“Kamminz” zamonaviy dizel dvigatellari bilan jihozlangan traktorlar, yuk avtomobillari, avtobuslar va boshqa texnikani qoʻllash yoʻli bilan qishloq xoʻjaligida va boshqa tarmoqlarda ishlar samaradorligini oshirish, shuningdek “Keys” kompaniyasining traktorlari va paxta terish mashinalari ishlab chiqarishni mahalliylashtirish dasturini amalga oshirishni jadallashtirish maqsadida Vazirlar Mahkamasi qaror qiladi:

1. Amerikaning “Kamminz Endjin” kompaniyasi, “Oʻzqishloqxoʻjalikmash-xolding” kompaniyasi, “Oʻzavtosanoat” uyushmasi, “Oʻzqishloqxoʻjaliktaʼminottuzatish” davlat-kooperativ qoʻmitasi va Oʻzbekiston Respublikasi Hukumati tomonidan yopiq aksiyadorlik jamiyati shaklidagi “OʻzKamminzMotor” qoʻshma korxonasini tashkil etish toʻgʻrisida Bitim Bayonnomasi imzolanganligi maʼlumot uchun qabul qilinsin.

“OʻzKamminzMotor” qoʻshma korxonasining ustav jamgʻarmasini boshlangʻich miqdori 19,8 mln AQSH dollari boʻlgan va ulushlar “Kamminz Endjin” kompaniyasi bilan Oʻzbekiston tomoni oʻrtasida teng taqsimlangan holda shakllantirish, uning tuzilmasi va shakllantirish muddatlari toʻgʻrisidagi taklifga 1-ilovaga muvofiq rozilik berilsin.

2. 2000-yilda 6 mingta dvigatel ishlab chiqarishni va 2004-yilgacha mahalliylashtirish darajasini 48 foizgacha yetkazgan holda ularni ishlab chiqarishni 12 mingtagacha koʻpaytirishni nazarda tutuvchi loyihani texnik-iqtisodiy asoslashning asosiy koʻrsatkichlari 2 — 4-ilovalarga* muvofiq tasdiqlansin.

3. Quyidagilar:

umumiy qiymati 33 mln AQSH dollariga teng boʻlgan loyihani mablagʻ bilan taʼminlash “OʻzKamminzMotor” qoʻshma korxonasining 19,8 mln AQSH dollari miqdoridagi ustav fondi mablagʻlari va 13,2 mln AQSH dollari miqdoridagi qarz mablagʻlari hisobiga amalga oshiriladi;

“OʻzKamminzMotor” qoʻshma korxonasida quvvati 100 dan 210 ot kuchigacha boʻlgan toʻrt va olti silindrli dizel dvigatellari ishlab chiqarish tashkil etiladi;

Oʻzbekistonda ishlab chiqariladigan va 100 — 210 ot kuchi diapazonidagi dizel dvigatellariga ega boʻlgan barcha texnika, shu jumladan “OʻzKeys traktor” qoʻshma korxonasining, “OʻzKeysmash” qoʻshma korxonasining, Toshkent traktor zavodining traktorlari va paxta terish mashinalari, “Samarqand avtomobil zavodi” masʼuliyati cheklangan jamiyatining avtobuslari va yuk avtomobillari “OʻzKamminzMotor” qoʻshma korxonasida ishlab chiqariladigan dvigatellar bilan jihozlanadi;

qoʻshma korxona doirasida yigʻish, boʻyash va sinash sexlari, shuningdek tirsakli valni tayyorlash boʻyicha ishlab chiqarish tashkil etiladi;

“OʻzKamminzMotor” qoʻshma korxonasi “Motor zavodi” AJning eksperimental korpusiga joylashtiriladi, uni rekonstruksiya va modernizatsiya qilish qoʻshma korxonaning 11,1 mln AQSH dollari miqdoridagi mablagʻlari hisobiga amalga oshiriladi;

“OʻzKamminzMotor” qoʻshma korxonasining ishlab chiqarish binosini qurish va tayyorlash davrida dvigatellarni yigʻish “Motor zavodi” AJda amalga oshiriladi;

loyihada ishlab chiqaruvchi kompaniya tomonidan “OʻzKamminzMotor” qoʻshma korxonasining 4,9 mln AQSH dollari miqdoridagi mablagʻlari (shu jumladan, “Kamminz Endjin” kompaniyasi tomonidan kiritiladigan 2,0 mln AQSH dollari, shuningdek, ishlab chiqaruvchi kompaniya tomonidan Oʻzbekiston tomonining 7,5 mln AQSH dollari miqdoridagi mablagʻlari hisobiga “Motor zavodi” AJning “Krauze” yigʻish liniyasini “Kamminz” dvigatellarini yigʻish uchun modernizatsiya qilish va qayta joylashtirish nazarda tutilgan;

ishlab chiqarish korpusi, yigʻish, tirsakli valga ishlov berish avtomatik liniyalari, boʻyash-quritish kompleksi va sinov stansiyasidan “OʻzKamminzMotor” qoʻshma korxonasi “Motor zavodi” AJdan 12 yil muddatga ijara shartlarida, ijara toʻlovlari 2 yilga kechiktirilgan va ijara toʻlovi koʻrsatib oʻtilgan ijaraga olingan mol-mulkni sotib olish hisobiga “OʻzKamminzMotor” qoʻshma korxonasi mulkiga oʻtkazilgan holda foydalanadi.

4. “Oʻzqishloqxoʻjalikmash-xolding” kompaniyasi, “Motor zavodi” AJ “Kamminz Endjin” kompaniyasi bilan birgalikda uch oy muddatda Taʼsis shartnomasini, Ustavni, Texnologiya va texnik hujjatlarni berish toʻgʻrisidagi bitimni, Boshqaruv xizmatlari toʻgʻrisidagi shartnomani va Taʼsis shartnomasiga ilova hisoblanadigan boshqa hujjatlarni ishlab chiqish va roʻyxatdan oʻtkazish ishlarini tugallasinlar.

5. Belgilab qoʻyilsinki, 3-ilovaga* muvofiq hajmlarda ishlab chiqariladigan dvigatellarni har yili sotish “OʻzKamminzMotor” qoʻshma korxonasiga dvigatellar yetkazib berish yuzasidan:

Toshkent traktor zavodi, “OʻzKeysmash” qoʻshma korxonasi, “OʻzKeysTraktor” qoʻshma korxonasi, “Samarqand avtomobil zavodi” MCHJ va boshqa isteʼmolchilar bilan;

“Oʻzagrosugʻurta” kompaniyasi tomonidan “OʻzKamminzMotor” qoʻshma korxonasining yetkazib berish shartnomalari bilan taʼminlanmagan miqdordagi dvigatellarini sotib olish boʻyicha majburiyatlarni sugʻurta qoplamasi ostida “Oʻzagromashservis” uyushmasi bilan.

6. “Oʻzqishloqxoʻjaliktaʼminottuzatish” davlat-kooperativ qoʻmitasi Oʻzbekiston Respublikasi Moliya vazirligi bilan birgalikda ikki oy muddatda respublika mintaqalarida servis markazlarini joylashtirishni, normativ zaxiralarni toʻldirish uchun xarid qilinadigan ehtiyot qismlar, sarflash materiallari nomenklaturasi va hajmini nazarda tutuvchi “OʻzKamminzMotor” qoʻshma korxonasi ishlab chiqaradigan dvigatellarga texnik xizmat koʻrsatishni, servisni va ularni mukammal tuzatishni tashkil etish va mablagʻ bilan taʼminlash dasturini ishlab chiqsin.

7. “Oʻzqishloqxoʻjalikmash-xolding” kompaniyasi Oʻzbekiston Respublikasi Davlat mulki qoʻmitasi hamda Makroiqtisodiyot va statistika vazirligi bilan birgalikda “Kamminz” dvigatellarini ishlab chiqarish va mahalliylashtirishda foydalanilmayotgan “Motor zavodi” AJ quvvatlarini konservatsiya qilish toʻgʻrisida belgilangan tartibda Vazirlar Mahkamasiga takliflar kiritsin.

8. “Oʻzavtosanoat” uyushmasi “SamKochavto” qoʻshma korxonasi bilan birgalikda ikki oy muddatda “Kamminz Endjin” va “Otoyoʻl” (Turkiya) kompaniyalari bilan “Kamminz” dvigatellaridan foydalangan holda yuk avtomobillari va avtobuslar ishlab chiqarishni tashkil etish masalalarini kelishib olsin.

9. “Oʻzstandart” agentligi “Kamminz Endjin” kompaniyasi tomonidan “Kamminz” dvigatellarini ishlab chiqarish va ularga servis xizmati koʻrsatishni tashkil etish uchun yetkazib beriladigan asbob-uskunalar va butlovchi buyumlarning belgilangan tartibda sertifikatlashtirilishini taʼminlasin.

10. Oʻzbekiston Respublikasi Makroiqtisodiyot va statistika vazirligi “OʻzKamminzMotor” qoʻshma korxonasini tashkil etish va “Kamminz” dvigatellariga butlovchi buyumlar ishlab chiqarishni mahalliylashtirish loyihalarini belgilangan tartibda Oʻzbekiston Respublikasining 2000-yilgi va keyingi yillardagi Investitsiya dasturiga kiritsin.

18. Oʻzbekiston Respublikasi Tashqi ishlar vazirligi “OʻzKamminsMotor” qoʻshma korxonasining buyurtmanomalari boʻyicha koʻrsatib oʻtilgan loyihaning xorijiy qatnashchilari uchun kirish vizalarini konsullik yigʻimlari undirmasdan rasmiylashtirish masalalarini oʻz vaqtida koʻrib chiqsin.

19. Oʻzbekiston Respublikasi Ichki ishlar vazirligi “OʻzKamminzMotor” qoʻshma korxonasining buyurtmanomalari boʻyicha “OʻzKamminzMotor” qoʻshma korxonasini tashkil etish loyihasini amalga oshirishda qatnashuvchi xorijiy qatnashchilarni yashash joyida davlat boji undirmasdan vaqtincha roʻyxatdan oʻtkazsin va vaqtincha roʻyxatdan oʻtkazish muddatini uzaytirsin.

20. “OʻzKamminzMotor” qoʻshma korxonasini tashkil etish loyihasi doirasida ishlash uchun kelayotgan xorijiy mutaxassislarga Oʻzbekiston Respublikasi fuqarolari uchun nazarda tutilgan tariflar boʻyicha yashash va transportning barcha turlarida yurish uchun haq toʻlash huquqi berilsin.

21. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.