Mamlakatimizda elektron raqamli imzodan foydalanish sohasidagi munosabatlarni tartibga solish, shu jumladan sohaga oid qonunchilik hujjatlarini toʻgʻridan-toʻgʻri amal qiluvchi qonun doirasida tizimlashtirish maqsadida “Elektron raqamli imzo toʻgʻrisida”gi Oʻzbekiston Respublikasining Qonuni qabul qilindi.

Ushbu Qonun bilan elektron raqamli imzo, uning ochiq va yopiq kalitlari, elektron raqamli imzo kalitining sertifikati kabi asosiy tushunchalar, elektron raqamli imzo vositalari va ulardan foydalanish, elektron raqamli imzodan foydalanish sohasidagi davlat siyosatining asosiy yoʻnalishlari, elektron raqamli imzolar kalitlarini roʻyxatga olish markazlarining faoliyati, elektron raqamli imzolar kalitlari egalarining huquq va majburiyatlari bilan bogʻliq muhim normalar belgilab berildi.

Shu bilan birga, Oʻzbekiston Respublikasi Prezidentining 2022-yil 22-avgustdagi PQ-357-son qarorida IT-park rezidentlari tomonidan ingliz tilini oʻqitish boʻyicha xizmatni koʻrsatishga ruxsat berish orqali rezidentlar amalga oshirishi mumkin boʻlgan faoliyat turlarini kengaytirish nazarda tutilgan boʻlib, ushbu qoida asosida Oʻzbekiston Respublikasi Vazirlar Mahkamasining tegishli qaroriga Dasturiy mahsulotlar va axborot texnologiyalari texnologik parki tomonidan amalga oshirishga ruxsat etilgan faoliyat turlari roʻyxati kengaytirish bilan bogʻliq qoʻshimchalar kiritilmoqda.

Mazkur qarorning qabul qilinishi elektron raqamli imzodan foydalanish sohasini tartibga soluvchi qonunosti hujjatlarini “Elektron raqamli imzo toʻgʻrisida”gi Oʻzbekiston Respublikasining Qonuni talablariga muvofiqlashtirish, shuningdek Dasturiy mahsulotlar va axborot texnologiyalari texnologik parki tomonidan amalga oshirishga ruxsat etilgan faoliyat turlari roʻyxatini kengaytirish orqali IT sohasida ingliz tilini mukammal oʻzlashtirgan mutaxassislarni tayyorlashga xizmat qiladi.

“Elektron raqamli imzo toʻgʻrisida”gi Oʻzbekiston Respublikasining Qonuni va Oʻzbekiston Respublikasi Prezidentining “2022-2023-yillarda axborot-kommunikatsiya texnologiyalari sohasini yangi bosqichga olib chiqish chora-tadbirlari toʻgʻrisida” 2022-yil 22-avgustdagi PQ-357-son qaroriga muvofiq Vazirlar Mahkamasi qaror qiladi:

1. Oʻzbekiston Respublikasi Hukumatining 1-ilovaga muvofiq ayrim qarorlariga quyidagilarni nazarda tutuvchi oʻzgartirish va qoʻshimchalar kiritilsin:

elektron raqamli imzo va undan foydalanish sohasini tartibga soluvchi Oʻzbekiston Respublikasi Hukumati qarorlarini “Elektron raqamli imzo toʻgʻrisida”gi Oʻzbekiston Respublikasining Qonuniga muvofiqlashtirish;

Dasturiy mahsulotlar va axborot texnologiyalari texnologik parki rezidentlari tomonidan amalga oshirishga ruxsat etilgan faoliyat turlari roʻyxatiga axborot texnologiyalari sohasidagi taʼlimdan yillik umumiy daromadning 40 foizdan oshmagan holda, axborot texnologiyalari sohasida tashkil etiladigan taʼlim doirasida ingliz tilini oʻqitish boʻyicha xizmatni koʻrsatish faoliyatini kiritish.

2. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.

3. Mazkur qarorning bajarilishini nazorat qilish Oʻzbekiston Respublikasi raqamli texnologiyalar vaziri Sh.X. Shermatov zimmasiga yuklansin.

1. Vazirlar Mahkamasining 2017-yil 9-fevraldagi 66-son qarori bilan tasdiqlangan Tadbirkorlik subyektlarini davlat roʻyxatidan oʻtkazishda roʻyxatdan oʻtkazuvchi organlar va vakolatli tashkilotlarning oʻzaro hamkorligi reglamentining 37-bandidagi “Oʻzbekiston Respublikasi Davlat soliq qoʻmitasining elektron raqamli imzolar kalitlarini roʻyxatdan oʻtkazish markazi” soʻzlari “Qonunchilikda belgilangan tartibda akkreditatsiya qilingan elektron raqamli imzolar kalitlarini roʻyxatga olish markazlari” soʻzlari bilan almashtirilsin.

2. Vazirlar Mahkamasining 2018-yil 10-maydagi 348-son qarori bilan tasdiqlangan Davlat xizmatlari markazlari yoki onlayn tarzda (masofadan turib) rasmiy axborot resurslari orqali elektron raqamli imzo kalitini roʻyxatga olish va elektron raqamli imzo kalitining sertifikatini berish boʻyicha davlat xizmatlari koʻrsatishning maʼmuriy reglamentida:

a) 3-bandning beshinchi xatboshisi quyidagi tahrirda bayon etilsin:

“ERI kalitining sertifikati — ERIning ochiq kaliti ERIning yopiq kalitiga muvofiqligini tasdiqlaydigan elektron hujjat”;

b) 7-band quyidagi mazmundagi xatboshi bilan toʻldirilsin:

“Bunda, ERI kaliti sertifikatining amal qilish muddati ikki martadan koʻp boʻlmagan muddatga uzaytirilishi mumkin”.

3. Vazirlar Mahkamasining 2019-yil 15-iyuldagi 589-son qarori bilan tasdiqlangan Dasturiy mahsulotlar va axborot texnologiyalari texnologik parki faoliyatini tashkil etish tartibi toʻgʻrisidagi nizomda:

a) 18-bandda:

sakkizinchi xatboshidagi “kelishishi shart.” soʻzlari “kelishishi;” soʻzi bilan almashtirilsin;

quyidagi mazmundagi xatboshi bilan toʻldirilsin:

“axborot texnologiyalari sohasida ingliz tilini oʻqitish xizmatidan tushgan mablagʻlar hajmi axborot texnologiyalari sohasidagi taʼlimdan yillik umumiy daromadning 40 foizidan oshmasligini taʼminlashi shart”;

b) 21-bandda:

quyidagi mazmundagi oʻninchi xatboshi bilan toʻldirilsin:

“axborot texnologiyalari sohasida ingliz tilini oʻqitish xizmatidan tushgan mablagʻlar hajmi axborot texnologiyalari sohasidagi taʼlimdan yillik umumiy daromadning 40 foizidan oshganda;”;

oʻninchi xatboshi oʻn birinchi xatboshi deb hisoblansin;

v) 2-ilovaning 17-bandi quyidagi tahrirda bayon etilsin:

“17. Texnopark direksiyasi tomonidan tasdiqlangan dasturga muvofiq, axborot texnologiyalari sohasida, shu jumladan, Internet jahon axborot tarmogʻi orqali taʼlim berish hamda axborot texnologiyalari sohasidagi taʼlimdan yillik umumiy daromadning 40 foizdan oshmagan holda, axborot texnologiyalari sohasida tashkil etiladigan taʼlim doirasida ingliz tilini oʻqitish boʻyicha xizmatni koʻrsatish faoliyati”.

4. Vazirlar Mahkamasining 2022-yil 29-iyuldagi 413-son qarori bilan tasdiqlangan Oʻzbekiston Respublikasining xorijdagi konsullik muassasalari orqali elektron raqamli imzo berish tartibi toʻgʻrisidagi nizomda:

a) 2-bandning beshinchi xatboshisi quyidagi tahrirda bayon etilsin:

“ERI kalitining sertifikati — ERIning ochiq kaliti ERIning yopiq kalitiga muvofiqligini tasdiqlaydigan elektron hujjat;”;

b) 6-band quyidagi mazmundagi xatboshi bilan toʻldirilsin:

“Bunda, ERI kaliti sertifikatining amal qilish muddati ikki martadan koʻp boʻlmagan muddatga uzaytirilishi mumkin.”.

1. Vazirlar Mahkamasining “Elektron raqamli imzodan foydalanish sohasida normativ-huquqiy bazani takomillashtirish toʻgʻrisida” 2005-yil 26-sentabrdagi 215-son qarori.

2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “Oʻzbekiston Respublikasi Aloqa, axborotlashtirish va telekommunikatsiya texnologiyalari davlat qoʻmitasi faoliyatini tashkil etish toʻgʻrisida” 2012-yil 23-oktabrdagi PQ-1836-son qarori)” 2013-yil 23-avgustdagi 233-son qaroriga ilovaning 19-bandi.

3. Vazirlar Mahkamasining “Elektron raqamli imzolar kalitlarini roʻyxatga olish markazlarining faoliyat koʻrsatish tartibi toʻgʻrisidagi nizomga oʻzgartirish kiritish haqida” 2014-yil 9-iyuldagi 185-son qarori.

4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (“Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish, shuningdek ayrim qonun hujjatlarini oʻz kuchini yoʻqotgan deb topish toʻgʻrisida”gi Oʻzbekiston Respublikasining 2014-yil 14-maydagi OʻRQ-372-son Qonuni)” 2014-yil 11-sentabrdagi 259-son qaroriga ilovaning 6-bandi.

5. Vazirlar Mahkamasining “Tadbirkorlik subyektlariga davlat xizmatlari koʻrsatish tartibini yanada takomillashtirish chora-tadbirlari toʻgʻrisida” 2014-yil 31-dekabrdagi 377-son qaroriga ilovaning 24-bandi.

7. Vazirlar Mahkamasining “Elektron raqamli imzolar kalitlarini roʻyxatdan oʻtkazish markazlari faoliyatini yanada tartibga solishga doir qoʻshimcha chora-tadbirlar toʻgʻrisida” 2015-yil 15-iyuldagi 190-son qarori.

8. Vazirlar Mahkamasining “Muhammad al-Xorazmiy nomidagi Toshkent axborot texnologiyalari universitetida kadrlar tayyorlash tizimini tubdan takomillashtirish va samaradorligini oshirish chora-tadbirlari toʻgʻrisida” 2018-yil 24-iyuldagi 569-son qarorining 2-bandi va 2-3-ilovalari.

9. Vazirlar Mahkamasining “Aholi va tadbirkorlik subyektlarining davlat xizmatlaridan foydalanish imkoniyatlari kengaytirilishi munosabati bilan Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida” 2021-yil 27-dekabrdagi 774-son qaroriga 1-ilovaning 6-bandi.

10. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida” 2022-yil 4-apreldagi 153-son qaroriga ilovaning 137-bandi.

11. Vazirlar Mahkamasining “Oʻzbekiston Milliy axborot agentligi hayʼati aʼzolarini tasdiqlash toʻgʻrisida” 1993-yil 12-maydagi 219-son qarori.

12. Vazirlar Mahkamasining “Oʻzbekiston Milliy axborot agentligi hayʼati aʼzolari toʻgʻrisida” 1996-yil 2-iyuldagi 228-son qarori.

13. Vazirlar Mahkamasining “Oʻzbekiston Milliy axborot agentligi hayʼati aʼzolari toʻgʻrisida” 2002-yil 16-avgustdagi 292-son qarori.

14. Vazirlar Mahkamasining “Oʻzbekiston Milliy axborot agentligi hayʼati aʼzolarini tasdiqlash toʻgʻrisida” 2011-yil 30-maydagi 155-son qarori.