asosida qaytarib olishga haqli.

29. Oliy malaka komissiyasi qarori ustidan sudga shikoyat qilinishi mumkin.

30. Mazkur Nizomning buzilishida aybdor boʻlgan shaxslar qonunchilik hujjatlariga muvofiq javobgarlikka tortiladi.