Ўзбекистон Республикаси Ҳукумати томонидан тақдим этилиб, муҳокама қилиш мобайнида қонунчилик палатаси депутатларининг фикр-мулоҳазалари ва таклифлари ҳисобга олинган ҳолда маромига етказилган Ўзбекистон Республикасининг 2011 йилги Давлат бюджети лойиҳасини кўриб чиқиб, Ўзбекистон Республикаси Олий Мажлисининг қонунчилик палатаси қарор қилади :

1. Ўзбекистон Республикасининг 2011 йилги Давлат бюджети ҳамда солиқ ва бюджет сиёсатининг асосий йўналишлари Давлат бюджети тақчиллигининг энг юқори даражаси ялпи ички маҳсулот ҳажмига нисбатан 1,0 фоиз миқдорида белгиланган ҳолда қабул қилинсин.

2. Ўзбекистон Республикаси Ҳукумати:

мамлакатда олиб борилаётган ижтимоий-иқтисодий сиёсатни ва макроиқтисодий барқарорликни таъминлаш, иқтисодий ўсишнинг барқарор юқори суръатларига, иқтисодиётнинг ва жамият ижтимоий ҳаётининг мувозанатли ривожланишига, аҳоли фаровонлиги ва турмуш даражасини оширишга эришиш юзасидан зарур чора-тадбирлар кўрсин;

самарали инвестиция сиёсатини олиб бориш ҳамда стратегик жиҳатдан аҳамиятга молик лойиҳаларни амалга ошириш, иқтисодиётнинг энг муҳим тармоқларини техник ва технологик жиҳатдан қайта жиҳозлаш орқали иқтисодиётдаги таркибий ўзгаришларни ва унинг диверсификация қилинишини давом эттирсин;

хўжалик юритувчи субъектлар фаолиятини қўллаб-қувватлашга қаратилган солиқ маъмуриятчилиги такомиллаштирилиши ва унинг самарадорлиги оширилишини таъминласин, бюджет маблағларидан мақсадли фойдаланилиши ва уларнинг асоссиз сарфланишига барҳам бериш устидан қатъий назорат қилинишини таъминласин;

иш ҳақи, стипендиялар, ижтимоий нафақалар ва пенсиялар миқдорларини инфляция суръатларига нисбатан илдам ошириб бориш орқали аҳоли фаровонлигини изчил яхшилашга қаратилган чора-тадбирлар амалга оширилишини бундан буён ҳам давом эттирсин;

таълим муассасаларини реконструкция қилиш, капитал таъмирлаш ва жиҳозлаш ҳамда Олий таълим муассасаларининг моддий-техника базасини мустаҳкамлаш дастурини амалга оширишни таъминласин;

2011 йилда Иш ўринлари яратиш ва аҳолининг бандлигини таъминлаш дастурини бажариш юзасидан зарур чора-тадбирларни кўрсин;

Давлат бюджети тақчиллигини республика бюджетининг зарурий айланма касса маблағлари ҳажмидан ортиқ бўлган бўш қолдиқлари ҳамда бошқа ноинфляциявий манбалар ҳисобига молиялаштирилишини назарда тутсин.

3. Маҳаллий давлат ҳокимияти органлари Давлат бюджети даромадларининг тасдиқланган кўрсаткичлари бажарилишини таъминласин, минтақаларнинг солиқ солинадиган базасини кенгайтириш ва молиявий салоҳиятини мустаҳкамлаш юзасидан зарур чора-тадбирларни амалга оширсин, бюджет маблағларидан мақсадли фойдаланилиши устидан қатъий назорат ўрнатсин.

4. Ушбу қарор Ўзбекистон Республикаси Олий Мажлисининг Сенатига юборилсин.

5. Ушбу қарор қабул қилинган кундан эътиборан кучга киради.