Toʻqimachilik, charm-poyabzal va elektrotexnika mahsulotlarining eksport narxlarini asossiz pasaytirib koʻrsatish holatlarining oldini olish, valyuta tushumlari oʻz vaqtida va toʻliq taʼminlanishini nazorat qilish, shuningdek, ushbu sohada yashirin iqtisodiyot ulushini qisqartirish maqsadida Vazirlar Mahkamasi qaror qiladi:

1. Toʻqimachilik, charm-poyabzal va elektrotexnika mahsulotlari uchun eksport narxlari shakllantirilishi ustidan nazoratni taʼminlash maqsadida 2024-yil 15-maydan boshlab belgilangan tartibda tasdiqlangan roʻyxat boʻyicha respublikadan eksport qilinadigan toʻqimachilik, charm-poyabzal va elektrotexnika mahsulotlari boʻyicha shartnomalar qiymatini monitoring qilish hamda eksport narxlari shakllantirilishi ustidan nazorat oʻrnatish tartibi joriy etilsin.

2. Shunday tartib oʻrnatilsinki, unga muvofiq:

a) minimal eksport narxlari belgilanadigan toʻqimachilik, charm-poyabzal va elektrotexnika mahsulotlari roʻyxati (keyingi oʻrinlarda — roʻyxat) Oʻzbekiston Respublikasi Savdo-sanoat palatasi, Investitsiyalar, sanoat va savdo vazirligi hamda “Oʻztoʻqimachiliksanoat”, “Oʻzcharmsanoat” va “Oʻzeltexsanoat” uyushmalari takliflariga asosan Investitsiyalarni jalb qilish, sanoatni rivojlantirish va savdoni tartibga solish boʻyicha Hukumat komissiyasi tomonidan tasdiqlanadi;

b) roʻyxatga kiritilgan toʻqimachilik, charm-poyabzal va elektrotexnika mahsulotlari uchun minimal eksport narxlari Oʻzbekiston Respublikasi Savdo-sanoat palatasi tomonidan “Oʻztoʻqimachiliksanoat”, “Oʻzcharmsanoat” va “Oʻzeltexsanoat” uyushmalari bilan birgalikda har oyda tegishli mahsulotlar boʻyicha ichki va tashqi bozor konyunkturasi tahlili asosida shakllantiriladi hamda tasdiqlanadi.

Bunda zarur hollarda ichki va tashqi bozor konyunkturasida boʻlgan oʻzgarishlardan kelib chiqqan holda, minimal eksport narxlari oy davomida qayta qoʻrib chiqilishi mumkin;

v) toʻqimachilik, charm-poyabzal va elektrotexnika mahsulotlari minimal eksport narxlari boʻyicha maʼlumotlar Oʻzbekiston Respublikasi Savdo-sanoat palatasi tomonidan Tashqi savdo operatsiyalarining yagona elektron axborot tizimiga (keyingi oʻrinlarda — Yagona elektron axborot tizimi) kiritiladi, Savdo-sanoat palatasi, “Oʻztoʻqimachiliksanoat”, “Oʻzcharmsanoat” va “Oʻzeltexsanoat” uyushmalari rasmiy veb-saytlarida eʼlon qilib boriladi.

Bunda roʻyxatga kiritilgan toʻqimachilik, charm-poyabzal va elektrotexnika mahsulotlari uchun minimal eksport narxlari Savdo-sanoat palatasining rasmiy veb-saytida eʼlon qilingan kundan eʼtiboran ikki ish kuni oʻtgach amalga kiritiladi.

Savdo-sanoat palatasi doimiy ravishda bojxona organlarining axborot tizimiga minimal eksport narxlari boʻyicha maʼlumotlar onlayn tarzda taqdim etib borilishini taʼminlasin.

3. Belgilansinki:

toʻqimachilik, charm-poyabzal va elektrotexnika mahsulotlarining eksport narxlari minimal eksport narxlaridan pasaytirilganligi aniqlaganda, Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi tomonidan ushbu holat boʻyicha yigirma toʻrt soat ichida elektron axborot almashinuvi tizimi orqali Soliq qoʻmitasi hamda Bosh prokuratura huzuridagi Iqtisodiy jinoyatlarga qarshi kurashish departamentiga xabar beriladi;

Vazirlar Mahkamasi huzuridagi Soliq qoʻmitasi va Bosh prokuratura huzuridagi Iqtisodiy jinoyatlarga qarshi kurashish departamenti tomonidan aniqlangan holatlar yuzasidan qonunchilikka muvofiq javobgarlik choralari koʻriladi;

toʻqimachilik, charm-poyabzal va elektrotexnika mahsulotlari eksportiga doir tashqi savdo operatsiyalari boʻyicha aktivlarning repatriatsiya qilinishi ustidan nazorat ushbu mahsulotlarning minimal eksport narxlaridan past boʻlmagan narxlardan kelib chiqqan holda amalga oshiriladi.

Iqtisodiyot va moliya vazirligi huzuridagi Bojxona qoʻmitasi bir oy muddatda bojxona xizmati organlari axborot tizimlarini Bosh prokuratura huzuridagi Iqtisodiy jinoyatlarga qarshi kurashish departamentining axborot tizimlari bilan oʻzaro integratsiya qilsin.

4. Oʻzbekiston Respublikasi Investitsiyalar, sanoat va savdo vazirligi Raqamli texnologiyalar vazirligi hamda Iqtisodiyot va moliya vazirligi huzuridagi Bojxona qoʻmitasi bilan birgalikda bir oy muddatda Savdo-sanoat palatasiga Yagona elektron axborot tizimidan foydalanish imkoniyatini yaratsin.

5. Vazirlar Mahkamasining “Respublikada meva-sabzavot mahsulotlari eksportini tartibga solish chora-tadbirlari toʻgʻrisida” 2024-yil 29-fevraldagi 107-son qaroriga ilovaga muvofiq oʻzgartirishlar kiritilsin.

6. Oʻzbekiston Respublikasi Iqtisodiyot va moliya vazirligi Vazirlar Mahkamasi huzuridagi Soliq qoʻmitasi hamda Savdo-sanoat palatasi bilan birgalikda ikki oy muddatda qonunchilik hujjatlariga qishloq xoʻjaligi, toʻqimachilik, charm-poyabzal va elektrotexnika mahsulotlarini belgilangan minimal eksport narxlaridan past narxlarda eksport qilgan tadbirkorlik subyektlari uchun minimal eksport narxlaridan past narxda eksport qilingan mahsulot hajmiga nisbatan foyda soligʻi boʻyicha berilgan imtiyozlarni bekor qilish yuzasidan Vazirlar Mahkamasiga taklif kiritsin.

7. Oʻzbekiston Respublikasi Savdo-sanoat palatasi “Oʻztoʻqimachiliksanoat”, “Oʻzcharmsanoat” va “Oʻzeltexsanoat” uyushmalari hamda manfaatdor vazirlik va idoralar bilan birgalikda:

uch kun muddatda ushbu qaror bilan joriy etilayotgan yangi tizimning mazmun-mohiyati va ahamiyatini yoritish boʻyicha tadbirkorlik subyektlari, shu jumladan, roʻyxatga kiritilgan mahsulotlar eksporti bilan shugʻullanuvchi tadbirkorlik subyektlari ishtirokida brifing tashkil etsin;

bir oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga taklif kiritsin.

8. Oʻzbekiston Respublikasi Savdo-sanoat palatasi raisi D.A. Vaxabov hamda investitsiyalar, sanoat va savdo vaziri L.Sh. Kudratov mazkur qaror bilan joriy etilayotgan yangi tizimning samarali faoliyati uchun masʼul va shaxsan javobgar etib belgilansin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev zimmasiga yuklansin.

1. 2-banddagi “tavsiya etilgan” soʻzlari chiqarib tashlansin.

2. 3-bandda:

“a” kichik band quyidagi tahrirda bayon etilsin:

a) Savdo-sanoat palatasi Qishloq xoʻjaligi vazirligi huzuridagi Oʻsimliklar karantini va himoyasi agentligi hamda Investitsiyalar, sanoat va savdo vazirligi bilan birgalikda doimiy ravishda meva-sabzavot mahsulotlari boʻyicha ichki va tashqi bozor konyunkturasini oʻrganib boradi hamda har haftada respublikadagi yirik ulgurji bozorlarda shakllangan meva-sabzavotlarning eng past narxlari asosida roʻyxatda koʻrsatilgan meva-sabzavot mahsulotlariga minimal eksport narxlarini tasdiqlaydi.

Bunda zarur hollarda ichki va tashqi bozor konyunkturasida boʻlgan oʻzgarishlardan kelib chiqqan holda, minimal eksport narxlari har kuni eʼlon qilib borilishi mumkin;

“b” kichik bandda:

birinchi xatboshi quyidagi tahrirda bayon etilsin:

“b) Savdo-sanoat palatasi har hafta (zarur hollarda har kuni) meva-sabzavot mahsulotlari uchun minimal eksport narxlari Tashqi savdo operatsiyalarining yagona elektron axborot tizimiga kiritilishini taʼminlaydi, Palataning hamda Qishloq xoʻjaligi vazirligi huzuridagi Oʻsimliklar karantini va himoyasi agentligining rasmiy veb-saytlarida ularni eʼlon qilib boradi”;

ikkinchi xatboshidagi “tavsiya etiladigan” soʻzlari chiqarib tashlansin.

“v” kichik bandda:

birinchi va ikkinchi xatboshilar quyidagi mazmundagi birinchi xatboshi bilan almashtirilsin:

“v) meva-sabzavot mahsulotlarining eksport narxi minimal eksport narxlaridan pasaytirib koʻrsatilganligi aniqlaganda, Iqtisodiyot va moliya vazirligi huzuridagi Bojxona qoʻmitasi tomonidan ushbu holat boʻyicha yigirma toʻrt soat ichida elektron axborot almashinuvi tizimi orqali Vazirlar Mahkamasi huzuridagi Soliq qoʻmitasi hamda Bosh prokuratura huzuridagi Iqtisodiy jinoyatlarga qarshi kurashish departamentiga xabar beriladi;

uchinchi xatboshi ikkinchi xatboshi deb hisoblansin.