“Umumiy harbiy majburiyat va harbiy xizmat toʻgʻrisida”gi Oʻzbekiston Respublikasi Qonunini amalga oshirish, fuqarolarni harbiy roʻyxatga olish tizimini takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi fuqarolarini harbiy roʻyxatga olish toʻgʻrisidagi Nizom ilovaga muvofiq tasdiqlansin.

2. Belgilab qoʻyilsinki:

harbiy xizmatga majburlar va chaqiriluvchilarni harbiy roʻyxatdan oʻtkazish davlatdagi mavjud va harbiy xizmatga yaroqli chaqiriluvchilar resurslarini hisobga olish hamda tahlil qilishning umumdavlat tizimi hisoblanadi. Harbiy roʻyxat harbiy xizmatga majburlar va chaqiriluvchilarning yashash, ishlash va oʻqish joyida joylardagi davlat hokimiyati va boshqaruv organlari, harbiy boshqaruv mahalliy organlari, fuqarolarning oʻzini oʻzi boshqarish organlari, idoraviy mansubligi va mulkchilik shakllaridan qatʼi nazar, korxonalar, tashkilotlar va muassasalar, shu jumladan oʻquv muassasalari rahbarlari tomonidan yuritiladi;

harbiy xizmatga majburlar va chaqiriluvchilarni harbiy roʻyxatdan oʻtkazishni tashkil etish va yuritish ishlariga umumiy rahbarlik va nazorat Mudofaa vazirligi tomonidan amalga oshiriladi.

3. Quyidagilar:

davlatdagi mavjud va harbiy xizmatga yaroqli chaqiriluvchilar resurslarini hisobga olish hamda tahlil qilish umumdavlat tizimining samarali faoliyat koʻrsatishini taʼminlash;

mavjud harbiy xizmatga majburlar va chaqiriluvchilarning miqdor va sifat tarkibini aniqlash, ularning samarali va oqilona rejalashtirilishini va urush davrida ulardan Qurolli Kuchlar va iqtisodiyot ehtiyojlari uchun foydalanilishini taʼminlash;

rezervdagi harbiy xizmatga majburlar orasidan Qurolli Kuchlarning safarbarligini kuchaytirish va keyinchalik urush davri sharoitlarida Qurolli Kuchlarni ular bilan toʻldirish uchun zarur harbiy mutaxassislarni tayyorlash va rezervda saqlab turish tadbirlarini ishlab chiqish va amalga oshirish harbiy roʻyxatga olishning asosiy vazifalari etib belgilansin.

4. Vazirliklar, davlat qoʻmitalari va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

Oʻzbekiston Respublikasi fuqarolarini harbiy roʻyxatga olish toʻgʻrisidagi Nizom talablari sifatli va samarali bajarilishini, harbiy xizmatga majburlar va chaqiriluvchilarning harbiy roʻyxatga olish bilan toʻliq qamrab olinishini taʼminlasinlar;

2003-yil 1-iyungacha oʻzlariga qarashli korxonalar, tashkilotlar va muassasalar, shu jumladan taʼlim muassasalari, tuman, shahar hokimliklari va fuqarolarning oʻzini oʻzi boshqarish organlari shtat jadvallarini oʻrganib va aniqlab chiqsinlar, harbiy hisobga olish xodimlari lavozimlari mavjud boʻlmagan taqdirda ularni Oʻzbekiston Respublikasi fuqarolarini harbiy roʻyxatga olish toʻgʻrisidagi nizomda belgilangan yuklama normalariga muvofiq toʻldirishni nazarda tutsinlar.

5. Oʻzbekiston Respublikasi Mudofaa vazirligi (Q.Gʻ. Gʻulomov):

ikki oy muddatda harbiy xizmatga majburlar va chaqiriluvchilarni avtomatlashtirilgan tarzda harbiy roʻyxatga olishning klassifikatorli tizimini barpo etish dasturini ishlab chiqsin, uni ruxsatsiz axborot olish va axborot oshkor boʻlishidan himoya qilishni hisobga olsin hamda uning 2003-2004-yillar mobaynida amalga oshirilishini taʼminlasin. Maxsus asbob-uskunalar, texnika va dasturiy taʼminotni xarid qilish xarajatlarini 2003-yilda ajratilgan mablagʻ bilan taʼminlash limiti doirasida amalga oshirsin;

2003-yil 1-iyungacha Oʻzbekiston Respublikasi fuqarolarini harbiy hisobga olishni tashkil etish va uni yuritish tartibi masalalari boʻyicha yoʻriqnomani ishlab chiqsin va yoʻriqnoma bilan vazirliklar, idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarini taʼminlasin.

6. Oʻzbekiston Respublikasi Moliya vazirligi (M.B. Nurmurodov) 2004-yilga budjet prognozini shakllantirishda Oʻzbekiston Respublikasi Mudofaa vazirligining asoslangan hisob-kitoblariga koʻra harbiy xizmatga majburlar va chaqiriluvchilarni avtomatlashtirilgan tarzda harbiy roʻyxatga olishning klassifikatorli tizimini barpo etish uchun maxsus asbob-uskunalar, texnika va dasturiy taʼminotni xarid qilish uchun budjet mablagʻlari ajratishni nazarda tutsin.

7. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov va Oʻzbekiston Respublikasi Prezidenti huzuridagi Milliy xavfsizlik kengashi kotibi Gʻ.D. Oblayarov zimmasiga yuklansin.

Mazkur Nizom harbiy xizmatga majburlar va chaqiriluvchilarni harbiy roʻyxatga olishni tashkil etish va uning shakllari tartibini, shuningdek joylardagi davlat hokimiyati va boshqaruv organlari, fuqarolarning oʻzini oʻzi boshqarish organlari, harbiy boshqaruv, korxonalar, tashkilotlar va muassasalarning, shu jumladan taʼlim muassasalari mansabdor shaxslarining harbiy roʻyxatga olishni yuritish boʻyicha majburiyatlarini belgilab beradi.

1. Harbiy xizmatga majburlar va chaqiriluvchilarni harbiy roʻyxatga olish davlatdagi mavjud va harbiy xizmatga yaroqli chaqiriluvchilar resurslarini hisobga olish va tahlil qilishning umumdavlat tizimi hisoblanadi. Harbiy xizmatga majburlar va chaqiriluvchilarni harbiy roʻyxatga olish “Umumiy harbiy majburiyat va harbiy xizmat toʻgʻrisida”gi Oʻzbekiston Respublikasi Qonuniga muvofiq tashkil etiladi va ularning yashash joyi boʻyicha yuritiladi.

Oʻzbekiston Respublikasi Davlat xavfsizlik xizmati, Milliy gvardiyasi va Harbiy prokuraturasining harbiy xizmatga majburlarini roʻyxatga olish tegishlicha Oʻzbekiston Respublikasi Davlat xavfsizlik xizmati Raisi, Milliy gvardiya qoʻmondoni va Bosh prokuror tomonidan belgilanadigan tartibda amalga oshiriladi.

Tibbiy tayyorgarlikka yoki Oʻzbekiston Respublikasi Vazirlar Mahkamasi tomonidan belgilanadigan roʻyxatdagi tegishli harbiy ixtisoslikka turdosh kasb boʻyicha tayyorgarlikka ega boʻlgan ayollar jinsiga mansub shaxslar harbiy xizmatga majburlar harbiy roʻyxatiga kiritiladi.

2. Harbiy xizmatga majburlar va chaqiriluvchilarni harbiy roʻyxatga olish tizimi mamlakatda amal qiluvchi pasport tizimi bilan bogʻliq holda yuritiladi. Roʻyxatga olish tizimining amal qilishi Oʻzbekiston Respublikasi Mudofaa vazirligi, Ichki ishlar vazirligi organlari, Qoraqalpogʻiston Respublikasi Vazirlar Kengashi, viloyatlar, tumanlar va shaharlar hokimliklari, fuqarolarning oʻzini oʻzi boshqarish organlari, shuningdek idoraviy mansubliligi va mulkchilik shakllaridan qatʼi nazar korxonalar, tashkilotlar, muassasalar, shu jumladan taʼlim muassasalari tomonidan taʼminlanadi.

3. Harbiy xizmatga majburlar va chaqiriluvchilarni harbiy roʻyxatga olish maxsus va umumiy roʻyxatlarga boʻlinadi hamda joylardagi davlat hokimiyati va boshqaruv organlari, fuqarolarning oʻzini oʻzi boshqarish organlari, korxonalar, tashkilotlar va muassasalarning, shu jumladan taʼlim muassasalarining rahbarlari tomonidan ularning yashash, ishlash va oʻqish joylari boʻyicha yuritiladi.

Maxsus harbiy roʻyxatga olish safarbarlik davrida va urush davrida davlat boshqaruvi organlari, korxonalar, tashkilotlar va muassasalar uchun bron qilingan harbiy xizmatga majburlarni roʻyxatga olish va nazorat qilish uchun moʻljallangan.

Umumiy harbiy roʻyxatga olish safarbarlik davrida va urush davrida davlat boshqaruvi organlari, korxonalar, tashkilotlar va muassasalar uchun bron qilinmagan chaqiriluvchilar va harbiy xizmatga majburlarni shaxsiy roʻyxatga olish va nazorat qilish uchun moʻljallangan. Harbiy xizmatga majburlar va chaqiriluvchilarni shaxsiy roʻyxatga olish tuman (shahar) mudofaa ishlari organlari, fuqarolarning oʻzini oʻzi boshqarish organlari, shuningdek ular ishlaydigan yoki oʻqiydigan korxonalar, muassasalar, tashkilotlar va taʼlim muassasalari tomonidan amalga oshiriladi.

4. Safarbarlik chaqiriq rezervi xizmatchilarini harbiy roʻyxatga olish mudofaa ishlari boʻlimlari tomonidan hisobga olish kartochkalari alohida kartotekaga ajratilgan holda alohida amalga oshiriladi.

Ular 27 yoshga toʻlgandan keyin ikkinchi toifali rezerv harbiy xizmatga majburlarning umumiy roʻyxatiga oʻtkaziladi.

Safarbarlik chaqiriq rezervi xizmatchisi yoki rezervning harbiy xizmatga majburi belgilangan tartibda tinch davrda harbiy xizmatga yaroqsiz, urush davrida cheklangan yaroqli deb topilgan taqdirda, zaxiraga oʻtkazilishi kerak.

5. Harbiy xizmatga majburlar va chaqiriluvchilarni harbiy roʻyxatga kiritish va undan chiqarish tartibi Mudofaa vazirligi tomonidan belgilanadi.

Oʻzbekiston Respublikasi Davlat xavfsizlik xizmati, Oʻzbekiston Respublikasi Prezidenti Davlat xavfsizlik xizmati, Milliy gvardiyasi, Harbiy prokuraturasi, Favqulodda vaziyatlar vazirligi, Elektron texnologiyalarini rivojlantirish markazi organlari va harbiy tuzilmalariga roʻyxatga olish uchun berilgan, shuningdek, Ichki ishlar vazirligi hamda Iqtisodiyot va moliya vazirligi huzuridagi Bojxona qoʻmitasi kadrlari tarkibiga oʻtkazilgan harbiy xizmatga majburlar tegishli vazirliklar va idoralarning roʻyxatida turadi.

Ular xizmatdan boʻshatilgandan keyin boʻshatish paytidagi lavozimlari va unvonlari boʻyicha yashash joyidagi mudofaa ishlari boʻlimlariga roʻyxatga olish uchun beriladilar, xizmatni Davlat xavfsizlik xizmati, Milliy gvardiya, Oʻzbekiston Respublikasi Prezidenti Davlat xavfsizlik xizmati va harbiy prokuratura organlarida oʻtagan shaxslar bundan mustasno.

Oʻzbekiston Respublikasi Davlat xavfsizlik xizmati, Oʻzbekiston Respublikasi Prezidenti Davlat xavfsizlik xizmati, Harbiy prokuraturasi, Favqulodda vaziyatlar vazirligi, Elektron texnologiyalarini rivojlantirish markazi organlariga roʻyxatga olish uchun berilayotgan harbiy xizmatga majburlarni, shuningdek, Oʻzbekiston Respublikasi Ichki ishlar vazirligi, Milliy gvardiyasi hamda Iqtisodiyot va moliya vazirligi huzuridagi Bojxona qoʻmitasi kadrlari tarkibiga oʻtkazilgan harbiy xizmatga majburlarni harbiy roʻyxatdan chiqarish Oʻzbekiston Respublikasi ichki ishlar vaziri va favqulodda vaziyatlar vazirining, Elektron texnologiyalarini rivojlantirish markazi boshligʻining, Milliy gvardiya qoʻmondonining, Davlat xavfsizlik xizmati raisi, Oʻzbekiston Respublikasi Prezidenti Davlat xavfsizlik xizmati raisi, Bosh prokuror, Davlat xavfsizlik xizmati Chegara qoʻshinlari qoʻmondoni hamda Iqtisodiyot va moliya vazirligi huzuridagi Bojxona qoʻmitasi raisining buyrugʻidan koʻchirma asosida amalga oshiriladi.

6. Harbiy xizmatga majburlar va chaqiriluvchilarni roʻyxatga olishni tashkil etish va yuritish boʻyicha ishlarga umumiy rahbarlik qilish, hokimliklar, fuqarolarning oʻzini oʻzi boshqarish organlarida, idoraviy mansubliligi va mulkchilik shakllaridan qatʼi nazar, korxonalar, muassasalar, tashkilotlar va taʼlim muassasalarida ushbu ishlarning holati ustidan nazorat qilish Mudofaa vazirligi tomonidan amalga oshiriladi.

Oʻzbekiston Respublikasi vazirliklari va idoralariga, Qoraqalpogʻiston Respublikasi Vazirlar Kengashiga, viloyatlar va Toshkent shahar hokimliklariga harbiy xizmatga majburlar va chaqiriluvchilarni shaxsiy roʻyxatga olish zimmasiga yuklangan oʻzlariga qarashli korxonalar, muassasalar, tashkilotlar, taʼlim muassasalari va fuqarolarning oʻzini oʻzi boshqarish organlarida harbiy xizmatga majburlar va chaqiriluvchilarni roʻyxatga olishning holati ustidan nazorat qilish vazifasi yuklanadi.

7. Oʻzbekiston Respublikasi fuqarolarini harbiy roʻyxatga olishni tashkil etish va yuritish tartibi masalalari boʻyicha yoʻriqnomalar va boshqa normativ-huquqiy hujjatlar, shuningdek roʻyxatga olish va hisobot berishning tegishli blankalari Mudofaa vazirligi tomonidan ishlab chiqiladi va tasdiqlanadi hamda vazirliklar, idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga yuboriladi, ular oʻzlariga qarashli korxonalar, muassasalar, tashkilotlar, taʼlim muassasalarini, tumanlar, shaharlar hokimliklarini va fuqarolarining oʻzini oʻzi boshqarish organlarini ushbu hujjatlar va blankalar bilan taʼminlaydi.

Oʻzbekiston Respublikasi Davlat xavfsizlik xizmati, Milliy gvardiya va Harbiy prokuraturaning harbiy xizmatga majburlarini roʻyxatga olishni tashkil etish va hisobini yuritish tartibi masalalari boʻyicha yoʻriqnomalar hamda boshqa normativ-huquqiy hujjatlar, shuningdek, roʻyxatga olish va hisobot berishning tegishli blanklari tegishliligi boʻyicha Davlat xavfsizlik xizmati, Milliy gvardiya va Bosh prokuratura tomonidan ishlab chiqiladi va tasdiqlanadi.

8. Quyidagilar:

ofitserning shaxsini tasdiqlovchi guvohnoma, kontrakt boʻyicha harbiy xizmatchi guvohnomasi blankalari, harbiy guvohnoma, zaxiradagi ofitser guvohnomasi, qayd etish guvohnomasi va muqobil xizmat xizmatchisi guvohnomasi, shuningdek harbiy xizmatga majburlarning maxsus harbiy roʻyxatdagi holatini belgilovchi guvohnomalar va bildirishnomalar blankalari qatʼiy hisobot beriladigan harbiy-hisob hujjatlari hisoblanadi. Harbiy-hisob hujjatlari Oʻzbekiston Respublikasi Mudofaa vazirligining buyurtmanomalari boʻyicha Oʻzbekiston Respublikasi Markaziy banki huzuridagi “Davlat belgisi” davlat ishlab chiqarish birlashmasi korxonalarida qalbakilashtirishga qarshi himoya elementlariga ega boʻlgan maxsus qogʻozda tayyorlanadi hamda Mudofaa vazirligi tomonidan vazirliklar (idoralar)ga hamda Qoraqalpogʻiston Respublikasi, viloyatlar va Toshkent shahar mudofaa ishlari boshqarmalariga yuboriladi.

Harbiy-hisob hujjatlari qatʼiy hisobot beriladigan hujjatlar toifasi uchun belgilangan tartibda hisobga olinadi, saqlanadi va hisobdan chiqariladi.

Ofitser shaxsini tasdiqlovchi guvohnoma, kontrakt boʻyicha harbiy xizmatchi guvohnomasi, zaxiradagi ofitser guvohnomasi, harbiy guvohnoma, qayd etish guvohnomasi va muqobil xizmat xizmatchisi guvohnomasi blankalar uchun haq undirilmasdan beriladi. Yoʻqotilgan, yoʻqolgan yoki yaroqsiz holga kelgan guvohnomalar oʻrniga guvohnomalarni takroran berishda blankalar uchun haq undiriladi.

Muqobil xizmat xizmatchilariga ular xizmat qilgan davrda muqobil xizmat xizmatchisi guvohnomasi beriladi. Xizmat muddati tamom boʻlgach muqobil xizmatdan boʻshatilganda yoki turli sabablarga koʻra muddatidan oldin boʻshatilganda ularga harbiy guvohnoma beriladi.

9. Harbiy xizmatga majburlar va chaqiriluvchilarni tuman (shahar) mudofaa ishlari organlarida, fuqarolarning oʻzini oʻzi boshqarish organlarida, korxonalar, muassasalar, tashkilotlar va taʼlim muassasalarida roʻyxatga olish:

Oʻzbekiston Respublikasi fuqarolari tomonidan umumiy harbiy majburiyat bajarilishini va “Umumiy harbiy majburiyat va harbiy xizmat toʻgʻrisida”gi Oʻzbekiston Respublikasi Qonunida belgilangan harbiy roʻyxatga olish qoidalariga rioya qilish nazorat qilinishini taʼminlash;

safarbarlik davrida va urush davrida Oʻzbekiston Respublikasi iqtisodiyoti tarmoqlariga rahbarlar tarkibini, muhandis-texnik xodimlarni, malakali ishchilarni bron qilishni oʻz vaqtida rasmiylashtirishni tashkil etish;

safarbarlik boʻyicha chaqirilishi kerak boʻlgan mutaxassislarni almashtirish uchun zarur kadrlar rezervini oldindan tayyorlash;

safarbarlik tadbirlarini oʻtkazishda harbiy boshqaruv mahalliy organlariga yordam berish maqsadlarida yuritiladi.

10. Mudofaa ishlari organlari harbiy xizmatga majburlar va chaqiriluvchilarni yashash joylari boʻyicha harbiy roʻyxatga olishga, shuningdek fuqarolarning oʻzini oʻzi boshqarish organlarida, idoraviy mansubliligi va mulkchilik shakllaridan qatʼi nazar, korxonalar, tashkilotlar va muassasalarda, shu jumladan taʼlim muassasalarida uni yuritishning holati va tartibini nazorat qilishga majburdirlar.

11. Fuqarolarning oʻzini oʻzi boshqarish organlari:

oʻzlari xizmat koʻrsatadigan hududda yashovchi barcha harbiy xizmatga majburlar va chaqiriluvchilar toʻliq va sifatli roʻyxatga olinishini taʼminlashga;

harbiy xizmatga majburlar va chaqiriluvchilarni boshlangʻich roʻyxatga olish kartochkalarini zaxiradagi ofitserlar guvohnomalari va harbiy guvohnomalardagi, qayd etish guvohnomalari va muqobil xizmat xizmatchilari guvohnomalaridagi yozuvlar bilan muntazam ravishda solishtirishga hamda ushbu kartochkalarni bir yilda kamida bir marta solishtirish uchun tuman va shahar mudofaa ishlari boʻlimlariga taqdim etishga;

oʻn kun muddatda harbiy roʻyxatga olingan va undan chiqarilgan barcha harbiy xizmatga majburlar va chaqiriluvchilar toʻgʻrisida tuman (shahar) mudofaa ishlari organlariga xabar berishga majburdirlar.

12. Idoraviy mansubliligi va mulkchilik shakllaridan qatʼi nazar, korxonalar, muassasalar, tashkilotlar va taʼlim muassasalari maʼmuriyati quyidagilarga majburdir:

mazkur korxona, muassasa, tashkilot va taʼlim muassasasining barcha harbiy xizmatga majburlar va chaqiriluvchilarini Oʻzbekiston Respublikasi Mudofaa vazirligi va Milliy statistika qoʻmitasi tomonidan belgilanadigan qoidalar va shakllar boʻyicha toʻliq va sifatli roʻyxatga olinishini taʼminlash;

zaxiradagi ofitserlar guvohnomalaridagi, harbiy guvohnomalardagi, qayd etish guvohnomalaridagi va muqobil xizmat xizmatchilarining guvohnomalaridagi yozuvlarni ularning shaxsiy kartochkalaridagi (T-2-shakl) yozuvlar bilan doimiy ravishda aniqlashtirib borish hamda ushbu kartochkalarni solishtirish uchun har yili kamida bir marta tuman va shahar mudofaa ishlari boʻlimlariga taqdim etish;

harbiy xizmatga majburlar va chaqiriluvchilarning oilaviy ahvoli, yashash joyi manzili, xizmatdagi mavqeyi, umumtaʼlim va texnik tayyorgarligidagi oʻzgarishlarni muntazam ravishda hisobga olib borish hamda besh kun muddatda ushbu oʻzgarishlarni ularning shaxsiy kartochkalariga kiritish, bu toʻgʻrida tegishli harbiy roʻyxatga olish organlariga ular tomonidan belgilanadigan muddatlarda, lekin har oyda kamida bir marta maʼlum qilish;

rahbarlar, muhandis-texnik xodimlar va malakali ishchilar tarkibidagi harbiy xizmatga majburlar safarbarlik davri va urush davri uchun Oʻzbekiston Respublikasi iqtisodiyoti tarmoqlariga bron qilib qoʻyilishini oʻz vaqtida rasmiylashtirish;

ishga (oʻqishga) yangi qabul qilingan yoki ishdan (oʻquv yurtidan) boʻshatilgan barcha harbiy xizmatga majburlar va chaqiriluvchilar toʻgʻrisida yetti kun muddatda mudofaa ishlari boʻlimlariga xabar qilish;

fuqarolarni ishga (oʻqishga) qabul qilishda ularda harbiy-hisob hujjatlari (harbiy xizmatga majburlarda — zaxiradagi ofitser guvohnomasining, harbiy guvohnomaning, chaqiriluvchilarda esa — qayd etish guvohnomasi) mavjudligini tekshirish hamda ularning harbiy hisobda turishini aniqlash. Fuqarolar faqat yashash joyi boʻyicha harbiy hisobga qoʻyilganidan keyingina ishga (oʻqishga) qabul qilinadilar.

13. Yuqori organga ega boʻlmagan nodavlat sektordagi korxonalar, tashkilotlar va muassasalar, shu jumladan taʼlim muassasalari harbiy hisobni yuritish masalalari yuzasidan oʻzlari joylashgan hududdagi tuman (shahar) hokimliklariga hisobot beradilar. Ushbu hollarda hokimlik ularni harbiy xizmatga majburlar va chaqiriluvchilarni harbiy roʻyxatga olish boʻyicha blankalar, hisobot shakllari va boshqa hujjatlar namunalari bilan taʼminlaydi.

Nodavlat sektordagi korxonalar, muassasalar, tashkilotlar va taʼlim muassasalarida harbiy xizmatga majburlar va chaqiriluvchilarning harbiy roʻyxatga olish, shuningdek ular boʻyicha hisobot berish ushbu Nizomning 12-bandida nazarda tutilgan qoidalar boʻyicha amalga oshiriladi.

14. Joylardagi davlat hokimiyati va boshqaruv organlari, fuqarolarning oʻzini oʻzi boshqarish organlari, zimmasiga harbiy hisobni yuritish yuklangan korxonalar, muassasalar, tashkilotlar va taʼlim muassasalari rahbarlari, ichki ishlar, fuqarolik holatlarini qayd etish tergovga qadar tekshiruvni amalga oshiruvchi organlar, surishtiruv va dastlabki tergov organlari, tibbiy-mehnat ekspert komissiyalari, uy-joylardan foydalanish organlari va uy egalari “Umumiy harbiy majburiyat va harbiy xizmat toʻgʻrisida”gi Oʻzbekiston Respublikasi Qonunining 45-moddasiga muvofiq harbiy boshqaruv mahalliy organlariga ularning ishida koʻmaklashishi va Oʻzbekiston Respublikasi fuqarolari tomonidan umumiy harbiy majburiyatning bajarilishini va harbiy roʻyxatga olish qoidalariga rioya etilishini taʼminlash chora-tadbirlarini koʻrishi shart.

15. Mudofaa ishlari organlari, hokimliklar, fuqarolarning oʻzini oʻzi boshqarish organlari, korxonalar, tashkilotlar va muassasalar, shu jumladan taʼlim muassasalaridagi harbiy roʻyxatga olish xodimlari soni bir xodim hisobiga yuklama normasidan kelib chiqqan holda:

a) mudofaa ishlari boʻlimlarida:

hisobda 1500 nafargacha harbiy xizmatga majburlar boʻlganda – hisobga olish va bron qilish boʻyicha bir nafar xodim, hisobda 1500 dan 3000 nafargacha harbiy xizmatga majburlar boʻlganda — ikki nafar ana shunday xodim va shundan keyingi har 1500 nafar harbiy xizmatga majburlar va chaqiriluvchilar hisobiga — bir nafardan xodim;

v) korxonalar, muassasalar, tashkilotlar va taʼlim muassasalarida:

hisobda 500 dan 2000 nafargacha harbiy xizmatga majburlar va chaqiriluvchilar boʻlganda — asosiy ishidan ozod qilingan bir nafar xodim, hisobda 2000 dan 4000 nafargacha harbiy xizmatga majburlar va chaqiriluvchilar boʻlganda — ikki nafar xodim, hisobda 4000 dan 7000 nafargacha harbiy xizmatga majburlar va chaqiriluvchilar boʻlganda — uch nafar xodim va shundan keyingi har 3000 nafar harbiy xizmatga majburlar va chaqiriluvchilar hisobiga — bir nafardan xodim belgilanadi.

Hokimliklar va fuqarolarning oʻzini oʻzi boshqarish organlarining harbiy roʻyxatga olish xodimlari mahalliy budjet mablagʻlari hisobiga, korxonalar, muassasalar, tashkilotlar va taʼlim muassasalarida esa — oʻz mablagʻlari hisobiga taʼminlanadilar.

16. Hokimliklar, fuqarolarning oʻzini oʻzi boshqarish organlari, idoraviy mansubliligi va mulkchilik shakllaridan qatʼi nazar, korxonalar, tashkilotlar va muassasalarda, shu jumladan taʼlim muassasalarida hisobda 500 nafardan kam harbiy xizmatga majburlar va chaqiriluvchilar boʻlganda harbiy xizmatga majburlar va chaqiriluvchilarni harbiy roʻyxatga olish va bron qilish ishlari belgilangan tartibda hokimlik, fuqarolarning oʻzini oʻzi boshqarish organi, korxona, tashkilot va muassasaning, shu jumladan taʼlim muassasasining xodimlaridan biriga oʻrindoshlik boʻyicha yuklanadi.

17. Harbiy roʻyxatga olish bilan shugʻullanuvchi xodimlarni tasdiqlash, almashtirish va ishdan boʻshatish tegishli ravishda tuman (shahar) hokimi, fuqarolar yigʻini kengashi, idoraviy mansubliligi va mulkchilik shakllaridan qatʼi nazar, korxona, muassasa, tashkilot va taʼlim muassasasi rahbarlari tomonidan mudofaa ishlari boʻlimlari boshliqlari bilan kelishilgan holda amalga oshiriladi.

18. Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari, vazirliklar, idoralar, uyushmalar, konsernlar, korporatsiyalar va birlashmalar rahbarlari:

joylardagi davlat boshqaruv organlarida, tasarruflaridagi korxonalar, tashkilotlar, taʼlim muassasalarida harbiy roʻyxatga olish ishlarining ahvolini nazorat qilishi;

joylardagi harbiy roʻyxatga olish ishlarining ahvoli masalalarini muntazam ravishda koʻrib chiqishi va ularni yaxshilash chora-tadbirlarini koʻrishi shart.

19. Harbiy roʻyxatga olish boʻlimlari, harbiy safarbarlik organlari xodimlaridan harbiy roʻyxatga olish va safarbarlik ishlari bilan bogʻliq boʻlmagan boshqa vazifalarni bajarish uchun foydalanishga yoʻl qoʻyilmaydi.

20. Harbiy xizmatga majburlar, chaqiriluvchilar va mansabdor shaxslar harbiy roʻyxatga olish qoidalarini buzganlik uchun amaldagi qonunchilikka muvofiq javobgarlikka tortiladilar.