Ўзбекистон Республикаси Президентининг 2018 йил 20 августдаги «Наманган» эркин иқтисодий зонасини ташкил этиш тўғрисида»ги ПФ-5517-сон Фармонига мувофиқ, «Наманган» эркин иқтисодий зонаси ҳудудини кенгайтириш, замонавий технологияларни жорий қилиш, тадбиркорлар учун қулай шароитлар яратиш ҳамда импорт ўрнини босувчи ва экспортбоп маҳсулотлар ишлаб чиқариш қувватларини ташкил қилиш мақсадида:

1. Наманган вилояти ҳокимлиги, Инвестициялар, саноат ва савдо вазирлиги, Қишлоқ хўжалиги вазирлиги ҳамда Кадастр агентлигининг:

иловага мувофиқ Тўрақўрғон тумани ҳокимлиги захирасидаги Ибрат массивида жойлашган 70,0 гектар бўш турган қишлоқ хўжалигига мўлжалланган суғориладиган ер майдонини қишлоқ хўжалигига мўлжалланган ерлар тоифасидан саноат, транспорт, алоқа, мудофаа ва бошқа мақсадларга мўлжалланган ерлар тоифасига ўтказиш;

Тўрақўрғон туманидан 70,0 гектар бўш ер участкаларини ажратиш ҳисобига «Наманган» эркин иқтисодий зонаси ҳудудини кенгайтириш тўғрисидаги таклифларига розилик берилсин.

2. Наманган вилояти ҳокимлиги:

а) Қишлоқ хўжалиги вазирлиги ҳамда Кадастр агентлиги билан биргаликда бир ой муддатда ушбу қарор талабларидан келиб чиқиб давлат ер кадастри маълумотларига тегишли ўзгартиришлар киритсин;

б) Қурилиш ва уй-жой коммунал хўжалиги вазирлиги ҳамда Инвестициялар, саноат ва савдо вазирлиги билан биргаликда «Наманган» эркин иқтисодий зонаси дирекцияси» давлат унитар корхонаси маблағлари ҳисобига бир ой муддатда «Наманган» эркин иқтисодий зонасининг янги ҳудудлари (кейинги ўринларда — «Наманган» ЭИЗнинг янги ҳудудлари) бош режаси ишлаб чиқилиши ва тасдиқланишини таъминласин.

Бунда:

бош режа лойиҳасини ишлаб чиқиш бўйича буюртмачи этиб «Наманган» эркин иқтисодий зонаси дирекцияси» давлат унитар корхонаси белгиланади;

бош режа лойиҳасини ишлаб чиқиш Наманган вилояти маҳаллий бюджети маблағлари ҳисобидан амалга оширилади;

бош режа лойиҳасини ишлаб чиқиш бўйича лойиҳа ташкилоти тендер (танлов) савдолари натижасига кўра аниқланади;

в) уч йил муддатда «Наманган» эркин иқтисодий зонаси учун ажратилган қишлоқ хўжалигига мўлжалланган ер майдонлари ўрнига беш баробарга тенг миқдорда янги ерларни ўзлаштириш чораларини кўрсин.

3. Белгилансинки, «Наманган» ЭИЗнинг янги ҳудудларида:

инвестиция лойиҳаларини амалга ошириш учун ер участкаларини ажратиш Ўзбекистон Республикаси Президентининг 2018 йил 21 декабрдаги «Эркин иқтисодий зоналар фаолиятини мувофиқлаштириш ва бошқариш тизимини янада такомиллаштириш чора-тадбирлари тўғрисида»ги ПФ-5600-сон Фармонига мувофиқ электрон онлайн-аукцион савдолари орқали;

инфратузилма объектларини қуриш ишларини молиялаштириш Ўзбекистон Республикаси Президентининг 2020 йил 18 декабрдаги «Ҳудудларда муҳандислик-коммуникация инфратузилмасини янада ривожлантириш чора-тадбирлари тўғрисида»ги ПҚ-4929-сон қарорига мувофиқ;

инфратузилма объектларини қуриш-таъмирлаш ишлари бўйича буюртмачи вазифаси Ўзбекистон Республикаси Президентининг 2021 йил 30 апрелдаги «Махсус иқтисодий ва кичик саноат зоналари муҳандислик-коммуникация инфратузилмасини янада ривожлантириш чора-тадбирлари тўғрисида»ги ПҚ-5101-сон қарорида белгиланган ташкилотлар томонидан амалга оширилади;

қишлоқ хўжалигидан бошқа мақсадларда фойдаланиш учун ажратиладиган ерларда қишлоқ хўжалиги ишлаб чиқариши нобудгарчилигининг ўрнини қоплаш учун компенсация тўловлари, истисно тариқасида, ундирилмайди.

4. Инвестициялар, саноат ва савдо вазирлиги Иқтисодиёт ва молия вазирлиги, Рақамли технологиялар вазирлиги, Автомобиль йўллари қўмитаси, «Ҳудудий электр тармоқлари» АЖ, «Ҳудудгазтаъминот» АЖ, «Ўзсувтаъминот» АЖ ва Наманган вилояти ҳокимлиги билан биргаликда «Наманган» ЭИЗнинг янги ҳудудлари тасдиқланган бош режасига асосан:

уч ой муддатда 2023-2024 йилларда муҳандислик-коммуникация ва йўл инфратузилмаси билан таъминлаш лозим бўлган объектлар рўйхатини тасдиқласин;

2024 йил 1 мартга қадар амалга ошириладиган объектларнинг лойиҳа ҳужжатларини ишлаб чиқсин ва ўрнатилган тартибда келишиш ишларини якунласин.

5. Иқтисодиёт ва молия вазирлиги объектлар рўйхати тасдиқлангандан сўнг бир ой муддатда уларнинг лойиҳа ҳужжатларини ишлаб чиқиш учун зарур маблағларнинг ажратилишини таъминласин.

6. Экология, атроф-муҳитни муҳофаза қилиш ва иқлим ўзгариши вазирлиги «Наманган» ЭИЗнинг янги ҳудудлари бош режаси белгиланган тартибда давлат экологик экспертизасидан ўтказилишини таъминласин ҳамда табиатни муҳофаза қилиш қонунчилигига қатъий риоя этилиши юзасидан давлат назоратини ўрнатсин.

7. Мазкур қарорнинг ижросини самарали ташкил қилишга масъул ва шахсий жавобгар этиб инвестициялар, саноат ва савдо вазири Л.Ш. Қудратов ҳамда Наманган вилояти ҳокими Ш.Ш. Абдуразаков белгилансин.

Қарор ижроси учун масъул идоралар фаолиятини мувофиқлаштириш ва назорат қилиш Бош вазир ўринбосари Ж.А. Ходжаев зиммасига юклансин.