LexUZ шарҳи
Мазкур Битим Ўзбекистон Республикаси Президентининг 2018 йил 14 февралдаги ПҚ-3531-сонли «Халқаро шартномаларни тасдиқлаш тўғрисида»ги қарори билан тасдиқланган.
Ўзбекистон Республикаси Ҳукумати билан Афғонистон Ислом Республикаси Ҳукумати, кейинги ўринларда «Томонлар» деб аталувчилар,
Ўзбекистон Республикаси билан Афғонистон Ислом Республикаси ўртасида алоқаларни кенгайтириш учун қулай шарт-шароитлар яратиш мақсадида,
Ўзбек-Афғон Давлат чегараси, шу жумладан, автомобиль, темир йўл ва дарё йўллари орқали шахслар, транспорт воситалари, юк, товарлар, ҳайвонлар ва бошқа мол-мулкларнинг ўтишини такомиллаштириш зарурлигини ҳисобга олган ҳолда,
ноқонуний миграциянинг олдини олиш, қурол-яроғ контрабандаси, гиёҳвандлик воситалари ва бошқа тақиқланган товарларнинг олиб ўтилишига қарши курашиш, шунингдек, эпидемия ва эпизоотиялар тарқалишининг олдини олиш бўйича биргаликда тезкор чора-тадбирларни амалга ошириш мақсадида,
Томонлар Ўзбек-Афғон Давлат чегараси орқали шахслар, транспорт воситалари, юк, товарлар, ҳайвонлар ва бошқа мол-мулкларнинг ўтиши учун мазкур Битимнинг Иловасида кўрсатилган халқаро ўтказиш пунктларини (кейинги ўринларда «Ўтказиш пунктлари» деб аталади) ташкил этишга келишиб олдилар.
Ўтказиш пунктлари шахслар, транспорт воситалари, товарлар, юклар, ҳайвонлар ва бошқа мол-мулклар ўтишини назорат қилишни таъминлайди.
Томонлар давлатларининг фуқаролари ўтказиш пунктлари орқали фуқароларнинг давлат чегарасидан ўтишига оид икки томонлама битим ва баённомаларда кўзда тутилган шартларга кўра амалдаги ҳужжатлар асосида Томонлар давлатларининг ҳудудига кирадилар ва ундан чиқадилар.
Ўтказиш пунктлари, башарти Томонлар давлатларининг чегара ва божхона идоралари бошқача белгиламаган бўлса, кунда йигирма тўрт соат фаолият кўрсатади.
Иш режимига риоя этилишини назорат қилиш, шунингдек шахслар, транспорт воситалари, товарлар, юк, ҳайвонлар ва бошқа мол-мулкларни ўтказиш тартиби Томонлар давлатларининг чегара ва божхона идоралари келишувига кўра белгиланади.
Шахслар, транспорт воситалари, юк, товарлар, ҳайвонлар ва бошқа мол-мулкларнинг чегара, божхона ва зарур ҳолларда назоратнинг бошқа турлари ўтказиш пунктларида Томонлар давлатларининг миллий қонунчилиги ва улар иштирок этган халқаро шартномаларга мувофиқ амалга оширилади. Томонлар алоҳида битимлар асосида биргаликдаги назоратни амалга оширадилар.
Ўтказиш пунктларининг тегишли фаолиятини таъминлаш учун Томонларнинг ҳар бири ўз давлати ҳудудида зарур инфратузилмани яратади.
Янги ўтказиш пунктларини ташкил этиш, мавжудларини тугатиш ёки уларнинг мақоми ва иш режимини ўзгартириш тартиби Томонлар ўртасида дипломатик каналлар орқали келишилади ҳамда мазкур Битимнинг ажралмас қисми ҳисобланадиган баённомалар орқали расмийлаштирилади.
Ўтказиш пунктлари орқали ҳаракатланишни чеклаш ёки тўхтатиш табиий офатлар оқибатида, санитария-карантин, эпидемиялар, эпизоотиялар ва бошқа сабабларга кўра Томонлар давлатларининг миллий хавфсизлиги манфаатларини кўзлаб амалга оширилиши мумкин.
Бундай чеклашларни киритаётган Томон, бошқа Томонни уларни киритиш режалаштирилаётган вақтидан камида йигирма тўрт соат олдин чеклашнинг сабаб ва муддатларини кўрсатган ҳолда, дипломатик каналлар орқали хабардор қилади.
Томонлар Ўзбек-Афғон Давлат чегараси орқали ҳаракатланишнинг ўтказиш пунктлари объектлари ёки коммуникация қурилмаларида режалаштирилган таъмирлаш билан боғлиқ ҳолда чеклангани ёки тўхтатилгани тўғрисида бир-бирларини бундай ишлар бошланишидан камида уч ой олдин, уларнинг бошланиш ва тугатилиш санаси тўғрисидаги хабарнома билан бирга хабардор қиладилар.
Мазкур Битим Томонларнинг улар иштирокчи ҳисобланган бошқа халқаро шартномалардан келиб чиқадиган ҳуқуқ ва мажбуриятларига дахл қилмайди.
Томонларнинг ўзаро келишувига кўра мазкур Битимга унинг ажралмас қисми ҳисобланадиган алоҳида баённомалар билан расмийлаштириладиган ўзгартириш ва қўшимчалар киритилиши мумкин.
Мазкур Битимнинг қоидаларини — қўллаш ёки талқин қилиш бўйича низо ва келишмовчиликлар юзага келган ҳолда Томонлар уларни музокара ва маслаҳатлашувлар ўтказиш орқали ҳал этадилар.
Т/р | Ўзбекистон Республикасининг ўтказиш пунктлари номи | Ўзбекистон Республикасидаги жойлашув ўрни | Афғонистон Ислом Республикасининг ўтказиш пунктлари номи | Афғонистон Ислом Республикасидаги жойлашув ўрни | Ўтказиш пунктларининг мақоми | Иш режими |
1. | «Термиз-автомобиль йўли» | Сурхондарё вилояти, | «Ҳайратон-автомобиль йўли» | Балх вилояти, Ҳайратон шаҳри | Халқаро | Кечаю кундуз |
2. | «Термиз-темир йўли» | Сурхондарё вилояти, | «Ҳайратон-темир йўли» | Балх вилояти, Ҳайратон шаҳри | Халқаро | Кечаю кундуз |
3. | «Термиз-дарё порти» | Сурхондарё вилояти, | «Ҳайратон-дарё порти» | Балх вилояти, Ҳайратон шаҳри | Халқаро | Кечаю кундуз |
Мазкур Битим унинг кучга кириши учун зарур бўлган давлат ички процедураларини Томонлар бажарганликлари тўғрисида охирги ёзма хабарнома олинган санадан бошлаб кучга киради ҳамда беш (5) йил мобайнида амал қилади. Томонлардан бири бошқа Томонни мазкур Битим амал қилишини тугатиш истаги тўғрисида олти (6) ой аввал ёзма равишда хабардор қилмаса, у ўз-ўзидан кейинги беш (5) йиллик муддатларга узаяверади.