Oʻzbekiston Respublikasi Hukumati va Indoneziya Respublikasi Hukumati, (bundan keyin “Tomonlar” deb ataluvchilar);

turizm sohasida ikki mamlakat oʻrtasidagi doʻstlik va hamkorlikni mustahkamlash istagida;

Tomonlar oʻrtasida Jakartada 1992-yil 23-iyunda imzolangan iqtisodiy va texnikaviy hamkorlik toʻgʻrisidagi Bitimga asosan;

turistik munosabatlarini, shuningdek oʻzlarining rasmiy turistik tashkilotlari oʻrtasidagi hamkorlikni rivojlantirish va ragʻbatlantirish zaruriyatini tan olgan holda;

Tomonlarning amaldagi qonun va qoidalariga muvofiq,

quyidagilar toʻgʻrisida kelishib oldilar:

Ushbu hamjihatlik Memorandumining maqsadlari boʻlib:

a) ikkala mamlakatga jahonning boshqa davlatlaridan Oʻzbekiston Respublikasi orqali va/yoki Indoneziya Respublikasi orqali turistik safarlarni koʻpaytirish;

b) ikki mamlakat har birining turli turistik obyektlari va diqqatga sazovor joylariga turistik safarlarini yanada kengroq yoyishni ragʻbatlantirish;

v) ikki mamlakatning har biriga oʻz fuqarolari va doimiy yashovchilarining tashrifini ragʻbatlantirish;

g) ikkala mamlakatda turistik industriyasining rivoji jarayonlarini qoʻllab-quvvatlash hisoblanadi.

Tomonlar ushbu hamjihatlik Memorandumni ijro etuvchi hisoblanadigan oʻzlarining vakolatli rasmiy tashkilotlari orqali turistik sohada yaqin munosabatlarni koʻllab-quvvatlash majburiyatini oladilar. Shu munosabat bilan, Oʻzbekiston Respublikasi Hukumati nomidan “Oʻzbekturizm” milliy kompaniyasi va Indoneziya Respublikasi Hukumati nomidan esa turizm boʻyicha Bosh direktorati, turizm, pochta aloqasi va telekommunikatsiya boʻyicha Departamenti rasmiy organ boʻlib hisoblanadilar.

Ikkala Tomon oʻz mamlakatlarida turistik vakolatxonalarni ochishga va faoliyat koʻrsatishiga koʻmaklashadilar.

Tomonlar oʻz mamlakatlarining qonun va qoidalariga muvofiq quyidagi sohalarda turizm sohasidagi hamkorlikni rivojlantirish uchun harakat qiladilar:

a) Maʼlumotlar, axborot va tadqiqotlar natijalari bilan almashuv

Ikkala Tomon uchun foydali boʻlgan maʼlumotlar, axborot va tadqiqotlar natijalari bilan almashuv sohasida hamkorlik.

b) Taʼlim va oʻqitish

Tomonlar oʻrtasida taʼlim va oʻqitish sohasidagi hamkorlik axborot bilan almashuv, studentlar va stajorlar bilan almashuv, qiyosiy oʻquv dasturlari boʻyicha oʻqitish va kadrlar tayyorlash yoʻli bilan amalga oshiriladi.

v) Rivojlanishga koʻmaklashish

1) Bu sohada Tomonlar oʻz mamlakatlarida turizmni rivojlantirish boʻyicha materiallarni boshqa mamlakatlarda tarqatishda hamkorlik qiladilar.

2) Tomonlar ikki mamlakat oʻrtasidagi turistik aviamarshrutlarga koʻmaklashadilar va shu maqsadda tegishli xizmatlarga yordam beradilar.

d) Uchrashuv, tashabbus, bitim va koʻrgazmalar

Uchrashuv, tashabbus, bitim va koʻrgazmalar shaklidagi hamkorlik ikki mamlakat oʻrtasida dasturlar almashish yoʻli bilan amalga oshiriladi.

a) Tomonlar ushbu hamjihatlik Memorandumini bajarish boʻyicha zarurat boʻlganida maslahatlashuvlar oʻtkazib turadilar.

b) Ushbu hamjihatlik Memorandumini bajarishni yengillashtirish uchun Tomonlar uning vazifalarini 2-moddada qayd etilgan vakolatli rasmiy organlar orqali amalga oshirish uchun bajariladigan tadbirlar tartibini, rejalar va tavsiya dasturlarini belgilab beradilar.

Yuqoridagi moddalarni talqin etish va qoʻllashdagi har qanday kelishmovchiliklar ikki Tomon oʻrtasida doʻstona maslahatlashuvlar yoʻli bilan hal qilinishi lozim.

Ushbu hamjihatlik Memorandumi toʻldirilishi yoki qayta koʻrib chiqilishi mumkin. Har qanday Tomon toʻldirilgan va qayta koʻrib chiqilgan qoʻshimchalarni yozma ravishda soʻrab olishi mumkin. Ikkala mamlakat qonun va qoidalariga muvofiq Tomonlar tomonidan kelishilgan har qanday qoʻshimcha va tuzatishlar ushbu hamjihatlik Memorandumining bir qismi boʻlib hisoblanadi. Bunday qoʻshimcha va tuzatishlar Tomonlar kelishib olgan kundan boshlab kuchga kiradi.

Ushbu hamjihatlik Memorandumi imzolangan vaqtdan boshlab kuchga kiradi.

a) Ushbu hamjihatlik Memorandumi besh (5) yil davomida amal qiladi va Tomonlardan biri uning bekor qilinishi toʻgʻrisida olti (6) oy oldin maʼlum qilguniga qadar navbatdagi besh (5) yilga oʻz-oʻzidan uzaytirilaveradi.

b) Ushbu hamjihatlik Memorandumi toʻxtatilgan taqdirda uning Qoidalari hamkorlikning tadbirlar bajarish tartibi, rejalar va Dasturlari bitkazilgunga qadar kuchda qoladi.

Buning tasdigʻi sifatida oʻzlarining tegishli hukumatlari tomonidan vakolat olgan Tomonlar ushbu hamjihatlik Memorandumini imzoladilar.

Toshkentda 1995-yil 8-aprelda, olti asl nusxada, ikkitadan oʻzbek, indoneziya va ingliz tillarida tuzildi, barcha matnlar bir xil kuchga ega. Ushbu hamjihatlik Memorandumini talqin etishda biron-bir tafovut tugʻilgan holda ingliz tilidagi matn ustuvorlik qiladi.