Qoraqalpogʻiston Respublikasining Moʻynoq tumanida baliqchilik tarmogʻini yanada rivojlantirish, “Jaltirbas”, “Sudochye” va “Ribachye” tabiiy suv havzalarining baliq mahsuldorligini oshirish, yangi ish oʻrinlarini yaratishga, aholini yuqori sifatli baliq mahsulotlari bilan taʼminlashga doir vazifalarni hal etishga kompleks yondashish, shuningdek yuqorida qayd etilgan tabiiy suv havzalarini baliqlantirishni samarali tashkil etish maqsadida Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi, Oʻzbekiston Respublikasi Tabiatni muhofaza qilish davlat qoʻmitasi, Oʻzbekiston Respublikasi Qishloq va suv xoʻjaligi vazirligining:

Moʻynoq tumani hokimligi huzurida “Moʻynoq akva sanoat” davlat unitar korxonasini (keyingi oʻrinlarda “Moʻynoq akva sanoat” DUK deb ataladi) tashkil etish;

Qoraqalpogʻiston Respublikasining Moʻynoq tumanida joylashgan “Jaltirbas” (17280 ga), “Sudochye” (19000 ga) va “Ribachye” (3000 ga) tabiiy suv havzalarini (keyingi oʻrinlarda suv havzalari deb ataladi) baliqchilik tarmogʻini rivojlantirish uchun belgilangan tartibda “Moʻynoq akva sanoat” DUKga doimiy alohida foydalanish uchun berish toʻgʻrisidagi takliflariga rozilik berilsin.

2. Quyidagilar “Moʻynoq akva sanoat” DUKning asosiy vazifalari hisoblansin:

suv havzalarini kelgusida baliqlantirish uchun baliq chavoqlarini yetishtirish maqsadida suv havzalari hududida baliq pitomniklari va inkubatsiya sexlarini tashkil etish va ularning faoliyatini taʼminlash;

suv havzalarida qafas usulida baliq yetishtirish texnologiyalarini yaratish va joriy etish ishlarini tashkil qilish;

suv havzalari hududida havaskorlik va sport maqsadidagi baliq ovini, turizmni rivojlantirish:

baliq ovlash hajmini koʻpaytirish, raqobatbardosh baliq mahsulotlari va yarim tayyor mahsulotlarni ishlab chiqarish boʻyicha texnologik jarayonlarni bosqichma-bosqich shakllantirish.

3. Quyidagilar:

“Moʻynoq akva sanoat” DUKning boshqaruv xodimlarining cheklangan soni 9 nafardan iborat boʻlgan boshqaruv tuzilmasi 1-ilovaga* muvofiq:

Qoraqalpogʻiston Respublikasining Moʻynoq tumanidagi “Jaltirbas”, “Sudochye” va “Ribachye” tabiiy suv havzalarini yanada rivojlantirish va biologik resurslaridan oqilona foydalanish chora-tadbirlari kompleksi 2-ilovaga* muvofiq tasdiqlansin.

4. Belgilansinki:

Qoraqalpogʻiston Respublikasining Moʻynoq tumani hokimligi “Moʻynoq akva sanoat” DUKning muassisi hisoblanadi:

“Moʻynoq akva sanoat” DUK oʻz faoliyatini toʻliq oʻzini oʻzi moliyalashtirish asosida amalga oshiradi, ishlab chiqarish-xoʻjalik va moliyaviy faoliyat masalalarini mustaqil hal qiladi.

5. Tijorat banklariga Qoraqalpogʻiston Respublikasining Moʻynoq tumanidagi “Jaltirbas”, “Sudochye” va “Ribachye” tabiiy suv havzalarini yanada rivojlantirish va biologik resurslaridan oqilona foydalanish boʻyicha tasdiqlangan chora-tadbirlar kompleksida nazarda tutilgan tadbirlarning bajarilishini moliyalashtirish uchun “Moʻynoq akva sanoat” DUKga belgilangan tartibda kreditlar ajratish tavsiya etilsin.

6. Qoraqalpogʻiston Respublikasi Vazirlar Kengashi bir oy muddatda:

Moʻynoq tumani hokimligi tomonidan “Moʻynoq akva sanoat” DUKning ustavi tasdiqlanishini va uning davlat roʻyxatidan oʻtkazilishini:

“Moʻynoq akva sanoat” DUKning ijro etuvchi apparati tasdiqlangan tuzilma va shtatlar jadvaliga muvofiq puxta tanlov asosida yuqori malakali mutaxassislar bilan toʻldirilishini taʼminlasin.

“Moʻynoq akva sanoat” DUK quyidagi manzilga joylashtirilsin:

Qoraqalpogʻiston Respublikasi, Moʻynoq tumani, Ajiniyoz koʻchasi, 77-uy.

7. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining Qishloq va suv xoʻjaligi, qishloq xoʻjaligi mahsulotlarini qayta ishlash hamda isteʼmol tovarlari masalalari axborot-tahlil departamentiga yuklansin.