Oʻzbekiston Respublikasi Prezidentining 2008-yil 28-fevraldagi PQ-804-sonli “Osiyo taraqqiyot banki ishtirokida “Mintaqaviy avtomobil yoʻllarini rivojlantirish” loyihasini amalga oshirish chora-tadbirlari toʻgʻrisida”gi qarori (Oʻzbekiston Respublikasi qonun hujjatlari toʻplami, 2008-yil, 10-11-son, 55-modda) ijrosini taʼminlash maqsadida Oʻzbekiston Respublikasi Moliya vazirligi, Davlat arxitektura va qurilish qoʻmitasi va “Oʻzavtoyoʻl” Davlat-aksiyadorlik kompaniyasi qaror qiladilar:

1. “Transyoʻlqurilish” kompaniyasi bajargan mexanizatsiyalashgan ishlar uchun pudratchi tashkilotlar tomonidan toʻlovlarni amalga oshirish tartibi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kundan keyin kuchga kiradi.

1. Ushbu Nizom Oʻzbekiston Respublikasi Prezidentining “Osiyo taraqqiyot banki ishtirokidagi “Mintaqaviy avtomobil yoʻllarini rivojlantirish” loyihasini amalga oshirish chora-tadbirlari toʻgʻrisida” 2008-yil 28-fevraldagi PQ-804-sonli qarorining (Oʻzbekiston Respublikasi qonun hujjatlari toʻplami, 2008-yil 10-11-son, 55-modda) 5-bandiga asosan mexanizatsiyalashgan yoʻl-qurilish va taʼmirlash ishlarini bajarganligi uchun “Transyoʻlqurilish” kompaniyasi (keyingi oʻrinlarda — Kompaniya deb yuritiladi) bilan pudrat tashkilotlarining hisob-kitob qilish tartibini belgilaydi.

2. Kompaniya zimmasiga pudrat tashkilotlari (ishlarning bajaruvchilari) bilan shartnoma asosida umumiy foydalanishdagi avtomobil yoʻllarini qurish, tiklash va taʼmirlashda yoʻl-qurilish texnikasi, uskunalar va ulardan foydalana oladigan malakali mutaxassislardan foydalangan holda mexanizatsiyalashgan ishlarni bajarish yuklatiladi.

3. Pudrat tashkilotlari yoʻl-qurilish va taʼmirlash ishlari uchun pudrat shartnomasi tuzilguncha loyiha hujjatlarida koʻzda tutilgan bajariladigan ishlarning hajmiga muvofiq yoʻl-qurilish texnikasi va uskunalariga boʻlgan ehtiyojni aniqlaydi hamda Kompaniyaga tegishli arizani taqdim qiladi.

4. Kompaniya yoʻl-qurilish texnikasi, uskunalar va ulardan foydalana oladigan malakali mutaxassislardan foydalangan holda mexanizatsiyalashgan yoʻl-qurilish va taʼmirlash ishlarini bajarish uchun pudrat tashkilotlarining arizalarini qabul qiladi va umumlashtiradi, texnika, uskunalar va ulardan foydalana oladigan malakali mutaxassislar bilan taʼminlay olish imkoniyatlarining mavjudligidan kelib chiqib, pudrat tashkilotlari bilan shartnomalar tuzadi.

5. Kompaniya tomonidan bajarilgan mexanizatsiyalashgan ishlar uchun hisob-kitoblar pudrat tashkilotlari bilan tuzilgan shartnoma talablariga muvofiq, mexanizatsiyalashgan ishlar hajmiga bogʻliq holda amalga oshiriladi. Bunda pudrat tashkiloti Kompaniya tomonidan bajarilgan mexanizatsiyalashgan ishlarning toʻlovini amalga oshiradi, avtomobil yoʻllarini qurish, tiklash va taʼmirlash boʻyicha bajarilgan ishlarning umumiy hajmi esa belgilangan tartibda pudrat tashkilotining hisobiga kiritiladi.

6. Mexanizatsiyalashgan yoʻl-qurilish va taʼmirlash ishlarining qiymati pudrat ishlari bozori konyunkturasi va Kompaniya xoʻjalik faoliyatining yuzaga kelgan koʻrsatgichlaridan kelib chiqqan zaruriy rentabellik darajasini hisobga olgan holda, jumladan, texnika va uskunalardan foydalanish boʻyicha bevosita va boshqa xarajatlarni hisobga olib aniqlanadi.

7. Texnika va uskunalardan foydalanish va xizmat koʻrsatish boʻyicha bevosita xarajatlar tegishli texnika va uskunalardan foydalanish uchun qilinadigan joriy xarajatlardan, shuningdek, ishlarning joydan-joyga koʻchishini hisobga olgan holda ulardan foydalanadigan shaxsning ish haqi uchun qilinadigan xarajatlardan tashkil topadi.

8. Texnika va uskunalardan foydalanish uchun qilinadigan xarajatlar texnika va uskunalarning har bir turi va xili uchun joriy narxlarda mashina-soatlarda bajarilgan ishlarning hajmlariga muvofiq aniqlanadi. Mashina va mexanizmlardan foydalanishning joriy narxlari Oʻzbekiston Respublikasi Davlat arxitektura va qurilish qoʻmitasi tomonidan chiqarilgan Narxlar katalogi asosida yoki tegishli hududda yuzaga kelgan narxlarga muvofiq aniqlanadi.

9. Yoʻl-qurilish va taʼmirlash texnikasidan foydalanadigan shaxsning ish haqi uchun qilinadigan xarajatlar ishlarning mehnat sarfi normasini bir kishi-soat narxiga va ijtimoiy sugʻurta ushlab qolish miqdorini hisobga oluvchi koeffitsiyentga koʻpaytirish yoʻli bilan aniqlanadi. Ishlarning mehnat sarfi normasi va texnika va uskunalardan foydalanadigan shaxsning oʻrtacha bir soatlik ish haqi qonunda belgilangan tartibda hisoblanadi.

10. Boshqa xarajatlar tarkibiga qonunchilikka muvofiq zaruriy foyda, majburiy toʻlovlar va ajratmalar kiradi.

11. Kompaniya bilan tuzilgan shartnomaga muvofiq, pudrat tashkiloti Kompaniya hisob raqamiga mexanizatsiyalashgan yoʻl-qurilish va taʼmirlash ishlari qiymatining 15 foizidan kam boʻlmagan miqdorda boʻnak toʻlovini oʻtkazadi, shundan keyingina Kompaniya belgilangan muddatlarda texnika, uskunalar va ulardan foydalanadigan shaxslarni safarbar qiladi hamda shartnomada moʻljallangan mexanizatsiyalashgan ishlarni bajarishga kirishadi.

12. Amalda bajarilgan mexanizatsiyalashgan yoʻl-qurilish va taʼmirlash ishlari uchun hisob-kitoblar belgilangan tartibda rasmiylashtirilgan hisob-fakturalar asosida, ajratilgan boʻnakni mutanosib chegirib qolishni hisobga olgan holda bajarilgan ishlarning umumiy qiymatidan 95 foizgacha miqdorda har oyda amalga oshiriladi. Mexanizatsiyalashgan yoʻl-qurilish va taʼmirlash ishlari qiymatining qolgan 5 foiz toʻlovini pudrat tashkiloti shartnomada nazarda tutilgan kafolat muddati tugagandan keyin 3 bank ish kuni mobaynida amalga oshiradi.