«Архив иши тўғрисида»ги Ўзбекистон Республикасининг Қонуни ижросини таъминлаш мақсадида Вазирлар Маҳкамаси қарор қилади:

1. Архивларнинг асосий иш турлари бўйича вақт ва ишлаб чиқаришнинг Намунавий меъёрлари иловага мувофиқ тасдиқлансин.

2. Ўзбекистон Республикаси «Ўзархив» агентлиги:

Архивларнинг асосий иш турлари бўйича вақт ва ишлаб чиқаришнинг Намунавий меъёрларининг жорий этилишини доимий назорат қилиш;

«Ўзархив» агентлигининг расмий веб-сайтида эркин фойдаланиш учун Архивларнинг асосий иш турлари бўйича вақт ва ишлаб чиқаришнинг Намунавий меъёрларини жойлаштириш таъминласин.

3. Мазкур қарорнинг ижросини назорат қилиш Ўзбекистон Республикаси Бош вазирининг ўринбосари — Ахборот тизимлари ва телекоммуникацияларини ривожлантириш комплекси раҳбари зиммасига юклансин.

1. Мазкур Архивларнинг асосий иш турлари бўйича вақт ва ишлаб чиқаришнинг Намунавий меъёрлари (кейинги ўринларда — Намунавий меъёрлар) «Архив иши тўғрисида»ги Ўзбекистон Республикасининг Қонунига мувофиқ архивларнинг асосий фаолият турларининг ишлаб чиқариш ва вақт нормаларини тартибга солади.

2. Ушбу Намунавий меъёрларда қуйидаги асосий тушунчалар қўлланилади:

архив ҳужжатлари — фуқаролар, жамият ва давлат учун аҳамияти боис сақланиши лозим бўлган матнли, қўлёзма ва машинада ўқиладиган ҳужжатлар, овозли ёзувлар, видеоёзувлар, киноленталар, фотосуратлар, фотография плёнкалари, чизмалар, схемалар, хариталар, шунингдек бошқа моддий жисмлардаги ёзувлар;ёзувлар;

каталоглар — архив фондлари, сақлов бирлиги/ҳисоб бирлиги, архив ҳужжатлари (ёки уларнинг қисмлари) мазмуни тўғрисидаги маълумотлар мавзу ёки соҳа бўйича белгиланган таснифлаш схемаси асосида жойлаштирилган архивнинг фондлараро архивмаълумотномаси;

жамлаш — архивни архив ҳужжатлари билан мунтазам тўлдириб бориш мақсадида амалга оширилувчи архив фонди доирасида архив ҳужжатларини фондлаштириш ҳамда ташкил этиш ва жамлаш манбаларидан уларни қабул қилиб олиш мақсадида йўналиши ва даражаси бўйича зарурий архив ҳужжатлари билан тўлдириб боришга доир ишлар мажмуи;

илмий-маълумотнома аппарати — архив ҳужжатларининг таркиби ва мазмуни тўғрисидаги ягона илмий-услубий асосда тузилган, бир-бири билан боғлиқ, ўзаро тўлдирувчи архив маълумотномалари мажмуи (архивнинг илмий-маълумотнома тизими);

йиғма жилдлар (ҳужжатлар) рўйҳати — сақлов бирликлари/ҳисоб бирликлари таркиби ва мазмунини очиб бериш, уларнинг фондлар ичида тизимлаштирилиши ва ҳисобини мустаҳкамлаш учун мўлжалланган архив маълумотномаси;

фойдаланувчи — архив ҳужжатларидан зарур маълумотларни олиш ва улардан фойдаланиш учун архивга мурожаат этувчи юридик ёки жисмоний шахс;

тартибга келтириш — архив рўйхатларини тузиш, йиғмажилдларни шакллантириш ва расмийлаштириш, ҳужжатларнинг қимматлилигини аниқлаш экспертизасини ўтказишни ўз ичига олган ҳужжатларни илмий-техникавий ишлаш ва архивларда сақлаш учун тайёрлаш, шунингдек архив рўйхатларини тузиш бўйича ишлар мажмуи;

архив ҳужжатларининг ҳисоби — архивлар томонидан архив ҳужжатлари ва архив фондларининг мунтазам равишда келиб тушиши, мавжудлиги ва ҳолатини белгиланган бирликлар асосида аниқлаш ҳамда уларни ҳисоб ҳужжатларида акс эттириш бўйича тизимли мониторинг олиб бориш.

3. Ушбу Намунавий нормаларда қуйидаги қисқартмалар қўлланилади:

МБ — маълумотлар базаси;

ИМА — илмий-маълумотнома аппарати;

АҚ — алоҳида қимматли;

ШЭҲМ — шахсий электрон-ҳисоб машинаси;

МАФ — маълумотнома-ахборот фонди;

СФ — суғурта фонди;

ЭТК — эксперт-текширув комиссияси;

ЭТУК — эксперт-текширув услубий комиссияси;

МЭК — марказий эксперт комиссияси.

4. Ушбу Намунавий меъёрлар бошқарув, илмий-техник ҳужжатлар, кинофотофоно ҳужжатлар, шахсий келиб чиқиш ва шахсий таркиб ҳужжатларини сақлайдиган давлат, шунингдек нодавлат архивларига (кейинги ўринларда — архив) татбиқ этилади.

5. Ушбу Намунавий меъёрлар қуйидагилар:

архив, унинг таркибий бўлинмалари ва аниқ ижрочилари фаолиятини режалаштиришда, асосий ходимларнинг зарур сонини ҳисоблаш ва асослаш, архивлар ва уларнинг таркибий бўлинмалари иши тўғрисида ҳисобот тузишда сарфланган иш вақтини таҳлил қилиш учун ишнинг мураккаблиги бегиланади;

40 соатлик иш ҳафтасида 8 соат давом этадиган иш куни учун ўрнатилади;

тайёргарлик ва якуний ишларнинг вақти (топшириқни бажаришга тайёргарлик кўриш учун ишлатиладиган вақт ёки уни якунлаш билан боғлиқ ҳаракатлар), ёрдамчи ишлар (асосий ишнинг бажарилишини таъминлайдиган ҳаракатлар учун ишлатиладиган вақт) ва иш жойига техник хизмат кўрсатишни ташкил этиш (иш жойини ташкил қилиш ва унга ғамхўрлик қилиш учун ишлатиладиган вақт)ҳисобга олинади;

рўйҳатлар, карточкалар, ахборот хатлари, маълумотномалар ва бошқа ҳужжатларнинг бир тилда тузилишини назарда тутади.

6. Меъёрларни ҳисоблашда иш куни давомида 20 дақиқа давом этадиган дам олиш ва шахсий эҳтиёжлар учун вақт ҳисобга олинади (иш куни давомида белгиланган танаффуслар учун вақтни ҳисобга олмаган ҳолда).

7. Мазкур Намунавий меъёрлар мақсадлари учун сақлов бирлиги, ҳужжат, босма варақ, машинкада ёзиладиган варақ, варақ, карточка, харита, микрофильм, микрофиш, қути, боғлам, бокс, ролик ва бошқа асосий ўлчов бирликлари қўлланилади.

8. Ҳужжатларни сақлов бирлиги деганда 250 вараққача ҳажмда бўлган 210×297 мм (А4 формат) ўлчамдаги қоғоз асосдаги йиғмажилд, шахсий келиб чиқиш ҳужжатлари учун — худди шу ўлчамдаги 50 варақ тушунилади.

Кўрсатилган миқдордан кўп ёки кам варақлар сақловчи йиғмажилдлар мос равишда 250 ёки 50 вараққача ҳажм билан битта шартли йиғмажилдга ҳисобланади.

9. 10 (5) сақлов бирлигини ўз ичига олган қути (боғлам) иш ҳажмини ўлчаш бирлиги сифатида ҳисобланади.

10. Варақнинг иш ҳажмини ўлчаш бирлиги сифатида архив иши варақаси бирлиги олинади (варақнинг бир томонидаги матн).

11. Битта босма варақнинг иш ҳажмини ўлчаш бирлиги сифатида 40 минг босма белгини ўз ичига олган материал олинади, бу ҳар бири 2450 белгидан иборат 1,5 оралиқда босилган 16-17 ёзувли саҳифани ташкил этади.

12. Турли хил ўлчов бирликларига эга бўлган бир нечта операциялардан иборат бўлган ишлар учун меъёрларда иккита ўлчов бирлиги ўрнатилади, улардан бири (ҳисоблагич) ишнинг якуний натижасига йўналтирилган, иккинчиси (махраж) ишнинг боришини тезкор назорат қилиш воситаси бўлиб хизмат қилади.

13. Меҳнат унумдорлиги тарихийлик даврига ёки ҳужжатларнинг хусусиятига боғлиқ бўлган ишлар учун ҳужжатларнинг келиб чиқиши (совет давригача (тарихий), совет ва мустақиллик даври, бошқарув ҳужжатлари, шахсий келиб чиқиши ва шахсий таркиби ҳужжатлари) асосида табақалаштирилган нормалар белгиланади.