Oʻzbekiston Respublikasi Prezidentining “kichik va oʻrta tadbirkorlikni rivojlantirishni ragʻbatlantirishga oid qoʻshimcha chora-tadbirlar toʻgʻrisida 1997-yil 31-yanvardagi PF-1702-son Farmonini bajarish maqsadida Vazirlar Mahkamasi qaror qiladi:

1. Loyihalarni tanlab olish tartibi hamda Kichik va oʻrta tadbirkorlikni rivojlantirish uchun jalb qilinadigan xorijiy kredit liniyalari hisobiga kichik va oʻrta korxonalarga kreditlar berish sxemasi 1 va 2-ilovalarga* muvofiq tasdiqlansin.

2. “Oʻzistiqbolstat” davlat qoʻmitasining oʻz huzurida, xodimlarning tasdiqlangan umumiy soni doirasida Kichik va oʻrta tadbirkorlikni mablagʻ bilan taʼminlashga koʻmaklashish markazi tuzish toʻgʻrisidagi taklifi qabul qilinsin va unga:

respublikaning turli tarmoqlari va mintaqalaridagi kichik va oʻrta tadbirkorlikni rivojlantirishga oid takliflarni oʻrganish va umumlashtirish va shu asosda investitsiya, loyihalariga boʻlgan takliflar va talablarga oid maʼlumotlar bankini shakllantirish, davriy axborot byulletenini chiqarish va uni manfaatdor tuzilmalar oʻrtasida tarqatish;

tarmoqlar va mintaqalarni rivojlantirishning ustuvor yoʻnalishlarini, xomashyo resurslari va zarur infrastruktura mavjudligini hisobga olgan holda ishlab chiqarishlarni oqilona joylashtirishda kichik va oʻrta tadbirkorlik subyektlariga koʻmaklashish;

loyihalarning maqsadga muvofiqligini baholash va Oʻzbekiston Respublikasining Investitsiya dasturiga kiritish toʻgʻrisida “Oʻzistiqbolstat” davlat qoʻmitasiga takliflar tayyorlash yuklansin.

“Oʻzistiqbolstat” davlat qoʻmitasi 15 kun muddatda kichik va oʻrta tadbirkorlikni mablagʻ bilan taʼminlashga koʻmaklashish markazi toʻgʻrisidagi nizomni ishlab chiqsin va tasdiqlash uchun Vazirlar Mahkamasiga kiritsin.

3. Davlat soliq qoʻmitasi Milliy bank bilan birgalikda bir hafta muddatda jalb qilinayotgan xorijiy kreditlar hisobiga olib kelinadigan texnologik uskunalar uchun kichik va oʻrta korxonalarni import boj poshlinalari toʻlashdan ozod qilish tartibini belgilasin.

4. Qoraqalpogʻiston Respublikasi Vazirlar Kengashi va viloyatlar hokimliklari kichik va oʻrta tadbirkorlik subyektlariga xizmat koʻrsatuvchi “Oʻzinvestloyiha” kompaniyasining viloyat boʻlinmalariga va Oʻzbekiston Banklar uyushmasining shuʼba tuzilmalariga ofislar ajratishda, malakali kadrlar bilan taʼminlashda va boshqa tashkiliy masalalarda amaliy yordam koʻrsatsinlar.

5. Oʻzbekiston Respublikasi Adliya vazirligi bir oy muddatda qonunchilikni Oʻzbekiston Respublikasi Prezidentining 1997-yil 31-yanvardagi PF-1702-son Farmoni va mazkur qarorga muvofiq oʻzgartirish yuzasidan belgilangan tartibda takliflar kiritsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari B.S. Hamidov va V.A. Chjen zimmasiga yuklansin.

1.1. Mazkur Tartib kichik va oʻrta tadbirkorlik subyektlari tomonidan taqdim etilgan (investitsiya takliflarini tanlab olishning hamda ishlab chiqish, mablagʻ bilan taʼminlash va amalga oshirishning izchil mexanizmini belgilaydi.

1.2. Xorijiy kredit liniyalari hisobiga mablagʻ bilan taʼminlashning ustuvor huquqi:

faoliyat koʻrsatayotgan kichik va oʻrta qoʻshma korxonalarni rivojlantirish va yangilarini tuzish;

eksportga yoʻnaltirilgan mahsulotlar ishlab chiqarish;

qishloq xoʻjaligi mahsulotlarini chuqur qayta ishlash boʻyicha ishlab chiqarishlarni rivojlantirish;

asosan qishloq joylarda qoʻshimcha ishlab chiqarish va noishlab chiqarish infrastrukturani yaratishni nazarda tutuvchi investitsiya loyihalariga beriladi.

2.1 Investitsiya takliflarining tashabbuskorlari loyiha gʻoyasi koʻrsatilgan belgilangan namunadagi buyurtmanoma-anketani rasmiylashtiradilar va uni “Oʻzinvestloyiha” boʻlinmalariga yoki Oʻzbekiston Banklari uyushmasining “Bankinvestloyiha” tashkilotiga taqdim etadilar.

2.2 Investitsiya takliflarining tashabbuskorlari respublika tarmoqlari va mintaqalarini rivojlantirishning ustuvor yoʻnalishlari, ishlab chiqarish kuchlarini joylashtirish sxemalari, xomashyo resurslarining mavjudligi, ishlab chiqarish va ijtimoiy infrastrukturaning rivojlanganligi, shuningdek, prefensiyalar tizimi toʻgʻrisidagi maʼlumotlarni “Oʻzistiqbolstat” davlat qoʻmitasining Kichik va oʻrta tadbirkorlikni mablagʻ bilan taʼminlashga koʻmaklashish markazidan va “Oʻzistiqbolstat” davlat qoʻmitasining mintaqaviy boʻlinmalaridan olishlari mumkin.

2.3. “Oʻzinvestloyiha” boʻlinmalari yoki “Bankinvestloyiha” tashkiloti xizmatlarga haq olmagan holda, 10 kun muddatda taqdim etilgan hujjatlarni koʻrib chiqadilar, ishlab chiqarish bazasini tekshirishdan oʻtkazadilar hamda kichik va oʻrta biznesni rivojlantirishning belgilangan ustuvorliklari, shuningdek, jalb etilgan xorijiy kredit liniyalari mezonlariga muvofiq mablagʻ bilan taʼminlash uchun tijorat banklari tomonidan talab etiladigan hujjatlar paketini tayyorlashning maqsadga muvofiqligi toʻgʻrisida xulosa tayyorlaydilar.

2.4. Xorijiy kredit liniyalari doirasida mablagʻ bilan taʼminlash chogʻida loyiha tashabbuskorining oʻz sarmoyasi tijorat banklarining tegishli talablariga yetarli boʻlmagan holda investitsiya tashkilotlari (Oʻzbekiston Banklari uyushmasi “Bankinvesttrast” va boshqalar) loyiha tashabbuskorining ustav fondini yetarli miqdorda shakllantirishda qatnashishlari mumkin.

3.1. Investitsiya takliflarining tashabbuskorlari zarur hollarda injiniring va konsalting kompaniyalarini jalb etgan holda investitsiya oldi tekshiruvlarini amalga oshiradilar, shu jumladan:

talab va takliflar prognozini hisobga olgan holda mahsulot bozorini baholash;

prognozlashtiriladigan xomashyo va foydalaniladigan resurslarning zaxiralarini baholash;

obyekt, infrastrukturaning joylashgan oʻrnini baholash;

loyihaning atrof-muhitga taʼsirini baholash;

ishlab chiqarish miqyoslarini optimallashtirish;

oqilona texnologik yechimni tanlash;

loyihaning iqtisodiy samaradorligi va hayotiyligini baholash;

loyihaning huquqiy, tashkiliy va moliyaviy asoslarini shakllantirish.

3.2. “Oʻzinvestloyiha” tomonidan tasdiqlangan tavsiyalarga muvofiq tayyorlangan loyihaning Texnik-iqtisodiy asoslashlari loyiha tashabbuskori tomonidan tijorat banki (lizing kompaniyasi)ga taqdim etiladi.

4.1. Tijorat banki (lizing kompaniyasi) zarur boʻlganda Oʻzbekiston Banklari uyushmasi (“Bankinvestloyiha”, “Bankhuquqxizmat”, “Bankaxborotreyting”, “Bankkonsaltaudit”) konsalting firmalarini jalb etgan holda loyiha biznes-rejasini va texnik-iqtisodiy asoslashini, loyiha tashabbuskorining kreditga layoqatliligini baholash, loyihaning huquqiy, tashkiliy va moliyaviy tuzilmalarini, shuningdek, kreditni taʼminlashning yetarliligini ekspertizadan oʻtkazadi.

Tijorat banki (lizing kompaniyasi) 30 kun muddatda loyiha tashabbuskorini loyihani mablagʻ bilan taʼminlash mumkinligi toʻgʻrisida xabardor qiladi.

4.2. Tijorat banki (lizing kompaniyasi)ning kredit qoʻmitasi ijobiy qarori qabul qilganda loyiha tashabbuskori belgilangan tartibda kontraktlarni rasmiylashtiradi va Tashqi iqtisodiy aloqalar vazirligida roʻyxatdan oʻtkazadi, garov shartnomasini rasmiylashtiradi va Adliya vazirligida roʻyxatdan oʻtkazadi, “Oʻzistiqbolstat” davlat qoʻmitasi bilan Investitsiya dasturiga kiritish imkoniyatini kelishib oladi, mulkni sugʻurtalash va tadbirkorlik tavakkalchiliklarini sugʻurtalashning boshqa shakllarini va qarz oluvchining tijorat banki (lizing kompaniyasi) talablariga muvofiq javobgarligini rasmiylashtiradi.

5.1 Loyiha tashabbuskori tomonidan tijorat banki (lizing kompaniyasi)ga belgilangan talablarga muvofiq kreditni taʼminlash boʻyicha hujjatlarning toʻla paketini taqdim etish yakuniga koʻra tijorat banki (lizing kompaniyasi) 10 kun muddatda loyihani amalga oshirishni taʼminlovchi xarajatlar moddalari boʻyicha mablagʻ bilan taʼminlashni boshlaydi.

5.2 Loyiha tashabbuskorida texnik-iqtisodiy asoslashlarni ishlab chiqish va sugʻurtalash boʻyicha xizmatlarga haq toʻlash uchun yetarli mablagʻlar boʻlmagan hollarda ushbu xarajatlar bu xizmatlar qiymatining koʻpi bilan 50 foizi doirasida kredit summasiga kiritilishi mumkin.

5.3 Loyiha tashabbuskori qarz mablagʻlaridan belgilangan maqsadlarda foydalanilishi, ishlab chiqarish quvvatlarining oʻz vaqtida oʻzlashtirilishi va kredit belgilangan muddatlarda toʻlanishi uchun amaldagi qonunchilikka muvofiq javob beradi.

5.4 Tijorat banki (lizing kompaniyasi ajratilgan mablagʻlardan belgilangan maqsadlarda foydalanilishini nazorat qiladi va bank amaliyotida qabul qilingan qoidalar va tartiblarga muvofiq kreditning oʻz vaqtida toʻlanishi monitoringini amalga oshiradi.

5.5 Ajratilgan kredit mablagʻlaridan belgilangan maqsadlarda foydalanilmagan hollarda, shuningdek, kredit oʻz vaqtida toʻlanmagan hollarda tijorat banki (lizing kompaniyasi) tomonidan quyidagi choralar qoʻllaniladi:

loyiha tashabbuskorining schyotida mablagʻ boʻlganda:

loyiha tashabbuskori schyotidan har qanday valyutadagi mablagʻni soʻzsiz undirib olish;

loyiha tashabbuskorining schyotida yetarli miqdorda mablagʻ boʻlmaganda:

garovga qoʻyilgan mol-mulk hisobidan undirib olish va kreditni toʻlamaslik tavakkalchiligining loyiha tashabbuskori tomonidan taqdim etilgan boshqa taʼminoti boʻyicha undirib olish;

loyiha tashabbuskorining mansabdor shaxslari suiisteʼmolchiliklarga yoʻl qoʻyganda va qonunchilikda nazarda tutilgan boshqa shunga oʻxshash hollarda:

bu mansabdor shaxslarni jinoiy javobgarlikka tortish.