Ilmiy tadqiqotlarni tashkil qilish tizimini takomillashtirish va o‘tkazilayotgan iqtisodiy tadqiqotlarning amaliy yo‘nalishini kuchaytirish, ularni iqtisodiyotni isloh qilish hamda erkinlashtirishning asosiy ustuvor yo‘nalishlari va maqsadli vazifalarini amalga oshirishga yo‘naltirish, mamlakatni iqtisodiy va ijtimoiy rivojlantirishni prognoz qilishning mustahkam ilmiy-metodologik bazasini yaratish maqsadida:

1. O‘zbekiston Respublikasi Iqtisodiyot vazirligi, Moliya vazirligi va Markaziy bankining tugatilayotgan Markazlar — Iqtisodiyot vazirligi huzuridagi Samarali iqtisodiy siyosat markazi, Moliya vazirligi huzuridagi Soliq-budjet siyosati markazi, Markaziy bank huzuridagi Pul-kredit siyosati markazi, Bank-moliya tizimi rivojlanishini prognozlash va erkinlashtirish instituti negizida Ijtimoiy-iqtisodiy tadqiqotlar markazi (bundan buyon matnda — Markaz deb yuritiladi) tashkil etish to‘g‘risidagi taklifi qabul qilinsin.

Markaz o‘z faoliyatida O‘zbekiston Respublikasi Vazirlar Mahkamasining Iqtisodiyot va tashqi iqtisodiy aloqalar masalalari yig‘ma axborot-tahlil departamentiga hisobot beradi.

2. Quyidagilar Markaz faoliyatining asosiy vazifalari va yo‘nalishlari etib belgilansin:

tabiiy, mineral-xomashyo, yoqilg‘i-energetika va yer-suv resurslarini uzoq muddatli istiqbolda rivojlantirish va ulardan oqilona foydalanish bo‘yicha chuqur tahlil qilish, takliflar ishlab chiqish va prognozlarni shakllantirish;

makroiqtisodiy parametrlar va proporsiyalarni tizimli tahlil qilish, ko‘p variantli uzoq va o‘rta muddatli makroiqtisodiy prognozlarni shakllantirish, yig‘ma qiymat balanslari tizimini ishlab chiqish, ularning amalga oshirilishi monitoringini olib borish, makroiqtisodiy barqarorlik va izchil iqtisodiy o‘sishni ta’minlash bo‘yicha takliflar tayyorlash;

moliya-bank tizimini yanada isloh qilish va erkinlashtirish, iqtisodiyotda to‘lov va hisob-kitoblar mexanizmini takomillashtirish, turli darajadagi budjetlar o‘rtasida o‘zaro munosabatlarni maqbullashtirish, soliq ma’muriyatchiligining ilg‘or usullarini amaliyotga joriy etish jarayonlarini tahlil etish va takliflar ishlab chiqish, shuningdek pul muomalasini mustahkamlash, soliq, budjet va kredit siyosatini, inflatsiyani jilovlash mexanizmini takomillashtirish, milliy valyutaning barqarorligini ta’minlash masalalari;

tarmoq va hududiy proporsiyalarni chuqur tahlil etish, shu asosda iqtisodiyotdagi tarkibiy o‘zgartirishlar va ularni belgilovchi omillar, raqobat muhitini rivojlantirish bo‘yicha takliflar ishlab chiqish, investitsiya siyosatining ustuvor yo‘nalishlarini asoslab berish, qulay investitsiya muhitini shakllantirish va xorijiy investitsiyalarni jalb etish bo‘yicha tavsiyalar tayyorlash;

oila iste’mol budjetini belgilovchi omillarni tadqiq etish, daromadlar va xarajatlar, real ish haqi manbalarini shakllantirish hamda aholi farovonligini oshirish sohasida ijtimoiy va iqtisodiy siyosatni ishlab chiqish borasida chuqur asoslangan takliflar tayyorlash;

demografik jarayonlarni tadqiq qilish, oqilona bandlikni va mintaqalar ijtimoiy infratuzilmasini rivojlantirishni ta’minlaydigan chora-tadbirlarni asoslash;

xalqaro hisob va hisobot tizimini joriy etish, milliy hisobvaraqlar tizimini takomillashtirish bo‘yicha jahon tajribasini o‘rganish va takliflar ishlab chiqish.

3. Quyidagilar belgilansin:

Markaz tadqiqotlarining 2-bandda ko‘rsatilgan eng muhim funksional yo‘nalishlari bo‘yicha shakllantiriladigan loyihalar Markazning asosiy tarkibiy bo‘linmalarini tashkil etadi;

tadqiqot loyihalariga ilmiy ishlarda tajribaga ega bo‘lgan yuqori malakali mutaxassislardan tanlov asosida tayinlanadigan loyiha rahbarlari boshchilik qiladi;

Ilmiy kengash qaroriga binoan loyihalarning rahbarlari va ijrochilari bilan O‘zbekiston Respublikasi Mehnat kodeksiga muvofiq bir yilga mehnat shartnomasi (kontraktlar) tuziladi, ularda loyiha temasi, maqsadi, vazifalari va uni amalga oshirishning asosiy bosqichlari aniq ko‘rsatiladi;

loyiha rahbarlarining hisobotlari Ilmiy kengash majlislarida muntazam tinglab boriladi, kengash yil yakunlariga ko‘ra o‘tkazilgan tadqiqotlarning natijalari va sifatiga baho beradi hamda loyiha doirasida tadqiqotlarni davom ettirish yoki uni yopish to‘g‘risida qaror qabul qiladi;

Markaz xodimlariga davlat boshqaruvi organlari xodimlari uchun belgilangan mehnatga haq to‘lash, mukofotlash va moddiy yordam ko‘rsatish shartlari joriy etiladi.

4. Quyidagilar:

umumiy cheklangan xodimlar soni 166 nafar, shu jumladan ilmiy xodimlar soni 130 nafar bo‘lgan Ijtimoiy-iqtisodiy tadqiqotlar markazining tuzilmasi 1-ilovaga* muvofiq;

Ijtimoiy-iqtisodiy tadqiqotlar markazi to‘g‘risidagi nizom 2-ilovaga* muvofiq tasdiqlansin.

Markaz direktoriga Iqtisodiyot va tashqi iqtisodiy aloqalar masalalari yig‘ma axborot-tahlil departamenti bilan kelishilgan holda zarurat tug‘ilganda Markazning tasdiqlangan tuzilmasiga xodimlarning cheklangan soni doirasida o‘zgartirishlar kiritish huquqi berilsin.

Belgilansinki, Markaz direktori Iqtisodiyot va tashqi iqtisodiy aloqalar masalalari yig‘ma axborot-tahlil departamentining taqdimnomasi bo‘yicha Vazirlar Mahkamasi tomonidan lavozimga tasdiqlanadi.

5. Markazga quyidagi huquqlar berilsin:

tadqiqotlarga tarmoq ekspertlari sifatida kontrakt asosida davlat boshqaruvi organlari, idoralar, banklarning mutaxassislarini, tadqiqot markazlari xodimlarini, oliy o‘quv yurtlari, shu jumladan chet el oliy o‘quv yurtlarining olimlari va o‘qituvchilarini jalb etish;

boshqa ilmiy tadqiqot tashkilotlari, jamg‘armalar, universitetlar, shu jumladan xalqaro va xorijiy tashkilotlar, jamg‘armalar, universitetlar bilan qo‘shma tadqiqotlar o‘tkazishga shartnomalar tuzish;

noshirlik faoliyatini amalga oshirish, iqtisodiyotni rivojlantirish muammolari bo‘yicha axborot-tahliliy sharh va ma’lumotnomalar chop etish;

Markaz zimmasiga yuklangan vazifalar doirasida markaziy iqtisodiy organlar, vazirliklar, idoralar, banklar va boshqa tashkilotlardan zarur normativ, statistik va tahliliy axborotlarni talab qilib olish.

6. Quyidagilar Markazni moliyalashtirish manbalari etib belgilansin:

maqsadli budjet mablag‘lari, vazirliklar, idoralar va banklarning buyurtmanomalari bo‘yicha tadqiqotlar o‘tkazishga ular tomonidan ajratiladigan mablag‘lar;

xalqaro moliya institutlari va donor tashkilotlarning grantlari;

O‘zbekiston Respublikasi qonun hujjatlari doirasida Markazning o‘z faoliyatidan oladigan daromadlari.

Markaz daromadlari soliqqa tortish obyekti emasligi belgilab qo‘yilsin.

7. Markaz:

O‘zbekiston Respublikasi Prezidentining farmonlari, qarorlari va farmoyishlari, Oliy Majlis materiallari, Vazirlar Mahkamasining qaror va farmoyishlari, vazirliklar hamda idoralarning normativ va yo‘riqnoma hujjatlari yuborilishi shart bo‘lgan tashkilotlar ro‘yxatiga;

O‘zbekiston Respublikasi Davlat statistika qo‘mitasi, Moliya vazirligi, Tashqi iqtisodiy aloqalar, investitsiyalar va savdo vazirligi, Mehnat va aholini ijtimoiy muhofaza qilish vazirligi, Davlat soliq qo‘mitasi, Davlat bojxona qo‘mitasi, Davlat mulki qo‘mitasining statistik axborotnomalari yuborilishi shart bo‘lgan ro‘yxatga kiritilsin.

8. Markaz:

Iqtisodiyot va tashqi iqtisodiy aloqalar masalalari yig‘ma axborot-tahlil departamenti, O‘zbekiston Respublikasi Moliya vazirligi bilan kelishilgan holda ikki hafta muddatda Markazning lavozimlar ro‘yxatini ishlab chiqsin va belgilangan tartibda tasdiqlasin;

bir oy muddatda Markaz bo‘linmalari respublikada amalga oshirilayotgan iqtisodiy islohotlarning mohiyatini chuqur anglaydigan yuqori malakali, tajribali mutaxassislar bilan kontrakt asosida to‘ldirilishini ta’minlasin.

9. Belgilansinki, Ijtimoiy-iqtisodiy tadqiqotlar markazi Iqtisodiyot vazirligi huzuridagi Samarali iqtisodiy siyosat markazi, Moliya vazirligi huzuridagi Soliq-budjet siyosati markazi, Markaziy bank huzuridagi Pul-kredit siyosati markazi, Bank-moliya tizimi rivojlanishini prognozlash va erkinlashtirish institutining shartnomalari hamda majburiyatlari bo‘yicha huquqiy voris hisoblanadi.

10. Markaz quyidagi manzilda joylashtirilsin: Toshkent shahri, A. Qayumov ko‘chasi, 2, mazkur bino O‘zbekiston Respublikasi Markaziy banki balansidan Markaz balansiga bepul o‘tkaziladi, G‘ulomov ko‘chasi, 1.

11. Quyidagilar:

Vazirlar Mahkamasining “Iqtisodiy tadqiqotlarni tashkil qilishni takomillashtirish chora-tadbirlari to‘g‘risida” 2000-yil 29-noyabrdagi 464-sonli qarori;

Vazirlar Mahkamasining “Bank-moliya sohasidagi tadqiqotlarni chuqurlashtirish chora-tadbirlari to‘g‘risida” 2002-yil 18-noyabrdagi 398-sonli qarori o‘z kuchini yo‘qotgan deb hisoblansin.

12. Ushbu qarorning ijrosini nazorat qilish O‘zbekiston Respublikasi Bosh vazirining o‘rinbosari V.A. Golishev zimmasiga yuklansin.