Mamlakatimizda aholining daromad manbalarini oshirish, yoshlar va ishsiz fuqarolarning bandligini taʼminlash uchun qoʻshimcha imkoniyatlar yaratish, xalqaro standartlar asosida milliy haydovchilik guvohnomalari toifalari va ularni berish asoslarini kengaytirish, shuningdek, odam oʻlimiga sabab boʻlayotgan qoʻpol qoidabuzarliklarning barvaqt oldini olishga qaratilgan chora-tadbirlarni belgilash maqsadida Vazirlar Mahkamasi qaror qiladi:

1. Oʻzbekiston Respublikasi Ichki ishlar vazirligi, Transport vazirligi, Strategik islohotlar agentligi hamda keng jamoatchilikning 2026-yil 1-yanvardan boshlab moped va skuterlarni, shuningdek, eng yuqori konstruktiv tezligi soatiga 25 kilometrdan oshmaydigan, ish hajmi 25 sm³ gacha boʻlgan ichki yonuv dvigateliga ega boʻlgan yoki nominal (belgilangan) quvvati 0,25 kilovattgacha boʻlgan kichik hajmdagi mototransport vositalarini (individual harakatlanish vositalari bundan mustasno) boshqarish uchun milliy haydovchilik guvohnomasida “A1” kichik toifani joriy etish toʻgʻrisidagi taklifi maʼqullansin.

2. Belgilansinki, 2026-yil 1-yanvardan boshlab:

a) “A1” kichik toifadagi transport vositalarini boshqarish huquqini beradigan milliy haydovchilik guvohnomasini olish uchun talabgorlarga haydovchilarni tayyorlash majburiy oʻquv dasturini oʻtamasdan turib, toʻgʻridan-toʻgʻri nazariy va amaliy imtihonlarni topshirish huquqi beriladi. Bunda:

talabgorlar oʻzlarining ixtiyoriga koʻra oʻquv kurslarida (onlayn yoki oflayn shaklda) oʻqishi yoxud mustaqil tayyorlanishi mumkin boʻladi;

milliy haydovchilik guvohnomasini olish uchun talabgorlardan haydovchilarni tayyorlash oʻquv dasturi boʻyicha oʻqishni tugatgani haqida guvohnoma talab etilmaydi;

b) “A”, “B”, “C”, “D” toifadagi avtomototransport vositalaridan birini boshqarish huquqini beruvchi milliy haydovchilik guvohnomasiga ega boʻlgan shaxslar “A1” kichik toifadagi transport vositalarini toʻgʻridan-toʻgʻri boshqarish huquqiga ega boʻladi;

v) “A1” kichik toifadagi transport vositalarini boshqarish huquqini beradigan milliy haydovchilik guvohnomasini olish uchun nazariy imtihonda 20 ta elektron (animatsion) test savollaridan kamida 16 tasiga toʻgʻri javob bergan haydovchilikka nomzodlar “nazariy imtihonni topshirgan” deb hisoblanadi va amaliy imtihonga qoʻyiladi;

g) imtihonlarni muvaffaqiyatli topshirgan shaxslarga “A1” kichik toifaga kiradigan transport vositalarini boshqarishga ruxsat berilganligi toʻgʻrisida maʼlumot aks etgan milliy haydovchilik guvohnomasi beriladi.

3. Shunday tartib oʻrnatilsinki, unga koʻra 2026-yil 1-fevraldan boshlab “A” va “B” toifadagi transport vositalarini boshqarish huquqini olish uchun talabgorlar haydovchilarni tayyorlash boʻyicha majburiy oʻquv dasturining nazariy qismini mustaqil oʻzlashtirishi mumkin boʻladi. Bunda:

talabgorlar oʻz ixtiyoriga koʻra nazariy bilimlarni olish uchun oʻquv kurslarida (onlayn yoki oflayn shaklda) oʻqiydi yoxud mustaqil tayyorlanadi;

talabgorlar majburiy oʻquv dasturida belgilangan amaliy mashgʻulotlarda avtomototransport vositalari va shahar elektr transporti vositalari haydovchilarini tayyorlash hamda qayta tayyorlash boʻyicha davlat va nodavlat taʼlim xizmatlarini koʻrsatish faoliyati bilan shugʻullanuvchi yuridik shaxslarda toʻliq qatnashadi;

talabgorlar majburiy oʻquv dasturida belgilangan amaliy mashgʻulotlarda toʻliq qatnashgandan soʻng transport vositalarini boshqarish koʻnikmalarini baholashning ijobiy natijalariga asosan haydovchilik guvohnomasini olish uchun nazariy va amaliy imtihonlarni topshiradi;

talabgorlarning haydovchilarni tayyorlash oʻquv dasturining amaliy mashgʻulotlardagi oʻqishni tugatgani haqidagi maʼlumotnoma elektron tarzda shakllantiriladi;

“A” va “B” toifadagi transport vositalari haydovchilarini tayyorlash va qayta tayyorlash oʻquv guruhlarini Davlat yoʻl harakati xavfsizligi xizmatida roʻyxatga olish tartibi bekor qilinadi.

4. Oʻzbekiston Respublikasi Ichki ishlar vazirligi:

ikki oy muddatda “A1” kichik toifadagi transport vositalarini boshqarish huquqini olish uchun amaliy imtihonlarni oʻtkazish, shuningdek, transport vositasiga qoʻyiladigan talablarni hamda haydovchilik huquqidan mahrum etilgan shaxslarning transport vositalarini boshqarish huquqini olish uchun oʻqitish va imtihonlarni topshirish boʻyicha alohida tartibni belgilovchi Hukumat qarori loyihasini belgilangan tartibda kiritsin;

uch oy muddatda Raqamli texnologiyalar vazirligi, Adliya vazirligi, Strategik islohotlar agentligi hamda boshqa manfaatdor vazirlik va idoralar bilan birgalikda Yoʻl harakati qoidalari, transportni boshqarish xavfsizligi va boshqa yoʻnalishlar boʻyicha zarur bilim va koʻnikmalarni shakllantirishga koʻmaklashuvchi elektron oʻquv materiallarini ishlab chiqsin va ulardan barcha xohlovchilar uchun ochiq foydalanish imkoniyatini yaratsin.

5. Belgilab qoʻyilsinki, 2026-yil 1-apreldan boshlab:

maxsus avtomatlashtirilgan foto va video qayd etish tizimlari orqali qayd etilgan tegishli yoʻl harakati qoidabuzarliklari uchun ham jarima ballari hisoblanadi;

jarima ballarini transport vositasining mulkdori va mazkur transport vositasidan fuqarolik-huquqiy munosabatlar asosida belgilangan tartibda (ishonchnoma, sugʻurta polisi, yoʻl varaqasi) foydalanuvchi boshqa haydovchilarga taqsimlash tartibi joriy etiladi.

6. Oʻzbekiston Respublikasi Ichki ishlar vazirligi:

a) ikki oy muddatda manfaatdor vazirlik va idoralar bilan birgalikda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin;

b) 2026-yil 1-martga qadar Raqamli texnologiyalar vazirligi bilan birgalikda haydovchilar tomonidan sodir etilgan yoʻl harakati qoidabuzarliklari uchun ularga jarima ballarini hisoblashning “E-jarimaball” modulida ushbu qaror talablari asosida maxsus avtomatlashtirilgan foto va video qayd etish tizimlari orqali qayd etilgan tegishli yoʻl harakati qoidabuzarliklari uchun ham jarima ballarini qoʻshib hisoblash imkoniyatini yaratsin;

v) Oʻzbekiston Milliy teleradiokompaniyasi va Oʻzbekiston Milliy axborot agentligi bilan birgalikda ushbu qarorning maqsadi va vazifalarini ommaviy axborot vositalarida va Internet tarmogʻida keng yoritish ishlarini tashkil qilsin.

7. Vazirlar Mahkamasining “Yoʻl harakati qoidabuzarliklarini jarima ballari asosida baholash tizimini joriy etish toʻgʻrisida” 2025-yil 6-maydagi 296-son qaroriga ilovaga muvofiq oʻzgartirish va qoʻshimchalar kiritilsin.

Mazkur banddagi oʻzgartirish va qoʻshimchalar 2026-yil 1-apreldan eʼtiboran kuchga kiradi.

8. Ushbu qarorning bajarilishini nazorat qilish Oʻzbekiston Respublikasi ichki ishlar vaziri A.A. Tashpulatov zimmasiga yuklansin.

1. 3-bandda:

uchinchi xatboshi chiqarib tashlansin;

toʻrtinchi — oltinchi xatboshilar tegishlicha uchinchi — beshinchi xatboshilar deb hisoblansin.

2. Ilovada:

3-bandning ikkinchi xatboshisi quyidagi tahrirda bayon etilsin:

“Bunda Kodeksning tegishli moddalarida nazarda tutilgan huquqbuzarliklar sodir etilgani uchun asosiy jazo bilan birga ushbu Nizomda belgilangan tartibda jarima ballari hisoblanadi”;

5-banddan “faqat Davlat yoʻl harakati xavfsizligi xizmati xodimlari tomonidan rasmiylashtirilgan maʼmuriy bayonnomalar boʻyicha qabul qilingan qarorlar asosida” soʻzlari chiqarib tashlansin.

quyidagi mazmundagi 5¹ va 5²-bandlar bilan toʻldirilsin:

“5¹. Jarima ballari, Yoʻl harakati qoidalari buzilgani holati:

a) Davlat yoʻl harakati xavfsizligi xizmati xodimlari tomonidan rasmiylashtirilgan maʼmuriy bayonnomalar boʻyicha qabul qilingan qarorlar asosida transport vositalarini bevosita boshqargan haydovchilarga nisbatan;

b) maxsus avtomatlashtirilgan foto va video qayd etish tizimlari orqali qayd etilgan Kodeksda nazarda tutilgan tegishli qoidabuzarliklar uchun rasmiylashtirilgan jarima solish toʻgʻrisidagi qarorlar asosida transport vositasining mulkdori yoki mazkur transport vositasidan fuqarolik-huquqiy munosabatlar asosida belgilangan tartibda foydalangan shaxsga nisbatan hisoblanadi.

5². Yoʻl harakati qoidalari buzilgani holati maxsus avtomatlashtirilgan foto va video qayd etish texnika vositalari orqali qayd etilganda jarima ballari hisoblanadigan haydovchining shaxsi quyidagi tartibda aniqlanadi:

a) transport vositasining mulkdori (jismoniy va yuridik shaxs) tomonidan:

jismoniy shaxs oʻziga tegishli boʻlgan transport vositasidan fuqarolik-huquqiy munosabatlar asosida belgilangan tartibda foydalanuvchi boshqa haydovchiga yoki yuridik shaxsning transport vositasidan foydalanish uchun masʼul boʻlgan shaxsiga topshirilgani toʻgʻrisidagi maʼlumotlarni kiritib borish uchun tegishli axborot tizimlarida shaxsiy elektron kabinet ochiladi;

boshqa haydovchi toʻgʻrisidagi maʼlumotlar ushbu haydovchiga transport vositasi boshqarish uchun topshirilishidan oldin shaxsiy elektron kabinetiga kiritiladi;

transport vositasini amalda boshqarish uchun qabul qilgan haydovchi tomonidan mazkur maʼlumotlar tasdiqlanadi;

b) maxsus avtomatlashtirilgan foto va video qayd etish tizimi orqali qayd etilgan qoidabuzarlik uchun jarima ballari hisoblanadigan (qoidabuzarlik sodir etgan) haydovchi toʻgʻrisidagi aniq maʼlumot mavjud boʻlmagan (shaxsiy elektron kabinet orqali tasdiqlanmagan) holatlarda jarima ballari mazkur qoidabuzarlik sodir etilgan transport vositasining mulkdoriga nisbatan (unda haydovchilik guvohnomasi mavjud boʻlsa) qoʻllaniladi;

v) maxsus avtomatlashtirilgan foto va video qayd etish tizimi orqali qayd etilgan qoidabuzarlik uchun jarima ballari hisoblanadigan (qoidabuzarlik sodir etgan) haydovchining shaxsi toʻgʻrisidagi aniq maʼlumot mavjud boʻlmagan (shaxsiy elektron kabinet orqali tasdiqlanmagan), shuningdek, mulkdoriga nisbatan jarima ballarini qoʻllash imkonsiz (haydovchilik guvohnomasi mavjud boʻlmasa) boʻlgan transport vositalarida sodir etilgan qoidabuzarliklar uchun hisoblanadigan jarima ballari yigʻindisi 12 balldan oshganda, mazkur transport vositasi jarima maydonchasiga joylashtirish orqali vaqtincha ushlab turiladi”;

1-ilovaning 2-bosqich “Tadbirlar” ustunidagi “DYHXX xodimi tomonidan rasmiylashtirilgan maʼmuriy bayonnomalar boʻyicha” soʻzlari chiqarib tashlansin.