Oʻzbekiston Respublikasi Vazirlar Mahkamasining 2009-yil 18-avgustdagi 233-sonli “Ilmiy xodimlar mehnatini yanada ragʻbatlantirish chora-tadbirlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2009-y. 34-son, 370-modda) muvofiq Oʻzbekiston Respublikasi Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qoʻmitasi, Moliya vazirligi va Mehnat va aholini ijtimoiy muhofaza qilish vazirligi qaror qiladilar:

1. Ilmiy xodimlarni moddiy ragʻbatlantirish jamgʻarmasini shakllantirish va uning mablagʻlaridan foydalanish tartibi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgach kuchga kiradi.

Ushbu Nizom Oʻzbekiston Respublikasi Vazirlar Mahkamasining 2009-yil 18-avgustdagi 233-sonli “Ilmiy xodimlar mehnatini yanada ragʻbatlantirish boʻyicha chora-tadbirlar toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2009-y., 34-son, 370-modda) muvofiq, ilmiy xodimlarni moddiy ragʻbatlantirish jamgʻarmasi (bundan keyingi oʻrinlarda jamgʻarma deb yuritiladi) mablagʻlarini shakllantirish va foydalanish tartibini belgilaydi.

1. Jamgʻarma fundamental, amaliy tadqiqotlar va innovatsiya ishlari ilmiy-texnik dasturlari loyihalarini budjet mablagʻlari hisobiga amalga oshirish uchun kalendar yilda moliyalashtirishga erishgan ilmiy-tadqiqot, taʼlim muassasalari hamda ilmiy-texnik dasturlarni bajaruvchi-tashkilotlarda (bundan keyingi oʻrinlarda — bajaruvchi-tashkilotlar deb yuritiladi) tashkil qilinadi.

2. Jamgʻarma mablagʻlari ilmiy-texnik dasturlar boʻyicha loyihalarni amalga oshirishga aniq mehnat va ilmiy hissasini qoʻshgan alohida farqlangan ilmiy xodimlarni ularga bir martalik mukofot belgilash yoʻli bilan moddiy ragʻbatlantirishga yoʻnaltiriladi.

3. Jamgʻarma mablagʻlari hisobidan tayinlangan bir martalik mukofotlarning summasi ularga qonunchilik tomonidan oʻrnatilgan tartibda yagona ijtimoiy toʻlovni hisoblash yoʻli bilan bajaruvchi-tashkilotlarning mehnatga haq toʻlash umumiy fondiga kiritiladi.

Jismoniy shaxslarning jamgʻarma mablagʻlari hisobidan olgan daromadlarini soliqqa tortish oʻrnatilgan tartibda amalga oshiriladi.

4. Fundamental, amaliy tadqiqotlar va innovatsiya ishlarining ilmiy-texnik dasturlarini amalga oshirishda qatnashuvchi bajaruvchi-tashkilotlar uchun kalendar yilda koʻzda tutilgan mehnatga haq toʻlash jamgʻarmasining 5 foizi miqdoridagi budjet mablagʻlari Jamgʻarma mablagʻlarini shakllantirish manbaalari hisoblanadi. Shu bilan birga faqat ilmiy-texnik dasturlarni amalga oshirish uchun ajratiladigan budjet mablagʻlari hisobidan shakllantiriladigan mehnatga haq toʻlash fondi hisobga olinadi.

5. Xodimlarga bir martalik mukofotlarni tayinlash va toʻlash yillik ish natijalari boʻyicha, odatda joriy yilning dekabr oyida amalga oshiriladi.

6. Bir martalik mukofotlarni tayinlash va toʻlash kalendar yil uchun Jamgʻarmada koʻzda tutilgan mablagʻlar chegarasida amalga oshiriladi.

7. Hisobot yilining oxirgi ish kuni yakunida foydalanilmagan jamgʻarma mablagʻlari Respublika budjetiga qaytarilishi shart.

8. Ilmiy xodimlarga bir martalik mukofotlar toʻlash toʻgʻrisidagi qaror bajaruvchi-tashkilot qoshidagi ilmiy kengash yoki bunga mutasaddi boʻlgan kollegial organ (bundan keyingi oʻrinlarda Ilmiy kengash deb yuritiladi) tomonidan qabul qilinadi.

9. Ilmiy kengashning bir martalik mukofotlar toʻlash toʻgʻrisidagi qarori kengash aʼzolari yigʻilishidagi ishtirokchilar sonidan kelib chiqib, ochiq muhokama qilish sharoitida oddiy koʻpchilik ovoz bilan qabul qilinadi. Agar uning qabul qilinishida ilmiy kengash aʼzolarining kamida uchdan ikki qismi ishtirok etgan boʻlsa, qaror kuchga ega hisoblanadi.

Ilmiy kengashning aʼzosi hisoblanadigan ilmiy xodimni mukofotlash masalasini koʻrib chiqishda u toʻgʻrisidagi qaror oʻsha xodim ovozini hisobga olmagan holda qabul qilinadi.

Bajaruvchi-tashkilotdagi rahbar xodimlarni bir martalik mukofotlash agar ular ilmiy-texnik dasturni amalga oshirishda ilmiy xodim sifatida qatnashgan boʻlsalargina amalga oshiriladi.

10. Ilmiy xodimlarga bir martalik mukofot bajaruvchi-tashkilotdagi rahbarning buyrugʻi bilan ilmiy kengashning qarori asosida belgilanadi.

11. Ilmiy xodimlarni mukofotlash uchun asosiy koʻrsatkichlar boʻlib ilmiy-texnik dasturlarni ishlab chiqish doirasida ular erishgan alohida natijalar va ularning aniq qoʻshgan hissasining darajasi hisoblanadi, shu qatorda:

yangi yirik ilmiy natijalarga erishishda (yangi qonuniyatlar, effektlar, hodisalarni kashf qilish va boshqalar);

yangi salmoqli amaliy natijalarga erishishda (yangi materiallar, texnologiyalar, uskunalar, mashinalar, qurilmalar va boshqalar);

yuqorida aytilgan tadqiqot natijalarini iqtisodiyot tarmogʻida amalda joriy qilishda;

olingan ilmiy natijalar xalqaro tan olinganida (olingan ilmiy natijalarning tan olingani xalqaro nashriyotlarda chop etilishi, olingan ilmiy natijalar boʻyicha xalqaro patentlarni olish).

12. Ilmiy-texnik dasturlarni amalga oshirishda qatnashadigan bajaruvchi-tashkilotlar sanab oʻtilgan asosiy koʻrsatkichlar asosida va oʻz faoliyatining xususiyatlaridan kelib chiqib u yoki bu koʻrsatkichlarning salmogʻini aniqlash, ularni aniq detallashtirish va miqdoriy baholashda individual yondashuvga amal qilinishini taʼminlaydilar.

13. Bajaruvchi-tashkilotlarning ilmiy xodimlarini bir martalik mukofotlash mazkur Nizomning 11-bandida koʻzda tutilgan koʻrsatkichlarga mosligiga qarab 2 dan 5 gacha bazaviy lavozim maoshi miqdorida ularga mukofot toʻlash yoʻli bilan amalga oshiriladi.

14. Ilmiy xodimga toʻlanadigan mukofotning aniq miqdori bajaruvchi-tashkilotning ilmiy kengashi qarori bilan belgilanadi.

15. Jamgʻarma hisobidan bir martalik mukofotlar toʻlashni belgilashning obyektivligi va toʻgʻriligi uchun Ilmiy kengashlar raislari javobgar hisoblanadi.

16. Jamgʻarma mablagʻlaridan maqsadli foydalanilishini tekshirish qonunchilik bilan oʻrnatilgan tartibda amalga oshiriladi.