Oʻzbekiston Respublikasi Prezidentining “Kasbiy taʼlimda malakali kadrlar tayyorlash tizimini yanada takomillashtirish va xalqaro taʼlim dasturlarini joriy qilish chora-tadbirlari toʻgʻrisida” 2024-yil 16-oktabrdagi PF-158-son Farmoni ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Kasbiy taʼlimda malakali kadrlar tayyorlash tizimini yanada takomillashtirish va xalqaro taʼlim dasturlarini joriy qilish chora-tadbirlari toʻgʻrisida” 2024-yil 16-oktabrdagi PF-158-son Farmoniga muvofiq Oliy taʼlim, fan va innovatsiyalar vazirligi huzurida yuridik shaxs maqomiga ega boʻlmagan Kasbiy taʼlimni rivojlantirish jamgʻarmasi (keyingi oʻrinlarda — Jamgʻarma) tashkil etilgani maʼlumot uchun qabul qilinsin.

2. Quyidagilarni nazarda tutuvchi Oʻzbekiston Respublikasi Oliy taʼlim, fan va innovatsiyalar vazirligi huzuridagi Kasbiy taʼlimni rivojlantirish jamgʻarmasi toʻgʻrisidagi nizom ilovaga muvofiq tasdiqlansin:

Jamgʻarma mablagʻlarini shakllantirish va ulardan foydalanish tartibi;

Jamgʻarma faoliyatini boshqarish va uning mablagʻlarini taqsimlash tartibi;

Jamgʻarma mablagʻlarining hisobi va hisobotini yuritish tartibi.

3. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov hamda oliy taʼlim, fan va innovatsiyalar vaziri K.A. Sharipov zimmasiga yuklansin.

1. Ushbu Nizom Oʻzbekiston Respublikasi Oliy taʼlim, fan va innovatsiyalar vazirligi (keyingi oʻrinlarda — Vazirlik) huzuridagi Kasbiy taʼlimni rivojlantirish jamgʻarmasi (keyingi oʻrinlarda — Jamgʻarma) mablagʻlarini shakllantirish va ulardan foydalanish, Jamgʻarma faoliyatini boshqarish, uning mablagʻlarini taqsimlash, hisobi va hisobotini yuritish tartibini belgilaydi.

2. Jamgʻarma yuridik shaxs hisoblanmaydi va uning mablagʻlari Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasida ochilgan Vazirlikning budjetdan tashqari shaxsiy gʻazna hisobvaragʻida jamlanadi hamda ushbu Nizomda belgilangan maqsadlar uchun sarflanadi.

3. Quyidagilar Jamgʻarma mablagʻlarini shakllantirish manbalari hisoblanadi:

2025-yil 1-mayga qadar Davlat budjetidan ajratiladigan 50 mlrd soʻm;

2025-yil 1-sentabrga qadar Oliy taʼlim muassasalarini rivojlantirish jamgʻarmasidan ajratiladigan 50 mlrd soʻm;

kasbiy taʼlim tashkilotlarining toʻlov-kontrakt shaklida oʻqitishdan tushadigan mablagʻlarining moliya yili oxiriga qoldiq (tijorat banklarining depozitlariga joylashtirilgan mablagʻlarini inobatga olgan holda) qismining 4 foizi miqdoridagi ajratmalari;

oʻrta maxsus va kasbiy taʼlim tashkilotlari pedagog kadrlarini navbatdan tashqari attestatsiyadan oʻtkazish boʻyicha davlat xizmatini koʻrsatganlik uchun undiriladigan yigʻimlarning Vazirlikka tushgan qismi;

Jamgʻarmaning vaqtincha boʻsh turgan mablagʻlarini tijorat banklariga depozitga joylashtirishdan olingan foiz tarzidagi daromadlari;

xalqaro donorlarning grantlari va homiylik mablagʻlari;

qonunchilik hujjatlari bilan taqiqlanmagan boshqa manbalar.

4. Kasbiy taʼlim tashkilotlarining toʻlov-kontrakt shaklida oʻqitishdan tushadigan mablagʻlari hisobidan oʻtkaziladigan ajratmalar har yili 1-fevraldan kechiktirmay tushirilishi shart.

5. Jamgʻarmaga toʻlov-kontrakt mablagʻlari hisobidan oʻtkaziladigan ajratmalar hajmining toʻgʻri belgilanishi hamda belgilangan muddatda oʻtkazilishi yuzasidan masʼuliyat kasbiy taʼlim tashkilotlarining direktorlari zimmasiga yuklanadi.

6. Jamgʻarmaning vaqtincha boʻsh turgan mablagʻlari Vazirlik tomonidan Oʻzbekiston Respublikasidagi tijorat banklarining depozit hisobvaraqlariga joylashtirilishi mumkin hamda ulardan olingan foiz daromadlari mazkur Nizomning 8-bandida nazarda tutilgan maqsadlarga sarflash uchun taqsimlanadi.

7. Jamgʻarmaning joriy yilda foydalanilmagan mablagʻlari keyingi yilga oʻtadi.

8. Jamgʻarma mablagʻlari quyidagi maqsadlarga yoʻnaltiriladi:

kasbiy taʼlim tashkilotlarining oʻquv-metodik taʼminotini mustahkamlash, oʻquv adabiyotlarini yaratish, chop etish va ularning kitob fondini toʻldirish;

kasbiy taʼlim tashkilotlarining bino va inshootlarini zamonaviy jihozlar bilan taʼminlash, oʻquv binolari, talabalar turar joylari, sport inshootlari va boshqa infratuzilma obyektlarida qurilish, rekonstruksiya qilish, mukammal va joriy taʼmirlash ishlarini amalga oshirish;

kasbiy taʼlim tashkilotlarining oʻquv jarayonini raqamlashtirish, axborot-kommunikatsiya, multimedia va tarmoq qurilmalari, texnikalari, vositalari hamda dasturiy taʼminotlarni xarid qilish;

oʻquv laboratoriyalarini zarur materiallar va butlovchi qismlar bilan taʼminlash;

kasbiy taʼlim sohasida tanlovlarni oʻtkazish hamda malakali mahalliy va chet ellik mutaxassislarni jalb qilish;

kasbiy taʼlim tizimida taʼlim jarayonini isloh qilish va takomillashtirish maqsadida chet ellik ekspert va konsultantlarni jalb etish;

kasbiy taʼlim tashkilotlarining rahbar va pedagog xodimlarining malaka toifalarini baholashni tashkil etishda ishtirok etgan mutaxassislarni moddiy ragʻbatlantirish;

“Kasbiy taʼlim” platformasini ishlab chiqish va uning lozim darajada ishlashini taʼminlash;

Vazirlik tomonidan tasdiqlangan kasbiy taʼlimni rivojlantirish bilan bogʻliq boshqa chora-tadbirlarni amalga oshirish;

kasbiy taʼlim tizimiga jalb qilinadigan investitsiya loyihalari doirasida loyiha, tanlov hamda shartnoma hujjatlarini ekspertizadan oʻtkazish va roʻyxatga olish, tovar qabul qilish bilan bogʻliq boʻlgan deklaratsiyalash-sertifikatlash ishlari, vaqtincha ombordan foydalanish va konsalting xizmatlari uchun haq toʻlash;

kasbiy taʼlim tashkilotlarida oʻquv-metodik, ijtimoiy, tarbiyaviy, psixologik va boshqa loyihalarni tashkil etish va oʻtkazish (ishchi guruhlarning ish haqi, xizmat safari va boshqa xarajatlar);

pedagog kadrlar yoki oʻquvchilar oʻrtasida oʻtkaziladigan respublika tanlovlari gʻoliblarini taqdirlash va ragʻbatlantirish;

kasbiy taʼlim sohasida islohotlarni amalga oshirishda faollik koʻrsatgan kasbiy taʼlim tashkilotlarining rahbar xodimlari, pedagog kadrlar va boshqa xodimlarini moddiy ragʻbatlantirish;

kasbiy taʼlim tashkilotlarining jamoalarini, rahbar va pedagog kadrlarini, oʻquvchilarini kasbiy taʼlim sohasidagi xalqaro musobaqalarga va konferensiyalarga yuborish;

vakillik tadbirlarini (xorijiy delegatsiyalarni kutib olish, transport xizmati, tarjimonlarni jalb qilish, sovgʻa va suvenirlar sotib olish, ovqatlantirish) oʻtkazish;

Oʻzbekiston Respublikasi Prezidenti va Vazirlar Mahkamasining hujjatlariga muvofiq oʻtkaziladigan sport-sogʻlomlashtirish va boshqa tadbirlarni tashkil etish;

kasbiy taʼlim sohasiga masʼul boʻlgan Vazirlikning rahbar va xodimlarini taʼlim tashkilotlari va boshqa tashkilotlarga tajriba oʻrganish va hamkorlik oʻrnatish maqsadlarida xorijiy xizmat safariga yuborish.

9. Jamgʻarma hisobidan xodimlarni ragʻbatlantirish miqdorlarini belgilash va toʻlash yuzasidan takliflar Jamgʻarmani boshqarish kengashi (keyingi oʻrinlarda — Kengash) tomonidan tayyorlanadi hamda Oʻzbekiston Respublikasi oliy taʼlim, fan va innovatsiyalar vaziri (keyingi oʻrinlarda — vazir) buyrugʻiga asosan tasdiqlanadi.

10. Jamgʻarma mablagʻlari kasbiy taʼlim tashkilotlarining budjetdan tashqari rivojlantirish jamgʻarmalarining shaxsiy gʻazna hisobvaraqlariga oʻtkaziladi, gʻazna ijrosi bilan qamrab olinmagan tashkilotlar bundan mustasno.

Bunda kasbiy taʼlim tashkilotlari haqiqiy xarajatlaridan kelib chiqqan holda, asoslovchi hujjatlar bilan birgalikda hisobotni taqdim etadi va foydalanilmay qolgan mablagʻlarni Jamgʻarmaga qaytaradi.

11. Jamgʻarma mablagʻlaridan uning tasdiqlangan daromadlar va xarajatlar smetasi asosida amalga foydalaniladi.

Jamgʻarmaning daromadlar va xarajatlari smetasi budjet tashkilotlari uchun budjetdan tashqari mablagʻlar boʻyicha qonunchilik hujjatlarida belgilangan tartibda tuziladi, Vazirlik tomonidan tasdiqlanadi hamda Oʻzbekiston Respublikasi Iqtisodiyot va moliya vazirligida roʻyxatdan oʻtkaziladi.

12. Jamgʻarmaning daromadlar va xarajatlar smetasiga yil davomida Vazirlik tomonidan belgilangan tartibda oʻzgartirishlar kiritilishi mumkin.

13. Jamgʻarma faoliyatini boshqarish va uning mablagʻlarini taqsimlash uchun Kengash tashkil etiladi.

Kengash aʼzolari oʻz faoliyatini jamoatchilik asosida amalga oshiradi.

Kengash ishtirok etishning ixtiyoriyligi va uning vakolatiga tegishli masalalarni hal etishda barcha aʼzolarning teng huquqliligi tamoyillari asosida shakllantiriladi.

Kengash rais, rais oʻrinbosari, kotib va aʼzolardan iborat boʻladi.

Kengash Vazirlik va kasbiy taʼlim tashkilotlarining 9 nafar direktorlari hamda masʼul xodimlaridan iborat tarkibda shakllantiriladi. Kengashning shaxsiy tarkibi bir yilda bir marta vazir tomonidan tasdiqlanadi.

Vazir lavozimiga koʻra Kengash raisi hisoblanadi.

14. Kengash raisi:

Kengash majlisi kun tartibini belgilaydi va tasdiqlaydi;

Kengash qarorlarini tasdiqlaydi va ularning bajarilishini nazorat qiladi;

Kengash aʼzolariga yuklangan vazifalar bajarilishi yuzasidan ularning ishini muvofiqlashtiradi.

15. Kengash aʼzolari:

Kengash majlislarida koʻrib chiqiladigan masalalarni muhokama qilish va hal etishda ishtirok etadi;

kasbiy taʼlim tizimini rivojlantirishning dolzarb masalalari boʻyicha Kengashga takliflar kiritadi;

Kengash tomonidan koʻrib chiqiladigan masalalar boʻyicha ovoz beradi.

Kengash aʼzolari majlisda shaxsan qatnashadilar. Bunda qatnashishning imkoni boʻlmagan taqdirda, Kengash aʼzosi majlisning kun tartibi boʻyicha oʻz fikrini yozma ravishda taqdim etishga haqlidir.

16. Kengash kotibi:

Kengash majlisiga barcha zarur hujjatlarning oʻz vaqtida tayyorlanishini taʼminlaydi;

majlisni oʻtkazish muddatlari va joyini Kengash raisi bilan kelishadi;

kun tartibi masalalari boʻyicha Kengash majlislari oʻtkazilishini tashkil etadi;

Kengash aʼzolari va taklif etilgan shaxslarni majlisning sanasi, vaqti, joyi va kun tartibi loyihasidan xabardor qiladi;

Kengash qarorlari bajarilishi monitoringini yuritadi;

Kengash bayonnomalarini rasmiylashtiradi, tasdiqlangan bayonnomalarni kengash aʼzolariga hamda boshqa manfaatdor vazirlik va idoralarga yuboradi.

Kengash kotibi Kengash aʼzosi hisoblanadi.

17. Kengash oʻz majlislarini zaruratga koʻra biroq har chorakda kamida bir marotaba oʻtkazadi.

18. Kengash majlisini Kengash raisi, u boʻlmagan taqdirda esa, Kengash raisi oʻrinbosari boshqaradi.

19. Kengash majlisi unda Kengash aʼzolarining kamida uchdan ikki qismi qatnashganda oʻtkazilgan hisoblanadi.

20. Majlisni oʻtkazish uchun kvorum yoki rais va uning oʻrinbosari boʻlmaganda, Kengash majlisini oʻtkazishning yangi sanasi eʼlon qilinadi.

21. Kengash majlisida koʻrib chiqiladigan masalalarning xususiyatiga koʻra davlat organlari va boshqa tashkilotlarning rahbarlari, mutaxassislari hamda kasbiy taʼlim tashkilotlarining xodimlari ham taklif etilishi mumkin.

Kengash qarori Kengashning majlisda qatnashgan aʼzolarining oddiy koʻpchilik ovozi bilan qabul qilinadi. Ovozlar teng boʻlgan taqdirda, Kengash raisining ovozi hal qiluvchi hisoblanadi.

Jamgʻarmaning daromadlari va xarajatlarining yillik moliyaviy rejasini, shuningdek, Kengash mablagʻlaridan foydalanilishini tasdiqlash masalalari boʻyicha qarorlar Kengashning majlisda qatnashgan aʼzolarining uchdan ikki qismi ovozi bilan qabul qilinadi.

Kengash qarorlari kengash majlisining bayonnomasi bilan rasmiylashtiriladi. Kengash majlisining bayonnomasi Kengash raisi tomonidan tasdiqlanadi hamda vazir buyrugʻi asosida amalga oshiriladi.

22. Quyidagilar Kengashning asosiy vazifalari hisoblanadi:

hisobot yili yakuni boʻyicha Jamgʻarma mablagʻlarining daromadlari va xarajatlari toʻgʻrisidagi hisobotlarni koʻrib chiqish va tasdiqlash;

Jamgʻarma mablagʻlaridan maqsadli va samarali foydalanilishini nazorat qilish.

23. Vazirlikning Buxgalteriya hisobi va hisoboti boʻlimi Jamgʻarmaning ishchi organi hisoblanadi.

24. Ishchi organ quyidagi funksiyalarni amalga oshiradi:

Jamgʻarmaning daromadlari va xarajatlarining yillik moliyaviy rejasini ishlab chiqadi;

daromadlar va xarajatlar smetalarini tayyorlaydi, shuningdek, ularga qonunchilik hujjatlarida belgilangan tartibda oʻzgartirishlar kiritadi;

Jamgʻarma tushumlarini koʻpaytirish va uning mablagʻlaridan samarali foydalanish boʻyicha takliflar tayyorlaydi;

kasbiy taʼlim tashkilotlari hamda Jamgʻarmadan saqlash xarajatlari moliyalashtiriladigan tashkilotlarning Jamgʻarmadan mablagʻ ajratishga oid murojaatlarini umumlashtiradi va Kengashda koʻrib chiqish uchun materiallar tayyorlaydi;

Jamgʻarmaning tushumlar manbalari boʻyicha daromadlari hamda asosiy xarajatlar yoʻnalishlariga asosan hisobini yuritadi;

har chorak yakuni boʻyicha Jamgʻarma mablagʻlaridan foydalanish toʻgʻrisida hisobot tayyorlaydi hamda Kengashga koʻrib chiqish va tasdiqlash uchun taqdim etadi.

25. Jamgʻarma mablagʻlarining hisob va hisobotini yuritish hamda joriy xizmat koʻrsatish ishlari Vazirlikning Buxgalteriya hisobi va hisoboti boʻlimi tomonidan amalga oshiriladi.

26. Jamgʻarma mablagʻlaridan foydalanish boʻyicha hisob va hisobotlar Vazirlikning budjetdan tashqari boshqa mablagʻlaridan alohida yuritiladi.

27. Jamgʻarmaning daromadlar va xarajatlar smetasining ijrosi toʻgʻrisidagi yillik hisobot Kengash tomonidan koʻrib chiqiladi hamda har yili 15-martga qadar Vazirlikning hayʼat majlisida tasdiqlanadi.

28. Jamgʻarmaning daromadlar va xarajatlar smetasi hamda uning ijrosi toʻgʻrisidagi hisobotlar, shuningdek, tovarlar (ishlar, xizmatlar)ni xarid qilish boʻyicha tuzilgan shartnomalar roʻyxatlari Vazirlikning rasmiy veb-saytida eʼlon qilinadi.

29. Jamgʻarma mablagʻlaridan oqilona va maqsadli foydalanish yuzasidan davlat moliyaviy nazorati qonunchilik hujjatlarida belgilangan tartibda Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamentining Davlat moliyaviy nazorati inspeksiyasi hamda Vazirlikning Ichki audit boshqarmasi tomonidan amalga oshiriladi.

30. Ushbu Nizomni qoʻllashda yuzaga keladigan nizolar qonunchilik hujjatlarida belgilangan tartibda hal etiladi.

31. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.