Вазирлар Маҳкамасининг «Ўзбекистон Республикаси Давлат хавфсизлик хизмати ҳарбий хизматчиларининг овқатланишини ташкил этиш тартибини янада такомиллаштириш чора-тадбирлари тўғрисида» 2018 йил 26 апрелдаги 302-сон қарорининг ижросини таъминлаш ҳамда Ўзбекистон Республикаси Давлат хавфсизлик хизмати органлари ва бўлинмаларининг шахсий таркибини овқатлантиришни ташкил этиш тизимини такомиллаштириш мақсадида Ўзбекистон Республикаси Вазирлар Маҳкамаси қарор қилади:

1. Вазирлар Маҳкамасининг «Ўзбекистон Республикаси Давлат хавфсизлик хизмати ҳарбий хизматчиларининг овқатланишини ташкил этиш тартибини янада такомиллаштириш чора-тадбирлари тўғрисида» 2018 йил 26 апрелдаги 302-сон қарорида Ўзбекистон Республикаси Давлат хавфсизлик хизмати бўлинмалари шахсий таркибининг овқатланишини аутсорсинг шартларида ташкил этиш соҳасида давлат-хусусий шериклик механизмларини босқичма-босқич жорий этиш назарда тутилганлиги маълумот учун қабул қилинсин.

2. Ўзбекистон Республикаси Давлат хавфсизлик хизмати органлари ва бўлинмалари шахсий таркибининг овқатланишини ташкил этиш бўйича аутсорсинг хизматларини кўрсатиш тартиби тўғрисида низом иловага мувофиқ тасдиқлансин.

3. Ўзбекистон Республикаси Давлат хавфсизлик хизмати раисига қуйидаги ҳуқуқлар берилсин:

озиқ-овқат маҳсулотларининг зарур бўлган захираларини сақлаш ва уларни Ўзбекистон Республикаси Давлат хавфсизлик хизмати органлари ва бўлинмалари шахсий таркибининг овқатланишини таъминлаш учун аутсорсерларга ҳақиқий харид нархларида транспорт харажатларини қоплашни ҳисобга олган ҳолда, янгилаш тартибида реализация қилиш;

шахсий таркибнинг узлуксиз овқатланишини (жумладан, доимий жойлашув пунктида, дала шароитида, табиий ва бошқа характердаги фавқулодда ҳолатлар юзага келганда, шунингдек, бошқа ҳолатларда) ташкил этиш мақсадида Ўзбекистон Республикаси Давлат хавфсизлик хизмати органлари ва бўлинмалари штатида тегишли лавозимларни сақлаб туриш;

фавқулодда ва бошқа вазиятларда Ўзбекистон Республикаси Давлат хавфсизлик хизмати органлари ва бўлинмалари шахсий таркибини овқатланишини ташкил этиш учун муқобил штат лавозимларини назарда тутиш ва Ўзбекистон Республикаси Давлат хавфсизлик хизмати бўлинмалари ва органлари штатига киритиш;

шахсий таркибни иссиқ овқат таъминотига киритган ҳолда, унинг овқатланишини ташкил этадиган аутсорсерлар томонидан савдо устамасининг юқори — 20 фоиз даражасига риоя қилиш шарти билан улар учун қонунчиликда назарда тутилган шартлар асосида Ўзбекистон Республикаси Давлат хавфсизлик хизматининг тоифаланган ҳарбий объектлари ҳудудида шахсий таркибни иссиқ овқат таъминотига киритмаган ҳолда, шахсий таркибнинг овқатланишини ташкил қиладиган тадбиркорлик субъектларига ошхона учун бино ва ускуналарни тақдим этиш, шунингдек, уларнинг коммунал тўловлар бўйича харажатларини тўлаб бериш;

Давлат хавфсизлик хизматининг шахсий таркиб овқатланишини аутсорсинг шартларида ташкил этиш тизимига ўтадиган органлари ва бўлинмаларини белгилаш.

4. Қорақалпоғистон Республикаси Вазирлар Кенгаши раисига, вилоятлар ва Тошкент шаҳар ҳокимларига:

аутсорсерлар танловини ўтказишни, бунда умумий овқатланиш соҳасида катта тажрибага, етарли молиявий, моддий-техника ва логистика базасига эга, ўз ташаббуси билан ошхоналар шароитини яхшилашга тайёр бўлган талабгорларга устунлик бериш;

Ўзбекистон Республикаси Давлат хавфсизлик хизматининг органлари ва бўлинмаларига белгиланган тартибда шартномалар тузиш учун аутсорсерларни танлаш бўйича баённома қарорларини ўз вақтида тақдим этишни;

аутсорсерларга озиқ-овқат маҳсулотларини фермер хўжаликларидан ва бошқа улгуржи савдо вакилларидан тўғридан-тўғри шартномалар бўйича сотиб олишда ҳар томонлама кўмаклашишни таъминласин.

5. Аутсорсерлар танловини сифатли ўтказиш бўйича жавобгарлик Қорақалпоғистон Республикаси Вазирлар Кенгашига, вилоятлар ва Тошкент шаҳар ҳокимлари зиммасига юклансин.

6. «Ўзбекозиқовқатзаҳира» уюшмаси ва Ўзбекистон Республикаси Вазирлар Маҳкамаси ҳузуридаги Давлат захираларини бошқариш қўмитасига ҳар йили Ўзбекистон Республикаси Давлат хавфсизлик хизмати буюртманомаларига мувофиқ асосий турдаги озиқ-овқат маҳсулотлари, сабзавотлар ва бошқа озиқ овқат маҳсулотлари турларини тайёрлашда Ўзбекистон Республикаси Давлат хавфсизлик хизмати органлари ва бўлинмалари эҳтиёжини ҳисобга олсин ва уларни аутсорсерларга иссиқ овқат таъминотида бўлган шахсий таркибнинг овқатланишини ташкил этиш учун реализация қилсин.

7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — Ўзбекистон Республикаси Молия вазири Д.А. Қўчқоров ва Ўзбекистон Республикаси Давлат хавфсизлик хизмати раиси А.А. Азизов зиммасига юклансин.

Мазкур Низом Ўзбекистон Республикаси Давлат хавфсизлик хизмати органлари ва бўлинмалари (кейинги ўринларда Хизмат органлари ва бўлинмалари деб аталади) шахсий таркибининг овқатланишини ташкил этиш бўйича аутсорсинг хизматларини кўрсатиш тартибини белгилайди.

1. Мазкур Низомда қуйидаги асосий тушунчалар қўлланилади:

аутсорсинг — Хизмат органлари ва бўлинмалари томонидан шахсий таркибининг овқатланишини ташкил этиш хизматларини кўрсатиш функцияларини шартнома асосида аутсорсерга бериш;

аутсорсер — Хизмат органлари ва бўлинмаларига шахсий таркибнинг овқатланишини ташкил этиш бўйича шартнома асосида аутсорсинг хизматларини кўрсатувчи юридик шахс;

шахсий таркиб — ўрнатилган тартибда иссиқ овқат таъминотига киритилган ҳарбий хизматчилар ва пенсионерлар ҳамда уларнинг оила аъзолари (болаларидан ташқари), шу жумладан стационар ҳарбий-шифохона муассасаларида даволанаётганлар.

2. Хизмат органлари ва бўлинмалари шахсий таркибини озиқ-овқат таъминоти озиқ-овқат йўналиши томонидан аутсорсинг шартларида ташқи умумий овқатланиш корхоналарини жалб этиш орқали таъминланади.

3. Аутсорсерларни жалб этиш орқали Хизмат органлари ва бўлинмалари шахсий таркибининг овқатланишини ташкил этиш учун пул маблағларига бўлган эҳтиёжни аниқлаш ва талаб қилиш режалаштирилган йилда овқатланувчилар сони, меъёрлар ва озиқ-овқат маҳсулотлари нархидан келиб чиққан ҳолда тузиладиган ҳисоб-китоблар асосида амалга оширилади.

4. Аутсорсерлар Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан талабгорларни ўрганиш ҳамда энг яхши таклифларни танлаш орқали танлаб олинади. Бунда умумий овқатланиш соҳасида катта иш тажрибасига, тегишли молиявий, моддий-техника ва логистика базасига эга, ошхоналарнинг ҳолатини яхшилашга тайёр бўлган талабгорларга устунлик берилади.

5. Аутсорсерларни танлаб олиш натижалари баённома шаклида расмийлаштирилади ва шахсий таркибнинг овқатланишини ташкил этиш бўйича аутсорсинг хизматларини кўрсатиш юзасидан Хизмат органлари ва бўлинмалари билан белгиланган тартибда шартнома тузиш учун бир кун муддатда Хизмат органлари ва бўлинмаларига юборилади.

6. Аутсорсерларни жалб этган ҳолда, шахсий таркибнинг стационар ва дала шароитларида овқатланишини ташкил этиш бўйича шартномалар бир календарь йил учун тузилади.

Шахсий таркибнинг овқатланишини ташкил этиш бўйича ҳисоб-китоблар шартнома шартларига мувофиқ амалда кўрсатилган хизматлар ва таомнома бўйича тайёрланган таомлар асосида амалга оширилади.

Тегишли ой учун умумий сумманинг 15 фоизи миқдоридаги олдиндан тўлов бошланган ойнинг дастлабки 10 банк куни давомида хизматлар кўрсатиш жадвалига мувофиқ амалга оширилади. Сумманинг қолган қисми амалда кўрсатилган хизматлар асосида шартнома шартларига кўра тўланади.

7. Шартнома суммаси тузиладиган шартноманинг ажралмас қисми бўлган умумқўшин паёгининг ҳисоб-китобига асосан аниқланади ва унда умумий овқатланувчилар сони, озиқ-овқат паёкларининг нормаси, бир овқатланувчи учун озиқ-овқат нархи ва умумий қиймат ойларга бўлинган ҳолда кўрсатилади.

8. Озиқ-овқат маҳсулотлари нархларининг бозордаги ўртача кўрсаткичлари тегишли ҳудудда юзага келган нархлар даражасини ҳар ой ўрганиш орқали Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан белгиланади.

Озиқ-овқат маҳсулотларининг Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари баённомаларида белгиланган нархлари улар тасдиқлангандан кейинги кундан эътиборан кучга киради.

9. Агар озиқ-овқат маҳсулотларининг амалдаги бозор нархлари Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг баённома қарорида белгиланган нархлардан баланд бўлса, Хизматнинг органи ёки бўлинмаси раҳбари аутсорсер билан биргаликда Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларига кўриб чиқиш ва қарор қабул қилиш учун тегишли ҳудуддаги амалдаги нархларни ўрганиб чиқиш далолатномаси илова қилинган таклифларни белгиланган тартибда юборади.

10. Баённома қарорларнинг тўғри тузилиши учун жавобгарлик Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларига юкланади.

11. Хизмат шахсий таркибининг овқатланишини ташкил этишда аутсорсерларга давлат стратегик захирасидан олинган озиқ-овқат маҳсулотларини ҳамда Хизмат органлари ва бўлинмаларининг ёрдамчи хўжаликларида етиштирилган қишлоқ хўжалиги маҳсулотларини қайта ишлаш асосида беришга ёки реализация қилишга рухсат берилади.

Аутсорсерларга бериладиган ёки реализация қилинадиган озиқ-овқат ва қишлоқ хўжалиги маҳсулотларининг нархи транспорт харажатларини қоплашни ҳисобга олган ҳолда амалда сотиб олинган нарх асосида белгиланади.

12. Аутсорсер ҳар ойнинг 5-санасига қадар Хизмат органига (бўлимига) ўтган ойда амалда кўрсатилган хизматлар бўйича ҳисоб-фактурани ўзаро ҳисоб-китобларни амалга ошириш учун тақдим этади. Кўрсатилган хизматлар нархи озиқ-овқат маҳсулотларининг амалдаги харид нархидан келиб чиққан ҳолда (бўлинмалар жойлашган жойдаги ўртача бозор нархидан юқори бўлмаган даражада) ва аутсорсернинг барча харажатларини, шу жумладан ходимлар иш ҳақи, солиқлар, транспорт харажатлари ва бошқаларни ўз ичига олган 20 фоизгача устама ҳақи ҳисобга олинган равишда белгиланади.

13. Хизмат органлари ва бўлинмалари шахсий таркибининг овқатланишини ташкил этиш учун аутсорсерларни танлаш ва аутсорсер ҳамда Хизмат органи (бўлинмаси) ўртасидаги ҳисоб-китоблар мазкур Низомга 2- ва 3-иловаларга мувофиқ схемалар бўйича амалга оширилади.

14. Шахсий таркибнинг овқатланиш режимини ишлаб чиқиш аутсорсерлар билан келишилган ҳолда Хизмат органи ва бўлинмаси бошлиғига, унинг тегишли ўринбосарига, Хизмат органи ва бўлинмаси тиббиёт ва озиқ-овқат йўналишлари бошлиқларига юкланади.

15. Таомлар тарқатилишидан олдин Хизмат органи ва бўлинмаси врачи (фельдшер) орган ва бўлинма навбатчиси билан биргаликда таомлар сифатини татиб кўриш орқали текширадилар, шунингдек, ошхона хоналари, ошхона идиш-товоқлари, инвентарларнинг санитар ҳолатини назорат қиладилар.

16. Хизмат органлари ва бўлинмалари шахсий таркибининг овқатланишини, белгиланган озиқ-овқат маҳсулотларининг ҳар бир ҳарбий хизматчига тўлиқ берилишини назорат қилиш, тайёрланган таомлар сифатини баҳолаш учун бўлинма ва орган раҳбари ёки унинг кўрсатмасига биноан тегишли мансабдор шахслар томонидан ҳар куни тайёр таомлар (эрталабки нонушта, тушлик, кечки нонуштадан олдин) татиб кўрилади.

Хизмат органлари ва бўлинмалари масъул мансабдор шахслар орқали тайёрланган таомлар сифати, порциялар миқдорини текширишга ҳақлидирлар.

17. Хизмат органлари ва бўлинмаларига келтириладиган барча озиқ-овқат маҳсулотлари сифатли бўлиши шарт. Маҳсулотлар сифати мувофиқлик сертификатига ва давлат стандартлари томонидан ўрнатилган кўрсаткич ва техник шартларга мос келиши керак.

18. Сифатини тасдиқловчи ҳужжатларсиз (сертификатлар ва маълумотлар), шунингдек, давлат стандартлари талабларига ва техник шартларга жавоб бермаган озиқ-овқат маҳсулотларни қабул қилишга йўл қўйилмайди. Келтирилган ҳар бир партия озиқ-овқат маҳсулотларига уларнинг сифатини тасдиқловчи ҳужжатлар илова қилинади.

19. Хизмат орган ва бўлинмаларига келтириладиган озиқ-овқат маҳсулотлари Хизмат орган ва бўлинмаларининг мансабдор шахслари, тиббиёт ва озиқ-овқат йўналишлари комиссиялари томонидан аутсорсер вакили иштирокида назорат қилинади.

Органолептик кўрсаткичларига кўра сифатсизлиги аниқланган маҳсулотлар Ўзбекистон Республикаси Соғлиқни сақлаш вазирлигининг тегишли лабораторияларига, шунингдек, ички идоравий лабораторияларга таҳлил учун топширилади.

Озиқ-овқат омборига келтирилган маҳсулотларнинг сифати ҳақиқатдан ҳам ҳужжатларда кўрсатилган стандарт талабларига, техник шартларга, маркировкага мос келмаса, Хизмат органи ва бўлинма раҳбари томонидан тайинланган комиссия томонидан бу ҳақида далолатнома тузилади. Аутсорсер зудлик билан сифатсиз маҳсулотни алмаштириш бўйича чоралар кўради.

Бундай ҳолатда Хизмат органи ва бўлинма раҳбари сифатсиз маҳсулот келтирилганлиги ва шартнома шартлари бузилганлиги ҳақида ёзма равишда аутсорсерни хабардор қилади.

20. Ошпазлар ва ошхонанинг бошқа ишчиларига улар санитария-гигиена минимумидан синов топшириб тиббий кўрикдан ўтганларидан сўнг ошхонада ишлашга рухсат берилади. Кейинчалик улар маълум ўрнатилган муддатларда тиббий кўрикдан ўтадилар ва кўрик натижалари шахсий санитария китобчасига киритилади.

21. Хизматнинг тегишли органлари ва бўлинмалари томонидан махсус текширув тадбирларидан ўтказилган аутсорсерларга Хизматнинг ёпиқ объектларида фаолият кўрсатишига рухсат берилади.

22. Хизматнинг ёпиқ объектларида фаолият кўрсатувчи аутсорсерлар Ўзбекистон Республикасининг амалдаги қонунчилигига мувофиқ равишда Хизмат органлари ва бўлинмалари шахсий таркибининг овқатланишини ташкил этиш фаолияти даврида маълум бўлган ошкор қилиб бўлмайдиган ва махфий маълумотларни тарқатмаслиги учун тўлиқ жавобгардир.

23. Озиқ-овқат йўналишидаги объектлар ва ошхонага фойдаланишга берилган моддий-техник воситалар Хизмат органлари ва бўлинмалари комиссияси томонидан тегишли далолатнома расмийлаштирилиб, аутсорсерга (ноль ставка билан) вақтинча фойдаланишга берилади. Ушбу далолатнома орган ва бўлинма комиссияси ва аутсорсер томонидан имзоланиб, Хизмат органи ва бўлинмаси раҳбари томонидан тасдиқланади.

24. Хизмат органлари ва бўлинмалари шахсий таркибининг овқатланишини ташкил этиш учун фойдаланишга вақтинча топширилган моддий-техник воситаларга хизмат кўрсатиш ва таъмирлаш ишларини аутсорсер амалга оширади.

25. Аутсорсерга вақтинча фойдаланишга топширилган моддий-техник воситалар эксплуатация қилишнинг ўрнатилган муддатидан олдин яроқсиз ҳолга келса, аутсорсер ҳисобидан тикланади.

26. Шахсий таркибнинг овқатланишини ташкил этиш бўйича фаолият кўрсатаётган аутсорсерларга ёпиқ объектларда жойлашган умумий овқатланиш муассасаларида Хизматнинг шахсий таркиби учун халқ истеъмол товарлари ва озиқ-овқат маҳсулотларини сотиш бўйича савдо шахобчалари юритишга рухсат берилади. Бу фаолият учун қўшимча рухсат берувчи ҳужжатлар талаб этилмайди. Маҳсулот нархига 20 фоизгача устама ҳақи ўрнатилади.

27. Мазкур Низомда белгиланган талабларнинг бузилиши тузилган шартномани белгиланган тартибда Хизмат органи ва бўлинмаси ёки аутсорсер ташаббуси билан бекор қилиш учун асос бўлиши мумкин.

28. Мазкур Низомда белгиланган талабларни бузган шахслар қонунчиликка асосан жавобгар бўлади.