Oʻzbek Milliy akademik drama teatrining nafaqat mamlakatimiz, balki Oʻrta Osiyo mintaqasida professional teatr sanʼatiga asos solish va uni rivojlantirish, xalqimizning boy madaniy merosi va anʼanalarini asrab-avaylash, yurtdoshlarimiz, ayniqsa, yosh avlodimizni milliy va umumbashariy qadriyatlar, Vatanga muhabbat va sadoqat ruhida kamol toptirish, yosh isteʼdodlarni tarbiyalash borasidagi ulkan xizmatlarini inobatga olib hamda tashkil etilganining 100 yilligini munosib nishonlash maqsadida:

1. Oʻzbekiston Respublikasi Madaniyat va sport ishlari vazirligi, “Oʻzbekteatr” ijodiy-ishlab chiqarish birlashmasi, Respublika Maʼnaviyat targʻibot markazi va keng jamoatchilikning Oʻzbek Milliy akademik drama teatrining 100 yilligini nishonlash toʻgʻrisidagi taklifi maʼqullansin.

2. Oʻzbek Milliy akademik drama teatrining 100 yilligiga bagʻishlangan tadbirlarni oʻtkazish boʻyicha tashkiliy qoʻmita tarkibi ilovaga* muvofiq tasdiqlansin.

3. Tashkiliy qoʻmita bir oy muddatda mazkur sanaga munosib tayyorgarlik koʻrish hamda uni yuksak darajada oʻtkazish boʻyicha tadbirlar rejasini ishlab chiqsin.

Ushbu rejada:

Oʻzbek Milliy akademik drama teatri binosini kapital taʼmirlash, zamonaviy texnik vositalar bilan jihozlash hamda hududini obodonlashtirish boʻyicha tegishli chora-tadbirlarni amalga oshirish;

“Oʻzbek Milliy akademik drama teatri” kitob-albomini nashrga tayyorlash va chop etish;

Oʻzbek Milliy akademik drama teatri haqida hujjatli film yaratish;

“Oʻzbekiston teatr sanʼati: tarix, taraqqiyot va istiqbol” mavzusida respublika ilmiy-amaliy konferensiyasini oʻtkazish;

Qoraqalpogʻiston Respublikasi, viloyatlar va Toshkent shahrida, oliy va oʻrta maxsus, kasb-hunar taʼlim muassasalari, mehnat jamoalari va mahallalarda teatr faoliyatiga bagʻishlangan uchrashuvlar tashkil etish;

2014-yilning sentyabr oyida Oʻzbek Milliy akademik drama teatri binosida mamlakatimiz teatrlari vakillari va faxriylari, madaniyat va sanʼat namoyandalari, keng jamoatchilik ishtirokida ushbu sanaga bagʻishlangan badiiy kecha oʻtkazish tadbirlari belgilansin.

4. Oʻzbekiston Milliy axborot agentligi, Oʻzbekiston Milliy teleradiokompaniyasi va boshqa ommaviy axborot vositalariga Oʻzbek Milliy akademik drama teatrining 100 yilligini nishonlash bilan bogʻliq tadbirlarni keng yoritish tavsiya etilsin.

5. Mazkur qarorning ijrosini nazorat qilish Oʻzbekiston Respublikasi Bosh vaziri Sh. Mirziyoyev zimmasiga yuklansin.