Ўзбекистон Республикаси Президентининг 2012 йил 18 июлдаги ПФ–4455 сонли «Ишбилармонлик муҳитини янада тубдан яхшилаш ва тадбиркорликка янада кенг эркинлик бериш чора-тадбирлари тўғрисида»ги Фармонига (Ўзбекистон Республикаси қонун ҳужжатлари тўплами, 2012 й., 29 - сон, 328 - модда) мувофиқ, товарларнинг келиб чиқишини сертификатлашни ўтказиш тартибини такомиллаштириш мақсадида, Ўзбекистон Республикаси Ташқи иқтисодий алоқалар, инвестициялар ва савдо вазирлиги, Молия вазирлиги ва Давлат божхона қўмитаси қарор қиладилар:

1. Ўзбекистон Республикаси Ташқи иқтисодий алоқалар, инвестициялар ва савдо вазирлиги, Молия вазирлиги ва Давлат божхона қўмитасининг 2010 йил 19 июлдаги ЭГ-01/10-4014, 60, 01-02/8-10-сон қарори (рўйхат рақами 2131, 2010 йил 13 август) (Ўзбекистон Республикаси қонун ҳужжатлари тўплами, 2010 йил, 33-сон, 279-модда) билан тасдиқланган Товарларнинг келиб чиқишини сертификатлашни ўтказиш тартиби тўғрисидаги низомга иловага мувофиқ ўзгартириш ва қўшимчалар киритилсин.

2. Мазкур қарор Ўзбекистон Республикаси Адлия вазирлигида давлат рўйхатидан ўтказилган кундан бошлаб ўн кун ўтгандан кейин кучга киради.

1. 1-бандда:

олтинчи ва еттинчи хатбошилар қуйидаги таҳрирда баён этилсин:

«Товарларнинг келиб чиқиши тўғрисидаги сертификат (бундан буён сертификат деб юритилади) — товарларнинг келиб чиқиш мамлакати тўғрисида аниқ далолат берувчи ҳужжат, шу жумладан электрон шаклдаги ҳужжат;

Товарларнинг келиб чиқишини сертификатлаш (бундан буён матнда сертификатлаш деб юритилади) — Ўзбекистон Республикасидан экспорт ва реэкспорт қилинаётган товарларнинг келиб чиқиши тўғрисидаги сертификатни бериш, гувоҳлантириш орқали товарларнинг келиб чиқиш мамлакатини аниқлаш мақсадида экспертиза ўтказиш жараёни;»;

қуйидаги мазмундаги саккизинчи ва тўққизинчи хатбошилар билан тўлдирилсин:

«товар — божхона чегарасидан ўтувчи ҳар қандай мол-мулк, шу жумладан иссиқлик, электр, бошқа энергия турлари ва транспорт воситалари (товар ва йўловчиларни халқаро ташиш хизматларини амалга оширувчи транспорт воситаларидан ташқари);

товар туркуми — бир вақтнинг ўзида битта юк олувчининг манзилига бир йўналишда юк жўнатувчидан бир ёки бир нечта товар кузатув ҳужжатлари асосида, шунингдек бир почта юк хати бўйича ёки чегарани кесиб ўтувчи шахснинг юки сифатида жўнатилаётган товарлар;»

саккизинчи хатбоши ўнинчи хатбоши деб ҳисоблансин.

2. Қуйидаги мазмундаги 8¹-банд билан тўлдирилсин:

«8¹. Товарларни МДҲ давлатларига экспорт қилишда «етарлича даражада қайта ишланганлиги» мезонини қўллаш учун кумуляция тамойилидан фойдаланиш мумкин, яъни товарларни МДҲ давлатларида бирин-кетинликда қайта ишлашда, ушбу давлатлар келиб чиқишни аниқлаш мақсадлари учун яхлит ҳудуд сифатида кўрилади.».

3. 27-банднинг тўртинчи хатбошисидаги «товарнинг юкланаётган туркумига» деган сўзлар «экспорт қилинаётган товарга» деган сўзлар билан алмаштирилсин.

4. Қуйидаги мазмундаги 27¹-банд билан тўлдирилсин:

«27¹. Реэкспорт қилинаётган товарнинг келиб чиқиши тўғрисидаги сертификатни олиш учун мурожаат қилинганда қуйидагилар тақдим қилиниши керак:

Ўзбекистон Республикаси ҳудудига кириб келган товарнинг келиб чиқиши тўғрисидаги сертификатнинг асл нусхаси;

товарнинг Ўзбекистон Республикаси божхона ҳудудига келиб тушганлигини тасдиқловчи ҳужжат нусхаси;

экспорт шартномаси ёки товарнинг Ўзбекистон Республикаси ҳудудидан реэкспорт қилинаётганлигини тасдиқловчи бошқа ҳужжат нусхаси.»

5. 28-банднинг иккинчи жумласи чиқариб ташлансин.

6. 31-банд қуйидаги таҳрирда баён этилсин:

«31. Экспертиза далолатномаси экспорт қилинаётган товарнинг шартномада кўрсатилган барча миқдорига ёки (экспортёрнинг ихтиёрига кўра) товарнинг жўнатишга тайёр бўлган туркумига расмийлаштирилади.».

7. 39-банд қуйидаги таҳрирда баён этилсин:

«39. Сертификат экспертиза далолатномаси асосида экспорт қилинаётган товарнинг шартномада кўрсатилган барча миқдорига ёки товарнинг жўнатишга тайёр бўлган туркумига (экспортёрнинг ихтиёрига кўра), Бош Преференциялар Тизимига мувофиқ преференциялар тақдим этувчи хорижий давлатларга экспорт қилинаётган товарларга — А шаклида, Мустақил Давлатлар Ҳамдўстлиги давлатларига — СТ-1 шаклида, бошқа давлатларга — мазкур Низомнинг 4-иловасига мувофиқ рус ёки инглиз тилларида ёки Ўзбекистон Республикаси билан тузилган битимларда белгиланган шаклларда расмийлаштирилади.

Экспортёрнинг ихтиёрига кўра, сертификат алоҳида транспортда ташилаётган товар бирликларига берилиши мумкин.»

8. VII бўлим ва 5-илова ўз кучини йўқотган деб ҳисоблансин.

9. 4-илова мазкур ўзгартириш ва қўшимчаларнинг иловасига мувофиқ таҳрирда баён этилсин.