Respublikamizga investitsiyalarni jalb qilishni ragʻbatlantirish uchun asos sifatida investitsiyaviy muhitni yaxshilash, iqtisodiyot tarmoqlarining raqobatbardoshligini oshirish va investitsiya faoliyatini samarali tartibga solish borasida mamlakatda keng miqyosli ishlar amalga oshirilmoqda.

Shu bilan birga, hududlarning hamda iqtisodiyot tarmoqlarining xom ashyo, infratuzilma va mehnat salohiyatini hisobga olgan holda ishlab chiqilgan investitsiya loyihalarining mavjud emasligi xorijiy kapitalni faol jalb qilish jarayonlariga toʻsqinlik qilmoqda.

Investitsiya loyihalarining samarali amalga oshirilishi ishlab chiqarish faoliyatiga boʻsh turgan va qurilishi tugallanmagan obyektlarni jalb qilishni taqozo etadi.

Potensial investorlarga taklif etish uchun xarajatlarni qoplay oladigan istiqbolli investitsiya loyihalarini ishlab chiqish, mamlakatimiz uchun ustuvor boʻlgan iqtisodiyot sohalari va tarmoqlariga investitsiyalarni jalb qilishni ragʻbatlantirish orqali respublika investitsiya salohiyatini oshirish, shuningdek, Oʻzbekiston Respublikasi Investitsiyalar va tashqi savdo vazirligi faoliyatining samaradorligini oshirish maqsadida:

1. Oʻzbekiston Respublikasi Prezidentining 2019-yil 14-yanvardagi “Davlat aktivlarini boshqarish, monopoliyaga qarshi kurashishni tartibga solish tizimini va kapital bozorini tubdan takomillashtirish chora-tadbirlari toʻgʻrisida”gi PF-5630-son Farmoniga muvofiq foydalanilmayotgan obyektlardan samarali foydalanish, shuningdek, boʻsh turgan va qurilishi tugallanmagan obyektlarning ishlab chiqarish faoliyatini tiklashga qaratilgan investitsiya loyihalari (“yoʻl xaritalari”)ni ishlab chiqish boʻyicha idoralararo komissiyalarning ishchi organi funksiyalari Oʻzbekiston Respublikasi Investitsiyalar va tashqi savdo vazirligi (keyingi oʻrinlarda — Vazirlik) zimmasiga yuklatilganligi maʼlumot uchun qabul qilinsin.

Vazirlikka qoʻshimcha ravishda 70 ta boshqaruv xodimlari shtat birligi, shu jumladan Qoraqalpogʻiston Respublikasi Investitsiyalar va tashqi savdo vazirligi, viloyatlar va Toshkent shahar investitsiyalar va tashqi savdo boshqarmalariga 5 tadan shtat birliklari ajratilsin.

2. Quyidagilar:

viloyatlar va Toshkent shahar hokimliklari tuzilmalariga — Oʻzbekiston Respublikasi investitsiyalar, sanoat va savdo vaziri bilan kelishilgan holda qonunchilik hujjatlarida belgilangan tartibda lavozimga tayinlanadigan va lavozimdan ozod etiladigan hokim oʻrinbosari — viloyatlar va Toshkent shahar investitsiyalar, sanoat va savdo boshqarmasi boshligʻi lavozimi;

tumanlar (shaharlar) hokimliklari tuzilmalariga — hokim oʻrinbosari — viloyatlar va Toshkent shahar investitsiyalar, sanoat va savdo boshqarmasi boshligʻi bilan kelishilgan holda qonunchilik hujjatlarida belgilangan tartibda lavozimga tayinlanadigan va lavozimdan ozod etiladigan hokim oʻrinbosari — tuman (shahar) investitsiyalar, sanoat va savdo boʻlimi boshligʻi lavozimi kiritilsin.

3. Quyidagilar:

viloyat hokimliklari tuzilmalaridagi (Buxoro, Samarqand, Toshkent, Xorazm viloyatlari va Toshkent shahridan tashqari) — viloyat hokimining investitsiyalar, innovatsiyalar, xususiylashtirilgan korxonalarga koʻmaklashish, erkin iqtisodiy va kichik sanoat zonalari hamda turizmni rivojlantirish masalalari boʻyicha oʻrinbosari lavozimi;

Buxoro, Samarqand, Toshkent va Xorazm viloyatlari hokimliklari tuzilmalaridagi — viloyat hokimining investitsiyalar, innovatsiyalar, xususiylashtirilgan korxonalarga koʻmaklashish, erkin iqtisodiy va kichik sanoat zonalarini rivojlantirish masalalari boʻyicha oʻrinbosari lavozimi;

Toshkent shahar hokimligi tuzilmasidagi — hokimning investitsiyalar, innovatsiyalar, sanoatni, turizmni rivojlantirish va xususiylashtirilgan korxonalarga koʻmaklashish masalalari boʻyicha oʻrinbosari lavozimi;

tuman (shahar) hokimliklari tuzilmasidagi -hokimning investitsiyalar, innovatsiyalar, xususiylashtirilgan korxonalarga koʻmaklashish va kichik sanoat zonalari, turizmni rivojlantirish masalalari boʻyicha oʻrinbosari lavozimi;

Vazirlik tuzilmasidagi — Qoraqalpogʻiston Respublikasi investitsiyalar va tashqi savdo vaziri, viloyatlar va Toshkent shahar investitsiyalar va tashqi savdo boshqarmalari boshligʻi hamda tumanlar (shaharlar) investitsiyalar va tashqi savdo boʻlimlari boshligʻi lavozimlari tugatilsin.

4. Belgilab qoʻyilsinki:

viloyatlarda, tumanlarda (shaharlarda) kichik sanoat zonalarini hamda Toshkent shahrida sanoatni rivojlantirish borasidagi vazifalar hokimning iqtisodiyot va tadbirkorlik masalalari boʻyicha tegishli birinchi oʻrinbosari zimmasiga yuklanadi;

tumanlarda (shaharlarda) turizmni rivojlantirish borasidagi vazifalar hokimning yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha tegishli oʻrinbosari zimmasiga yuklanadi;

Vazirlikning mazkur bandga muvofiq boʻshayotgan shtat birliklari Vazirlikning tegishli tarkibiy boʻlinmalarida saqlanib qolinadi.

5. Qoraqalpogʻiston Respublikasi Joʻqorgʻi Kengesiga mazkur qarorning 2 — 4-bandlari talablariga muvofiq Qoraqalpogʻiston Respublikasi Vazirlar Kengashining yangilangan tuzilmasini tasdiqlash tavsiya etilsin.

6. Oʻzbekiston Respublikasi Investitsiyalar va tashqi savdo vazirligi huzuridagi Texnologik rivojlanish agentligi hamda Oʻzbekiston Respublikasi Tashqi iqtisodiy faoliyat milliy banki huzuridagi “Investitsiyalar boʻyicha ekspert markazi” unitar korxonasi negizida Oʻzbekiston Respublikasi Investitsiyalar va tashqi savdo vazirligi huzuridagi Investitsiya loyihalarini ishlab chiqish markazi (keyingi oʻrinlarda — Markaz) tashkil etilsin va uning asosiy vazifalari hamda faoliyat yoʻnalishlari etib quyidagilar belgilansin:

innovatsion, yetakchi texnologiyalar va klaster yondashuvini qoʻllagan holda ichki va tashqi bozorlarda raqobatbardosh tayyor mahsulotlar(tovarlar) ishlab chiqarishni kengaytirish uchun mamlakatning raqobatdagi ustunligi, sanoat, infratuzilma, xom ashyo va inson salohiyatini safarbar qilishga yoʻnaltirilgan yangi investitsiya loyihalarini aniqlash va ishlab chiqish;

ishlab chiqarish hajmlarini kengaytirish, tashqi bozorlarga chiqish va jahon bozorlariga raqobatbardosh tayyor mahsulotlarni chiqarish uchun mavjud ishlab chiqarish quvvatlarini va istiqbolli korxonalarni modernizatsiya qilish, texnik va texnologik qayta jihozlash boʻyicha investitsiya loyihalarini ishlab chiqish;

har bir hududning ishlab chiqarish salohiyati va investitsiya hajmlariga boʻlgan ehtiyojlarini aks ettiruvchi, potensial investorlarni qiziqtirishi mumkin boʻlgan dastlabki hisob-kitoblar va boshqa maʼlumotlarga ega boʻlgan aniq loyihalarni ifodalovchi Oʻzbekiston Respublikasining interaktiv investitsiya xaritasini ishlab chiqish va joriy etish;

investitsiya loyihalariga texnik hamrohlik qilish, shuningdek, xalqaro standartlarga muvofiq ularning texnik-iqtisodiy asoslanishlarini mahalliy va xorijiy loyiha-tadqiqot va injiniring tashkilotlarini jalb qilgan holda ishlab chiqish uchun zarur boʻlgan litsenziya dasturlari va tizimlarning maʼlumotlar bazasini shakllantirish;

Vazirlik va Oʻzbekiston Respublikasi Investitsiyalar va tashqi savdo vazirligi huzuridagi Xorijiy investitsiyalarni jalb etish agentligiga potensial investorlarni jalb qilish uchun investitsiya loyihalarini, shu jumladan dastlabki texnik-iqtisodiy asoslanishlar bilan birga kiritish.

7. Oʻzbekiston Respublikasi Investitsiyalar va tashqi savdo vazirligi huzuridagi Investitsiya loyihalarini ishlab chiqish markazi boshqaruv xodimlarining cheklangan soni 50 nafardan iborat tuzilmasi 1-ilovaga muvofiq tasdiqlansin, shu jumladan Oʻzbekiston Respublikasi Davlat budjetidan moliyalashtiriladigan qoʻshimcha 33 ta boshqaruv xodimlari shtat birligi ajratilsin.

Belgilansinki, mazkur qarorga muvofiq Vazirlik va Markazga ajratilayotgan qoʻshimcha shtat birliklari 103 ta boshqaruv xodimlari shtat birligi, shu jumladan tegishincha Oʻzbekiston Respublikasi Iqtisodiyot va sanoat vazirligi hamda Davlat soliq qoʻmitasi hududiy boʻlinmalarining 35 tadan, shuningdek, Davlat bojxona qoʻmitasi hududiy boʻlinmalarining 33 ta shtat birligi qisqartirilishi hisobidan amalga oshiriladi.

8. Belgilab qoʻyilsinki:

a) quyidagilarni lavozimiga tayinlash va lavozimdan ozod etish:

Markaz direktorini — Oʻzbekiston Respublikasi investitsiyalar va tashqi savdo vazirining taqdimnomasiga binoan Oʻzbekiston Respublikasi Vazirlar Mahkamasi tomonidan;

Markaz direktori oʻrinbosarlarini — Oʻzbekiston Respublikasi investitsiyalar va tashqi savdo vaziri tomonidan amalga oshiriladi;

b) Markaz direktori moddiy taʼminot, ijtimoiy va transport xizmati koʻrsatish shartlari boʻyicha vazir oʻrinbosariga tenglashtiriladi;

v) Markaz xodimlariga nisbatan Vazirlikning markaziy apparati xodimlari uchun belgilangan mehnatga haq toʻlash, moddiy ragʻbatlantirish va ijtimoiy himoya shartlari tatbiq etiladi;

g) xizmatchilarning asosiy lavozimlari va ishchilarning kasblari klassifikatori ishga qabul qilishda taʼlimning minimal darajasi va ishchilarga kasbi boʻyicha malakaviy razryadlarni belgilash qismida Markaz uchun, xorijiy davlatlarda oliy oʻquv yurtlarini tugatgan tegishli yoʻnalishdagi mutaxassislarga nisbatan qoʻllanishi, istisno tariqasida, tavsiyaviy xarakterga ega boʻladi;

d) Markaz Oʻzbekiston Respublikasi Investitsiyalar va tashqi savdo vazirligi huzuridagi Texnologik rivojlanish agentligi va Oʻzbekiston Respublikasi Tashqi iqtisodiy faoliyat milliy banki huzuridagi “Investitsiyalar boʻyicha ekspert markazi” unitar korxonasining barcha huquqlari,majburiyatlari va shartnomalari boʻyicha huquqiy vorisi hisoblanadi;

e) ushbu qaror kuchga kirgunga qadar ustav fondi (kapitali)ni shakllantirishga kiritilgan investitsiyalar va Oʻzbekiston Respublikasi Tashqi iqtisodiy faoliyat milliy bankining “Investitsiyalar boʻyicha ekspert markazi” unitar korxonasining kreditor va boshqa qarzdorligini qoplashga yoʻnaltirilgan mablagʻlar bank xarajatlari hisoblanadi;

j) Markaz iqtisodiyotning tegishli tarmoqlarida investitsiya takliflarini ishlab chiqish masalalari boʻyicha vazirliklar, idoralar va mahalliy ijro hokimiyati organlari faoliyatini muvofiqlashtirishda Vazirlikka koʻmaklashadi.

9. Quyidagilar Markaz faoliyati va uning taʼminoti xarajatlarini moliyalashtirish manbalari etib belgilansin:

Oʻzbekiston Respublikasi Davlat budjeti mablagʻlari;

xalqaro moliya institutlari va donor mamlakatlarning texnik koʻmagi mablagʻlari;

qonun hujjatlarida taqiqlanmagan boshqa manbalar.

10. Oʻzbekiston Respublikasi Moliya vazirligi:

2019-yilda mazkur qarorni amalga oshirish borasida Markaz xarajatlari, shu jumladan 3 ta yengil avtomobilni sotib olish va taʼminlash uchun Oʻzbekiston Respublikasi Davlat budjeti parametrlari doirasida mablagʻlar ajratsin hamda 2020-yildan boshlab, har yili zarur budjet mablagʻlarini nazarda tutsin;

mazkur qaror qoidalaridan kelib chiqqan holda 2019-yil uchun tasdiqlangan Oʻzbekiston Respublikasi Davlat budjeti xarajatlari parametrlariga tegishli oʻzgartirishlar kiritsin.

11. Belgilansinki, Markaz oʻziga yuklatilgan vazifalar va funksiyalarni amalga oshirish uchun quyidagi huquqlarga ega:

davlat organlarining maʼlumotlar bazalaridan belgilangan tartibda foydalanish, Markaz vakolatiga kiradigan masalalarni hal etish uchun davlat va xoʻjalik boshqaruvi organlari, mahalliy davlat hokimiyati organlari, respublikaning xorijdagi diplomatik va savdo vakolatxonalari, Markaziy bank va tijorat banklaridan maʼlumotlarni soʻrab olish;

davlat statistika organlaridan zarur statistik maʼlumotlarni begʻaraz asosda olish;

oʻz vakolati doirasida ekspert-tahliliy ishlarni olib borish va investitsiya takliflarini ishlab chiqish uchun toʻgʻridan-toʻgʻri shartnomalarni tuzish orqali xalqaro ekspertlarni, davlat tashkilotlari va ularning vakillarini, mahalliy va xorijiy loyiha-tadqiqot va injiniring kompaniyalarini,shuningdek, alohida mutaxassislarni jalb qilish.

14. Markaz begʻaraz foydalanish huquqi asosida Toshkent shahri, Yashnobod tumani, Istiqlol koʻchasi, 51-uy manzili boʻyicha joylashtirilsin.

15. Oʻzbekiston Respublikasi Vazirlar Mahkamasi,zarur hollarda, Markaz faoliyati natijalarini baholash asosida uning boshqaruv xodimlari shtat birligini oshirish masalasini koʻrib chiqsin.

16. Oʻzbekiston Respublikasi Prezidentining va Oʻzbekiston Respublikasi Vazirlar Mahkamasining ayrim qarorlariga 2-ilovaga muvofiq oʻzgartirishlar kiritilsin.

17. Vazirlik manfaatdor vazirlik va idoralar bilan birgalikda bir oy muddatda:

Oʻzbekiston Respublikasi Prezidentining 2019-yil 29-apreldagi PQ-4300-son qarori bilan tasdiqlangan Xorijiy investorlarga taklif etiladigan istiqbolli investitsiya takliflarining roʻyxatida nazarda tutilgan investitsiya loyihalarini, zarur hollarda, texnik-iqtisodiy asoslanishlar bilan birga ishlab chiqishni taʼminlasin;

Markazning asosiy vazifalari va faoliyati yoʻnalishlaridan kelib chiqqan holda hududlar kesimida 2019-2020-yillar uchun dastlabki hisob-kitoblarni nazarda tutadigan Investitsiya loyihalarini ishlab chiqish dasturini tasdiqlasin;

“OʻzInjiniring” respublika loyiha instituti va “OʻzLITIneftegaz” AJning “UorliParsons Oʻzbekiston injiniring” QK MCHJdagi ulushlarini Markazga oʻtkazishning maqsadga muvofiqligi toʻgʻrisidagi takliflarni Oʻzbekiston Respublikasi Vazirlar Mahkamasiga kiritsin;

Oʻzbekiston Respublikasi Investitsiyalar va tashqi savdo vazirligi huzuridagi Investitsiya loyihalarini ishlab chiqish markazi toʻgʻrisidagi nizomni tasdiqlash toʻgʻrisidagi Vazirlar Mahkamasi qarori loyihasini belgilangan tartibda kiritsin;

qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida takliflar kiritsin.

18. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Bosh vazirining oʻrinbosari E.M. Ganiyev zimmasiga yuklansin.

1. Oʻzbekiston Respublikasi Prezidentining 2019-yil 28-yanvardagi “Oʻzbekiston Respublikasi Investitsiyalar va tashqi savdo vazirligi faoliyatini tashkil etish toʻgʻrisida”gi PQ-4135-son qarorida:

a) 1-bandda:

toʻrtinchi xatboshi chiqarib tashlansin;

beshinchi xatboshi toʻrtinchi xatboshi etib hisoblansin;

b) 2-bandda:

toʻrtinchi xatboshidagi “Texnologik rivojlanish agentligi” soʻzlari “Investitsiya loyihalarini ishlab chiqish markazi” soʻzlari bilan almashtirilsin;

beshinchi xatboshi quyidagi tahrirda bayon etilsin:

“Vazirlik, Vazirlik huzuridagi Xorijiy investitsiyalarni jalb etish agentligi, Eksportni ragʻbatlantirish agentligi va Investitsiya loyihalarini ishlab chiqish markazi boshqaruv xodimlarining cheklangan soni 1 534 nafar, shu jumladan Vazirlikning markaziy apparati boshqaruv xodimlari — 276 nafar etib belgilansin”;

v) 3-bandning ikkinchi xatboshidagi “Texnologik rivojlanish agentligi” soʻzlari “Investitsiya loyihalarini ishlab chiqish markazi” soʻzlari bilan almashtirilsin;

g) 4-bandda:

ikkinchi va uchinchi xatboshilardagi “Texnologik rivojlanish agentligi” soʻzlari “Investitsiya loyihalarini ishlab chiqish markazi” soʻzlari bilan almashtirilsin;

toʻrtinchi — oltinchi xatboshilar chiqarib tashlansin;

d) 7-bandning beshinchi xatboshidagi “Texnologik rivojlanish agentligi” soʻzlari “Investitsiya loyihalarini ishlab chiqish markazi” soʻzlari bilan almashtirilsin;

e) 16-bandning “e” kichik bandi toʻrtinchi xatboshidagi “va Texnologik rivojlanish agentligi” soʻzlari chiqarib tashlansin;

j) 2-ilovada “Texnologik rivojlanish agentligi” bloki “Investitsiya loyihalarini ishlab chiqish markazi” bloki bilan almashtirilsin;

z) 3-ilovaning rus tilidagi matnida “1217yed.” va “226 yed.” soʻzlari mos ravishda “1534 yed.” va “276 yed.” soʻzlari bilan almashtirilsin;

i) 6-ilova quyidagi tahrirda bayon etilsin:

2. Oʻzbekiston Respublikasi Prezidentining 2019-yil 20-fevraldagi “Qurilish materiallari sanoatini tubdan takomillashtirish va kompleks rivojlantirish chora-tadbirlari toʻgʻrisida”gi PQ-4198-son qarorining 9-bandi ikkinchi xatboshidagi “Texnologik rivojlanish agentligi” soʻzlari “Investitsiya loyihalarini ishlab chiqish markazi” soʻzlari bilan almashtirilsin.

3. Vazirlar Mahkamasining 2019-yil 10-maydagi 390-son qarori bilan tasdiqlangan Oʻzbekiston Respublikasi Investitsiyalar va tashqi savdo vazirligi toʻgʻrisidagi nizomda:

9-bandning sakkizinchi xatboshidagi “Texnologik rivojlanish agentligi” soʻzlari “Investitsiya loyihalarini ishlab chiqish markazi” soʻzlari bilan almashtirilsin;

35-bandning ikkinchi va uchinchi xatboshilaridagi “Texnologik rivojlanish agentligi” soʻzlari “Investitsiya loyihalarini ishlab chiqish markazi” soʻzlari bilan almashtirilsin.