Oʻzbekiston Respublikasi Prezidentining “Davlat boshqaruvi respublika organlari tizimini takomillashtirish toʻgʻrisida” 2003-yil 9-dekabrdagi PF–3358-son Farmoniga muvofiq hamda arxiv ishini boshqarish organlari faoliyati samaradorligini oshirish, arxivlarning moddiy-texnika bazasini mustahkamlash va rivojlantirish maqsadida Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasi huzuridagi Bosh arxiv boshqarmasi (“Oʻzbosharxiv” boshqarmasi) Oʻzbekiston Respublikasi Vazirlar Mahkamasi huzuridagi “Oʻzarxiv” agentligi (“Oʻzarxiv” agentligi)ga aylantirilsin.

2. Quyidagilar Oʻzbekiston Respublikasi Vazirlar Mahkamasi huzuridagi “Oʻzarxiv” agentligining asosiy vazifalari etib belgilansin:

arxiv ishi va ish yuritish sohasida yagona davlat siyosatini amalga oshirish;

arxiv ishi sohasidagi qonun hujjatlarining amalda bajarilishini va ularga rioya etilishi ustidan taʼsirchan nazoratni amalga oshirishni taʼminlash;

Oʻzbekiston Respublikasi Milliy arxiv fondi hujjatlarini shakllantirish, ularning saqlanishini, davlat hisobini taʼminlash va ulardan foydalanish;

respublika davlat arxivlarini boshqarish, ularning faoliyat koʻrsatishini taʼminlash;

respublikada arxiv ishini yanada rivojlantirish va takomillashtirish boʻyicha takliflar ishlab chiqish;

arxivshunoslik va arxeografiya sohasida ilmiy va metodik ishlarni tashkil etish va muvofiqlashtirish, ilmiy tadqiqotlar natijalarini va ilmiy-texnika yutuqlarini respublika arxiv muassasalari ishlari amaliyotiga joriy etish;

arxiv ishi sohasidagi mamlakatimiz va chet el ish tajribasini oʻrganish va ommalashtirish.

3. Belgilab qoʻyilsinki, Oʻzbekiston Respublikasi Vazirlar Mahkamasi huzuridagi “Oʻzarxiv” agentligi Oʻzbekiston Respublikasi Vazirlar Mahkamasi huzuridagi Bosh arxiv boshqarmasining huquq va majburiyatlari boʻyicha huquqiy vorisi hisoblanadi.

4. Quyidagilar:

Oʻzbekiston Respublikasi Vazirlar Mahkamasi huzuridagi “Oʻzarxiv” agentligining tashkiliy tuzilmasi 1-ilovaga muvofiq;

Oʻzbekiston Respublikasi Vazirlar Mahkamasi huzuridagi “Oʻzarxiv” agentligi toʻgʻrisidagi nizom 4-ilovaga muvofiq tasdiqlansin.

Oʻzbekiston Respublikasi Vazirlar Mahkamasi huzuridagi “Oʻzarxiv” agentligi Bosh direktoriga markaziy apparat tuzilmasiga belgilangan xodimlar soni va ish haqi fondi doirasida oʻzgartirishlar kiritish huquqi berilsin.

5. Oʻzbekiston Respublikasi Vazirlar Mahkamasi huzuridagi “Oʻzarxiv” agentligida Bosh direktorning bir nafar oʻrinbosari va shaxsiy tarkibi Oʻzbekiston Respublikasi Vazirlar Mahkamasi tomonidan tasdiqlanadigan 5 kishidan iborat hayʼat boʻlishiga ruxsat etilsin.

Oʻzbekiston Respublikasi Vazirlar Mahkamasi huzuridagi “Oʻzarxiv” agentligining Bosh direktori maqomiga koʻra vazirning birinchi oʻrinbosariga, Bosh direktor oʻrinbosari — vazir oʻrinbosariga tenglashtirilsin.

6. Belgilab qoʻyilsinki, arxiv ishi hududiy boshqarmalarining boshliqlari Qoraqalpogʻiston Respublikasi Vazirlar Kengashining Raisi, viloyatlar va Toshkent shahar hokimlari bilan kelishuv boʻyicha “Oʻzarxiv” agentligining Bosh direktori tomonidan lavozimga tayinlanadilar va lavozimdan ozod etiladilar.

7. Belgilansinki, Oʻzbekiston Respublikasi Vazirlar Mahkamasi huzuridagi “Oʻzarxiv” agentligi markaziy apparati va hududiy organlari, shuningdek unga qarashli davlat arxivlarining taʼminoti xarajatlari Oʻzbekiston Respublikasi Davlat budjeti mablagʻlari va amaldagi qonun hujjatlariga zid boʻlmagan boshqa manbalar hisobiga moliyalashtiriladi.

8. Oʻzbekiston Respublikasi Moliya vazirligi:

har yili Oʻzbekiston Respublikasi Davlat budjeti loyihasini tuzishda Oʻzbekiston Respublikasi Vazirlar Mahkamasi huzuridagi “Oʻzarxiv” agentligi va uning hududiy organlari taʼminoti va ularning moddiy-texnika bazasini mustahkamlash uchun zarur budjet mablagʻlarini nazarda tutsin;

Oʻzbekiston Respublikasi Vazirlar Mahkamasi huzuridagi “Oʻzarxiv” agentligiga markaziy apparat uchun ikkita yengil avtomobilni saqlashga limitni saqlab qolsin.

9. Oʻzbekiston Respublikasi Vazirlar Mahkamasi huzuridagi “Oʻzarxiv” agentligi bir oy muddatda arxiv ishi boʻyicha tegishli hududiy organlarni qayta tashkil etsin va ular toʻgʻrisidagi nizomni tasdiqlasin.

10. Oʻzbekiston matbuot va axborot agentligi Oʻzbekiston Respublikasi Vazirlar Mahkamasi huzuridagi “Oʻzarxiv” agentligini Oʻzbekiston Respublikasi Markaziy davlat arxivi kutubxonasi uchun tarixiy ilmiy nashrlar va davriy matbuotning nazorat nusxalarini oluvchi tashkilotlar roʻyxatiga kiritsin.

11. Oliy va oʻrta maxsus taʼlim vazirligi, Oʻrta maxsus, kasb-hunar taʼlimi markazi:

Oʻzbekiston Respublikasi Vazirlar Mahkamasi huzuridagi “Oʻzarxiv” agentligi tizimi muassasalari, respublikaning boshqa manfaatdor vazirliklari va idoralari bilan tuzilgan shartnomalarga muvofiq arxiv ishi boʻyicha oliy va oʻrta maxsus, kasb-hunarga oid maʼlumotli kadrlarni tayyorlash, qayta tayyorlashni va ularning malakasini oshirishni tashkil etsinlar;

arxiv ishi boʻyicha oliy va oʻrta maxsus, kasb-hunarga oid maʼlumotli kadrlarni tayyorlovchi, qayta tayyorlovchi va ularning malakasini oshiruvchi oʻquv yurtlarini yuqori malakali oʻqituvchilar bilan taʼminlasinlar;

Oʻzbekiston matbuot va axborot agentligi, Oʻzbekiston Respublikasi Vazirlar Mahkamasi huzuridagi “Oʻzarxiv” agentligi bilan birgalikda “Arxivshunoslik” kursi boʻyicha zarur darsliklar, oʻquv dasturlari va metodik qoʻllanmalar nashr etilishini taʼminlasinlar.

12. Oʻzbekiston Respublikasi Vazirlar Mahkamasi huzuridagi “Oʻzarxiv” agentligining markaziy apparati Toshkent shahar, Chilonzor koʻchasidagi 2-uyga joylashtirilsin.

13. Oʻzbekiston Respublikasi Vazirlar Mahkamasining “Arxiv ishi boʻyicha meʼyoriy hujjatlarni tasdiqlash toʻgʻrisida” 1999-yil 30-oktabrdagi 482-son qarorining (Oʻzbekiston Respublikasi QT, 1999-y., 10-son, 62-modda) 1-bandi toʻrtinchi xatboshi oʻz kuchini yoʻqotgan deb hisoblansin.

14. Oʻzbekiston Respublikasi Adliya vazirligi Oʻzbekiston Respublikasi Vazirlar Mahkamasi huzuridagi “Oʻzarxiv” agentligi, manfaatdor vazirliklar va idoralar bilan birgalikda bir oy muddatda amaldagi qonun hujjatlariga ushbu qarordan kelib chiquvchi oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

15. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.A. Azizxoʻjayev zimmasiga yuklansin.

1. Ushbu Nizom Oʻzbekiston Respublikasi Vazirlar Mahkamasi huzuridagi “Oʻzarxiv” agentligining (keyingi oʻrinlarda “Oʻzarxiv” agentligi deb yuritiladi) maqomi, vazifalari, funksiyalari, vakolatlari va faoliyatining tashkiliy asoslarini “Arxiv ishi toʻgʻrisida”, “Madaniy meros obyektlarini qoʻriqlash va ulardan foydalanish toʻgʻrisida”, “Axborotlashtirish toʻgʻrisida”, “Elektron hujjat aylanishi toʻgʻrisida”gi Oʻzbekiston Respublikasi qonunlariga hamda “Oʻzarxiv” agentligi faoliyatiga taalluqli Oʻzbekiston Respublikasining boshqa qonun hujjatlariga muvofiq belgilaydi.

2. Qoraqalpogʻiston Respublikasi va Toshkent shahar arxiv ishi hududiy boshqarmalari, Oʻzbekiston Respublikasi, Qoraqalpogʻiston Respublikasi, viloyatlar davlat arxivlari va ularning filiallari, Toshkent shahar Davlat arxivi “Oʻzarxiv” agentligi tizimiga kiradi.

3. “Oʻzarxiv” agentligi respublikada arxiv ishi va ish yuritish sohasidagi vakolatli davlat organi hisoblanadi va bevosita Oʻzbekiston Respublikasi Vazirlar Mahkamasiga boʻysunadi.

4. “Oʻzarxiv” agentligi oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Majlisining qarorlari va boshqa qonun hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, shuningdek, boshqa qonun hujjatlariga va ushbu Nizomga amal qiladi.

5. “Oʻzarxiv” agentligi xalqaro tashkilotlarda arxiv ishi va uni yuritish sohasida Oʻzbekiston Respublikasi nomidan vakillik qiluvchi vakolatli organ hisoblanadi.

6. “Oʻzarxiv” agentligi oʻziga yuklangan vazifalarni bevosita, shuningdek oʻz faoliyatini Qoraqalpogʻiston Respublikasi Vazirlar Kengashi, viloyatlar va Toshkent shahar hokimlari bilan kelishgan holda “Oʻzarxiv” agentligi tomonidan tasdiqlangan ular toʻgʻrisidagi nizomlar asosida amalga oshiruvchi, oʻziga boʻysunadigan hududiy organlar orqali hal qiladi.

7. Quyidagilar “Oʻzarxiv” agentligining asosiy vazifalari hisoblanadi:

arxiv ishi va uni yuritish sohasida yagona davlat siyosatini amalga oshirish;

arxiv ishi va ish yuritishning holati yuzasidan davlat nazoratining amalda bajarilishi va amalga oshirilishini taʼminlash;

Oʻzbekiston Respublikasi Milliy arxiv fondi hujjatlarini shakllantirish, ularning saqlanishini, davlat hisobini taʼminlash va ulardan foydalanish;

arxiv ishi va ish yuritishning holatini tahlil qilish, tendensiyalari va qonuniyatlarini oʻrganish, uni rivojlantirish yoʻnalishlarini belgilash;

respublika davlat arxivlarini boshqarish, ularning faoliyat koʻrsatishini taʼminlash;

respublikada arxiv ishi va ish yuritishni yanada rivojlantirish va takomillashtirish boʻyicha takliflar ishlab chiqish;

arxivshunoslik va arxeografiya, ish yuritish, elektron hujjat aylanishi sohasida ilmiy va metodik ishlarni tashkil etish va muvofiqlashtirish, ilmiy tadqiqotlar natijalarini va ilmiy-texnika yutuqlarini respublika arxiv muassasalari ishlari amaliyotiga joriy etish;

Oʻzbekiston Respublikasi Milliy arxiv fondiga tegishli boʻlgan axborot resurslarini saqlashni taʼminlaydigan elektron arxivlarni tashkil etishni va faoliyat koʻrsatishini tartibga solish hamda muvofiqlashtirish;

arxiv ishi va ish yuritish sohasidagi mamlakatimiz va chet el ilgʻor ish tajribasini oʻrganish va ommalashtirish.

8. “Oʻzarxiv” agentligi oʻziga yuklangan vazifalarga muvofiq quyidagi funksiyalarni bajaradi:

arxiv ishini rivojlantirish va arxivlar faoliyatini qoʻllab-quvvatlash boʻyicha davlat dasturlarini ishlab chiqadi va amalga oshiradi;

Oʻzbekiston Respublikasi Milliy arxiv fondi hujjatlarini jamlash, hisobga olish, saqlash va ulardan foydalanish masalalari boʻyicha normativ-huquqiy hujjatlarni ishlab chiqadi hamda belgilangan tartibda Oʻzbekiston Respublikasi Vazirlar Mahkamasiga kiritadi va ularning amalga oshirilishini taʼminlaydi;

davlat arxivlari shoxobchalarini rivojlantirish va ularning tuzilmalarini takomillashtirish boʻyicha ishlarni belgilangan tartibda tashkil qiladi va amalga oshiradi, Oʻzbekiston Respublikasi davlat arxivlari faoliyatiga rahbarlik qiladi;

arxivshunoslik, hujjatshunoslik, arxeografiya sohasidagi ilmiy-metodik ishlarni tashkil qiladi va muvofiqlashtiradi, ilmiy tadqiqotlar natijalarini va ilmiy-texnika yutuqlarini arxiv ishi va ish yuritish amaliyotiga joriy qiladi;

arxiv ishi sohasida yuridik va jismoniy shaxslar oʻrtasidagi oʻzaro munosabatlarni ularning respublika va mahalliy darajalardagi faoliyati uchun teng shart-sharoitlar yaratish yoʻli bilan muvofiqlashtirib boradi, foydalanuvchilarning huquqlarini va qonuniy manfaatlarini himoya qiladi;

hujjatlarning, shu jumladan davlat axborot resurslarining ilmiy va amaliy qimmatini ekspertizadan oʻtkazishni hamda ularni doimiy saqlash uchun davlat arxivlariga, shu jumladan elektron arxivlarga tanlab olishni tashkil qiladi;

Oʻzbekiston Respublikasi Milliy arxiv fondining davlat arxivlaridagi hujjatlarini toʻldirish, hisobga olish, saqlash va ulardan foydalanishni tashkil qiladi, hujjatlarning saqlanishi, ularning koʻrsatib oʻtilgan arxivlarga berilishi hamda ushbu hujjatlardan foydalanilishi boʻyicha belgilangan tartibga rioya etilishini nazorat qiladi;

davlat tomonidan saqlanishi uchun berilishi kerak boʻlgan, shu jumladan saqlash muddati koʻrsatilgan hujjatlarning namunaviy roʻyxatini ishlab chiqadi va tasdiqlaydi, respublika boshqaruv organlari tomonidan ishlab chiqilgan hujjatlarning idoraviy roʻyxatlarini kelishadi;

arxiv hujjatlari davlat arxivlariga berilishi kerak boʻlgan korxonalar, muassasalar va tashkilotlar roʻyxatini tuzish tartibini belgilaydi;

hujjatlarni respublika ahamiyatiga va mahalliy ahamiyatga ega boʻlgan arxiv fondlari tarkibiga kiritish masalalarini hal qiladi, respublika ahamiyatiga ega boʻlgan fondlarni Oʻzbekiston Respublikasi Davlat arxivlarida toʻplash, shuningdek Oʻzbekiston doirasida hujjatlarni Oʻzbekiston Respublikasi, Qoraqalpogʻiston Respublikasi, Toshkent shahri davlat arxivlaridan viloyatlarning davlat arxivlariga va aksincha, bir viloyatning davlat arxividan boshqa viloyatning davlat arxiviga berish tadbirlarini amalga oshiradi;

Oʻzbekiston Respublikasi Milliy arxiv fondi hujjatlarini doimiy ravishda saqlaydigan arxiv muassasalariga guvohnomalar beradi;

Oʻzbekiston Respublikasi Milliy arxiv fondi hujjatlarining respublika davlat arxivlarida roʻyxatga olinishini tashkil qiladi;

arxiv muassasalari tomonidan yuridik va jismoniy shaxslarga faoliyat sohasi boʻyicha koʻrsatiladigan pulli xizmatlar roʻyxatini va preyskurantlarini qonun hujjatlarida belgilangan tartibda tasdiqlaydi;

Oʻzbekiston Respublikasi Milliy arxiv fondi Davlat katalogini yuritadi;

Davlat mulkida boʻlgan arxiv hujjatlarini yoki ularning oʻrnini bosadigan nusxalarini, shuningdek Milliy arxiv fondining davlatga tegishli boʻlmagan qismi tarkibiga kiritilgan arxiv hujjatlarini yoki ularning oʻrnini bosadigan nusxalarini Oʻzbekiston Respublikasidan tashqariga vaqtinchalik olib ketish uchun yuridik va jismoniy shaxslarga belgilangan tartibda ruxsatnomalar beradi;

davlatga qarashli boʻlmagan arxiv fondi hujjatlarini sotib olish yuzasidan davlatning imtiyozli huquqini amalga oshiradi, bu borada “Oʻzarxiv” agentligi tizimi organlari va muassasalariga koʻmaklashadi;

arxiv xizmatlari, idoraviy arxivlar, shaxsiy tarkib boʻyicha hujjatlarning idoralararo arxivlari ishiga tarmoqlararo tashkiliy-metodik rahbarlikni va nazoratni, davlat hokimiyati va boshqaruvi respublika organlari ishlarini yuritishda hujjatlarning tashkil etilishini nazorat qiladi;

idoraviy arxivlar shoxobchalarini rivojlantirish va ularning ishlarini tashkil etish boʻyicha tadbirlarda qatnashadi;

arxiv hujjatlarini, Oʻzbekiston Respublikasi Milliy arxiv fondi hujjatlarining tarkibi va mazmuni toʻgʻrisidagi maʼlumotnoma-axborot adabiyotlarini nashr etishni tashkil qiladi, retrospektiv axborotlarga boʻlgan ijtimoiy ehtiyojlarni va hujjatlardan foydalanish samaradorligini oʻrganishga doir ishlarni muvofiqlashtiradi;

respublika tashqarisidagi arxiv hujjatlarini qaytarish toʻgʻrisidagi takliflarni koʻrib chiqadi va belgilangan tartibda kiritadi, chet eldagi Oʻzbekiston tarixiga oid arxiv hujjatlarini aniqlashni va ularni yoki ularning nusxalarini sotib olishni tashkil etadi;

davlatga qarashli boʻlmagan arxivlar egalariga ushbu arxivlarning hujjatlarini toʻldirish, saqlash va ulardan foydalanishda koʻmaklashadi;

Oʻzbekiston Respublikasining arxiv ishi va uni yuritish sohasidagi xalqaro faoliyatini amalga oshiruvchi vakolatli maʼmuriy organi sifatida ish koʻradi. Xalqaro tashkilotlarning arxiv ishi va uni yuritish sohasidagi kongresslarida, syezdlarida, konferensiyalarida Oʻzbekiston Respublikasi nomidan qatnashadi, arxiv ishi va uni yuritish sohasida xalqaro idoralararo bitimlar va shartnomalarni belgilangan tartibda tuzadi;

arxiv ishi va uni yuritish sohasidagi xalqaro, hukumatlararo bitimlar va shartnomalar loyihalarini tayyorlaydi;

arxiv ishi va uni yuritish uchun xalqaro moliya institutlari, xorijiy mamlakatlar hukumatlari tomonidan ajratiladigan grantlardan foydalanishning ustuvor yoʻnalishlarini belgilaydi;

arxiv ishi va uni yuritish sohasini rivojlantirishga investitsiyalarni, shu jumladan xorijiy investitsiyalarni jalb etish boʻyicha tendyerlar, tanlovlar va savdolarni tashkil qiladi va ularni oʻtkazishda qatnashadi;

arxiv muassasalari, idoraviy arxivlar hamda respublika korxonalari, muassasalari va tashkilotlarining ishlarni yuritish xizmatlari xodimlarini qayta tayyorlashni va ularning malakasini oshirishni tashkil qiladi;

arxiv ishi va ish yuritish sohasidagi kadrlarni sifatli tayyorlashda oliy va oʻrta maxsus, kasb-hunar oʻquv yurtlariga koʻmaklashadi;

Oʻzbekiston Respublikasi Milliy arxiv fondining axborot resurslari va elektron hujjatlari himoya qilinishi taʼminlanishini tashkil etadi;

arxiv hujjatlarini alohida qimmatli hujjatlar va noyob hujjatlar jumlasiga kiritish tartibini, shuningdek ehtiyot nusxalarini yaratish va saqlash tartibini belgilaydi;

fuqarolarning takliflari, arizalari va shikoyatlarining oʻz vaqtida koʻrib chiqilishini tashkil qiladi; konsullik soʻrovlari bajarilishini taʼminlaydi.

arxiv hujjatlaridan foydalanish tartibi va shart-sharoitlarini belgilaydi;

arxiv hujjatlarini belgilangan tartibda Milliy arxiv fondi tarkibiga kiritadi va undan chiqaradi;

“Oʻzarxiv” agentligi qonun hujjatlarida nazarda tutilgan boshqa funksiyalarni ham bajaradi.

9. “Oʻzarxiv” agentligi quyidagi huquqlarga ega:

oʻz vakolatlari doirasida, Oʻzbekiston Respublikasi qonun hujjatlariga muvofiq, arxiv ishi va uni yuritish sohasida yuridik va jismoniy shaxslar uchun majburiy boʻlgan normativ hujjatlarni ishlab chiqish, tasdiqlash va nashr etish;

davlat hokimiyati va boshqaruvi organlari vakillari, tarmoq davlat fondlari, respublika muzeylari va kutubxonalarining qoʻlyozmalar boʻlimlarining idoraviy saqlash bosqichidagi arxiv hujjatlari saqlanishining holati va ish yuritish tashkil etilishi toʻgʻrisidagi hisobotlarni eshitish, “Oʻzarxiv” agentligi vakolatiga tegishli masalalar boʻyicha axborotni ulardan belgilangan tartibda soʻrab olish;

Oʻzbekiston Respublikasi Milliy arxiv fondi hujjatlarini doimiy saqlovchi respublika davlat arxivlari, tarmoq davlat fondlari, vazirliklar, davlat qoʻmitalari, idoralar, korxonalar, muassasalar, tashkilotlar, kutubxonalar va muzeylarning qoʻlyozmalar boʻlimlari, siyosiy, jamoat, diniy tashkilotlar va birlashmalar, qoʻshma korxonalar va boshqa yuridik shaxslardan, shuningdek fuqarolardan Milliy arxiv fondining Davlat katalogi uchun tegishli maʼlumotlarni olish;

davlat hokimiyati va boshqaruvi respublika organlaridan hamda idoraviy boʻysunishidan va mulkchilik shakllaridan qatʼi nazar, korxonalar, muassasalar va tashkilotlardan arxivning ishi va idoraviy arxivlarning ishi, shuningdek arxiv ishi va ish yuritishning holati toʻgʻrisida zarur materiallarni olish;

davlat hokimiyati organlaridan tugatilayotgan korxonalar toʻgʻrisida axborot olish;

mansabdor shaxslarning Oʻzbekiston Respublikasi Milliy arxiv fondi hujjatlarining oʻgʻirlanishi, yaroqsiz holga keltirilishi, yashirilishi, yoʻqotilishi yoki noqonuniy yoʻq qilinishiga olib kelgan sharoitlar yaratganligi hollari toʻgʻrisida tergov organlariga xabar qilish;

arxiv ishi va uni yuritish masalalarini koʻrib chiqish uchun doimiy va vaqtinchalik idoralararo komissiyalar, kengashlar tuzish;

respublika vazirliklari va idoralari tomonidan ishlab chiqiladigan arxiv ishi va ish yuritish hujjatlarini tashkil etish masalalari boʻyicha qoidalar, nizomlar, yoʻriqnomalar, oʻquv dasturlari va boshqa normativ hujjatlarni kelishib olish;

oʻz vakolatlari doirasida xalqaro tashkilotlar, shuningdek xorijiy mansabdor va xususiy shaxslar bilan aloqalarni amalga oshirish, arxiv ishi boʻyicha belgilangan tartibda xalqaro, idoralararo shartnomalar tuzish;

arxivshunoslik, hujjatshunoslik va arxeografiya sohasidagi ishlarni bajarish yuzasidan tanlovlar eʼlon qilish.

“Oʻzarxiv” agentligi oʻziga yuklangan vazifalardan kelib chiqadigan oʻz vakolatlari doirasidagi boshqa huquqlarga ham egadir.

“Oʻzarxiv” agentligining mansabdor shaxslari oʻz xizmat majburiyatlarini bajarish uchun davlat hokimiyati va boshqaruvi organlari, respublika korxonalari,muassasalari, tashkilotlari va birlashmalarining arxivlari va idoraviy arxivlarga ish yuritish xizmatlariga belgilangan tartibda kirish huquqiga egadirlar.

10. “Oʻzarxiv” agentligi:

Oʻzbekiston Respublikasi Milliy arxiv fondini shakllantirish;

Milliy arxiv fondining Davlat katalogini yuritish;

respublika davlat arxivlarida saqlanayotgan hujjatlarning saqlanishini taʼminlash;

arxiv hujjatlaridan fuqarolar, jamiyat va davlat manfaatlari uchun foydalanish;

arxiv ishi hududiy boshqarmalari faoliyatini tashkil etish uchun javob beradi.

11. Agentlikka Oʻzbekiston Respublikasi Prezidenti tomonidan lavozimga tasdiqlanadigan va lavozimdan ozod etiladigan rais boshchilik qiladi.

Bosh direktorning belgilangan tartibda Vazirlar Mahkamasi tomonidan lavozimga tayinlanadigan va lavozimdan ozod qilinadigan bir nafar oʻrinbosari boʻladi.

12. Qoraqalpogʻiston Respublikasi, viloyatlar va Toshkent shahar arxiv ishi hududiy boshqarmalari boshliqlari Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari bilan kelishuv boʻyicha “Oʻzarxiv” agentligi Bosh direktori tomonidan lavozimga tayinlanadilar va lavozimdan ozod qilinadilar.

13. “Oʻzarxiv” agentligida bosh direktor (hayʼat raisi), uning oʻrinbosari (lavozimiga koʻra), shuningdek “Oʻzarxiv” agentligi faoliyatining asosiy yoʻnalishlarini muvofiqlashtiruvchi tarkibiy boʻlinmalari rahbarlaridan iborat tarkibda hayʼat tashkil etiladi.

Hayʼatning aʼzolari soni va shaxsiy tarkibi bosh direktorning taqdimnomasiga binoan Oʻzbekiston Respublikasi Vazirlar Mahkamasi tomonidan tasdiqlanadi.

Hayʼat quyidagilar bilan bogʻliq masalalarni koʻrib chiqadi:

“Oʻzarxiv” agentligi faoliyatining arxiv ishi va ish yuritishni yanada rivojlantirish, ilmiy-texnik yutuqlardan keng koʻlamli foydalanish, idoralararo va davlatlararo aloqalarni rivojlantirish boʻyicha ushbu Nizomda belgilangan asosiy yoʻnalishlarini tayyorlash va amalga oshirish;

“Oʻzarxiv” agentligi nomenklaturasiga kiradigan lavozimlarga kadrlarni tanlash, joy-joyiga qoʻyish, tayyorlash va qayta tayyorlash;

Oʻzbekiston Respublikasi Prezidentining farmonlari, qarorlari va farmoyishlarida, Oʻzbekiston Respublikasi Vazirlar Mahkamasi qarorlari va farmoyishlarida belgilangan vazifalarni amalga oshirish boʻyicha ijro intizomini mustahkamlash, ularning oʻz vaqtida va sifatli amalga oshirilishini taʼminlash uchun “Oʻzarxiv” agentligi rahbarlari va xodimlarining shaxsiy javobgarligini oshirish.

Hayʼat “Oʻzarxiv” agentligi vakolatiga taalluqli boshqa masalalarni ham koʻrib chiqish huquqiga ega.

Hayʼat majlisiga “Oʻzarxiv” agentligi vakolatiga kiradigan masalalar boʻyicha boshqa vazirliklar, davlat qoʻmitalari, idoralar, mahalliy davlat hokimiyati organlari, korxonalar, muassasalar, tashkilotlar rahbarlari taklif etilishi mumkin.

Hayʼat uning majlisida tarkibining yarmidan koʻpi qatnashgan taqdirda vakolatli boʻladi. Koʻrib chiqilayotgan masalalar boʻyicha qarorlar oddiy koʻpchilik ovoz bilan qabul qilinadi.

Hayʼat qarorlari bosh direktorning buyruqlari bilan amalga oshiriladi. Bosh direktor va hayʼat aʼzolari oʻrtasida kelishmovchiliklar paydo boʻlgan taqdirda bosh direktor paydo boʻlgan kelishmovchiliklar toʻgʻrisida Oʻzbekiston Respublikasi Vazirlar Mahkamasiga axborot bergan holda mustaqil ravishda qaror qabul qiladi. Hayʼat aʼzolari ham oʻz fikr-mulohazalarini Oʻzbekiston Respublikasi Vazirlar Mahkamasiga xabar qilishlari mumkin.

Hayʼat faoliyati tartibi uning hayʼat tasdiqlaydigan reglamentida belgilanadi.

14. “Oʻzarxiv” agentligi huzurida:

respublikada arxiv ishi va ish yuritishning ilmiy muammolarini koʻrib chiqish boʻyicha ilmiy kengash;

Oʻzbekiston Respublikasi Milliy arxiv fondi tarkibini belgilash va hujjatlarning qimmatini ekspertizadan oʻtkazish bilan bogʻliq masalalarni koʻrib chiqish uchun markaziy ekspert-tekshirish komissiyasi faoliyat koʻrsatadi.

Koʻrsatib oʻtilgan kengash va komissiya toʻgʻrisidagi nizom hamda ularning shaxsiy tarkiblari “Oʻzarxiv” agentligi Bosh direktori tomonidan tasdiqlanadi.

15. “Oʻzarxiv” agentligi va uning hududiy boshqarmalari faoliyatini moliyalashtirish Oʻzbekiston Respublikasi Davlat budjeti mablagʻlari, shuningdek amaldagi qonun hujjatlariga zid boʻlmagan boshqa manbalar hisobidan amalga oshiriladi.

16. “Oʻzarxiv” agentligi yuridik shaxs hisoblanadi, Oʻzbekiston Respublikasi Davlat gerbi tasviri tushirilgan hamda oʻz nomi yozilgan muhrga, bank muassasalarida hisob-kitob va boshqa hisob raqamlariga ega boʻladi.

17. “Oʻzarxiv” agentligini qayta tashkil etish va tugatish Oʻzbekiston Respublikasi qonun hujjatlariga muvofiq amalga oshiriladi.