Ўзбекистон Республикаси Бюджет кодексига мувофиқ, шунингдек, Ўзбекистон Республикаси Молия вазирлигининг Ягона ғазна ҳисобварағидаги вақтинча бўш маблағларни жойлаштириш жараёнларини ягона тизимга ўтказиш ва ундан фойдаланиш самарадорлигини ошириш мақсадида Вазирлар Маҳкамаси қарор қилади:

1. Ўзбекистон Республикаси Молия вазирлиги Ғазначилиги (кейинги ўринларда Молия вазирлиги Ғазначилиги деб аталади) Ўзбекистон Республикаси Молия вазирлигининг Ягона ғазна ҳисобварағидаги вақтинча бўш маблағларни тижорат банклари депозитларига жойлаштириш бўйича ягона орган этиб белгилансин.

Пул-кредит сиёсатини самарали амалга ошириш мақсадида Молия вазирлиги Ғазначилиги Ўзбекистон Республикаси Молия вазирлигининг Ягона ғазна ҳисобварағидаги вақтинча бўш маблағларни ушбу Низомнинг 13-бандида белгиланган тартибда ҳамда Марказий банкнинг қайта молиялаштириш ставкасидан кам бўлмаган ставкада депозит шартномаси асосида тўғридан-тўғри Ўзбекистон Республикаси Марказий банки депозитига жойлаштириши мумкин.

2. Ўзбекистон Республикаси Молия вазирлигининг Ягона ғазна ҳисобварағидаги вақтинча бўш маблағларни жойлаштириш тартиби тўғрисидаги низом иловага мувофиқ тасдиқлансин.

3. Белгилаб қўйилсинки:

илгари жойлаштирилган вақтинча бўш маблағлар депозит муддати тугагунига қадар тижорат банкларининг депозит хисобварақларида сақланади ва депозит шартномасида белгиланган муддатларда қайтарилади;

давлат мақсадли жамғармалари ва бюджетдан ташқари бошқа жамғармалар, шунингдек, бюджет ташкилотлари ўзининг вақтинча бўш маблағларини тижорат банклари депозитларига Молия вазирлиги Ғазначилигига буюртманомалар тақдим этиш йўли билан жойлаштирадилар.

4. Ўзбекистон Республикаси Молия вазирлиги Ғазначилиги томонидан вақтинча бўш маблағларни тижорат банкларининг депозитларига жойлаштириш жараёнида инсон омилини истисно этишни назарда тутувчи, вақтинча бўш маблағларни жойлаштириш бўйича таклифларни электрон саралаш учун мўлжалланган ва Марказий банк ҳамда барча тижорат банкларининг уланишини таъминловчи дастурий маҳсул ишлаб чиқилаётганлиги маълумот учун қабул қилинсин.

5. Белгилаб қўйилсинки, ушбу қарорнинг 4-бандида назарда тутилган дастурий маҳсулни ишлаб чиқиш ва амалиётга жорий қилиш Ўзбекистон Республикаси Молия вазирлигининг Ахборот-ҳисоблаш маркази томонидан Ўзбекистон Республикаси Молия вазирлиги Ғазначилиги билан биргаликда амалга оширилади.

6. Вазирлар Маҳкамасининг «Ўзбекистон Республикаси Бюджет кодексини амалга оширишга доир норматив-ҳуқуқий ҳужжатларни тасдиқлаш тўғрисида» 2015 йил 22 майдаги 135-сон қарори ўз кучини йўқотган деб ҳисоблансин (Ўзбекистон Республикаси ҚТ, 2015 й., 5-сон, 40-модда).

7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — Ўзбекистон Республикаси Молия вазири Ж.А. Қўчқоров зиммасига юклансин.

1. Ушбу Низом Ўзбекистон Республикаси Молия вазирлиги Ғазначилиги (кейинги ўринларда — Молия вазирлигининг Ғазначилиги) томонидан Ўзбекистон Республикаси Молия вазирлигининг Ягона ғазна ҳисобварағидаги вақтинча бўш маблағларни (кейинги ўринларда — вақтинча бўш маблағлар) ҳамда давлат мақсадли жамғармалари ва бюджетдан ташқари бошқа жамғармалар, шунингдек, бюджет ташкилотларининг вақтинча бўш маблағларини (кейинги ўринларда — бюджетдан ташқари вақтинча бўш маблағлар) тижорат банкларининг бош офислари (кейинги ўринларда — тижорат банклари) депозитларига жойлаштириш тартибини ва уларни жойлаштиришдан олинган даромадлардан фойдаланиш йўналишларини белгилайди.

Вақтинча бўш маблағлар ҳамда бюджетдан ташқари вақтинча бўш маблағлар тижорат банклари депозитларига ушбу Низомга иловага мувофиқ схема бўйича жойлаштирилади.

2. Ушбу Низомнинг амал қилиши қуйидагиларга нисбатан татбиқ этилмайди:

Ўзбекистон Республикаси Президенти ва Вазирлар Маҳкамаси қарорларига мувофиқ ажратиладиган бюджет ссудаларига;

техник кўмаклашиш маблағларига;

Ўзбекистон Республикаси республика бюджетининг касса узилишини қоплаш учун Ўзбекистон Республикасининг республика бюджетига Ягона ғазна ҳисобварағидаги вақтинча бўш маблағлар жалб қилиш ҳолатларига.

3. Пул-кредит ва солиқ-бюджет сиёсати соҳасидаги ҳаракатлар мувофиқлаштирилишини таъминлаш мақсадида Молия вазирлиги Ғазначилиги келгуси чорак учун ойлар бўйича тижорат банкларининг депозитларига жойлаштирилиши режалаштирилаётган вақтинча бўш маблағлар ҳажми тўғрисидаги маълумотни Ўзбекистон Республикаси Марказий банкига (кейинги ўринларда — Марказий банк) келишиш учун тақдим этади.

Молия вазирлиги Ғазначилиги томонидан тақдим этиладиган маълумотдан келиб чиқиб, Марказий банк жойлаштириладиган вақтинча бўш пул маблағларнинг энг кўп миқдорини аниқлайди ҳамда бу ҳақда Молия вазирлиги Ғазначилигини хабардор қилади. Зарурат бўлганда, ушбу кўрсаткичлар ойлик ва чораклик асосда аниқлаштирилади.

Молия вазирлиги Ғазначилиги Марказий банк билан биргаликда битта тижорат банки томонидан депозитга жалб этилиши мумкин бўлган вақтинча бўш пул маблағларнинг энг юқори чегарасини белгилашга ҳақли.

Тижорат банки томонидан депозитга жалб этилиши мумкин бўлган вақтинча бўш маблағларнинг энг юқори чегарасини белгилаш тартиби Ўзбекистон Республикаси Молия вазирлиги томонидан Марказий банк билан келишилган ҳолда белгиланади.

4. Иқтисодиётда инфляция хатарлари вужудга келган тақдирда Марказий банк бу ҳақда Молия вазирлиги Ғазначилигини хабардор қилади. Марказий банкнинг хабарномаси Молия вазирлиги Ғазначилиги томонидан вақтинча бўш маблағларни тижорат банклари депозитларига жойлаштирилишини тўхтатиб туриш учун асос ҳисобланади.

5. Тижорат банкларининг депозитларига вақтинча бўш маблағларни жойлаштиришда тижорат банкларига қўйиладиган асосий талаблар қуйидагилар ҳисобланади:

ҳар йиллик ташқи аудит ижобий хулосасининг мавжудлиги;

тижорат банкида Молия вазирлиги Ғазначилиги томонидан илгари жойлаштирилган депозитлар бўйича муддати ўтказиб юборилган қарздорликнинг йўқлиги.

6. Молия вазирлиги Ғазначилиги зарурият бўлганда тижорат банкларидан уларнинг молиявий ҳолати тўғрисидаги ахборотни сўраши мумкин.

7. Ушбу Низомнинг 5-бандида кўрсатилган талабларга жавоб берувчи, вақтинча бўш маблағлар ҳамда бюджетдан ташқари вақтинча бўш маблағлар депозитларига жойлаштирилиши мумкин бўлган тижорат банкларини аниқлаш бўйича танлов Молия вазирлиги Ғазначилиги томонидан Ўзбекистон Республикаси Молия вазирлигининг тегишли ахборот тизимида (кейинги ўринларда — ахборот тизими) эълон жойлаштириш йўли билан ўтказилади.

Вақтинча бўш маблағларни тижорат банклари депозитларига жойлаштириш ҳажми ва муддатлари, фоиз ставкасининг энг кам миқдори, лотлар сони ва жойлаштириш вақти махсус комиссия томонидан белгиланади.

Махсус комиссия таркиби ҳамда унинг ваколатлари Молия вазирлиги томонидан белгиланади.

7¹. Танловларда қатнашиш истаги бўлган тижорат банклари Молия вазирлигининг тегишли ахборот тизимида рўйхатдан ўтиш учун Молия вазирлиги Ғазначилигига мурожаатнома йўллайди.

Мурожаатноманинг шакли Молия вазирлиги Ғазначилиги томонидан белгиланади.

8. Бюджетдан ташқари вақтинча бўш маблағлар тижорат банклари депозитларига Молия вазирлиги Ғазначилигига буюртманомалар тақдим этиш йўли билан жойлаштирилади.

Бунда танловларда иштирок этиш учун бюджетдан ташқари вақтинча бўш маблағларнинг энг кўп миқдори, жойлаштириш муддатлари ва энг кам фоиз ставкаси давлат мақсадли жамғармалари ва бюджетдан ташқари бошқа жамғармалар, шунингдек, бюджет ташкилотлари томонидан белгиланади.

9. Буюртманомада депозитга жойлаштириш учун вақтинча бўш маблағлар ҳажми ва жойлаштириш муддати мажбурий тартибда кўрсатилади.

10. Вақтинча бўш маблағлар тижорат банклари депозитларига 24 ойгача бўлган муддатга жойлаштирилади.

Бюджетдан ташқари вақтинча бўш маблағлар тижорат банклари депозитларига 12 ойгача муддатга жойлаштирилади.

11. Молия вазирлиги Ғазначилиги танлов бошланишидан кечи билан бир кун аввал танлов иштирокчиларига қўйиладиган талаблар, маблағ ҳажми, минимал фоиз ставкаси, депозит муддати, танловнинг тугаш санаси, вақти ва танлов бўйича бошқа талабларни кўрсатган ҳолда эълон жойлаштиради.

12. Танлов ахборот тизими томонидан ҳар бир эълон бўйича ўтказилади ҳамда депозит суммаси ва танлов шартларида кўрсатилган муддат бўйича энг юқори даромад фоизини таклиф этган тижорат банки танлов ғолиби ҳисобланади.

Бунда танлов иштирокчилари томонидан бир хил фоиз ставкалари ва шартлар таклиф этилган ҳолларда биринчи бўлиб тегишли таклиф берган тижорат банки иштирокчилар орасида ғолиб бўлади.

13. Алоҳида ҳолларда Ўзбекистон Республикаси Президенти ёки Ўзбекистон Республикаси Ҳукуматининг тегишли қарорларига асосан вақтинча бўш маблағлар танлов ўтказилмасдан жойлаштирилиши мумкин.

14. Ушбу Низомнинг 5-банди талабларига жавоб бермайдиган ҳамда молиявий ҳолати Молия вазирлиги Ғазначилиги томонидан қониқарсиз деб топилган тижорат банклари танловларда иштирок этишига йўл қўйилмайди.

15. Тижорат банкларининг депозитларига маблағлар:

вақтинча бўш маблағлар бўйича Молия вазирлиги Ғазначилиги томонидан;

бюджетдан ташқари вақтинча бўш маблағлар бўйича давлат мақсадли жамғармалари ва бюджетдан ташқари бошқа жамғармалар ҳамда бюджет ташкилотлари томонидан ушбу Низомнинг 5-бандида кўрсатилган талабларга жавоб берувчи ва Молия вазирлигининг тегишли ахборот тизимида рўйхатдан ўтган тижорат банки билан тузиладиган депозит шартномаси асосида жойлаштирилади.

16. Шартнома ахборот тизими орқали автоматик тарзда шакллантирилади.

Шартнома танлов ғолиби билан:

вақтинча бўш маблағлар бўйича Молия вазирлиги Ғазначилиги томонидан;

бюджетдан ташқари вақтинча бўш маблағлар бўйича давлат мақсадли жамғармалари ва бюджетдан ташқари бошқа жамғармалар ҳамда бюджет ташкилотлари томонидан имзоланади ва Молия вазирлиги Ғазначилигида рўйхатдан ўтказилгандан сўнг кучга киради.

Бунда шартнома ваколатли шахснинг электрон рақамли имзосидан фойдаланган ҳолда электрон шартнома шаклида тузилади.

17. Электрон рақамли имзодан фойдаланган ҳолда электрон шартнома тузишда электрон рақамли имзонинг ҳақиқийлигини текшириш ахборот тизими томонидан амалга оширилади.

18. Вақтинча бўш маблағларни тижорат банкларининг депозитларига жойлаштиришдан олинган даромадлар қуйидаги тартибда тақсимланади:

70 фоизи — Ўзбекистон Республикаси Президенти Администрацияси фаолиятига кўмаклашиш жамғармасига;

20 фоизи — Ўзбекистон Республикаси молия тизимини ижтимоий ривожлантириш ва ходимларни моддий рағбатлантириш жамғармасига

10 фоизи — Ўзбекистон Республикасининг республика бюджети даромадига.

Бунда вақтинча бўш маблағларни жойлаштиришдан Ўзбекистон Республикаси молия тизимини ижтимоий ривожлантириш ва ходимларни моддий рағбатлантириш жамғармасига олинган даромадлар фақат Ўзбекистон Республикаси молия вазирлиги томонидан белгиланган тартибда фойдаланилади.

19. Бюджетдан ташқари вақтинча бўш маблағларни тижорат банклари депозитларига жойлаштиришдан олинган даромадлар икки иш куни мобайнида тўлиқ ҳажмда уларнинг тегишли ғазна ҳисобварақларига ўтказилади.

20. Вақтинча бўш маблағларни тижорат банклари депозитларига жойлаштиришдан олинган даромадлардан фойдаланиш қонунчиликка мувофиқ амалга оширилади.

21. Тижорат банкларининг депозитларига жойлаштирилган маблағларни қайтариш ва улар бўйича фоизларни тўлаш шартномада белгиланган тартибда ва муддатларда амалга оширилади.

Зарурат бўлганда Молия вазирлиги Ғазначилиги тижорат банкларининг депозитларига жойлаштирилган маблағлар муддатидан аввал қайтарилишини талаб қилиши мумкин. Муддатидан аввал қайтариш шартлари шартномада белгиланади.

22. Тижорат банклари депозитларига жойлаштирилган вақтинча бўш маблағлар, шу жумладан, фоизлар ўз вақтида қайтарилмаган тақдирда Молия вазирлиги Ғазначилиги шартномага мувофиқ:

шартномада белгиланган тартибда қарздорликни ундиради;

ҳар бир кечиктирилган кун учун муддати ўтказиб юборилган қарз суммасининг 0,033 фоизи миқдорида пеня ҳисоблайди.

23. Пеня ҳисобига келиб тушган маблағлар Ўзбекистон Республикаси Молия вазирлигининг махсус жамғармасига ўтказилади.