Oʻzbekiston Respublikasi Prezidentining “2006—2008-yillarda toʻqimachilik sanoati korxonalarini modernizatsiya qilish va texnikaviy qayta jihozlash Dasturi toʻgʻrisida” 2006-yil 13-noyabrdagi PQ-510-son qaroriga muvofiq Vazirlar Mahkamasi qaror qiladi:

1. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi huzuridagi Idoralararo ekspertlar kengashi (keyingi oʻrinlarda “Ekspertlar kengashi” deb ataladi) tomonidan yengil sanoat korxonalarini qurish, qayta ixtisoslashtirish va modernizatsiya qilish boʻyicha takliflarni koʻrib chiqish tartibi toʻgʻrisidagi nizom 1-ilovaga muvofiq tasdiqlansin.

2. Quyidagilar Ekspertlar kengashining asosiy vazifalari etib belgilansin:

yengil sanoat korxonalarini qurish, qayta ixtisoslashtirish va modernizatsiya qilish boʻyicha takliflarni koʻrib chiqish va ularni amalga oshirish yuzasidan tavsiyalar berish;

yengil sanoat korxonalarini qurish, qayta ixtisoslashtirish va modernizatsiya qilish loyihalarini tanlash mezonlarini ishlab chiqish va tasdiqlash;

tasdiqlangan 2006—2008-yillarda toʻqimachilik sanoati korxonalarini modernizatsiya qilish va texnikaviy qayta jihozlash Dasturiga kiritilgan, korxonalarning oʻz ehtiyojlari uchun olib kelinadigan texnologik va yordamchi asbob-uskunalar, texnologik jihozlar va ehtiyot qismlar roʻyxatini ishlab chiqish va Oʻzbekiston Respublikasi Vazirlar Mahkamasiga tasdiqlash uchun kiritish;

yangi loyihalarni koʻrsatib oʻtilgan Dasturga kiritish yuzasidan takliflar kiritish;

yengil sanoatni yanada modernizatsiya qilish strategiyasi boʻyicha takliflarni ishlab chiqish va Oʻzbekiston Respublikasi Vazirlar Mahkamasiga kiritish;

yengil sanoat korxonalarini qurish, qayta ixtisoslashtirish va modernizatsiya qilish boʻyicha xorijiy investorlardan tushadigan takliflar boʻyicha axborotlarni toʻplash va umumlashtirish;

loyihalarni amalga oshirish bilan bogʻliq boʻlgan boshqa masalalar.

3. Oʻzbekiston Respublikasi Vazirlar Mahkamasining “Respublika toʻqimachilik tarmogʻiga investitsiyalar jalb etish chora-tadbirlari toʻgʻrisida” 2005-yil 27-yanvardagi 38-son qaroriga 3-ilova oʻz kuchini yoʻqotgan deb hisoblansin.

5. Oʻzbekiston Respublikasi Iqtisodiyot vazirligi, Moliya vazirligi, Tashqi iqtisodiy aloqalar, investitsiyalar va savdo vazirligi, Markaziy bank, “Oʻzbekyengilsanoat” davlat-aksiyadorlik kompaniyasi Oʻzbekiston Respublikasi Adliya vazirligi bilan birgalikda bir oy muddatda oʻz idoraviy normativ hujjatlarini mazkur qarorga muvofiqlashtirsinlar.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Mazkur Nizom Tashqi iqtisodiy aloqalar, investitsiyalar va savdo vazirligi huzuridagi Idoralararo ekspertlar kengashi (keyingi oʻrinlarda “Ekspertlar kengashi” deb ataladi) tomonidan yengil sanoat korxonalarini qurish, qayta ixtisoslashtirish va modernizatsiya qilish boʻyicha takliflarni koʻrib chiqish tartibini belgilaydi.

2. Ekspertlar kengashi oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlari va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasining boshqa normativ hujjatlariga, shuningdek mazkur Nizomga amal qiladi.

3. Mazkur Nizom mulkchilik shakllaridan va moliyalashtirish manbalaridan qatʼi nazar, yengil sanoat korxonalarini qurish, qayta ixtisoslashtirish va modernizatsiya qilish boʻyicha barcha loyihalarga tatbiq etiladi.

4. Quyidagilar Ekspertlar kengashining asosiy vazifalari hisoblanadi:

yengil sanoat korxonalarini qurish, qayta ixtisoslashtirish va modernizatsiya qilish boʻyicha takliflarni koʻrib chiqish va ularni amalga oshirish yuzasidan tavsiyalar berish;

yengil sanoat korxonalarini qurish, qayta ixtisoslashtirish va modernizatsiya qilish loyihalarini (keyingi oʻrinlarda “loyihalar” deb ataladi) tanlash mezonlarini ishlab chiqish va tasdiqlash;

tasdiqlangan 2006—2008-yillarda toʻqimachilik sanoati korxonalarini modernizatsiya qilish va texnikaviy qayta jihozlash Dasturiga kiritilgan, korxonalarning oʻz ehtiyojlari uchun olib kelinadigan texnologik va yordamchi asbob-uskunalar, texnologik jihozlar va ehtiyot qismlar roʻyxatini ishlab chiqish va Oʻzbekiston Respublikasi Vazirlar Mahkamasiga tasdiqlash uchun kiritish;

yangi loyihalarni koʻrsatib oʻtilgan Dasturga kiritish yuzasidan takliflar kiritish;

yengil sanoatni yanada modernizatsiya qilish strategiyasi boʻyicha takliflarni ishlab chiqish va Oʻzbekiston Respublikasi Vazirlar Mahkamasiga kiritish;

yengil sanoat korxonalarini qurish, qayta ixtisoslashtirish va modernizatsiya qilish boʻyicha xorijiy investorlardan tushadigan takliflar boʻyicha axborotlarni toʻplash va umumlashtirish;

loyihalarni amalga oshirish bilan bogʻliq boʻlgan boshqa masalalar.

5. Ekspertlar kengashi oʻziga yuklangan vazifalarni bajarish uchun quyidagi huquqlarga ega:

ishchi guruhlar tashkil etish;

majlislarga vazirliklar, idoralar, mahalliy davlat hokimiyati organlari, xoʻjalik boshqaruvi organlari vakillarini va loyihalar tashabbuskorlarini taklif etish;

vazirliklar va idoralardan hamda loyihalar tashabbuskorlaridan loyiha bilan bogʻliq statistika axborotlarini va boshqa axborotlarni soʻrab olish;

asbob-uskunalar va obyektlarning holatini baholash uchun konsalting kompaniyalarini jalb etish;

vakolatli organlarning loyihalar ekspertizasi amalga oshirilishining belgilangan tartibiga rioya qilishi ustidan monitoring olib borish.

Ekspertlar kengashi qonun hujjatlariga muvofiq boshqa huquqlarga ham ega boʻlishi mumkin.

6. Ekspertlar kengashi loyiha tashabbuskorining yozma murojaati boʻyicha loyihani ishlab chiqish va amalga oshirish bilan bogʻliq masalalar yuzasidan oʻz vakolatlari doirasida tushuntirishlar berishi shart.

7. Oʻzbekiston Respublikasi Tashqi iqtisodiy aloqalar, investitsiyalar va savdo vazirligining Xorijiy investitsiyalarni jalb etish va investitsiya loyihalari monitoringi bosh boshqarmasi (keyingi oʻrinlarda “ishchi organ” deb ataladi) Ekspertlar kengashining ishchi organi hisoblanadi.

8. Ekspertlar kengashi tomonidan yengil sanoat korxonalarini qurish, qayta ixtisoslashtirish va modernizatsiya qilish boʻyicha takliflarni koʻrib chiqish ikki bosqichda amalga oshiriladi.

9. Birinchi bosqichda tashabbuskor tomonidan Ekspertlar kengashiga yozma ariza kiritiladi, unga yengil sanoat korxonalarini qurish, qayta ixtisoslashtirish va modernizatsiya qilish boʻyicha taklif (keyingi oʻrinlarda “taklif” deb ataladi) ilova qilinadi.

Taklifda:

loyihaning iqtisodiy samaradorligining dastlabki hisob-kitoblari, oqilona joylashtirishni tanlash va loyihani amalga oshirishning eng samarali texnik, tashkiliy va iqtisodiy yechimi;

tashkil etiladigan ish oʻrinlari soni;

xomashyo bazasining mavjudligi hamda loyihani amalga oshirish davrida xomashyo va materiallar bilan kafolatli taʼminlash;

ishlab chiqarish rejalashtirilayotgan mahsulotning hajmi va turlari;

xarid variantlarini va uni amalga oshirish imkoniyati sxemalarini koʻrib chiqish asosida texnologik asbob-uskunalar qiymati;

ishlab chiqariladigan mahsulotning moʻljallanayotgan narxlari va sotish bozorlari;

moliyalashtirish manbalari va qarz mablagʻlari jalb etilgan taqdirda moʻljallanayotgan garov taʼminoti;

loyiha tashabbuskorining kreditni toʻlashga qodirligi va ushbu tarmoqdagi ish tajribasi toʻgʻrisidagi umumiy maʼlumotlar boʻlishi kerak.

Taklif unga dastlabki baho berish uchun ishchi organga yuboriladi.

Respublika markaziy idoralariga hamda mahalliy davlat hokimiyati organlariga tushadigan barcha takliflar ular tushgan sanadan boshlab uch kun muddatda ishchi organga berilishi, ayni vaqtda loyihalar tashabbuskorlari yozma ravishda xabardor qilinishi kerak.

Ekspertlar kengashi oʻz ishini mahalliy davlat hokimiyati organlari, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan oʻzaro mustahkam hamkorlikda tashkil etadi, oʻzining loyihani amalga oshirishning maqsadga muvofiqligi toʻgʻrisidagi asoslangan takliflarini kiritish va Ekspertlar kengashining majlislarida qatnashish huquqiga ega.

Ekspertlar kengashi tashabbuskor taklifining tasdiqlangan mezonlarga muvofiqligini oʻrganib hamda ishchi organning dastlabki bahosi natijalarini koʻrib chiqib oʻn ish kuni mobaynida bundan keyin ishlab chiqishning maqsadga muvofiqligi toʻgʻrisida rasmiy xulosa beradi.

10. Ikkinchi bosqichda tashabbuskor Ekspertlar kengashining xulosasini hisobga olgan holda loyihaning texnik-iqtisodiy asoslashini mustaqil ravishda ishlab chiqadi yoxud ixtisoslashtirilgan tashkilotlarni (loyihalash institutlarini, konsalting va injiniring kompaniyalarini) jalb etadi.

Loyihalarning texnik-iqtisodiy asoslashini ishlab chiqish Ekspertlar kengashi tomonidan tasdiqlanadigan yengil sanoat korxonalarini qurish, qayta ixtisoslashtirish va modernizatsiya qilish loyihalarini tanlab olish boʻyicha mezonlar asosida amalga oshiriladi.

Vazirlar Mahkamasining 2007-yil 7-iyundagi 110-son qarori bilan tasdiqlangan Investitsiya loyihalari hujjatlarini ishlab chiqish, ekspertizadan oʻtkazish va tasdiqlash tartibi toʻgʻrisidagi nizomning 1-bandida nazarda tutilgan tegishli talablarga muvofiq boʻlgan loyihalar boʻyicha loyihalarning texnik-iqtisodiy asoslashini ishlab chiqish va ekspertizadan oʻtkazish koʻrsatib oʻtilgan nizomning IV boʻlimiga muvofiq amalga oshiriladi.

11. Loyihaning texnik-iqtisodiy asoslashi ekspertizadan oʻtkazish uchun “Oʻzbekyengilsanoat” davlat-aksiyadorlik kompaniyasiga beriladi. Loyihaning texnik-iqtisodiy asoslashini “Oʻzbekyengilsanoat” davlat-aksiyadorlik kompaniyasida ekspertizadan oʻtkazish loyiha boʻyicha qabul qilingan texnologik yechimni (foydalaniladigan texnologiyalar darajasi, asbob-uskunalarning — texnologik jarayonning tavsiya etilayotgan zanjirining kompleksliligi, yuqori sifatli va keng turdagi mahsulotlar ishlab chiqarishni tashkil etish imkoniyati, xalqaro standartlarga muvofiq boʻlgan sifatni boshqarish tizimining mavjudligi, xomashyo bazasi bilan taʼminlanganlik, shuningdek umuman tarmoq boʻyicha loyihani amalga oshirishning kompleksliligi) baholash yuzasidan ikki hafta muddatda amalga oshiriladi. Loyihaning texnik-iqtisodiy asoslashini “Oʻzbekyengilsanoat” davlat-aksiyadorlik kompaniyasida ekspertizadan oʻtkazish natijalariga koʻra tashabbuskor uni koʻrib chiqish uchun Ekspertlar kengashiga kiritadi.

loyihaning texnik-iqtisodiy asoslashi;

“Oʻzbekyengilsanoat” davlat-aksiyadorlik kompaniyasining texnik-iqtisodiy asoslash yuzasidan ekspert xulosasi;

texnologik asbob-uskunalar yetkazib berish yuzasidan kontraktlarning loyihalari, loyihalarda asbob-uskunalarni yetkazib berish shartlari, ularning qiymati, rusumlari, texnik tavsiflari, asbob-uskunalarning ishlab chiqarilgan yili (spetsifikatsiyasi) mavjud boʻladi;

ishlab chiqarilishi rejalashtirilayotgan mahsulotlarni sotish yuzasidan fyuchers kontraktlarning loyihalari (moʻljallar protokollari), (agar mavjud boʻlsa).

Taqdim etilgan hujjatlarning ishonchliligi uchun loyiha tashabbuskori javob beradi.

Loyiha tashabbuskori “Oʻzbekyengilsanoat” davlat-aksiyadorlik kompaniyasi xulosasiga rozi boʻlmagan taqdirda Ekspertlar kengashiga asoslangan eʼtirozni taqdim etish huquqiga ega. Ekspertlar kengashi loyihaning texnik-iqtisodiy asoslashini “Oʻzbekyengilsanoat” davlat-aksiyadorlik kompaniyasi xulosalarini, shuningdek loyiha tashabbuskori fikrini hisobga olgan holda koʻrib chiqadi va tegishli qaror qabul qiladi.

12. Ishchi organ ushbu Nizomning 11-bandida koʻrsatilgan hujjatlar tushgan sanadan boshlab bir kun muddatda Ekspertlar kengashi raisi bilan Ekspertlar kengashining navbatdagi majlisini oʻtkazish sanasini (hujjatlar taqdim qilingan sanadan boshlab oʻn ish kunidan kechikmay) kelishib oladi va Ekspertlar kengashi aʼzolarini bu toʻgʻrida xabardor qiladi.

13. Quyidagilar loyihani Ekspertlar kengashi tomonidan baholashning asosiy mezonlari hisoblanadi:

loyihani amalga oshirishning umumiy iqtisodiy jihatdan maqsadga muvofiqligi va samaradorligi (ishlab chiqarish quvvatlarini maqbul tarzda joylashtirish, tashkil etiladigan ish oʻrinlari, tarmoqdagi tarkibiy oʻzgartirishlarga taʼsiri, ishlayotgan quvvatlardan foydalanilishi, zarur xomashyo, materiallar va infratuzilmalarning mavjudligi);

tayyor mahsulotlarni ham ichki, ham tashqi bozorda sotish imkoniyati va istiqbollari;

loyihaning eksportga yoʻnaltirilganligi — eksport qilishga moʻljallangan mahsulotlar hajmi ishlab chiqarish hajmining 70—80 foizidan kam boʻlmasligi kerak;

texnologik asbob-uskunalar darajasining zamonaviy sifat standartlari (ISO 9001)ga muvofiqligi, loyihada xalqaro standartlarga muvofiq boʻlgan sifatni boshqarish tizimining mavjudligi.

14. Ekspertlar kengashi oʻn ish kuni mobaynida takliflarni taqdim etilgan hujjatlar asosida koʻrib chiqadi va quyidagilar:

a) loyihani amalga oshirish imkoniyati;

b) aniq va asoslangan fikr-mulohazalar va kamchiliklarni koʻrsatgan holda loyihani puxta ishlab chiqishning zarurligi;

v) loyihani amalga oshirishning maqsadga muvofiq emasligi toʻgʻrisida qaror qiladi.

15. Ushbu Nizomning 14-bandi “b” kichik bandiga muvofiq puxta ishlab chiqilgan loyihalar koʻrib chiqish uchun Ekspertlar kengashiga belgilangan tartibda takroran kiritiladi.

16. Loyihaning texnik-iqtisodiy asoslashi boʻyicha Ekspertlar kengashining ijobiy qarori loyihaning texnik-iqtisodiy asoslashida nazarda tutilgan shartlar, talablar va parametrlarga muvofiq loyihani kelgusida amalga oshirish uchun asos hisoblanadi.

Ushbu Nizomning 10-bandi uchinchi xatboshida nazarda tutilgan loyihalarning texnik-iqtisodiy asoslashini tasdiqlash loyihaning texnik-iqtisodiy asoslashi boʻyicha Ekspertlar kengashining ijobiy qarori olingandan keyin Vazirlar Mahkamasining 2007-yil 7-iyundagi 110-son qarori bilan tasdiqlangan Investitsiya loyihalari hujjatlarini ishlab chiqish, ekspertizadan oʻtkazish va tasdiqlash tartibi toʻgʻrisidagi nizomning IV boʻlimiga muvofiq amalga oshiriladi.

17. Ekspertlar kengashi majlislari zaruriyatga koʻra, biroq har oyda kamida bir marta oʻtkaziladi.

Majlisni Ekspertlar kengashi raisi, u boʻlmagan taqdirda — Ekspertlar kengashi raisining oʻrinbosari oʻtkazadi.

Ekspertlar kengashi majlisi uning aʼzolarining kamida uchdan ikki qismi qatnashganda vakolatli hisoblanadi. Kvorum boʻlmagan taqdirda majlis boshqa muddatga koʻchiriladi. Ekspertlar kengashi aʼzolari uning majlislarida shaxsan qatnashishi kerak.

Ekspertlar kengashining mahalliy davlat hokimiyati organlari orqali kiritilgan takliflar koʻrib chiqiladigan majlisiga mahalliy davlat hokimiyati tegishli organlarining vakillari taklif etiladi.

Ekspertlar kengashining qarorlari Ekspertlar kengashining majlisda qatnashayotgan aʼzolarining oddiy koʻpchilik ovozi bilan qabul qilinadi. Ovoz berish ochiq usulda oʻtkaziladi. Ekspertlar kengashining har bir aʼzosi bitta ovozga ega boʻladi. Ekspertlar kengashi aʼzolarining ovozi teng boʻlgan taqdirda uning raisi ovozi, u boʻlmaganda — rais oʻrinbosarining ovozi hal qiluvchi hisoblanadi.

18. Majlislar qarorlari protokol bilan rasmiylashtiriladi. Protokolda oʻtkazilgan majlisning joyi va sanasi, kun tartibi, raislik qiluvchi, kotib, Ekspertlar kengashining majlisda qatnashgan aʼzolari, loyiha tashabbuskori, uning tomonidan tavsiya qilingan loyiha toʻgʻrisidagi axborot, Ekspertlar kengashining koʻrib chiqilgan masalalar boʻyicha qarorlari va xulosalari koʻrsatiladi.