Oʻzbekiston Respublikasi Prezidentining “Oʻzbekiston Respublikasi Qurolli Kuchlari harbiy xizmatchilarining maʼnaviy-maʼrifiy saviyasini oshirish tizimini tubdan takomillashtirish toʻgʻrisida” 2018-yil 4-avgustdagi PQ-3898-son qaroriga muvofiq hamda Oʻzbekiston Respublikasi Milliy gvardiyasi harbiy xizmatchilari, xodimlari, ishchi va xizmatchilari, shuningdek ularning oila aʼzolari, mamlakatimiz yoshlarining maʼnaviy-maʼrifiy saviyasini oshirishga koʻmaklashish, ularning mazmunli hordiq olishlari uchun qulay shart-sharoitlar yaratish maqsadida:

1. Oʻzbekiston Respublikasi Milliy gvardiyasi, Madaniyat vazirligi, Moliya vazirligining Oʻzbekiston Respublikasi Milliy gvardiyasi tarkibida Maʼnaviyat va maʼrifat markazini (keyingi oʻrinlarda — Markaz) tashkil etish toʻgʻrisidagi taklifi maʼqullansin.

2. Quyidagilar Markazning asosiy vazifalari etib belgilansin:

harbiy xizmatchilar va xodimlarning harbiy-vatanparvarlik tuygʻusini, maʼnaviy saviyasini va intellektual salohiyatini yuksaltirishni taʼminlash, ularda mamlakatimizning qadimiy va boy madaniyati, azaliy qadriyatlari, udumlari va anʼanalariga asoslangan keng dunyoqarashni shakllantirish;

harbiy xizmatchilar ongiga Vatan himoyasi har bir fuqaroning sharafli va muqaddas burchi ekanini, milliy armiyamiz bilan faxrlanish, davlat va jamiyat xavfsizligini taʼminlash uchun masʼuliyat tuygʻusini chuqur singdirish boʻyicha chora-tadbirlarni tashkillashtirish;

harbiy xizmatchilar, xodimlar, ishchi va xizmatchilar hamda ularning oila aʼzolarining madaniy hordiq olishlarini taʼminlashga koʻmaklashish;

yoshlarning maʼnaviy-maʼrifiy kamol topishi boʻyicha qiziqishlarini roʻyobga chiqarish, shaxsiy tarkib qalbida vatanparvarlik, burchga sadoqat, Vatanimiz kelajagi uchun daxldorlik hissini oshirish, maʼnaviy-maʼrifiy tarbiyaning samarali usullarini joriy etishga koʻmaklashish;

sanʼat, musiqa va qoʻshiqchilik sohasida yosh ijodkorlarning samarali faoliyat yuritishi uchun qulay shart-sharoitlar yaratish.

3. Quyidagilar:

Oʻzbekiston Respublikasi Milliy gvardiyasi Maʼnaviyat va maʼrifat markazining tuzilmasi 1-ilovaga muvofiq;

Oʻzbekiston Respublikasi Milliy gvardiyasi Maʼnaviyat va maʼrifat markazi ofitserlar tarkibining harbiy unvonlari va lavozimlar boʻyicha tarif razryadlari roʻyxati 2-ilovaga muvofiq tasdiqlansin.

Oʻzbekiston Respublikasi Milliy gvardiyasi qoʻmondoniga Markazning tuzilmasiga harbiy xizmatchilar, ishchi va xizmatchilarning umumiy cheklangan soni va mehnatga haq toʻlash fondi doirasida oʻzgartirishlar kiritish huquqi berilsin.

4. Belgilansinki:

Markaz Oʻzbekiston Respublikasi Milliy gvardiyasiga qoʻshimcha 63 ta shtat birligi (ofitserlar — 2, serjant va oddiy askar tarkibidagi shartnoma asosidagi harbiy xizmatchilar — 6, ishchi va xizmatchilar — 55 nafar) ajratish hisobidan tashkil etiladi;

Markaz faoliyati Oʻzbekiston Respublikasi Davlat budjeti mablagʻlari, yuridik va jismoniy shaxslarning homiylik xayriyalari, pullik xizmatlar koʻrsatishdan tushadigan mablagʻlar, shuningdek qonun hujjatlarida taqiqlanmagan boshqa manbalar hisobidan moliyalashtiriladi;

Markaz toʻgaraklari xodimlarining shtat birliklari ushbu toʻgaraklar tomonidan koʻrsatiladigan pullik xizmatlardan tushadigan mablagʻlar hisobiga saqlanadi.

5. Oʻzbekiston Respublikasi Milliy gvardiyasining yuridik shaxs tashkil etmagan holda Markazning budjetdan tashqari jamgʻarmasini (keyingi oʻrinlarda — Jamgʻarma) tashkil etish toʻgʻrisidagi taklifi maʼqullansin.

Quyidagilar Jamgʻarma mablagʻlarini shakllantirishning asosiy manbalari etib belgilansin:

pullik xizmatlar koʻrsatishdan tushgan mablagʻlar (Markazning toʻgaraklari tomonidan koʻrsatiladigan pullik xizmatlardan tushadigan mablagʻlar bundan mustasno);

yuridik va jismoniy shaxslarning homiylik xayriyalari;

qonun hujjatlarida taqiqlanmagan boshqa manbalar.

6. Belgilansinki, Jamgʻarmaning:

75 foizdan kam boʻlmagan mablagʻlari — Markazning moddiy-texnik bazasini rivojlantirishga;

25 foizdan koʻp boʻlmagan mablagʻlari — Markazning harbiy xizmatchilari, ishchi va xizmatchilarini moddiy ragʻbatlantirishga yoʻnaltiriladi.

7. Oʻzbekiston Respublikasi Moliya vazirligi Oʻzbekiston Respublikasi Milliy gvardiyasining asoslangan hisob-kitoblari asosida Markazning samarali faoliyatini tashkil etish uchun zarur mablagʻlar ajratsin.

8. Oʻzbekiston Respublikasi Milliy gvardiyasi:

ikki oy muddatda Markazning ustavini ishlab chiqsin va belgilangan tartibda tasdiqlasin;

Markazning moddiy-texnik bazasini shakllantirish choralarini koʻrsin;

bir oy muddatda Oʻzbekiston Respublikasi Vazirlar Mahkamasiga Qoraqalpogʻiston Respublikasi va viloyatlardan Markazda faoliyat olib borish uchun kelgan mutaxassislarni xizmat uylari bilan taʼminlash yuzasidan takliflar kiritsin;

bir oy muddatda manfaatdor vazirlik va idoralar bilan birgalikda qonun hujjatlariga ushbu qarordan kelib chiqadigan oʻzgartirish va qoʻshimchalar kiritish toʻgʻrisidagi takliflarni Oʻzbekiston Respublikasi Vazirlar Mahkamasiga kiritsin.

9. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Milliy gvardiyasi qoʻmondoni B.X. Tashmatov zimmasiga yuklansin.