Oʻzbekiston Respublikasi Prezidentining “Iqtisodiyotning real sektori korxonalarini qoʻllab-quvvatlash, ularning barqaror ishlashini taʼminlash va eksport salohiyatini oshirish chora-tadbirlari dasturi toʻgʻrisida” 2008-yil 28-noyabrdagi PF-4058-son Farmonini bajarish yuzasidan, shuningdek jahon narxlari konyunkturasi jadal oʻzgarayotgan sharoitlarda mahsulotlarni tannarxiga teng yoki undan pastroq narxlarda eksport qilishga ruxsatnomalarni tezkorlik bilan berish mexanizmini yaratish maqsadida:

1. Iqtisodiy nochor korxonalarni tijorat banklariga sotish boʻyicha Respublika komissiyasiga (Sh.M. Mirziyoyev) mazkur qaror bilan belgilangan tartibda, 2009-yilda respublika korxonalariga oʻzlari ishlab chiqargan tovarlarni eksport qilinadigan tovarlarga jahon narxlarining amalda yuzaga kelgan konyunkturasini hisobga olgan holda, tannarxiga teng yoki undan pastroq narxlarda erkin ayirboshlanadigan valyutaga eksport qilish uchun ruxsatnomalar berish huquqi berilsin.

2. Eksport qilinadigan tovarlarga jahon narxlarining amalda yuzaga kelgan konyunkturasini hisobga olgan holda 2009-yilda tovarlarni tannarxiga teng yoki undan pastroq narxlarda eksport qilish uchun ruxsatnomalar berish tartibi toʻgʻrisidagi vaqtinchalik nizom ilovaga* muvofiq tasdiqlansin.

3. Belgilansinki, 2009-yilda oʻzi ishlab chiqargan tovarlarni mustaqil ravishda yoki vazirliklar, idoralar va xoʻjalik birlashmalarining tashqi savdo kompaniyalari (birlashmalari), shuningdek “Oʻzinterimpeks” DATK, “Oʻzmarkazimpeks” DATK, “Oʻzsanoatmashimpeks” DAK, “Markazsanoateksport” DATK orqali tannarxidan pastroq narxda erkin ayirboshlanadigan valyutaga eksport qiladigan korxonalar uchun soliqqa tortish maqsadlarida sotishdan olinadigan tushum eksport qilinadigan tovarlarni sotishning amaldagi narxidan kelib chiqqan holda belgilanadi.

4. Oʻzbekiston Respublikasi Davlat soliq qoʻmitasi, Davlat bojxona qoʻmitasi, Moliya vazirligi, Tashqi iqtisodiy aloqalar, investitsiyalar va savdo vazirligi, boshqa manfaatdor vazirliklar, idoralar, xoʻjalik birlashmalari hamda korxonalar 2009-yilda tovarlarni tannarxiga teng yoki undan pastroq narxlarda eksportga sotishning, shuningdek olingan tushumni soliqqa tortishning ushbu qaror bilan tasdiqlangan tartibiga qatʼiy rioya qilsin.

5. Mazkur qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.