Bojxona siyosatini amalga oshirishning samaradorligini oshirish hamda tovarlar bojxonada rasmiylashtirilishini hisobga olishning yagona tizimini joriy etish maqsadida Vazirlar Mahkamasi qaror qiladi:

1. Oʻzbekiston Respublikasi Davlat bojxona qoʻmitasining “Oʻzbekiston Respublikasi Davlat bojxona qoʻmitasining Yagona avtomatlashtirilgan axborot tizimini (YaAAT) tashkil etish” loyihasini amalga oshirish toʻgʻrisidagi taklifi qabul qilinsin.

Yagona avtomatlashtirilgan axborot tizimining axborotlarni yigʻish, saqlash, qayta ishlash va ularni berishning texnologik jarayonlarini kompleks avtomatlashtirishni, barcha darajalardagi bojxona organlarining yagona maʼlumotlar bazasidan tezkor maʼlumot olishini taʼminlashga, bojxona nazorati ostidagi tovarlar bilan aniq vaqt koʻlamida sodir etilayogan barcha tartib-qoidalarning monitoringini olib borishga qaratilgan tashkiliy-funksional tuzilmasi 1-ilovaga muvofiq maʼqullansin.

2. Quyidagilar:

Oʻzbekiston Respublikasi Davlat bojxona qoʻmitasi loyihaning buyurtmachisi hisoblanishi, “HetNet-Crown” kompaniyalar konsorsiumi (AQSh) esa tender asosida uning bajaruvchisi etib belgilanganligi;

Oʻzbekiston Respublikasi Davlat bojxona qoʻmitasi bilan “HetNet-Crown” kompaniyalar konsorsiumi oʻrtasidagi foydalanishga tayyor holda topshirish kontraktining cheklangan qiymati 7,77 mln AQSh dollari ekanligi;

Oʻzbekiston Respublikasi Davlat bojxona qoʻmitasi tomonidan Iqtisodiyot vazirligi hamda “Davarxitektqurilish” qoʻmitasi bilan kelishgan holda loyihaning 2-ilovaga* muvofiq asosiy koʻrsatkichlari bilan birgalikda texnik-iqtisodiy hisob-kitobi tasdiqlanganligi maʼlumot uchun qabul qilinsin.

3. Belgilab qoʻyilsinki:

import kontrakt qiymatining 1,17 mln AQSh dollari miqdoridagi 15 foizi Oʻzbekiston Respublikasi Davlat bojxona qoʻmitasining maxsus jamgʻarmasi mablagʻlari hisobiga moliyalashtiriladi;

import kontrakt qiymatining Eksimbankning (AQSh) sugʻurta mukofoti summasi qoʻshilgan 6,60 mln AQSh dollari miqdoridagi 85 foizi xorijiy bankning mablagʻlarini Eksimbankning sugʻurta qoplamasi ostida qayta moliyalashtirish yoʻli bilan Oʻzbekiston Respublikasi Tashqi iqtisodiy faoliyat milliy bankining krediti hisobiga moliyalashtiriladi;

asosiy qarzni, hisoblangan foizlarni, vositachilik toʻlovini va xorijiy kreditga xizmat koʻrsatish bilan bogʻliq moliyaviy boshqa xarajatlarni qaytarish qarz bitimlari muddatlari va shartlariga muvofiq, shuningdek loyihani amalga oshirish bilan bogʻliq Oʻzbekiston Respublikasining milliy valyutasidagi xarajatlarni moliyalashtirish Oʻzbekiston Respublikasi Davlat bojxona qoʻmitasining maxsus jamgʻarmasi mablagʻlari hisobiga amalga oshiriladi.

4. Oʻzbekiston Respublikasi Davlat bojxona qoʻmitasi:

maxsus jamgʻarmaning 2005-yilga va keyingi yillarga xarajatlari smetasini roʻyxatdan oʻtkazishda va Oʻzbekiston Respublikasi Moliya vazirligi bilan kelishishda mazkur loyihani amalga oshirish uchun zarur mablagʻlarni nazarda tutsin;

jalb etilayotgan kreditga xizmat koʻrsatish uchun koʻrsatib oʻtilgan jamgʻarma mablagʻlarini Oʻzbekiston Respublikasi Tashqi iqtisodiy faoliyat milliy bankida ochilgan maxsus hisob raqamida ustuvor tartibda oldindan toʻplab borsin.

5. Oʻzbekiston Respublikasi Tashqi iqtisodiy faoliyat milliy banki koʻrsatib oʻtilgan loyihani amalga oshirish uchun xorijiy bank bilan belgilangan tartibda qarz bitimi tuzsin va xorijiy bank mablagʻlari Oʻzbekiston Respublikasi Davlat bojxona qoʻmitasiga qayta moliyalashtirilishini taʼminlasin.

6. Mazkur loyihani amalga oshirish doirasida xorijiy bank, eksport-kredit agentligi va sugʻurta kompaniyalari Oʻzbekiston Respublikasi hududida toʻlov manbaida daromad soligʻi toʻlashdan ozod etilsin.

7. Oʻzbekiston Respublikasi Iqtisodiyot vazirligi mazkur loyihani belgilangan tartibda Oʻzbekiston Respublikasining Investitsiya dasturiga kiritsin.

8. Oʻzbekiston Respublikasi Davlat bojxona qoʻmitasining buyurtmanomalari boʻyicha:

Oʻzbekiston Respublikasi Tashqi ishlar vazirligi loyihani amalga oshirishda qatnashadigan xorijiy mutaxassislarga koʻp martalik vizalar konsullik yigʻimlari undirilmasdan belgilangan tartibda rasmiylashtirilishini taʼminlasin;

Oʻzbekiston Respublikasi Ichki ishlar vazirligi loyihani amalga oshirishda qatnashadigan xorijiy mutaxassislarga davlat bojlari undirilmasdan koʻp martalik vizalar berilishini va ularning muddati uzaytirilishini, shuningdek ular yashash joyida vaqtincha roʻyxatdan oʻtkazilishini va vaqtincha roʻyxatdan oʻtkazish muddati uzaytirilishini taʼminlasin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va A.N. Aripov zimmasiga yuklansin.