O‘zbekiston Respublikasi Soliq kodeksi, O‘zbekiston Respublikasi “Davlat soliq xizmati to‘g‘risida”gi Qonunining 7-moddasi, O‘zbekiston Respublikasi Prezidentining 2009-yil 22-dekabrdagi PQ-1245-son “O‘zbekiston Respublikasining 2010-yilgi asosiy makroiqtisodiy ko‘rsatkichlari va Davlat budjeti parametrlari to‘g‘risida”gi qaroriga muvofiq O‘zbekiston Respublikasi Moliya vazirligi va Davlat soliq qo‘mitasi qaror qiladi:

1. “O‘zbekneftgaz” MXK korxonalari tizim ichida mahsulot yetkazib berish bo‘yicha tabiiy gazni pirovard iste’molchiga sotishdan davlat maqsadli jamg‘armalariga majburiy ajratmalar to‘lash tartibi haqidagi nizom ilovaga muvofiq tasdiqlansin.

2. Mazkur qaror O‘zbekiston Respublikasi Adliya vazirligida davlat ro‘yxatidan o‘tkazilgan kundan boshlab o‘n kundan keyin kuchga kiradi.

Ushbu Nizom O‘zbekiston Respublikasi Soliq kodeksi, O‘zbekiston Respublikasi “Davlat soliq xizmati to‘g‘risida”gi Qonunining 7-moddasi, O‘zbekiston Respublikasi Prezidentining 2009-yil 22-dekabrdagi PQ-1245-son “O‘zbekiston Respublikasining 2010-yilgi asosiy makroiqtisodiy ko‘rsatkichlari va Davlat budjeti parametrlari to‘g‘risida”gi qaroriga muvofiq “O‘zbekneftgaz” MXK korxonalari tizim ichida mahsulot yetkazib berish bo‘yicha tabiiy gazni pirovard iste’molchiga sotishdan davlat maqsadli jamg‘armalariga majburiy ajratmalar to‘lash tartibini belgilaydi.

1. O‘zbekiston Respublikasi Prezidentining 2009-yil 22-dekabrdagi PQ-1245-son “O‘zbekiston Respublikasining 2010-yilgi asosiy makroiqtisodiy ko‘rsatkichlari va Davlat budjeti parametrlari to‘g‘risida”gi qarorining 5-bandiga muvofiq 2010-yil 1-yanvardan boshlab “O‘zbekneftgaz” MXK korxonalari uchun tizim ichida mahsulot yetkazib berish bo‘yicha tabiiy gazni pirovard iste’molchiga sotishdan davlat maqsadli jamg‘armalariga majburiy ajratmalar to‘lash tartibi joriy etilgan.

2. Mazkur Nizom tizim ichida tabiiy gazni yetkazib berishni amalga oshiruvchi mazkur Nizomning ilovasida ko‘rsatilgan “O‘zbekneftgaz” MXK korxonalariga tatbiq etiladi.

3. Mazkur Nizomning ilovasida ko‘rsatilgan korxonalar o‘rtasida tabiiy gazni yetkazib berish tizim ichida hisoblanadi, shu jumladan neft va gazni qazib oluvchi korxonalardan gazni qayta ishlovchi va gaz transporti korxonalarigacha, shuningdek gazni qayta ishlovchi korxonalardan gaz transporti korxonalarigacha yetkazish.

4. “O‘zbekneftgaz” MXK korxonalari maqsadli jamg‘armalarga majburiy ajratmalarni pirovard iste’molchiga yetkazib berilgan tabiiy gaz hajmidan, qo‘shilgan qiymat solig‘i va aksiz solig‘ini chegirib tashlagan holda hisoblaydi va to‘laydi. Bunda pirovard iste’molchi bo‘lib mazkur Nizomning ilovasida ko‘rsatib o‘tilmagan shaxs hisoblanadi.

5. “O‘ztransgaz” AK orqali tabiiy gaz transportirovkasi bo‘yicha xizmat ko‘rsatish shartnomalariga asosan tabiiy gaz transportirovkasini amalga oshiradigan korxonalar ushbu tabiiy gazni sotish hajmidan majburiy ajratmalarni davlat maqsadli jamg‘armalariga qonunchilikda belgilangan tartibda to‘laydi.

6. “O‘zbekneftgaz” MXK korxonalari soliq hisoboti shakllarida davlat maqsadli jamg‘armalariga majburiy ajratmalar bo‘yicha soliq solish bazasidan chiqariladigan tizim ichida yetkazib berilgan tabiiy gaz hajmini alohida satrda ko‘rsatadi.

7. Mazkur Nizom talablariga rioya etish bo‘yicha javobgarlik “O‘zbekneftgaz” MXK korxonalari rahbarlari va bosh buxgalterlari zimmasiga yuklatiladi.

8. Mazkur Nizomga rioya etish ustidan nazorat Davlat soliq xizmati organlari tomonidan amalga oshiriladi.

9. Mazkur Nizom “O‘zbekneftgaz” MXK bilan kelishilgan.