Ichki ishlar organlari tomonidan jinoiy jazoni ijro etish sohasida amalga oshirilayotgan faoliyati samaradorligini yanada oshirish, shuningdek, huquqbuzarliklar profilaktikasi xizmati xodimlarini tanlash va joy-joyiga qoʻyish tizimini takomillashtirish maqsadida:

1. Oʻzbekiston Respublikasi Prezidenti va Hukumatining ayrim hujjatlariga ilovaga muvofiq oʻzgartirish va qoʻshimchalar kiritilsin.

2. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

1. Oʻzbekiston Respublikasi Prezidentining 2020-yil 18-fevraldagi “Jamiyatda ijtimoiy-maʼnaviy muhitni sogʻlomlashtirish, mahalla institutini yanada qoʻllab-quvvatlash hamda oila va xotin-qizlar bilan ishlash tizimini yangi darajaga olib chiqish chora-tadbirlari toʻgʻrisida”gi PF-5938-son Farmonining 20-bandida:

a) beshinchi xatboshi quyidagi tahrirda bayon etilsin:

“profilaktika inspektorini lavozimga tayinlash va lavozimidan ozod etish, staji va tajribasini inobatga olgan holda mahallaga biriktirish hamda mahalla orasida rotatsiya qilish Qoraqalpogʻiston Respublikasi ichki ishlar vaziri, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari boshliqlari tomonidan Oʻzbekiston Respublikasi Ichki ishlar vazirligi Jamoat xavfsizligi departamenti Huquqbuzarliklar profilaktikasi xizmati bilan kelishilgan holda amalga oshiriladi (profilaktika inspektori lavozimidan katta profilaktika inspektori lavozimiga oʻtkazish bundan mustasno)”;

b) quyidagi mazmundagi yettinchi xatboshi bilan toʻldirilsin:

“Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari va viloyatlar ichki ishlar boshqarmalari Jamoat xavfsizligi xizmatining huquqbuzarliklar profilaktikasi boshqarmalari boshliqlari va ularning oʻrinbosarlari hamda ijtimoiy profilaktika boʻlim boshliqlari Oʻzbekiston Respublikasi Ichki ishlar vazirligi Jamoat xavfsizligi departamentining Huquqbuzarliklar profilaktikasi xizmati bilan kelishilgan holda belgilangan tartibda lavozimga tayinlanadi va lavozimdan ozod etiladi (yuqori turuvchi rahbarlik lavozimiga oʻtkazish holatlari bundan mustasno)”;

v) yettinchi va sakkizinchi xatboshilar tegishincha sakkizinchi va toʻqqizinchi xatboshilar deb hisoblansin.

2. Oʻzbekiston Respublikasi Prezidentining 2020-yil 27-oktabrdagi “Davlat ishtirokidagi korxonalarni isloh qilishni jadallashtirish hamda davlat aktivlarini xususiylashtirishga oid chora-tadbirlar toʻgʻrisida”gi PF-6096-son Farmoniga 4-ilovaning 234-pozitsiyasi chiqarib tashlansin.

3. Oʻzbekiston Respublikasi Prezidentining 2022-yil 17-maydagi “Tibbiyot muassasalari xodimlarini moddiy qoʻllab-quvvatlash hamda ragʻbatlantirishni kuchaytirish chora-tadbirlari toʻgʻrisida”gi PF-136-son Farmonining 1-bandi quyidagi mazmundagi oltinchi xatboshi bilan toʻldirilsin:

“Mazkur bandda belgilangan qoidalar 2024-yil 1-yanvardan boshlab Ichki ishlar vazirligi tizimidagi tibbiyot va farmatsevtika xodimlariga (maxsus va harbiy unvonga ega boʻlgan xodim hamda harbiy xizmatchilardan tashqari) nisbatan ham tatbiq etiladi”.

4. Oʻzbekiston Respublikasi Prezidentining 2017-yil 29-noyabrdagi PQ-3413-son qarori bilan tasdiqlangan Ichki ishlar organlarida xizmatni oʻtash tartibi toʻgʻrisidagi nizomning 19-bandi sakkizinchi xatboshisi “maxsus boʻlinmalarining,” soʻzlaridan keyin “axborot texnologiyalarini rivojlantirish boʻlinmalarining,” soʻzlari bilan toʻldirilsin.

5. Oʻzbekiston Respublikasi Prezidentining 2019-yil 29-yanvardagi “Ozodlikdan mahrum etilgan shaxslarning mehnat bilan bandligini taʼminlash boʻyicha qoʻshimcha chora-tadbirlar toʻgʻrisida”gi PQ-4138-son qarorining 3-bandida:

a) uchinchi va toʻrtinchi xatboshilar quyidagi tahrirda bayon etilsin:

“yetkazib beruvchilar, shu jumladan xorijiy yetkazib beruvchilar bilan ishlab chiqarish va yordamchi uskunalar, texnika va boshqa moddiy-texnik vositalar, resurslar, xomashyo materiallari, oʻsimlik urugʻlari, chorva mollarini (shu jumladan yirik va mayda shoxli mollar, parranda, baliq, asalari va boshqalarni) xarid qilish hamda xizmatlar koʻrsatish boʻyicha tanlov (tender) savdolarini oʻtkazmasdan toʻgʻridan-toʻgʻri shartnomalar tuzish;

koloniyalarda ishlab chiqarish faoliyatini kengaytirish, yangi ish oʻrinlarini yaratish hamda mahkumlarning bandligini taʼminlash maqsadida boshqa xoʻjalik yurituvchi subyektlar bilan toʻgʻridan-toʻgʻri shartnomalar tuzish orqali hamkorlikni amalga oshirish”;

b) yettinchi xatboshi quyidagi tahrirda bayon etilsin:

“jazoni ijro etish muassasalarining ishlab chiqarish boʻlinmalariga yuqori malakali menejerlarni (mutaxassislarni) Jazoni ijro etish departamentining budjetdan tashqari mablagʻlari hisobidan mehnatga haq toʻlashning eng kam miqdorining 5 baravaridan 15 barobarigacha, zarur mutaxassislikka ega boʻlmagan xizmat koʻrsatuvchi xodimlarga mehnatga haq toʻlashning eng kam miqdorining 5 baravarigacha oylik maoshi belgilash hamda ularni jazoni ijro etish muassasalari boshliqlarining ishlab chiqarishni rivojlantirish boʻyicha oʻrinbosari lavozimiga tayinlash imkoniyati bilan jalb qilish”.

6. Oʻzbekiston Respublikasi Prezidentining 2021-yil 2-apreldagi “Ichki ishlar organlarining jamoat xavfsizligini taʼminlash va jinoyatchilikka qarshi kurashish sohasidagi faoliyatini yanada takomillashtirish boʻyicha qoʻshimcha tashkiliy chora-tadbirlar toʻgʻrisida”gi PQ-5050-son qarorida:

a) 8-band quyidagi mazmundagi sakkizinchi xatboshi bilan toʻldirilsin:

“jazoni ijro etish muassasalari huzuridagi budjetdan tashqari faoliyatni amalga oshiradigan ishlab chiqarish boʻlinmalari lavozimlariga tegishli sohada amaliy ish tajribasiga ega boʻlgan shaxslar shahodatlangan lavozimlar hisobidan tayinlanishi mumkin”;

b) 2-ilovada:

9-bandda:

quyidagi mazmundagi oʻn yettinchi xatboshi bilan toʻldirilsin:

“budjetdan tashqari faoliyat hisobidan taʼminlanadigan ishchi va xizmatchilar shtat soniga oʻzgartirish va qoʻshimchalar kiritish”;

oʻn yettinchi va oʻn sakkizinchi xatboshilar tegishlicha oʻn sakkizinchi va oʻn toʻqqizinchi xatboshilar deb hisoblansin;

15-bandda:

quyidagi mazmundagi oʻn toʻqqizinchi va yigirmanchi xatboshilar bilan toʻldirilsin:

“Departament va tizim muassasalarining budjetdan tashqari faoliyatidan taʼminlanadigan ishchi va xizmatchilar shtat birliklarini kiritadi va qisqartiradi;

jazoni ijro etish koloniyalari tomonidan tizim tasarrufidagi boshqa boʻlinma yoki jazoni ijro etish koloniyasiga bir yildan koʻp boʻlmagan muddatga qaytarib berish sharti bilan moliyaviy yordam koʻrsatilishini tashkil etadi”;

oʻn toʻqqizinchi xatboshi yigirma birinchi xatboshi deb hisoblansin;

16-bandning uchinchi xatboshisi “oʻzgartirish va qoʻshimchalar kiritish” soʻzlaridan keyin “(budjetdan tashqari faoliyatidan taʼminlanadigan ishchi va xizmatchilar shtat birliklari bundan mustasno)” soʻzlari bilan toʻldirilsin;

18-bandning uchinchi xatboshisi “tahlil qilish va baholash,” soʻzlaridan keyin “moddiy-texnik, moliyaviy va ijtimoiy-maishiy jihatdan taʼminlashni tashkil etish,” soʻzlari bilan toʻldirilsin.

7. Oʻzbekiston Respublikasi Prezidentining 2022-yil 4-apreldagi “Avtomobil yoʻllarida inson xavfsizligini ishonchli taʼminlash va oʻlim holatlarini keskin kamaytirish chora-tadbirlari toʻgʻrisida”gi PQ-190-son qarorining 7-bandida:

oʻn uchinchi xatboshi “ekspluatatsiya-montaj boʻlinmalarining” soʻzlaridan keyin “binolarini qurish, kapital taʼmirlash va rekonstruksiya qilish hamda” soʻzlari bilan toʻldirilsin;

quyidagi mazmundagi oʻn oltinchi xatboshi bilan toʻldirilsin:

“yoʻllar boʻyida joylashgan maktablar oldida, kamida toʻrt tasmali yoʻllardagi piyodalar oʻtish joylarida hamda yoʻl-transport hodisalar oʻchoqlarida belgilangan tezlikni oshirish, piyodalarni oʻtkazmaslik va fuqarolarning yoʻlni belgilanmagan joydan kesib oʻtishi kabi qoidabuzarliklarni aniqlovchi maxsus foto-video qayd etish vositalarini oʻrnatish”.

8. Vazirlar Mahkamasining 2021-yil 15-oktabrdagi “Ichki ishlar organlari faoliyatiga zamonaviy axborot texnologiyalarini keng joriy etish chora-tadbirlari toʻgʻrisida”gi 645-son qaroriga 1-ilovaning 66-pozitsiyasi chiqarib tashlansin.