Ўзбекистон Республикаси Президентининг

қарори

Тиббиёт муассасаларини фармацевтика маҳсулотлари ва тиббий жиҳозлар билан таъминлаш тизимини такомиллаштириш чора-тадбирлари тўғрисида

Аҳоли ва тиббиёт муассасаларининг сифатли дори воситалари, тиббий буюмлар, тиббий техника ва жиҳозлар билан таъминланганлик даражасини ошириш, уларга бўлган эҳтиёжни аниқлаш, харид қилиш, етказиб бериш ва беморларни улар билан барқарор таъминлашнинг ягона тизимини жорий этиш мақсадида:

1. Шундай тартиб ўрнатилсинки, унга мувофиқ дори воситалари ва тиббий буюмларга бўлган эҳтиёж:

туман (шаҳар) тиббиёт бирлашмалари, Қорақалпоғистон Республикаси, вилоятлар ва Тошкент шаҳри даражасидаги тиббиёт муассасалари, республика даражасидаги тиббиёт муассасалари, Соғлиқни сақлаш вазирлигининг доимий фаолият юритувчи ҳайъатлари томонидан шакллантирилади. Бунда эҳтиёжни ҳисоблаш ҳудуддаги касалланиш кўрсаткичлари бўйича беморлар сони, бир беморга талаб этиладиган кунлик миқдор, даволаш курсининг давомийлиги, мавжуд захира ҳамда демографик ҳолатни инобатга олган ҳолда амалга оширилади;

бюджет тўғрисидаги қонунчилик ҳужжатларида белгиланган муддатлар асосида келгуси йил учун Давлат бюджети параметрлари билан бир вақтда шакллантирилади;

дори воситалари ва тиббий буюмларга ўн беш ойлик эҳтиёж асосида шакллантирилиб, ундан омборхонадаги қолдиқ миқдорларни чегириш орқали аниқланади.

2. Белгилансинки, 2025 йил 1 январдан бошлаб:

а) Ўзбекистон Республикасининг «Давлат харидлари тўғрисида»ги Қонунига мувофиқ, шунингдек, Соғлиқни сақлаш вазирлиги ҳамда Иқтисодиёт ва молия вазирлиги томонидан белгиланадиган тартиб ва рўйхатга асосан қуйидаги дори воситалари ва тиббий буюмларнинг давлат харидини тўғридан-тўғри шартномалар асосида амалга оширишга рухсат этилади:

оригинал дори воситалари (уларнинг ишлаб чиқарувчиси ёки расмий етказиб берувчиси орқали);

ёпиқ турдаги лаборатория ускунаси учун махсус реагент, реактив ва сарфлов воситалари;

шошилинч ва тез тиббий ёрдам кўрсатиш учун зарур дори воситалари ва тиббий буюмлар.

Бунда:

оригинал дори воситалари ҳамда ёпиқ турдаги лаборатория ускунаси рўйхати Соғлиқни сақлаш вазирлиги томонидан тасдиқланади ҳамда вазирликнинг расмий веб-сайтига жойлаштирилади ва мунтазам янгилаб борилади;

тўғридан-тўғри шартномалар асосида сотиб олинадиган дори воситалари ва тиббий буюмларнинг шошилинч ва тез тиббий ёрдам кўрсатиш учун зарур миқдорда ва ҳажмда харид қилиниши бўйича масъулият ва шахсий жавобгарлик тиббиёт муассасаси раҳбари зиммасига юклатилади;

(2-банд «а» кичик бандининг бешинчи хатбошиси Ўзбекистон Ўзбекистон Республикаси Президентининг 2025 йил 19 майдаги ПФ-88-сонли Фармонига асосан бешинчи — еттинчи хатбошилар билан алмаштирилган — Қонунчилик маълумотлари миллий базаси, 22.05.2025 й., 06/25/88/0459-сон)

б) Соғлиқни сақлаш вазирлиги томонидан давлат харидлари соҳасидаги ваколатли орган билан келишилган ҳолда тасдиқланган тўғридан-тўғри шартномалар бўйича харид қилинадиган дори воситалари ва тиббиётда қўлланадиган буюмларнинг амалдаги рўйхатлари бекор қилинади;

в) дори воситалари, тиббий ускуналар ва буюмларнинг марказлашган тартибда амалга ошириладиган харидида уларнинг бошланғич нархини аниқлаш бўйича маркетинг тадқиқотлари ўтказилади;

г) қуйидаги дори воситаларини марказлашган тартибда харид қилиш тақиқланади:

умумий яроқлилик муддати икки йилгача бўлганда — етказиб бериладиган вақтда 30 фоиздан ортиқ муддати ўтган;

умумий яроқлилик муддати уч йилгача бўлганда — етказиб бериладиган вақтда 40 фоиздан ортиқ муддати ўтган;

умумий яроқлилик муддати уч йилдан ортиқ бўлганда — етказиб бериладиган вақтда 50 фоиздан ортиқ муддати ўтган.

Ушбу бандда назарда тутилган талаблар давлат захирасидан чиқарилган дори воситаларини харид қилиш учун татбиқ этилмайди.

3. Тиббиёт муассасаларини дори воситалари, тиббий буюмлар, тиббий техника ва жиҳозлар билан таъминлаш бўйича «йўл харитаси» 1-иловага мувофиқ тасдиқлансин.

4. Соғлиқни сақлаш вазирлигининг қуйидаги таклифларига розилик берилсин:

а) «Oʻzmedimpeks» ва «Тиббиёт техникаларига хизмат кўрсатиш ўқув-ишлаб чиқариш маркази» давлат муассасалари негизида Соғлиқни сақлаш вазирлиги ҳузурида давлат муассасаси шаклида Харидлар марказини (кейинги ўринларда — Марказ) ҳамда Марказнинг 13 та ҳудудий филиалини ташкил этиш.

Бунда Марказ «Oʻzmedimpeks» ва «Тиббиёт техникаларига хизмат кўрсатиш ўқув-ишлаб чиқариш маркази» давлат муассасаларининг барча ҳуқуқлари, мажбуриятлари ва шартномалари бўйича ҳуқуқий вориси ҳисобланади;

б) дори воситалари, тиббий буюмлар, тиббий техника ва жиҳозлар учун марказлашган тартибда амалга ошириладиган харидларни Марказ ҳамда ишлаб чиқарувчи (расмий етказиб берувчи) ўртасида тузиладиган узоқ муддатли (бир йилдан ортиқ муддатга) шартнома асосида амалга ошириш;

в) БМТнинг тараққиёт дастури билан ҳамкорликда дори воситалари ва тиббий ускуналарни харид қилиш, сақлаш, етказиб бериш ва беморлар таъминоти тизимини ташкил этиш ҳамда ушбу жараёнларни рақамлаштириш бўйича лойиҳани (кейинги ўринларда — Лойиҳа) амалга ошириш.

Бунда Лойиҳа доирасида ҳудудларда дори воситалари ва тиббий ускуналарни сақлаш учун зарур талаблар асосида жиҳозланган омборлар ташкил этилади ҳамда уларни тиббиёт муассасасигача етказиб бериш учун ҳароратни назорат қилиш мосламалари билан жиҳозланган махсус автотранспорт воситалари билан таъминланади.

5. Қуйидагилар Марказнинг асосий вазифалари этиб белгилансин:

Соғлиқни сақлаш вазирлиги буюртмасига кўра тиббиёт муассасаларини дори ва сарфлов воситалари, тиббий буюмлар, тиббий ускуналар, реагентлар, реактивлар, бутловчи қисмлар ва бошқа асосий воситалар (кейинги ўринларда — тиббий товарлар) билан таъминлаш учун давлат харидларини амалга ошириш;

харид қилинган тиббий товарларни зарур талаблар асосида сақлаш ҳамда тиббиёт муассасаларига етказиб бериш;

ягона электрон тизим орқали тиббий жиҳозлар ҳисобини юритиш, ҳар бир тиббиёт муассасаси кесимида тиббий жиҳозларнинг самарали ишлатилиши бўйича мониторинг олиб бориш;

тиббиёт муассасаларига тиббий ускуна харид қилиш учун техник топшириқларни ишлаб чиқишда кўмаклашиш;

соғлиқни сақлаш тизимидаги тиббиёт муассасаларини тиббий ускуналар билан таъминлаш бўйича ягона сиёсат юритиш, тиббиёт муассасаларини жиҳозлаш бўйича минимал талабларни ишлаб чиқиш, марказлашган тартибда харид қилинган тиббий жиҳозларнинг тиббиёт муассасаларида ўрнатилишини, уларга техник хизмат кўрсатилишини ташкил этиш ҳамда соз ҳолатда бўлишини таъминлаш;

тиббиёт муассасалари учун харид қилинган тиббий техникаларнинг кафолат даврида етказиб берувчи томонидан ўз мажбуриятларининг шартнома шартларига мувофиқ тўлиқ бажарилишини ташкил этиш;

шартнома асосида тиббиёт муассасаларига улардаги тиббий ускуналарни таъмирлаш ёки белгиланган тартибда ҳисобдан чиқариш бўйича эксперт хулосасини бериш.

6. Соғлиқни сақлаш вазирлиги:

а) икки ой муддатда Лойиҳа амалиётга тўлиқ жорий этилгунгача марказлашган тартибда харид қилинадиган тиббий товарларни сақлаш ва тиббиёт муассасаларига етказиб беришни аутсорсинг асосида ташкил этиш бўйича тендер (танлов) савдоларини эълон қилсин. Бунда давлат хариди ғолиби билан шартнома имзолаш ҳамда кўрсатилган хизматлар учун ҳақ тўлаш Марказ томонидан амалга оширилади;

б) ҳар йили 15 январга қадар Марказ билан тиббий товарларни марказлашган тартибда харид қилиш бўйича шартномалар имзоланишини таъминласин;

в) икки ой муддатда Давлат активларини бошқариш агентлиги, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари билан биргаликда Марказ ва унинг ҳудудий филиалларини тиббиёт муассасаларининг бўш турган биноларига текин фойдаланиш ҳуқуқи асосида жойлаштирсин;

г) дори воситаларининг бевосита ишлаб чиқарувчиларидан (расмий етказиб берувчиларидан) узоқ муддатли харидини амалга ошириш учун Марказ фаолиятини замонавий бошқарув усуллари асосида ташкил этиш ҳамда унинг молиявий барқарорлигини таъминлаш, шунингдек, ишлаб чиқарувчилар билан музокаралар ўтказиш чораларини кўрсин.

7. Белгилаб қўйилсинки:

Соғлиқни сақлаш вазирлиги буюртмасига кўра марказлашган харидларни амалга оширишда Марказ фаолиятини молиялаштириш, харид қилинган тиббий товарларни сақлаш ҳамда жойларга етказиш тизимини аутсорсинг асосида ташкил этиш, тиббий ускуналарга хизмат кўрсатиш (бутловчи қисмлар ва сарфлов материаллари бундан мустасно) харажатлари учун харид суммасидан 8 фоизгача миқдорда хизмат ҳақи белгиланади ҳамда кўрсатиладиган хизматлар учун кўзда тутилган маблағларнинг камида 50 фоизи Марказга олдиндан ўтказиб берилади.

Бунда Марказ хизматларига тўловлар учун зарур маблағлар ҳар йилги ривожлантириш давлат дастурларини амалга ошириш учун Соғлиқни сақлаш вазирлигига ажратилган маблағлар ҳисобидан қопланади.

Марказда тиббий ускуналарни харид қилишда тиббиёт муассасасининг хусусиятидан келиб чиқиб, техник топшириқларни ишлаб чиқиш ҳамда уларга даврий хизмат кўрсатишни амалга оширувчи тиббий муҳандислар гуруҳи ташкил этилади.

8. Иқтисодиёт ва молия вазирлиги:

а) тиббий товарларнинг марказлашган тартибдаги хариди бўйича шартнома тузилиб, аванс тўловлари амалга оширилган ҳамда ушбу шартнома асосида келгуси молия йилида етказиб бериладиган товарлар учун юридик мажбурият билан банд қилинган маблағлар қолдиғининг молия йили якунида Марказнинг бюджетдан ташқари шахсий ғазна ҳисобварағига ўтказиб берилишини таъминласин;

б) Соғлиқни сақлаш вазирлиги билан биргаликда:

Ўзбекистон Республикасининг ижтимоий ва ишлаб чиқариш инфратузилмасини ривожлантириш дастурларида қурилиш-таъмирлаш ишлари олиб бориладиган тиббиёт муассасаларини тиббий техника ва бошқа зарур жиҳозлар билан таъминлаш меъёрлари асосида уларни жиҳозлаш учун зарур маблағлар кўзда тутилишини;

тиббий товарларнинг марказлашган хариди учун ишлаб чиқарувчи (расмий етказиб берувчи) билан тузиладиган узоқ муддатли шартномаларнинг ғазначилик хизмати органларида белгиланган тартибда рўйхатдан ўтказилишини таъминласин.

9. Соғлиқни сақлаш вазирлиги:

а) Иқтисодиёт ва молия вазирлиги билан биргаликда бир ой муддатда марказлашган тартибда харид қилинадиган ва амбулатор шароитда бериладиган дори воситаларини реимбурсация дастури асосида дорихоналар орқали тақдим этиш бўйича таклиф киритсин.

Бунда тиббий ёрдамнинг кафолатланган ҳажмига киритилган ва амбулатор шароитда бериладиган дори воситалари учун ажратиладиган маблағлар ҳар йили консолидациялашган тартибда Давлат тиббий суғуртаси жамғармасига режалаштирилиши кўзда тутилади;

б) уч ой муддатда манфаатдор вазирлик ва идоралар билан биргаликда қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.

10. Бош прокуратура ҳузуридаги Иқтисодий жиноятларга қарши курашиш департаменти (кейинги ўринларда — Департамент) соғлиқни сақлаш тизимида дори воситалари ва тиббий буюмлар харидининг қонунийлиги ва мақсадлилигини таъминлаш, уларнинг манзилли етказилиши устидан қатъий назорат ўрнатсин. Бунда:

дори воситалари ва тиббий буюмларга бўлган эҳтиёжни шакллантириш бўйича республика ва ҳудудий ҳайъатлар таркибига бир нафардан Департамент ходимлари киритилади;

йил якунида амалга оширилган харидларнинг қонунийлиги ва мақсадлилиги Давлат молиявий назорати инспекцияси томонидан ўрганилади.

11. Ўзбекистон Республикаси Президентининг ва Ўзбекистон Республикаси Ҳукуматининг айрим ҳужжатларига 2-иловага мувофиқ ўзгартириш ва қўшимчалар киритилсин.

12. Мазкур қарорнинг ижросини самарали ташкил қилишга масъул ва шахсий жавобгар этиб Ўзбекистон Республикаси соғлиқни сақлаш вазири А.А. Худаяров белгилансин.

Қарор ижросини муҳокама қилиб бориш, ижро учун масъул ташкилотлар фаолиятини мувофиқлаштириш ва назорат қилиш Ўзбекистон Республикасининг Бош вазири А.Н. Арипов зиммасига юклансин.

Ўзбекистон Республикаси Президенти Ш. МИРЗИЁЕВ

Тошкент ш.,

2024 йил 29 ноябрь,

ПҚ-408-сон

Ўзбекистон Республикаси Президентининг 2024 йил 29 ноябрдаги ПҚ-408-сон қарорига
1-ИЛОВА

Тиббиёт муассасаларини дори воситалари, тиббий буюмлар, тиббий техника ва жиҳозлар билан таъминлаш бўйича

«ЙЎЛ ХАРИТАСИ»

Т/р	Чора-тадбирлар	Амалга ошириш механизми	Амалга ошириш шакли	Ижро муддати	Масъул ижрочилар
1.	Тиббиёт муассасаларида дори воситалари, тиббий буюмлар ва сарфлов воситаларига бўлган эҳтиёжни шакллантиришни тартибга солиш.	Дори воситалари, тиббий буюмлар ва сарфлов воситаларига бўлган эҳтиёжни шакллантириш тартибини ишлаб чиқиш.	Идоравий ҳужжат	2025 йил январь	Соғлиқни сақлаш вазирлиги (А. Худаяров)
2.	Соғлиқни сақлаш вазирлиги ҳузуридаги «Харидлар маркази» давлат муассасаси ҳамда унинг 13 та ҳудудий филиали фаолиятини самарали йўлга қўйиш.	1. Соғлиқни сақлаш вазирлиги ҳузуридаги «Харидлар маркази» давлат муассасаси ва унинг ҳудудий филиаллари фаолиятини тартибга солувчи низомларни ишлаб чиқиш ва тасдиқлаш.	Идоравий ҳужжат	2025 йил январь	Соғлиқни сақлаш вазирлиги (А. Худаяров)
2.		2. Харидлар марказининг 13 та ҳудудий филиали фаолиятини йўлга қўйиш, уларни бино, омборхона, автотранспорт воситалари, зарур асбоб-ускуналар билан таъминлаш чораларини кўриш.	Амалий чора-тадбирлар	2025 йил апрель	Соғлиқни сақлаш вазирлиги (А. Худаяров)
3.	Дори воситалари ва тиббий буюмларнинг харидини тартибга солиш.	2. Дори воситалари ва тиббий буюмлар харидини тўғридан-тўғри шартномалар асосида амалга ошириш тартибини ишлаб чиқиш. Бунда оригинал дори воситалари ҳамда ёпиқ турдаги лаборатория ускунаси рўйхати Соғлиқни сақлаш вазирлиги томонидан тасдиқланади ва расмий веб-сайтига жойлаштириб борилади.	Идоравий ҳужжат	2025 йил июль	Соғлиқни сақлаш вазирлиги (А. Худаяров), Иқтисодиёт ва молия вазирлиги (О. Фозилкаримов)
3.		3. Дори воситалари ва тиббий буюмларнинг дастлабки харид суммасини белгилаш учун қуйидагиларни назарда тутувчи маркетинг тадқиқотларини ўтказиш тартибини тасдиқлаш: харид нархини сунъий ошишининг олдини олишга, географик жиҳатдан яқин давлатлардаги ўртача нархларни ҳамда сўнгги уч йилдаги нархларнинг ўзгариш динамикасини таҳлил қилишга қаратилган чораларни белгилаш; дори воситалари ва тиббий буюмлар харидини маркетинг тадқиқотлари асосида лотларга бўлган ҳолда амалга ошириш.	Идоравий ҳужжат	2025 йил июль
4.	Дори воситалари ва тиббий буюмларнинг референт нархларини белгилаш тартибини қайта кўриб чиқиш.	Халқаро ташкилот ва экспертларнинг тавсиялари асосида референт нархни шакллантириш тизими доирасида дори воситалари нархларини қайд этиш тартибини қайта ишлаб чиқиш.	Идоравий ҳужжат	2025 йил май	Соғлиқни сақлаш вазирлиги (А. Худаяров), Рақобатни ривожлантириш ва истеъмолчилар ҳуқуқларини ҳимоя қилиш қўмитаси (Х. Турахужаев), Иқтисодиёт ва молия вазирлиги (О. Фозилкаримов)
5.	Тиббиёт муассасалари томонидан шошилинч ва тез тиббий ёрдам кўрсатиш учун зарур дори воситалари ва тиббий буюмлар харид қилинишини такомиллаштириш.	Тиббиёт муассасалари томонидан шошилинч ва тез тиббий ёрдам кўрсатиш учун зарур дори воситалари ва тиббий буюмларни камида бир чорак учун талаб этиладиган ҳажмда харид қилиш учун зарур маблағларнинг тиббиёт муассасаларига ажратилишини таъминлаш.	Амалий чора-тадбирлар	Доимий	Соғлиқни сақлаш вазирлиги (А. Худаяров), Иқтисодиёт ва молия вазирлиги (О. Фозилкаримов), Давлат тиббий суғуртаси жамғармаси (З. Эрматов)
6.	Ягона электрон тизим орқали тиббий жиҳозлар ҳисобини юритиш ва улардан самарали фойдаланиш механизмларини жорий этиш.	1. Давлат тиббиёт муассасаларидаги тиббий жиҳозлар ва бошқа асосий воситалар ҳисобини юритиш, уларнинг ҳолатини доимий мониторинг қилиб бориш бўйича электрон тизим яратиш. 2. Тиббий ускуналар муҳандисларини жалб қилган ҳолда тиббиёт муассасаларида фойдаланиладиган асосий турдаги тиббий жиҳозларни белгилаш ҳамда тиббий жиҳозларнинг миллий таснифини ишлаб чиқиш.	Амалий чора-тадбирлар	2025 йил июль	Соғлиқни сақлаш вазирлиги (А. Худаяров), Рақамли технологиялар вазирлиги (Ш. Шерматов)
7.	Тиббий жиҳозларни таъмирловчи ҳамда уларга хизмат кўрсатувчи тиббиёт муҳандисларини тайёрлашни тизимли равишда йўлга қўйиш.	Халқаро экспертларни жалб этган ҳолда тиббий жиҳозларни таъмирловчи ҳамда уларга хизмат кўрсатувчи тиббиёт муҳандисларини тайёрлаш, қайта тайёрлаш ва малакасини ошириш тизимини такомиллаштириш юзасидан Вазирлар Маҳкамасига таклиф киритиш.	Амалий чора-тадбирлар	2025 йил май	Соғлиқни сақлаш вазирлиги (А. Худаяров), Олий таълим, фан ва инновациялар вазирлиги (К. Шарипов)

Изоҳ: «Йўл харитасида» белгиланган чора-тадбирларни амалга оширишда ишлаб чиқилаётган ҳужжат шакли ўзгартирилиши ёки ишлаб чиқилаётган ҳужжат бошқа бандларда кўзда тутилган ҳужжатлар билан бирлаштирилиши мумкин. Икки ва ундан ортиқ ҳужжатлар бирлаштиришда тегишли бандлар бажарилиши учун белгиланган энг охирги муддат ишлаб чиқиш муддати ҳисобланади.

(1-илова Ўзбекистон Республикаси Президентининг 2025 йил 19 майдаги ПФ-88-сонли Фармони таҳририда — Қонунчилик маълумотлари миллий базаси, 22.05.2025 й., 06/25/88/0459-сон)

Ўзбекистон Республикаси Президентининг 2024 йил 29 ноябрдаги ПҚ-408-сон қарорига
2-ИЛОВА

Ўзбекистон Республикаси Президентининг ва Ўзбекистон Республикаси Ҳукуматининг айрим ҳужжатларига киритилаётган ўзгартириш ва қўшимчалар

1. Ўзбекистон Республикаси Президентининг 2017 йил 17 июлдаги «Аҳолини дори воситалари ва тиббиёт буюмлари билан таъминлаш тизимини такомиллаштириш бўйича қўшимча чора-тадбирлар тўғрисида»ги ПҚ-3137-сон қарорининг 1-бандида:

а) иккинчи хатбошидаги «Oʻzmedimpeks» масъулияти чекланган жамияти (кейинги ўринларда «Oʻzmedimpeks» МЧЖ деб юритилади)» сўзлари «Харидлар маркази» давлат муассасаси» сўзлари билан алмаштирилсин;

б) бешинчи — еттинчи хатбошилар қуйидаги таҳрирда баён этилсин:

«Ўзбекистон Республикаси Президенти ва Ҳукуматининг соғлиқни сақлаш соҳаси бўйича қабул қилинган қарорлари билан тасдиқланган Давлат дастурларида белгиланган тадбирларни амалга ошириш ҳамда шу мақсадлар учун ажратилган бюджет ва бюджетдан ташқари маблағлардан ўз вақтида, мақсадли ва самарали фойдаланиш, шунингдек, тиббиёт муассасаларини замонавий тиббий ускуналар, реагентлар, реактивлар, бутловчи қисмлар, дори воситалари ва сарфлаш материаллари, тиббий буюмлар ва бошқа асосий воситалар билан узлуксиз таъминлаш мақсадида давлат харидлари Соғлиқни сақлаш вазирлиги буюртмаси асосида «Харидлар маркази» давлат муассасаси томонидан амалга оширилади. Бунда «Харидлар маркази» давлат муассасаси учун Иқтисодиёт ва молия вазирлигида шахсий ғазна ҳисобварағи очилади ҳамда бюджет маблағлари олувчиси сифатида харажатлар сметаси ўрнатилган тартибда Соғлиқни сақлаш вазирлиги томонидан рўйхатдан ўтказилади;

«Харидлар маркази» давлат муассасаси томонидан кўрсатиладиган хизмат учун тўлов миқдори харид суммасининг 8 фоизигача миқдорда белгиланади ва ушбу тўловлар Соғлиқни сақлаш вазирлиги билан тузиладиган шартнома асосида вазирлик томонидан тўлаб берилади;

Соғлиқни сақлаш вазирлиги буюртмасига асосан «Харидлар маркази» давлат муассасаси томонидан импорт шартномалари асосида тиббий ускуналар, реагентлар, реактивлар, бутловчи қисмлар, дори воситалари ва сарфлаш материаллари, тиббий буюмлар ва бошқа асосий воситаларнинг хариди «Харидлар маркази» давлат муассасасига хизмат кўрсатувчи тижорат банки орқали аккредитив тўлов асосида амалга оширилади»;

в) тўққизинчи хатбоши қуйидаги таҳрирда баён этилсин:

«Харидлар маркази» давлат муассасасига харид қилинган маҳсулотларни сақлаш, уларни жойларга етказиб бериш ҳамда тиббий ускуналарга хизмат кўрсатиш хизматини аутсорсинг асосида ташкил этиш ҳуқуқи берилсин».

(Ўзбекистон Республикаси Президентининг 2025 йил 26 декабрдаги ПФ-259-сонли Фармонига асосан 2-банднинг ўз кучини йўқотиш санаси — 2026 йил 1 январь — Қонунчилик маълумотлари миллий базаси, 27.12.2025 й., 06/25/259/1224-сон)

3. Ўзбекистон Республикаси Президентининг 2018 йил 7 ноябрдаги «Давлат тиббиёт муассасалари ва соғлиқни сақлашни бошқариш органлари ходимларини моддий рағбатлантиришни кучайтириш чора-тадбирлари тўғрисида»ги ПҚ-4007-сон қарорида:

а) 5-банднинг «а» кичик бандида:

учинчи хатбоши қуйидаги таҳрирда баён этилсин:

«Тиббиёт ходимларининг касбий малакасини ривожлантириш маркази, Республика ўрта тиббиёт ва фармацевтика ходимлари малакасини ошириш ва уларни ихтисослаштириш маркази ҳамда унинг ҳудудий бўлинмалари, тиббиёт олий таълим муассасалари ва уларнинг филиаллари, республика ихтисослаштирилган илмий-амалий тиббиёт марказлари ва уларнинг филиаллари, Тиббиёт ва фармацевтика ходимларининг малакасини баҳолаш маркази ва унинг ҳудудий бўлинмаларининг клиник ординатура, малака ошириш, мавзули ўқиш, қайта тайёрлаш ва баҳолаш бўйича пулли тушумлари миқдорининг 5 фоизи»;

қуйидаги мазмундаги хатбоши билан тўлдирилсин:

«Фармацевтика маҳсулотлари хавфсизлиги марказининг барча турдаги маҳсулотларни давлат рўйхатидан ўтказиш ва сертификатлаштириш билан боғлиқ кўрсатиладиган хизматлар тушумлари миқдорининг 10 фоизи»;

«б» кичик банд қуйидаги таҳрирда баён этилсин:

«б) Соғлиқни сақлаш вазирлиги ҳузуридаги барча бюджетдан ташқари жамғармаларнинг вақтинча бўш маблағларини тижорат банкларининг депозитларига жойлаштиришдан олинадиган даромадлар»;

б) 6-банднинг «б» кичик бандидаги «37,5» рақами «70» рақами билан алмаштирилсин.

4. Ўзбекистон Республикаси Президентининг 2020 йил 21 августдаги «Маҳаллий ишлаб-чиқарувчиларни қўллаб-қувватлашга доир қўшимча чора-тадбирлар тўғрисида»ги ПҚ-4812-сон қарори 2-банди «б» кичик бандининг тўртинчи хатбошиси «давлат сирлари» сўзларидан кейин «ҳамда Соғлиқни сақлаш вазирлигининг буюртмасига асосан аҳолининг эҳтиёжидан келиб чиқиб, импорт шартномалари асосида олиб келинадиган дори воситалари, тиббий буюмлар ва тиббий ускуналар» сўзлари билан тўлдирилсин.

5. Ўзбекистон Республикаси Президентининг 2021 йил 28 июлдаги «Соғлиқни сақлаш соҳасида ихтисослаштирилган тиббий ёрдам кўрсатиш тизимини янада такомиллаштириш чора-тадбирлари тўғрисида»ги ПҚ-5199-сон қарорига 2-илованинг II бўлими номланишидаги «2025 йил 1 январдан» сўзлари «2025 йил 1 апрелдан» сўзлари билан алмаштирилсин.

6. Ўзбекистон Республикаси Президентининг 2022 йил 26 октябрдаги «Аҳолини сифатли дори воситалари ва тиббий буюмлар билан таъминлаш юзасидан қўшимча чора-тадбирлар тўғрисида»ги ПҚ-411-сон қарори 3-бандининг «а» кичик бандидаги «2025» рақами «2028» рақами билан алмаштирилсин.

7. Ўзбекистон Республикаси Президентининг 2023 йил 24 мартдаги «Иқтисодиётда давлат иштирокини қисқартиришнинг қўшимча чора-тадбирлари тўғрисида»ги ПҚ-102-сон қарорига 1-илованинг 449, 454, 457, 458, 459, 462, 463, 464, 465, 467, 468 ва 469-позициялари чиқариб ташлансин.

8. Ўзбекистон Республикаси Президентининг 2023 йил 20 июндаги «Маъмурий ислоҳотлар доирасида соғлиқни сақлаш соҳасида давлат бошқарувини самарали ташкил қилиш чора-тадбирлари тўғрисида»ги ПҚ-197-сон қарорига 2-илованинг 5-позициясидаги «Oʻzmedimpeks» давлат муассасаси» сўзлари «Харидлар маркази» давлат муассасаси» сўзлари билан алмаштирилсин.

9. Ўзбекистон Республикаси Президентининг 2024 йил 10 январдаги «Фармацевтика тармоғини янада ривожлантириш ва инвестиция лойиҳаларини амалга оширишни жадаллаштириш бўйича қўшимча чора-тадбирлар тўғрисида»ги ПҚ-14-сон қарори 4-бандининг учинчи хатбошиси қуйидаги таҳрирда баён этилсин:

«2025 йил 1 апрелдан дори воситалари ва тиббий буюмлар харидлари Соғлиқни сақлаш вазирлиги ҳамда Иқтисодиёт ва молия вазирлиги томонидан тасдиқланган тартибга мувофиқ лотларга бўлган ҳолда амалга оширилади».

10. Ўзбекистон Республикаси Президентининг 2024 йил 5 сентябрдаги ПҚ-311-сон қарори билан тасдиқланган Давлат тиббий суғуртаси жамғармаси тўғрисидаги низомда:

а) 6-бандда «ижро этувчи аппаратини» сўзлари «ижро этувчи аппарати ва ҳудудий бўлинмаларини» сўзлари билан алмаштирилсин;

б) 23-банднинг ўн биринчи хатбошисида «ижро этувчи аппарати» сўзлари «ижро этувчи аппарати ва ҳудудий бўлинмалари» сўзлари билан алмаштирилсин;

в) 27-бандда:

бешинчи хатбошида «таркибий бўлинмалари» сўзлари «таркибий ва ҳудудий бўлинмалари» сўзлари билан, «ижро этувчи аппаратининг тузилмасига» сўзлари «ижро этувчи аппарати ва ҳудудий бўлинмаларининг тузилмаларига» сўзлари билан алмаштирилсин;

олтинчи хатбошида «ижро этувчи аппарати» сўзлари «ижро этувчи аппарати ва ҳудудий бўлинмалари» сўзлари билан алмаштирилсин;

г) 28 ва 29-бандларда «ижро этувчи аппарати» сўзлари «ижро этувчи аппарати ва ҳудудий бўлинмалари» сўзлари билан алмаштирилсин;

д) 31-бандда «ходимларга» сўзи «Жамғарманинг ижро этувчи аппарати ва ҳудудий бўлинмалари ходимларига» сўзлари билан алмаштирилсин.

11. Вазирлар Маҳкамасининг 2017 йил 18 сентябрдаги «Ижтимоий аҳамиятга эга дори воситалари ва тиббиёт буюмларига эҳтиёжни аниқлаш тартиби тўғрисидаги низомни тасдиқлаш ҳақида»ги 741-сон қарори ўз кучини йўқотган деб ҳисоблансин.

12. Вазирлар Маҳкамасининг 2021 йил 29 январдаги «Маҳаллий ишлаб чиқарувчиларни қўллаб-қувватлаш чора-тадбирлари тўғрисида»ги 41-сон қарорига 2-илованинг изоҳи қуйидаги таҳрирда баён этилсин:

«Товарнинг тўлиқ номланиши Вазирлар Маҳкамасининг 2022 йил 31 декабрдаги «Ўзбекистон Республикасининг ташқи иқтисодий фаолиятини тартибга солиш бўйича қўшимча чора-тадбирлар тўғрисида»ги 733-сон қарорига мувофиқ тавсифланади.

Мазкур рўйхат ҳаво кемалари ва авиадвигателларга техник хизмат кўрсатиш ва таъмирлашда қўлланадиган ҳамда олиб кириладиган бутловчи ва эҳтиёт қисмлар, деталлар ва сарфланадиган материалларга (тўқимачилик маҳсулотлари бундан мустасно), шунингдек, Соғлиқни сақлаш вазирлиги буюртмасига кўра марказлашган тартибда харид қилинадиган товарларга нисбатан татбиқ этилмайди.

Мазкур рўйхатда кўрсатилган электротехника ва унинг қисмларини импорт қилиш бўйича назарда тутилган чекловлар давлат буюртмачилари томонидан қонунчиликда белгиланган тартибда жалб қилинган пудрат ташкилотларига нисбатан ҳам татбиқ этилади».

Изоҳ: 9-банд 2025 йил 1 апрелдан бошлаб амалга киритилади.

(Қонунчилик маълумотлари миллий базаси, 05.12.2024 й., 07/24/408/1005-сон; 22.05.2025 й., 06/25/88/0459-сон; 27.12.2025 й., 06/25/259/1224-сон)