Ҳужжат кучини йўқотган " " 26.11.2025

Ўзбекистон Республикаси Президентининг

Фармони

2019 — 2021 йилларда Ўзбекистон Республикасини инновацион ривожлантириш стратегиясини тасдиқлаш тўғрисида

Илм-фан ва техника ютуқларини кенг қўллаган ҳолда иқтисодиёт тармоқларига, ижтимоий ва бошқа соҳаларга замонавий инновацион технологияларни тезкор жорий этиш Ўзбекистон Республикаси жадал ривожланишининг муҳим шарти ҳисобланади.

Жамият ва давлат ҳаётининг барча соҳалари шиддат билан ривожланаётгани ислоҳотларни мамлакатимизнинг жаҳон цивилизацияси етакчилари қаторига кириш йўлида тез ва сифатли илгарилашини таъминлайдиган замонавий инновацион ғоялар, ишланмалар ва технологияларга асосланган ҳолда амалга оширишни тақозо этади.

Шу билан бирга, ўтказилган таҳлил ишлаб чиқаришни модернизация, диверсификация қилиш, унинг ҳажмини ошириш ҳамда ички ва ташқи бозорларда рақобатбардош маҳсулотлар турларини кенгайтириш борасидаги ишлар лозим даражада олиб борилмаётганини кўрсатди.

Хусусан, бу борада кўплаб кўрсаткичларнинг мавжуд эмаслиги ва ишлар самарали мувофиқлаштирилмагани сабабли мамлакатимиз сўнгги йилларда нуфузли ва обрўли халқаро тузилмалар томонидан тузиладиган Глобал инновацион индекс рейтингида иштирок этмаяпти.

Иқтисодиёт ва ижтимоий соҳа тармоқларининг илмий муассасалар билан ўзаро ҳамкорлиги даражаси пастлиги, вазирлик ва идоралар, шунингдек, маҳаллий давлат ҳокимияти органларининг инновацион ривожланиш соҳасидаги фаолияти лозим даражада мувофиқлаштирилмаётгани бу борадаги биринчи навбатдаги мақсадлар ва вазифаларга эришиш имконини бермаяпти.

Жаҳон фанининг замонавий ютуқлари, инновацион ғоялар, ишланмалар ва технологиялар асосида мамлакатни жадал ривожлантириш, шунингдек, 2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясида белгиланган вазифаларнинг ижросини изчил таъминлаш мақсадида:

1. Қуйидагилар:

2019 — 2021 йилларда Ўзбекистон Республикасини инновацион ривожлантириш стратегияси (кейинги ўринларда Стратегия деб юритилади) 1-иловага мувофиқ;

2019 — 2021 йилларда Ўзбекистон Республикасини инновацион ривожлантириш стратегиясини амалга ошириш бўйича «йўл харитаси» (кейинги ўринларда — «Йўл харитаси») 2-иловага мувофиқ;

(1-банднинг тўртинчи хатбошиси Ўзбекистон Республикаси Президентининг 2022 йил 23 августдаги ПФ-197-сонли Фармонига асосан чиқарилган — Қонунчилик маълумотлари миллий базаси, 24.08.2022 й., 06/22/197/0765-сон)

2. Белгилансинки:

а) мамлакатнинг халқаро майдондаги рақобатбардошлилиги даражасини ва инновацион жиҳатдан тараққий этганини белгиловчи асосий омил сифатида инсон капиталини ривожлантириш — Стратегиянинг бош мақсадидир;

б) бош мақсадга эришишда Стратегиянинг асосий вазифалари қуйидагилардан иборат:

Ўзбекистон Республикасининг 2030 йилга келиб Глобал инновацион индекс рейтинги бўйича жаҳоннинг 50 илғор мамлакати қаторига киришига эришиш;

барча даражада таълим сифати ва қамровини ошириш, узлуксиз таълим тизимини ривожлантириш, кадрлар тайёрлаш тизиминининг иқтисодиёт эҳтиёжларига мослашувчанлигини таъминлаш;

илмий тадқиқотлар ва ишланмаларнинг илмий салоҳиятини мустаҳкамлаш ва самарадорлигини ошириш, илмий-тадқиқот, тажриба-конструкторлик ва технологик ишлар натижаларини кенг жорий этиш учун таълим, илм-фан ва тадбиркорликни интеграция қилишнинг таъсирчан механизмларини яратиш;

инновациялар, илмий-тадқиқот, тажриба-конструкторлик ва технологик ишларга давлат ва хусусий маблағлар киритилишини кучайтириш, бу соҳалардаги тадбирларни молиялаштиришнинг замонавий ва самарали шаклларини жорий этиш;

бошқарувнинг замонавий усуллари ва воситаларини жорий этиш орқали давлат ҳокимияти органлари фаолиятининг самарадорлигини ошириш;

мулкчилик ҳуқуқлари ҳимоясини таъминлаш, рақобатбардош бозорлар ташкил этиш ва бизнес юритиш учун тенг шарт-шароитлар яратиш, давлат-хусусий шериклигини ривожлантириш;

барқарор фаолият юритадиган ижтимоий-иқтисодий инфратузилмани яратиш.

(3-банд Ўзбекистон Республикаси Президентининг 2024 йил 25 октябрдаги ПФ-168-сонли Фармонига асосан ўз кучини йўқотган)

(4-банд Ўзбекистон Республикаси Президентининг 2024 йил 25 октябрдаги ПФ-168-сонли Фармонига асосан ўз кучини йўқотган)

5. Қуйидагилар:

Ўзбекистон Республикаси Президенти Администрацияси бўлинмалари ва Ўзбекистон Республикаси Вазирлар Маҳкамаси комплекслари раҳбарлари — вазирлик ва идораларнинг Стратегияда ва «Йўл харитаси»да назарда тутилган тадбирларни амалга ошириш бўйича фаолиятини самарали ташкил этиш ва мувофиқлаштириш, мақсадли кўрсаткичларга эришиш, шунингдек, улар ижроси боришини ҳар чоракда муҳокама қилиш учун;

вазирлик ва идоралар раҳбарлари — илмий-таълим муассасалари, нодавлат нотижорат ташкилотлари вакилларини, мустақил экспертларни (консультантларни), шу жумладан хорижий мамлакатлардан кенг жалб этган ҳолда Стратегияда ва «Йўл харитаси»да назарда тутилган тадбирларнинг ўз вақтида ва сифатли бажарилиши, мақсадли кўрсаткичларга эришилиши учун;

давлат илмий-таълим муассасалари раҳбарлари — Стратегияда ва «Йўл харитаси»да назарда тутилган тадбирларни илмий-тадқиқот жиҳатидан қўллаб-қувватлаш, вазирлик ва идораларга мақсадли кўрсаткичларга эришиш учун илмий тақдимотлар ва маърузалар, таҳлилий материаллар тайёрлашда ҳар томонлама кўмаклашиш учун;

маҳаллий давлат ҳокимияти органлари раҳбарлари — вазиятни ҳақиқий ва сифатли ўзгартириш учун муносиб шароитлар яратиш, фуқароларнинг долзарб муаммоларини ҳал этиш, ҳудудларни ва уларнинг ижтимоий инфратузилмасини Стратегияда ва «Йўл харитаси»да назарда тутилган тадбирлар билан узвий боғлиқ ҳолда ривожлантириш, шунингдек, вазирлик ва идоралар билан ўзаро келишилган ҳолда жойларда мақсадли кўрсаткичларга эришиш чораларини кўриш учун шахсий жавобгарлик белгилаб қўйилсин.

6. Ўзбекистон Республикаси Олий таълим, фан ва инновациялар вазирлиги Ташқи ишлар вазирлиги, Миллий статистика қўмитаси ва бошқа манфаатдор идоралар билан биргаликда Ўзбекистон Республикаси ҳар йили Глобал инновацион индекс рейтингига киритилиши учун халқаро ташкилотларга зарур маълумотлар ва кўрсаткичларни мунтазам юборилишини таъминласин.

(6-банд Ўзбекистон Республикаси Президентининг 2025 йил 24 февралдаги ПФ-27-сонли Фармони таҳририда — Қонунчилик маълумотлари миллий базаси, 01.03.2025 й., 06/25/27/0196-сон)

7. Вазирлик ва идоралар Ўзбекистон Республикаси Вазирлар Маҳкамасининг тегишли комплекслари раҳбарлари билан келишилган ҳолда бир ой муддатда мақсадли кўрсаткичларга эришиш бўйича ўзаро боғлиқ ҳуқуқий, иқтисодий, ижтимоий, ташкилий ва техник чора-тадбирларни назарда тутадиган 3 йилга мўлжалланган ривожланиш дастурларини тасдиқласин, кейинчалик 3 йилга мўлжалланган янги ривожланиш дастурларини қабул қилсин.

8. Ўзбекистон Миллий ахборот агентлиги, Ўзбекистон Миллий телерадиокомпанияси, Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги оммавий ахборот воситаларида ушбу Фармоннинг мақсад ҳамда вазифаларини кенг ёритиш бўйича чиқишлар ва мавзуга оид кўрсатувларни мунтазам ташкил этсин.

(8-банд Ўзбекистон Республикаси Президентининг 2019 йил 10 декабрдаги ПФ-5892-сонли Фармони таҳририда — Қонун ҳужжатлари маълумотлари миллий базаси, 11.12.2019 й., 06/19/5892/4134-сон)

9. Ўзбекистон Республикаси Инновацион ривожланиш вазирлиги икки ой муддатда манфаатдор вазирлик ва идоралар билан биргаликда қонун ҳужжатларига мазкур Фармондан келиб чиқадиган ўзгартиш ва қўшимчалар тўғрисида Ўзбекистон Республикаси Вазирлар Маҳкамасига таклифлар киритсин.

10. Мазкур Фармоннинг ижросини назорат қилиш Ўзбекистон Республикасининг Бош вазири А.Н. Арипов, Ўзбекистон Республикаси Президенти Администрацияси раҳбари З.Ш. Низомиддинов, Ўзбекистон Республикаси Президенти маслаҳатчисининг биринчи ўринбосари Б.М. Мавлонов ва Ўзбекистон Республикаси Бош вазирининг ўринбосари — Ўзбекистон Республикаси Инвестициялар бўйича давлат қўмитасининг раиси С.Р. Холмурадов зиммасига юклансин.

Ўзбекистон Республикаси Президенти Ш. МИРЗИЁЕВ

Тошкент ш.,

2018 йил 21 сентябрь,

ПФ-5544-сон

Ўзбекистон Республикаси Президентининг 2018 йил 21 сентябрдаги ПФ-5544-сон Фармонига
1-ИЛОВА

2019 — 2021 йилларда Ўзбекистон Республикасини инновацион ривожлантириш

стратегияси

1-боб. Умумий қоидалар

аҳолининг олий таълим билан қамраб олинганлик даражаси паст;

олий таълим муассасалари ўқув режалари ва дастурларини, талабаларни қабул қилиш квотаси миқдорини белгилашда, молиявий маблағларни тақсимлашда мустақил эмас;

илмий ва инновацион фаолиятни ривожлантириш учун масъул вазирлик ва идоралар ўртасидаги ўзаро ҳамкорлик лозим даражада эмас, илмий-тадқиқот муассасалар ва лабораториялар фаолияти лозим даражада мувофиқлаштирилмаган;

илмий фаолият натижаларини тижоратлаштириш даражаси паст;

инновацион менежмент соҳасида технологиялар трансферини фаол илгари суриш ва амалга оширишга қодир юқори малакали мутахассислар мавжуд эмас;

илмий-тадқиқот ва тажриба-конструкторлик ишларига ажратилаётган бюджет маблағлари етарли эмас;

илмий ва инновацион фаолиятни давлат томонидан молиялаштириш самарали ва шаффоф эмас, бюджетдан ташқари ва хусусий жамғармалар маблағларини жалб этишни рағбатлантириш механизмлари мавжуд эмас, қарзни молиялаштиришнинг ички манбалари етарли даражада ривожланмаган;

интеллектуал фаолият натижаларини ҳимоя қилиш лозим даражада эмас, ушбу соҳада, айниқса давлат органлари ва ташкилотларида малакали мутахассислар мавжуд эмас;

қайта тикланувчи ва муқобил энергия манбалари, иккиламчи ресурсларни энергетик утилизация қилиш соҳаларида инновацион технологияларни жорий этиш даражаси паст;

мамлакатда, айниқса давлат компанияларида корпоратив муносабатлар ва корпоратив бошқарув принциплари ривожланмаган, бунда хориждаги энг намунали амалиёт инобатга олинмаяпти;

мамлакатнинг ялпи ички маҳсулоти ҳажмида ахборот-коммуникация технологиялари секторининг улуши кам.

Қайд этилган камчиликлар мамлакатимизнинг жадал инновацион ривожланишига, инвестицияларни жалб этишга, иқтисодиётнинг ўсишига ҳамда давлат ва жамият ҳаётининг бошқа соҳаларини ривожлантиришга тўсқинлик қилмоқда.

Шу муносабат билан қуйидаги мақсадлар, вазифалар ва асосий йўналишларни назарда тутадиган 2019 — 2021 йилларда Ўзбекистон Республикасини инновацион ривожлантириш стратегиясини (кейинги ўринларда Стратегия деб юритилади) ишлаб чиқиш алоҳида аҳамият касб этмоқда:

2-боб. Стратегиянинг мақсад ва вазифалари

1. Мамлакатнинг халқаро майдондаги рақобатбардошлилиги даражасини ва инновацион жиҳатдан тараққий этганини белгиловчи омил сифатида инсон капиталини ривожлантириш Стратегиянинг бош мақсадидир.

2. Бош мақсадга эришишда Стратегиянинг асосий вазифалари қуйидагилардан иборат:

Ўзбекистон Республикасининг 2030 йилга бориб Глобал инновацион индекс рейтинги бўйича жаҳоннинг 50 илғор мамлакати қаторига киришига эришиш;

барча даражада таълим сифати ва қамровини ошириш, узлуксиз таълим тизимини ривожлантириш, кадрлар тайёрлаш тизимининг иқтисодиёт эҳтиёжларига мослашувчанлигини таъминлаш;

барқарор фаолият юритадиган ижтимоий-иқтисодий инфратузилмани яратиш.

3-боб. Стратегиянинг асосий йўналишлари

3.1. Фан, ихтирочилик ва технологиялар трансферини ривожлантириш

1. Лойиҳавий бошқарув механизмларидан фойдаланган ҳолда дастурий-мақсадли принцип асосида илмий-тадқиқот ва тажриба-конструкторлик ишларини ўтказишга давлат томонидан буюртма бериш орқали тадқиқотлар ташкил этиш механизмини жорий этиш.

2. Ёшларни илмий фаолиятга жалб этиш бўйича комплекс чора-тадбирларни амалга ошириш.

3. Ноёб илмий-техник ускуналардан жамоавий фойдаланиш марказларини ташкил этиш.

4. Ўзбекистон Республикасида илмий фаолият нуфузини ошириш.

5. Мамлакатимиз ва хориждаги илмий-техник ахборот манбаларини тўплаш, сақлаш ва қайта ишлашга, ахборот фондлари, маълумотлар базалари ва банкларини шакллантириш, юритиш ва улардан фойдаланишга ихтисослашган республика, тармоқ ва ҳудудий илмий-техник ахборот ресурслари ва ташкилотларидан иборат давлат илмий-техник ахборот тизимини яратиш.

6. Интеллектуал мулк объектларини баҳолаш механизмларини такомиллаштириш.

7. Технологиялар трансфери бўйича миллий ва ҳудудий офисларни ташкил этиш.

8. Илғор технологияларни ишлаб чиқиш ва жорий этиш учун технопарклар хаби, эркин иқтисодий зоналар, эркин саноат зоналари, кичик саноат зоналари ва илмий-ишлаб чиқариш кластерларини ташкил этиш.

9. Хорижий ҳамкорлар билан маҳаллий илмий ҳажмдор маҳсулотлар ишлаб чиқариш ва уни ташқи бозорда сотиш бўйича қўшма ташкилотларни шакллантириш учун давлат кўмагини кучайтириш.

3.2. Инновацион фаолиятни молиялаштириш тизимини такомиллаштириш

1. Илмий-тадқиқот ва тажриба-конструкторлик ишларига сарфланадиган давлат харажатларини кўпайтириш ва 2021 йилга бориб бу кўрсаткични ялпи ички маҳсулот ҳажмининг 0,8 фоизига етказиш.

2. Инновацион фаолиятни молиялаштириш бўйича махсус институтлар (инновация жамғармалари, инновация банклари, венчур жамғармалари) ташкил этиш.

3. Мамлакатни инновацион ривожлантиришни рағбатлантириш учун банк кредитини олиш тартиб-таомилларини ва талабларини соддалаштириш.

4. Инновацион тараққиётни микромолиялаштириш тизимини такомиллаштириш.

5. Илмий-технологик ривожланишнинг устувор йўналишларини белгилаш ва молиялаштиришда хусусий сектор иштирокини рағбатлантириш.

6. Инновацион лойиҳалар ва салоҳиятли инвесторларнинг доимий равишда янгилаб бориладиган ягона маълумот базасини ташкил этиш.

7. Инновацион лойиҳалар учун грантлар ва техник кўмак маблағларини олиш ва улардан фойдаланиш тартиб-таомилларини соддалаштириш ва шаффофлигини ошириш.

3.3. Инфратузилма ва ахборот-коммуникация технологияларини ривожлантириш

1. Телекоммуникация соҳасини норматив-ҳуқуқий тартибга солиш тизимини, шу жумладан давлат-хусусий шериклиги асосида тадбиркорлик субъектлари иштирокини кенгайтириш орқали такомиллаштириш.

2. 2021 йилгача ахборот-коммуникация технологиялари соҳасидаги хизматлар экспорти улушини улар умумий ҳажмининг 4 фоизига етказиш.

3. Барча операторлар учун халқаро телекоммуникациялар тармоқларига тўғридан-тўғри уланишни эркинлаштириш.

4. Аҳолини ахборот-коммуникациялар технологияларидан фойдаланишга рағбатлантириш.

5. Стартап лойиҳалар учун технопарк ташкил этиш орқали мамлакатимизда дастурий маҳсулотлар ишлаб чиқиш тармоғини ривожлантириш.

3.4. Таълим тизимини такомиллаштириш ва инсон капиталини ривожлантириш

1. Ўқув-тарбия жараёнига янги таълим дастурларини, замонавий педагогик технологиялар ва smart-технологияларни жорий этиш орқали таълим муассасаларида ўқитиш сифатини янада яхшилаш (электрон модуллар ташкил этиш ва масофавий ўқитишни жорий этиш).

2. Ногирон болалар таълим ва тарбиядан тенг шароитда баҳраманд бўлиши учун шароитлар яратиш мақсадида инклюзив таълимни ривожлантириш, шу жумладан:

таълим муассасаларида кўтариш қурилмалари, пандуслар, санитар хоналарда махсус мосламалар ўрнатиш, тутқичлар, махсус парталар, столлар ва бошқа махсус компенсатор воситалари билан жиҳозлаш орқали «тўсиқсиз муҳит» яратиш;

имконияти чекланган болаларни интеграциялашган ҳолда ўқитиш дастурларини яратиш;

таълим муассасаларини тегишли кадрлар (педагог-дефектологлар, болаларни руҳий-педагогик қўллаб-қувватлаш бўйича мутахассислар) билан таъминлаш.

3. Ҳудудий ва миллий даражада таълим жараёни натижаларини тизимли мониторинг қилиш асосида таълим сифатини ва унинг мамлакат инновацион ривожланиши даражасига таъсирини баҳолашнинг миллий тизимини ишлаб чиқиш ва жорий этиш.

4. Меҳнат бозоридаги тенденциялар ўзгариб боришини ҳисобга олган ҳолда қайта тайёрлашга муҳтож ёшлар учун касб-ҳунар коллежларида қисқа муддатли ўқувлар ташкил этиш.

5. Аҳолининг олий таълим билан қамраб олинишини ошириш.

6. Табиий ва техник фанлар йўналишлари бўйича талабалар улушини кўпайтириш.

7. Чоп этилган илмий мақолалар сони, улардан иқтибос келтириш индекси, халқаро конференциялар ва семинарларда иштироки, олинган патентлари сони бўйича танлаб олинган соҳадаги энг фаол олий таълим муассасаларини давлат томонидан қўллаб-қувватлаш асосида олий таълим муассасалари фаолиятининг тадқиқот йўналишини кучайтириш.

8. Тармоқ ва минтақавий иқтисодиёт сценарийлари бўйича таклифлар ишлаб чиқиш мақсадида инновацион фаолият ривожини прогнозлаштириш тизимининг алоҳида бўғини сифатида етакчи олий таълим муассасаларида форсайт марказларини ташкил этиш. Олий таълим муассасасининг ички ва ташқи муҳитини илмий-технологик прогнозлаштиришни таъминлаш, уларнинг технологик ва инновацион муҳитини ва устувор инновацион йўналишларини ривожлантириш.

3.5. Рақобатни ривожлантириш ва маъмурий тўсиқларни камайтириш

1. Халқаро тажрибани ҳисобга олган ҳолда корпоратив ҳуқуқни ривожлантириш ва корпоратив бошқарувнинг замонавий принципларини жорий этиш.

2. Иқтисодиётни тараққиётнинг инновацион йўлига ўтишини таъминлайдиган рақобатбардош бозорни шакллантириш ва ресурслардан самарали фойдаланиш.

3. Монополияга қарши сиёсатни, шу жумладан давлат-хусусий шериклигини жорий этиш ҳисобига такомиллаштириш, барча юридик ва жисмоний шахслар учун табиий монополиялар субъектлари товарлари, ишлари ва хизматларидан фойдаланишда тенг шароитларни таъминлаш, монопол корхоналар маҳсулотларига нарх шаклланишининг самарали механизмларини жорий этиш.

4. Тадбиркорлик фаолиятини амалга ошириш учун тенг шарт-шароитлар яратиш ва ички бозорнинг монополлашувини олдини олиш.

5. 2021 йилга бориб давлат кадастри ишларини юритишнинг тўлиқ рақамлаштирилишини таъминлаш ва мулкни рўйхатдан ўтказиш тартиб-таомилини соддалаштириш.

6. Қайта тикланувчи ва муқобил энергия манбаларидан фойдаланган ҳолда электр энергиясини ишлаб чиқариш улушини 2025 йилга бориб 20 фоиздан зиёдга ошириш.

Ўзбекистон Республикаси Президентининг 2018 йил 21 сентябрдаги ПФ-5544-сон Фармонига
2-ИЛОВА

2019 — 2021 йилларда Ўзбекистон Республикасини инновацион ривожлантириш стратегиясини амалга ошириш бўйича

«ЙЎЛ ХАРИТАСИ»

Т/р	Тадбирлар номланиши	Амалга ошириш муддатлари	Амалга ошириш шакли	Молиялаштириш манбалари	Масъул ижрочилар	Кутилаётган натижалар
I. Илм-фан, ихтирочилик ва технологиялар трансферини ривожлантириш
1.	Давлат мақсадли фан-техника дастурлари, технологиялар трасфери ва уларни тижоратлаштириш масалаларини ишлаб чиқиш ва молиялаштириш учун фан ва технологияларнинг устувор йўналишларини аниқлаш.	2019 йил 1 мартгача	Норматив-ҳуқуқий ҳужжат	Давлат бюджети маблағлари	Инновацион ривожланиш вазирлиги (И. Абдурахмонов), Фанлар академияси (Б. Юлдашев), Олий ва ўрта махсус таълим вазирлиги (И. Мажидов), Иқтисодиёт вазирлиги (Б. Ходжаев), Молия вазирлиги (Ж. Кўчқоров), Соғлиқни сақлаш вазирлиги (А. Шодмонов), Адлия вазирлиги (Р. Давлетов)	Жаҳон фани ва технологияларини ривожлантириш тенденцияси бўйича устувор йўналишларни ишлаб чиқиш.
2.	Ёшларни илмий фаолиятга жалб қилиш бўйича комплекс чора-тадбирларни амалга ошириш.	2019 йил 1 майгача	Комплекс чора-тадбирлар	-	Инновацион ривожланиш вазирлиги (И. Абдурахмонов), Фанлар академияси (Б. Юлдашев), Олий ва ўрта махсус таълим вазирлиги (И. Мажидов), Молия вазирлиги (Ж. Кўчқоров)	Ёш илмий арбобларни кўпайтириш, илмий ҳамжамиятнинг ўртача ёшини пасайтириш. Табиий ва гуманитар фанлар (физика, кимё, география ва бошқалар) бўйича халқаро олимпиадалар ўтказиш. Бир нечта лойиҳалардан иборат «Ёш олим» ғоясини амалга ошириш, шу жумладан телевидениеда ёш олимлар иштирокида махсус интеллектуал-таълим ва маърифий телекўрсатувларни ташкил этиш. Олимларнинг мақоми, нуфузи ва моддий даражасини оширишни назарда тутувчи, жаҳон даражасида фундаментал тадқиқотларни амалга оширувчи илмий муассасалар ва лабораторияларни давлат томонидан қўллаб-қувватлаш, ёшларни илмий-тадқиқот ишларига жалб қилиш, тегишли илмий лабораторияларнинг моддий-техник базасини мустаҳкамлаш.
3.	Ноёб илмий-техника ускуналаридан жамоавий фойдаланиш марказларини ташкил қилиш.	2020 йил 1 январгача	Вазирлар Маҳкамаси қарори	Давлат бюджети маблағлари, корхоналар маблағлари	Фанлар академияси (Б. Юлдашев), Олий ва ўрта махсус таълим вазирлиги (И. Мажидов), Инновацион ривожланиш вазирлиги (И. Абдурахмонов)	Илмий-тадқиқот ва тажриба-конструкторлик ишланмаларини ривожлантириш орқали рақобатбардош инновацион маҳсулотлар ва янги технологияларни кўпайтириш.
4.	Ўзбекистон Республикасида илмий фаолият нуфузини ошириш.	2020 йил 1 январгача	Норматив-ҳуқуқий ҳужжат	Инновацион ривожланиш ва новаторлик ғояларини қўллаб-қувватлаш жамғармаси	Инновацион ривожланиш вазирлиги (И. Абдурахмонов), Фанлар академияси (Б. Юлдашев), Олий ва ўрта махсус таълим вазирлиги (И. Мажидов)	Инновацион кўринишдаги тадқиқотларни ўтказиш учун илмий салоҳиятни мустаҳкамлаш ва махаллий илм-фаннинг халқаро тадқиқот дастурларида иштирокини кенгайтириш. Етакчи хориж илмий марказлари ва университетлари негизида Ўзбекистон учун истиқболли ва долзарб йўналишлар бўйича олий малакали кадрлар (фалсафа докторлари PhD) ва фан докторларини (DSc) тайёрлаш. Халқаро илмий журналларда илмий нашрлар сонини кўпайтириш. Илмий-тадқиқот муассасалари моддий-техник базасини яхшилаш. Илм-фан арбобларининг иш ҳақи ва ижтимоий таъминот тизимини такомиллаштириш. Республикада илмий алоқаларни ривожлантириш, тажриба алмашиш ва малака ошириш учун тизимли равишда йирик халқаро форум ва конференциялар ўтказиш. Илмий-техник лойиҳаларни олиб бориш, тенологияларини жорий қилиш ва инновацион лойиҳаларни ишлаб чиқиш мақсадида ташкилотларни рағбатлантириш.
5.	Илмий-техник маълумотларнинг маҳаллий ва хорижий манбаларини йиғиш, сақлаш ва қайта ишлашга, ахборот фондлари, маълумотлар базалари ва банкларини шакллантириш, юритиш ва фойдаланишга ихтисослаштирилган, республика, тармоқ, ҳудудий илмий-техника маълумотлари ахборот ресурслари ва ташкилотларини ўз ичига олган илмий-техника маълумотлари давлат тизимини яратиш.	2021 йил 31 декабргача	Норматив-ҳуқуқий ҳужжат	Давлат бюджети маблағлари	Фанлар академияси (Б. Юлдашев), Инновацион ривожланиш вазирлиги (И. Абдурахмонов), Олий ва ўрта махсус таълим вазирлиги (И. Мажидов)	Илмий-техника маълумотининг автоматлаштирилган тизимини яратиш. Ахборот ресурсларини шакллантириш ва уларни жаҳон илмий-ахборот маконига интеграция қилиш. Ахборот ҳамкорлигининг барча турларини амалга ошириш учун маълумотларни яратиш, сақлаш, қайта ишлаш ва оммалаштириш учунривожланган ахборот муҳитини шакллантириш. Жаҳон ахборот маконида миллий илмий-техника маҳсулотларини тақдим қилиш.
7.	Технологияларни трансфер қилиш миллий ва ҳудудийофисларини яратиш.	2019 йил 1 ноябргача	Ўзбекистон Республикаси Президентининг Фармони	Давлат бюджети маблағлари, корхоналар маблағлари	Инновацион ривожланиш вазирлиги (И. Абдурахмонов), Олий ва ўрта махсус таълим вазирлиги (И. Мажидов), Халқ таълими вазирлиги (Ш. Шерматов), Фанлар академияси (Б. Юлдашев)	«Битта дарча» принципи бўйича инновацион имкониятларни ривожлантириш ва салоҳиятини амалга ошириш учун инновацион жараёнларнинг иштирокчиларини барча зарур хизматлар билан таъминлаш. Технологияларнинг ички ва ташқи трансферини ривожлантириш.
8.	Илғор технологияларни ишлаб чиқиш ва жорий этиш учун хаби, технопарклар, эркин иқтисодий зоналар, эркин индустриал зоналар ва илмий-ишлаб чиқариш кластерларини яратиш.	2021 йил 1 февралгача	Комплекс чора-тадбирлар	Давлат бюджети маблағлари, корхоналар маблағлари, Инновацияларни қўллаб-қувватлаш фонди, венчур фондлари маблағлари	Иқтисодиёт вазирлиги (Б. Ходжаев), Савдо-саноат палатаси (А. Икрамов), Инновацион ривожланиш вазирлиги (И. Абдурахмонов), Инвестициялар ва ташқи савдо вазирлиги (Н. Холмуродов)	Ишлаб турган эркин иқтисодий зоналар ҳудудида замонавий юқори технологиялари маҳсулотлар ишлаб чиқаришни ташкил этиш.
9.	Хорижий ҳамкорлар билан илм-фанга асосланган маҳаллий маҳсулотлар ишлаб чиқариш бўйича қўшма ташкилотларни шакллантириш ва бу маҳсулотларнинг ташқи бозорда сотилишини давлат томонидан қўллаб-қувватлашни кучайтириш.	2019 йил 1 майгача	Комплекс чора-тадбирлар	Давлат бюджети маблағлари	Инновацион ривожланиш вазирлиги (И. Абдурахмонов), Фанлар академияси (Б. Юлдашев), Молия вазирлиги(А. Хайдаров)	Республикада илм-фанга асосланган ва юқори технологияли маҳсулотлар ишлаб чиқаришга маблағ сарфлаётган инвесторларга имтиёзлар, преференциялар, давлат кафолатлари ва кредитлар тақдим этиш. Инновацион лойиҳаларни саралашда тартиб-таомилларнинг очиқлиги ва шаффофлигини таъминлаш, эксперт кенгашини шакллантириш тартибини, лойиҳалар самарадорлиги ва мақсадга мувофиқлигидан келиб чиқиб уларни саралаш механизмини қайта кўриб чиқиш орқали танлов тизимини такомиллаштириш.
I. Инновацион фаолиятни молиялаштириш тизимини такомиллаштириш
10.	Илмий-тадқиқот ва тажриба-конструкторлик ишларига давлат сарф харажатларини ошириш ва бу кўрсаткични 2021 йилга бориб ялпи ички маҳсулот ҳажмининг 0,8 фоизигаетказиш.	2019 йил 1 январгача	Ўзбекистон Республикаси Президентининг қарори	Давлат бюджети маблағлари	Инновацион ривожланиш вазирлиги (И. Абдурахмонов), Фанлар академияси (Б. Юлдашев), Молия вазирлиги (А. Хайдаров), Марказий банк (М. Нурмуратов), Олий ва ўрта махсус таълим вазирлиги (И. Мажидов), Халқ таълими вазирлиги (Ш. Шерматов), Мактабгача таълим вазирлиги (А. Шин)	Кредит бериш, шу жумладан инновацион молиялаштириш ҳажмларининг кўпайганлигини, бунинг натижасида эса Инновациялар глобал индексининг «Кредит беришнинг ички бозорини ривожлантириш» қисми бўйичаЎзбекистон позициясининг яхшиланиши (Ўзбекистон Республикаси Давлат бюджетидан харажатларни босқичма-босқич ошириб бориш дастурининг қабул қилиниши). Бизнеснинг инновацион фаоллигини ошириш ва янги ииновацион компаниялар пайдо бўлишини жадаллаштириш. Бюджет маблағларидан инновацион ривожланишни рағбатлантириш мақсадларида фойдаланиш самарадорлиги ва шаффофлигини ошириш.
11.	Инновацион фаолиятни молиялаштириш бўйича махсус институтлар (инновацион жамғармалар, инновацион банклар, венчур жамғармалар) яратиш.	2019 йил 1 майгача	Комплекс чора-тадбирлар	-	Инновацион ривожланиш вазирлиги (И. Абдурахмонов), Молия вазирлиги (А. Хайдаров), Марказий банк (М. Нурмуратов)	Инновацион фаолиятни молиялаштиришнинг амалдаги механизмлари ва манбаларини кенгайтириш. Ииновацион маҳсулотлар ва хизматларни тижоратлаштиришнинг бозор институтларини ривожлантириш. Инновацион фаолиятни молиялаштиришда венчур капитал ҳиссасини ошириш.
12.	Мамлакатни инновацион ривожлантиришни рағбатлантириш учун банкдан кредит олиш талаблари ва қоидаларини соддалаштириш.	2019 йил 1 апрелгача	Норматив-ҳуқуқий ҳужжат	-	Марказий банк (М. Нурмуратов), Савдо-саноат палатаси (А. Икрамов), Иқтисодиёт вазирлиги (Б. Ходжаев), Молия вазирлиги (Ж. Кўчқоров), Инновацион ривожланиш вазирлиги (И. Абдурахмонов)	Норматив-ҳуқуқий базани такомиллаштириш. Инновацион фаолият субъектларининг молия ресурслариданфойдалана олишларини таъминлаш. Банк кредитини олиш ва сарфлаш ҳисобининг электрон тизимини жорий этиш. Жаҳон банкининг «Бизнес юритиш» рейтингига мувофиқ бизнес-муҳитни белгиловчи асосий параметрларни яхшилаш.
13.	Ииновацион ривожланишнинг микромолиялаштириш тизимини такомиллаштириш.	2019 йил 1 майгача	Қонунчиликка ўзгартириш ва қўшимчалар киритиш	-	Марказий банк (М. Нурмуратов), Савдо-саноат палатаси (А. Икрамов), Молия вазирлиги (А. Хайдаров)	Кичик инновацион лойиҳаларни амалга оширишда микромолиялаштириш институтларининг ролини ошириш.
14.	Илмий-технологик ривожланишнинг устуворликларини аниқлаш ва молиялаштиришда ҳусусий секторнинг иштирокини рағбатлантириш.	2019 йил 1 июлгача	Норматив-ҳуқуқий ҳужжат	Хўжалик юритувчи субъектлар маблағлари	Инновацион ривожланиш вазирлиги (И. Абдурахмонов), Молия вазирлиги (Ж. Кўчқоров)	Инновацион лойиҳаларни молиялаштиришга маҳаллий ҳусусий ва хорижий инвесторлар кенг доирасини жалб қилиш. Тадқиқотлар ва ишланмаларнинг ички харажатлари умумий ҳажмида ҳусусий молиялаштириш ҳиссасини ошириш.
15.	Инновацион лойиҳалар ва салоҳиятли инвесторларнинг доимий янгиланиб турадиган ягона маълумотлар базасини яратиш.	2019 йил 1 мартгача	Маълумотлар базаси	Давлат бюджети маблағлари	Инновацион ривожланиш вазирлиги (И. Абдурахмонов)	Етакчи халқаро инновацион компаниялар ва трансмиллий корпорацияларни стратегик инвесторлар сифатида жалб қилишни таъминлаш.
16.	Инновацион лойиҳаларга техник кўмаклашиш маблағлари ва грантларини олиш ва ишлатишда шаффофликни ошириш ва тартиб-қоидаларини соддалаштириш.	2020 йил 1 мартгача	Вазирлар Маҳкамаси қарори	Давлат бюджети маблағлари	Инновацион ривожланиш вазирлиги (И. Абдурахмонов), Инвестициялар ва ташқи савдо вазирлиги (Ш. Вафаев), Молия вазирлиги (А. Хайдаров)	Инновацион фаолиятни янада ривожлантиришни таъминлаш, ижтимоий иқтисодий ва бошқа соҳаларда истиқболли инновацион лойиҳаларни амалга ошириш.
III. Инфратузилма ва ахборот-коммуникация технологияларини ривожлантириш
17.	Телекоммуникация соҳасини норматив-ҳуқуқий тартибга солиш тизимини, шу жумладан, давлат-хусусий шерикчилик шартларида тадбиркорлик субъектлари иштирокини кенгайтириш орқали такомиллаштириш.	2020 йил 1 апрелгача	Норматив-ҳуқуқий ҳужжат	-	Ахборот технологиялари ва коммуникацияларини ривожлантириш вазирлиги (Ш. Содиқов), МТРК (А. Ходжаев), Савдо-саноат палатаси (А. Икрамов), ЛБМА (Д. Ли)	Телекоммуникация соҳасига давлат-хусусий шерикчилик принципларида тадбиркорлик субъектларини кенг жалб қилиш.
18.	2021 йилга бориб ахборот-коммуникация технологиялари соҳасида хизматлар экспорти улушини умумий ҳажмнинг 4 фоизига етказиш.	2021 йил 1 апрелгача	Ташкилий-амалий комплекс чора-тадбирлар	Давлат бюджети маблағлари, техник кўмаклашиш, грантлар ва бошқа маблағлар	Ахборот технологиялари ва коммуникацияларини ривожлантириш вазирлиги (Ш. Содиқов), Савдо-саноат палатаси (А. Икрамов), ЛБМА (Д. Ли)	Замонавий ахборот коммуникация технологияларини жорий этиш учун ишбилармонлик муҳитини янада ривожлантириш. Ахборот-коммуникация технологиялари соҳасида талаб юқори ва профессионал кадрларни тайёрлаш. Ахборот-коммуникация технологиялари соҳасида ҳар йили йирик халқаро форумлар ўтказиш. Мухаммад ал-Хоразмий номидаги Тошкент ахборот технологиялари университетини дунёнинг 1000 та энг нуфузли университетлари қаторига киритиш бўйича ҳаракатлар режасини ишлаб чиқиш.
19.	Барча операторларнинг халқаро телекоммуникация тармоқларига тўғридан-тўғри уланишини либераллаштириш.	2020 йил 1 январгача	Норматив-ҳуқуқий ҳужжат	Хусусий инвесторлар ва тадбиркорлар маблағлари	Ахборот технологиялари ва коммуникацияларини ривожлантириш вазирлиги (Ш. Содиқов)	Пировард фойдаланувчилар учун Интернет тармоғига уланиш нархини пасайтириш.
20.	Аҳолини ахборот-коммуникация технологияларидан фойдаланишга рағбатлантириш.	2020 йил 1 февралгача	Чора-тадбирлар дастури	Давлат бюджети маблағлари, ХМИ кредитлари	Ахборот технологиялари ва коммуникацияларини ривожлантириш вазирлиги (Ш. Содиқов), Молия вазирлиги (А. Хайдаров), Иқтисодиёт вазирлиги (Б. Ходжаев)	Аҳолининг Интернет тармоғига кенг полосали қамраб олинишини кенгайтириш. Интернет тармоғига кенг полосали уланиш имконини берувчи мобил тармоқларни кенгайтириш (LTK, WIMAX).
21.	Стартап-лойиҳалар учун технопарк яратиш орқали дастурий маҳсулотлар ишлаб чиқишнинг маҳаллий саноатини ривожлантириш.	2019 йил 1 октябргача	Вазирлар Маҳкамаси қарори	Хусусий инвесторлар ва тадбиркорлар маблағлари	Ахборот технологиялари ва коммуникацияларини ривожлантириш вазирлиги (Ш. Содиқов), ЛБМА (Д. Ли)	«Mirzo Ulugbek Innovation Center» ахборот технологияларини ишлаб чиқиш ва жорий этишни қўллаб-қувватлаш инновацион марказида дастурий маҳсулотлар ишлаб чиқувчиларни халқаро бозорда маркетинг жиҳатдан қўллаб-қувватлаш ихтисослаштирилган хизматлар ҳамда кейинчалик ҳудудий филиалларини яратган ҳолда дастурий маҳсулотлар ишлаб чиқиш соҳасида стартаплар учун тажриба технопарки яратиш.
IV. Таълим тизимини такомиллаштириш ва инсон капиталини ривожлантириш
22.	Таълим муассасаларида ўқув-тарбия жараёнига янги таълим дастурлари, замонавий педагогик ва smart-технологияларини жорий этиш орқали ўқитиш сифатини янада яхшилаш (электрон модулларни шакллантириш ва масофавий ўқитишни жорий этиш).	2020 йил 1 сентябргача	Комплекс чора-тадбирлар	Давлат бюджети ва хусусий инвесторлар маблағлари	Мактабгача таълим вазирлиги, Халқ таълими вазирлиги ҳамда Олий ва ўрта махсус таълим вазирлиги вакилларидан иборат ишчи гуруҳ	Таълим жараёнининг узлуксизлиги принципини таъминлаш орқали таълим сифатини ошириш. Электрон онлайн-модуль ва масофавий ўқитиш дастурларини шакллантириш. Ўқитишнинг инновацион усуллари ва ахборот-коммуникация технологиялари асосида янги ўқув дастурларини ишлаб чиқиш. Е-learning (электрон таълим) тизимини кенг жорий этиш.
23.	Ногиронлиги бўлган болаларни тенг ўқитиш ва тарбиялаш учун шароитлар билан таъминлаш мақсадида қуйидагиларни инобатга олган ҳолда инклюзив таълимни ривожлантириш: таълим муассасаларида кўтариш ускуналари, пандуслар, санитар хоналарида махсус мосламалар ўрнатиш, тутқичлар, махсус парта, стол ва бошқа махсус компенсатор воситалари билан жиҳозлаш орқали «тўсиқсиз муҳит»ни яратиш; имконияти чекланган болалар учун интеграциялашган таълим дастурларини яратиш; таълим муассасаларини муносиб салоҳиятли кадрлар билан таъминлаш (педагог-дефектологлар, болаларни психологик-педагогик жиҳатдан кузатиш мутахассислар).	2019 йил 1 декабргача	Такшилий тадбирлар	Давлат бюджети маблағлари, халқаро ташкилотлар грантлари (ПPOOH, ЮНЕСКО, ЮНИСЕФ)	Халқ таълими вазирлиги (Ш. Шерматов), Мактабгача таълим вазирлиги (А. Шин), Олий ва ўрта махсус таълим вазирлиги (И. Мажидов)	Жисмоний имкониятлари чекланган шахсларга улар таълим олиши давомида тенг шароитлар яратиш.
24.	Таълим сифатини ва таълим жараёни натижаларининг мониторингини ҳудудий ҳамда миллий даражаларда тизимли ўтказиш асосида мамлакатнинг инновацион ривожланиш даражасига таъсирини баҳолаш миллий тизимини ишлаб чиқиш ва жорий этиш.	2019 йил 1 мартгача	Вазирлар Маҳкамаси қарори	Давлат бюджети маблағлари	Таълим сифатини назорат қилиш давлат инспекцияси (У. Тошкенбоев), Олий ва ўрта махсус таълим вазирлиги (И. Мажидов), халқ таълими вазирлиги (Ш. Шерматов), Мактабгача таълим вазирлиги (А. Шин), Инновацион ривожланиш вазирлиги (И. Абдурахмонов)	Илғор хориж амалиёти асосида таълим муассасаларининг сифатли рейтинг тизимини (умумтаълим муассасаларидан ташқари) жорий қилиш. Таълим муассасалари рейтинги натижаларидан уларни аккредация қилиш, педагогик ходимларни аттестациядан ўтказиш, текшириш ва фаолиятини мониторинг қилиш ва бошқаларда фойдаланиш. Таълим статистикасининг халқаро методологияси талаб ва принципларини (ЮНЕСКО, ОЭСР) ҳисобга олган ҳолда таълимнинг сифатини ошириш ва такомиллаштириш.
25.	Меҳнат бозорининг ўзгараётган тенденцияларини ҳисобга олиб, қайта тайёрлашга эҳтиёжманд ёшлар учун касб-ҳунар коллежларида қисқа муддатли таълимни ташкил қилиш.	2020 йил 1 мартгача	Норматив-ҳуқуқий ҳужжат	Давлат бюджети ва хусусий инвесторлар маблағлари	Олий ва ўрта махсус таълим вазирлиги (И. Мажидов), Халқ таълими вазирлиги (Ш. Шерматов), Таълим сифатини назорат қилиш давлат инспекцияси (У. Тошкенбоев)	Долзарб ва истиқболли йўналишлар бўйича қисқа муддатли касб-ҳунар таълими курсларини ташкил қилиш (1 ойдан 6 ойгача). Мамлакат иқтисодиётининг эҳтиёжларига мувофиқ ёшларни таълим олишида жадаллашувни, таълим ва ишлаб чиқариш жараёнларида интеграция тезлигини таъминлаш.
26.	Аҳолининг олий таълим билан қамраб олинишини ошириш.	2019 йил 1 апрелгача	Норматив-ҳуқуқий ҳужжат	Давлат бюджети ва хусусий инвесторлар маблағлари	Олий ва ўрта махсус таълим вазирлиги (И. Мажидов), Молия вазирлиги (Ж. Кўчқоров)	Илғор хориж амалиётини ўрганиш асосида янги олий таълим муассасаларини, шу жумладан, хориж ва маҳаллий олий ўқув юртлари филиалларини, шунингдек, нодавлат олий таълим муассасаларини ташкил этиш. Талабаларни тўлов-шартнома асосида олий таълим муассасаларига қабул қилишда квоталарни босқичма-босқич бекор қилиш. Олий таълим муассасаларига талабаларни тўлов-шартнома асосида қабул қилиш квоталарини олий ўқув юртининг қуввати ва кадрларга бўлган эҳтиёжидан келиб чиқиб мустақил равишда белгилаш ҳуқуқини бериш. Абитуриентларга бир вақтнинг ўзида бир нечта олий таълим муассасаларига киришга руҳсат бериш. Иқтисодиёт эҳтиёжига тегишлилигини таъминлашда олий таълим муассасаларининг маъмурий, академик ва молиявий эркинлигини кенгайтириш.
27.	Табиий ва техника фанлари йўналишлари бўйича талабалар сонини кўпайтириш.	2019 йил 1 декабргача	Қабул квоталарини қайта кўриб чиқиш, ўқитишнинг янги йўналишларини ташкил этиш	-	Олий ва ўрта махсус таълим вазирлиги (И. Мажидов), Фанлар академияси (Б. Юлдашев), Молия вазирлиги (Ж. Кўчқоров), Иқтисодиёт вазирлиги (Б. Ходжаев)	Мамлакатда STEM — Science, Technology, Engineering and Mathematics (Илм-фан, Технология, Муҳандислик ва Математика) таълим тизимини ривожлантириш. Технологик жараёнларни ривожлантириш ва био- ҳамда нанотехнологияларни модернизация қилишда етакчи рол ўйнайдиган илмий-муҳандис кадрларга бўлган эҳтиёжни таъминлаш.
28.	Чоп этилган илмий мақолалар миқдори, келтирилаётган индекси, халқаро конференциялар ва семинарлардаги иштироки, олинган патентлар сони бўйича сараланган, мазкур соҳада жуда фаол бўлган олий таълим муассасаларини давлат томонидан қўллаб-қувватлаш асосида олий таълим муассасалари тадқиқотларини кучайтириш.	2019 йил 1 июнгача	Чора-тадбирлар дастури	Инновацияларни қўллаб-қувватлаш жамғармаси, корхоналар, венчур жамғармалармаблағлари	Инновацион ривожланиш вазирлиги (И. Абдурахмонов), Олий ва ўрта махсус таълим вазирлиги (И. Мажидов)	Олий таълим муассасаларининг илмий-тадқиқот фаолияти самарадорлиги кўрсаткичларини такомиллаштириш: чоп этилган илмий мақолалар миқдори, келтирилаётган индексини ошириш, халқаро конференциялар ва семинарлардаги иштироки, олинган патентлар сони ва бошқалар. Олий таълим муассасаларининг энг фаол ва натижадор илмий мактабларини қўллаб- қувватлаш, жу жумладан молиявий жиҳатдан қўллаш.
29.	Тармоқ ва ҳудудий иқтисодиёт сценарийлари бўйича таклифлар ишлаб чиқиш мақсадида етакчи олий таълим муассасаларида Форсайт марказларини инновацион фаолият ривожланишини прогнозлаш тизимининг алоҳида бўғими сифатида яратиш. Ички ва ташқи муҳитнинг илмий-технологик жиҳатдан прогноз қилишни таъминлаш, олий таълим муассасаларининг технологик ва инновацион қуршови ҳамда устувор инновацион йўналишларини ривожлантириш.	2019 йил 1 июнгача	Ўзбекистон Республикаси Президентининг қарори	Давлат бюджети маблағлари ва хусусий инвесторлар, Инновацияларни қўллаб-қувватлаш жамғармаси маблағлари	Олий ва ўрта махсус таълим вазирлиги (И. Маджидов), Молия вазирлиги (Ж. Кўчқоров), Инновацион ривожланиш вазирлиги (И. Абдурахмонов),	Инновацион секторда кооперация жараёнларини ривожлантириш: ишлаб чиқариш соҳасидаги илмий ютуқларни рўёбга чиқариш учун олий таълим муассасаларининг йўналишларини ошириш ҳамда маркетинг тадқиқотларини ўтказиш. Долзарб илмий-техника соҳаларини прогноз қилиш тизими ва доимий мониторингини таъминлаш.Тадқиқотлар ва ишланмаларнинг жаҳон бозорида етакчи позицияларга эришиш. Тафаккур «чашмаларини» шакллантириш, прогнозлаштириш, инновацион технологияларни қўллаган ҳолда янги соҳаларни излаш билан шуғулланувчи фанлараро таҳлилий гуруҳларни ўқитиш ва тайёрлаш тизимини ташкил этиш.
V. Рақобатни ривожлантириш ва маъмурий тўсиқларни қисқартириш
30.	Корпоратив ҳуқуқни ривожлантириш ва халқаро тажрибани ҳисобга олган ҳолда корпоратив бошқарувнинг замонавий принципларини жорий этиш.	2019 йил 1 апрелгача	Ўзбекистон Республикаси Президентининг қарори	Давлат бюджети маблағлари	Давлат рақобат қўмитаси (И. Шарипов), Инновацион ривожланиш вазирлиги (И. Абдурахмонов), Молия вазирлиги (А. Хайдаров), ДСҚ (Б. Мусаев), ЛБМА (Д. Ли)	Устав фондларида давлат улуши бўлган давлат унитар корхоналари ва хўжалик жамиятларида корпоратив бошқарувнинг принципларидан кенг фойдаланиш. Иқтисодий фаолият кўрсаткичларидан келиб чиқиб, устав фондларида давлат улуши бўлгандавлат унитар корхоналари ва хўжалик жамиятлари фаолиятини баҳолашни жорий этиш (капитал маблағларнинг самарадорлиги, меҳнат унумдорлигини ошириш, хориж инвестициялари, янги технологияларни жалб қилиш ҳажми, молия ҳисоботининг шаффофлиги ва бошқалар). Акциядорларнинг ҳуқуқлари, шу жумладан миноритар ҳуқуқларини ҳимоя қилишнинг таъсирчан тизимини шакллантириш.
31.	Иқтисодиётни ривожлантиришнинг инновацион йўлига ўтишини рағбатлантирувчи рақобат бозорини шакллантириш ва ресурслардан самарали фойдаланиш.	2020 йил 1 январгача	Иқтисодиётда рақобат муҳитини ривожлантириш ва монополиядан чиқариш концепцияси	Давлат бюджети маблағлари	Давлат рақобат қўмитаси (Н. Шарипов), Инновацион ривожланиш вазирлиги (И. Абдурахмонов), Молия вазирлиги (А. Хайдаров), Адлия вазирлиги (Р. Давлетов), ДСҚ (Б. Мусаев) ЛБМА (Д. Ли)	Тармоқ хўжалик бирлашмалари кўринишида бўлган, кўп жиҳатдан тармоқ вазирликлари ва идоралари мақоми ва функцияларига эга, сақланиб қолган тармоқ монополиялари (квази вазирлик тузилмалари)ни тугатиш. Давлат-хусусий шериклиги ривожлантириш орқали самарасиз давлат монополия компанияларини хусусийлаштириш. Давлат корхоналари, хўжалик бирлашма ва ассоциацияларининг хўжалик ва бошқарув функцияларини ажратиш.
32.	Монополияга қарши сиёсатни, шу жумладан давлат-хусусий шериклигини жорий этиш ҳисобига такомиллаштириш, барча юридик ва жисмоний шахслар учун табиий монополиялар субъектларининг товарлар, ишлар ва хизматлардан чекловларсиз фойдаланишни таъминлаш, монополист-корхоналар маҳсулотларига баҳо белгилашнинг самарали механизмини жорий этиш.	2019 йил 1 мартгача	Норматив-ҳуқуқий ҳужжат	Давлат бюджети маблағлари	Давлат рақобат қўмитаси (Н. Шарипов), Иқтисодиёт вазирлиги (Б. Ходжаев), Молия вазирлиги (Ж. Кўчқоров)	Рақобат муҳитини шакллантириш, ишлаб чиқариш самардорлигини ва рақобатбардошлигини оширишни рағбатлантиришда монополияга қарши сиёсат ролини ошириш. Корхоналарнинг рақобатга қарши ҳаракатларини аниқлаш. Монополияга қарши бошқариш органларининг институционал ва кадрлар салоҳиятини ошириш, монополияга қарши баҳсларни профессионал муҳокама қилувчи кадрлар тайёрлаш. Монополияга қарши тартибга солиш органлари фаолиятида эълон қилинган нархларга риоя қилиш устидан назорат функциясидан бозордаги тўсиқларни аниқлаш ва бартараф этиш ҳамда монопол мавқени эгаллаб турган ташкилотлар томонидан суиистеъмолчиликка йўл қўймаслик орқали рақобат муҳитини риввожлантиришфункциясига эътиборни қаратиш.
33.	Тадбиркорлик фаолиятини амалга оширишнинг тенг шарт-шароитларини яратиш ва ички бозор монополиялаштирилишининг олдини олиш.	2019 йил 1 июнгача	Қонунчиликка ўзгартириш ва қўшимчалар киритиш	Давлат бюджети маблағлари	Молия вазирлиги (А. Хайдаров), Иқтисодиёт вазирлиги (М. Мирзаев), Бош прокуратура (А. Мавлонов), Савдо-саноат палатаси (А. Икрамов)	Ижтимоий сўровлар, иқтисодий тадқиқотлар, экперт баҳолаш ва статистика ҳисоботи негизида мўлжалланган сифат ва миқдор индикаторлари асосида товар бозорларидаги рақобат муҳити ҳолатини баҳолаш кўрсаткичларининг комплекс тизимини шакллантириш. Ўзбекистон Республикасига инвестицияларни жалб қилишга кўмаклашувчи ишбилармонлик муҳитини янада ривожлантириш.
34.	2021 йилга бориб давлат кадастри ишларини юритишни тўлиқ рақамлаштиришни таъминлаш ва мулкни рўйхатдан ўтказиш жараёнларини соддалаштириш.	2019 йил 1 февралгача	Чора-тадбирлар дастури	Давлат бюджети, техник кўмаклашиш маблағлари, грантлар	Давергеодезкадастр (А. Абдуллаев), Адлия вазирлиги (Р. Давлетов), Қурилиш вазирлиги (А. Тухтаев), Ахборот технологиялари ва коммуникацияларини ривожлантириш вазирлиги (Ш. Содиқов)	Кўчмас мулкнинг ягона электрон реестрини яратиш. Ҳудудларнинг бош режасини эълон қилиш. Ер ажратишнинг илғор механизмларини жорий этиш.
35.	2025 йилга бориб энергиянинг қайта тикланадиган ва муқобил манбаларидан фойдаланган ҳолда электр энергиясини ишлаб чиқариш ҳиссасини 20 фоиздан кўпроққа ошириш.	2019 йил 1 июлгача	Ташкилий-амалий комплекс чора-тадбирлар	Давлат бюджети, техник кўмаклашиш маблағлари, грантлар ва бошқа маблағлар	«Ўзбекэнерго» АЖ (У. Мустафоев), «Ўзбекгидроэнерго» АЖ (А. Сангинов), «НЭК» АЖ (Д. Муратов), Инновацион ривожланиш вазирлиги (И. Абдурахмонов), Молия вазирлиги (Ж. Кўчқоров), Иқтисодиёт вазирлиги (Б. Ходжаев), Ўзатом (Ж. Мирзамахмудов)	Ёқилғи-энергетика балансини қайта тикланадиган ва муқобил энергия манбаларидан фойдаланган, иккиламчи энергетика ресурсларини энергетик утилизация қилган ҳолда электр энергия ишлаб чиқариш қисмида диверсификациялаш, қуёш, шамол энергиялари, микро- ва кичик гидроэлектростанциялардан фойдаланишда апробациядан ўтгантехнологиялар асосида ишлаб чиқариш қувватларини яратишга тадбиркорлик субъектларини жалб қилиш. Қайта тикланадиган манбалардан энергия, бунинг учун ускуналар (қурилмалар) ишлаб чиқарувчиларни ҳамда инвесторларни қўллаб-қувватлаш ва рағбатлантириш шароитлари ва механизмларини яратиш. Замонавий энергия самарадор ва энергия тежовчи технологияларни татбиқ қилиш асосида амалдаги қувватларни модернизация қилиш, техник ва технологик жиҳатдан қайта жиҳозлашва янгиларини яратиш орқали чиқарилаётган маҳсулотларнинг энергия сарфини камайтириш.

Изоҳ. Норматив-ҳуқуқий ҳужжатлар тегишли ҳуқуқий муносабатларни тартибга солиш соҳалари ва предметига қараб яхлит бир ҳужжатга бирлаштирилиши мумкин.

(2-илова Ўзбекистон Республикаси Президентининг 2022 йил 17 мартдаги ПФ-89-сонли Фармони таҳририда — Қонунчилик маълумотлари миллий базаси, 18.03.2022 й., 06/22/89/0227-сон)

(3-илова Ўзбекистон Республикаси Президентининг 2022 йил 23 августдаги ПФ-197-сонли Фармонига асосан ўз кучини йўқотган — Қонунчилик маълумотлари миллий базаси, 24.08.2022 й., 06/22/197/0765-сон)

(4-илова Ўзбекистон Республикаси Президентининг 2024 йил 25 октябрдаги ПФ-168-сонли Фармонига асосан ўз кучини йўқотган)

(Қонун ҳужжатлари маълумотлари миллий базаси, 22.09.2018 й., 06/18/5544/1951-сон; 08.03.2019 й., 06/19/5687/2723-сон, 11.12.2019 й., 06/19/5892/4134-сон; 20.03.2020 й., 06/20/5971/0348-сон; 28.09.2020 й., 06/20/6075/1330-сон; Қонунчилик маълумотлари миллий базаси, 07.07.2021 й., 06/21/6257/0645-сон, 23.08.2021 й., 06/21/6280/0811-сон; 18.03.2022 й., 06/22/89/0227-сон; 24.08.2022 й., 06/22/197/0765-сон; 01.03.2025 й., 06/25/27/0196-сон)