Oʻzbekiston Respublikasi Vazirlar Mahkamasining

qarori

Paxta-toʻqimachilik ishlab chiqarishlari va klasterlari faoliyatini tashkil etish boʻyicha qoʻshimcha chora-tadbirlar toʻgʻrisida

Oʻzbekiston Respublikasi Prezidentining “Toʻqimachilik va tikuv-trikotaj sanoatini jadal rivojlantirish chora-tadbirlari toʻgʻrisida” 2017-yil 14-dekabrdagi PF-5285-son Farmonining oʻz vaqtida bajarilishini taʼminlash, paxta-toʻqimachilik ishlab chiqarishini tashkil etishning zamonaviy shakllarini joriy qilish, paxta-toʻqimachilik ishlab chiqarishi hududida joylashgan paxta tozalash korxonalari va paxta tayyorlash punktlarining ishlab chiqarish quvvatlaridan samarali foydalanish maqsadida Vazirlar Mahkamasi qaror qiladi:

1. Quyidagilar maʼlumot uchun qabul qilinsin:

a) Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi tomonidan “Oʻzpaxtasanoat” AJ va “Oʻztoʻqimachiliksanoat” uyushmasi bilan birgalikda paxta-toʻqimachilik ishlab chiqarishlari va klasterlari hududida joylashgan 16 ta paxta tozalash korxonasi va 68 ta paxta tayyorlash punkti xatlovdan oʻtkazilib, ularning holati baholangan;

b) Oʻzbekiston Respublikasi Prezidentining “Toʻqimachilik va tikuv-trikotaj sanoatini jadal rivojlantirish chora-tadbirlari toʻgʻrisida” 2017-yil 14-dekabrdagi PF-5285-son Farmoni bilan tashkil etilgan Paxta-toʻqimachilik klasterlarini oʻrta muddatli istiqbolda rivojlantirish konsepsiyasi loyihasini ishlab chiqish boʻyicha ishchi komissiya tomonidan oʻtkazilgan xatlov natijalari boʻyicha:

paxta-toʻqimachilik ishlab chiqarishlari va klasterlari hududida joylashgan 1-ilovaga muvofiq paxta tozalash korxonalari va paxta tayyorlash punktlarining bino hamda inshootlarini ularning tashkilotchilariga 5 yil muddatga boʻlib toʻlash sharti bilan baholash qiymatida sotish;

paxta-toʻqimachilik ishlab chiqarishlari va klasterlari tashkilotchilari tomonidan ularning hududida joylashgan paxta tozalash korxonalarining ishlab chiqarish quvvatlaridan 2018-yilda paxta xomashyosini qaytarib berish va ijara asosida qayta ishlash uchun foydalanish toʻgʻrisidagi masalalarni paxta tozalash korxonalari aksiyadorlarining umumiy yigʻilishlarida koʻrib chiqish uchun kiritish tavsiya etilgan.

2. Belgilansinki:

a) paxta tozalash korxonalari va paxta tayyorlash punktlarining bino hamda inshootlari paxta-toʻqimachilik ishlab chiqarishlari hamda klasterlari tashkilotchilariga ishlab chiqarishni 2 yildan ortiq boʻlmagan vaqt davomida modernizatsiyalash sharti bilan sotiladi;

b) paxta tozalash korxonalari va tayyorlov punktlarining ishlab turgan uskunalari va boshqa asosiy vositalari paxta-toʻqimachilik ishlab chiqarishlari hamda klasterlari tashkilotchilariga ijaraga:

modernizatsiyalash amalga oshiriladigan davrgacha berilishi mumkin;

mulk va yer soligʻi hamda amortizatsiya ajratmalari hisobga olingan holda, davlat mulki uchun belgilangan eng kam stavkalar boʻyicha beriladi.

3. “Oʻzpaxtasanoat” AJ Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi bilan birgalikda:

ushbu qarorga 1-ilovada qayd etilgan paxta tozalash korxonalari va paxta tayyorlash punktlarining bino hamda inshootlari bir oy muddatda baholanishini;

paxta tozalash korxonalari boshqaruv organlarining yigʻilishlarini ikki oy muddatda oʻtkazish tashabbusini va Ishchi komissiyaga koʻrib chiqish uchun tavsiya etilgan (ushbu qarorning 1-bandi “b” kichik bandiga muvofiq) masalalar kun tartibiga kiritilishini;

paxta-toʻqimachilik ishlab chiqarishlari va klasterlari tashkilotchilari bilan tegishli shartnomalar tuzilishini taʼminlasin.

4. Oʻzbekiston Respublikasi Vazirlar Mahkamasining “Paxta-toʻqimachilik ishlab chiqarishini tashkil etishning zamonaviy shakllarini joriy etish chora-tadbirlari toʻgʻrisida” 2018-yil 25-yanvardagi 53-son qaroriga 2-ilovaga muvofiq oʻzgartirishlar va qoʻshimchalar kiritilsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari N.S. Otajonov va “Oʻzpaxtasanoat” AJ boshqaruvi raisi A.I. Maqsudov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 31-mart,

253-son

Vazirlar Mahkamasining 2018-yil 31-martdagi 253-son qaroriga
1-ILOVA

Paxta-toʻqimachilik ishlab chiqarishlari va klasterlari hududida joylashgan, bino va inshootlarini (uskunalaridan tashqari) investitsiyalar kiritish hamda 5 yil muddatga boʻlib toʻlash sharti bilan baholash qiymatida sotish taklif etilayotgan paxta tozalash korxonalari va paxta tayyorlash punktlarining

ROʻYXATI

T/r	Aksiyadorlik jamiyatlarining nomi	Paxta-toʻqimachilik ishlab chiqarishlari va klasterlari tashkilotchilari	Paxta tozalash korxonalari	Paxta tayyorlash punktlari*
1.	“Ellikqalʼa paxta tozalash” AJ	“Boston klaster” MChJ	1	4
1¹.	“Ellikqalʼa paxta tozalash” AJ	“Ellikqalʼa oltin tolasi klaster” MChJ	-	1
2.	“Chinobod paxta tozalash” AJ	“Digital Prime Textile” MChJ	1	5
3.	“Soʻfiqishloq paxta tozalash” AJ	“Khantex Group” MChJ	–	5
4.	“Dashtobod paxta tozalash” AJ	“Hayotbek tekstil” MChJ	1	1
5.	“Jeynov paxta tozalash” AJ	“Gʻuzor Tekstil Impeks” MChJ	1	5
6.	“Uchqoʻrgʻon paxta tozalash” AJ	“Textile Finance Namangan” XKMChJ	1	3
7.	“Navbahor paxta tozalash” MChJ	“Navbahor tekstil” MChJ	1	2
8.	“Qiziltepa paxta tozalash” AJ	“Baxt tekstil” MChJ va “Baxt Navoiy” MChJ	1	7
9.	“Xatirchi paxta tozalash” AJ	“Baxt tekstil” MChJ va “Baxt Navoiy” MChJ	1	7
10.	“Zirabuloq paxta tozalash” AJ	“Maroqand Sifat” MChJ	1	1
12.	“Angor paxta tozalash” AJ	“Gʻuzor Tekstil Impeks” MChJ	1	1
13.	“Olimkent paxta tozalash” AJ	“Abc Oqqorgon Agro Classter” MChJ	1	4
14.	“Rishton paxta tozalash” AJ	“Rus Oʻzbekteks” MChJ	1	7
15.	“Shovot paxta tozalash” AJ	“Textile Finance Khorezm” XKMChJ	1	1
16.	“Baxt paxta tozalash” AJ	“BEK Cluster” MChJ	–	2
17.	“Paxtaobod paxta tozalash” AJ	“BEK Cluster” MChJ	–	1
18.	“Romitan paxta tozalash” AJ	“Bukhara cotton textile cluster Agrokompleks” MChJ	1	5
19.	“Qiziriq paxta tozalash” AJ	“Surxon Cotton Textile Cluster” MChJ	1	3
	Jami:		15	65

* Izoh. Zavod huzuridagi paxta tayyorlash punktlari hisobga olingan holda.

(1-ilova Oʻzbekiston Respublikasi Vazirlar Mahkamasining 2022-yil 30-avgustdagi 477-sonli qarori tahririda — Qonunchilik maʼlumotlari milliy bazasi, 31.08.2022-y., 09/22/477/0781-son)

Vazirlar Mahkamasining 2018-yil 31-martdagi 253-son qaroriga
2-ILOVA

Oʻzbekiston Respublikasi Vazirlar Mahkamasining “Paxta-toʻqimachilik ishlab chiqarishini tashkil etishning zamonaviy shakllarini joriy etish chora-tadbirlari toʻgʻrisida” 2018-yil 25-yanvardagi 53-son qaroriga kiritilayotgan oʻzgartirishlar va qoʻshimchalar

1. 3-banddagi “Qishloq va suv xoʻjaligi vazirligi” soʻzlari “Qishloq xoʻjaligi vazirligi va Suv xoʻjaligi vazirligi” soʻzlari bilan almashtirilsin.

2. 4-bandning uchinchi xatboshidagi “Oʻzbekiston Respublikasi Vazirlar Mahkamasi huzuridagi Qishloq xoʻjaligi mahsulotlarining davlat xaridi va qishloq xoʻjaligini texnika bilan jihozlashni maqsadli moliyalashtirish jamgʻarmasi” soʻzlari “Oʻzbekiston Respublikasi Moliya vazirligi huzuridagi Qishloq xoʻjaligini davlat tomonidan qoʻllab-quvvatlash jamgʻarmasi” soʻzlari bilan almashtirilsin.

3. 6-bandning ikkinchi xatboshidagi “fermer xoʻjaligining maxsus hisob raqamiga” soʻzlari “fermer xoʻjaligining maxsus hisob raqamiga, shuningdek, paxta-toʻqimachilik ishlab chiqarishlari tashkilotchilari bilan tuzilgan shartnomalar asosida paxta-toʻqimachilik ishlab chiqarishlari tashkilotchilari, moddiy-texnika resurslari yetkazib beruvchilar va xizmatlar koʻrsatuvchi tashkilotlarga” soʻzlari bilan almashtirilsin.

4. 7-bandning ikkinchi xatboshidagi “va suv” soʻzlari chiqarib tashlansin.

5. 10-banddagi “Qishloq va suv xoʻjaligi vazirligi” soʻzlari “Qishloq xoʻjaligi vazirligi va Suv xoʻjaligi vazirligi” soʻzlari bilan almashtirilsin.

6. 13-bandga “Paxta-toʻqimachilik ishlab chiqarishi tashkilotchilari” soʻzlaridan soʻng “va paxtachilik-toʻqimachilik klasterlari” soʻzlari qoʻshilsin.

7. 14-banddagi “va suv” soʻzlari chiqarib tashlansin.

8. 15-banddagi “-Qishloq va suv xoʻjaligi vaziri” soʻzlari chiqarib tashlansin.

9. 1-ilovaning “Paxta-toʻqimachilik ishlab chiqarishining tashkilotchilari” ustunida:

a) 1-pozitsiyadagi ““Boston klaster” MChJ” soʻzlaridan soʻng ““Xorazm teks” MChJ” soʻzlari qoʻshilsin;

b) 2-pozitsiyadagi ““Xanteks” MChJ” soʻzlari ““Khantex Group” MChJ va “Khantex Agro Servis” MChJ” soʻzlari bilan almashtirilsin;

v) 8-pozitsiyadagi ““Baxt tekstil” MChJ” soʻzlaridan soʻng “va “Baxt Navoiy” MChJ” soʻzlari qoʻshilsin;

g) 10-pozitsiyadagi ““Sherobod tekstil invest” MChJ” soʻzlaridan soʻng ““Surxonteks” MChJ” soʻzlari qoʻshilsin;

10. 3-ilovaning nomida “paxta-toʻqimachilik ishlab chiqarishi” soʻzlaridan soʻng “va paxtachilik-toʻqimachilik klasterlari” soʻzlari qoʻshilsin.

(Qonun hujjatlari maʼlumotlari milliy bazasi, 04.04.2018-y., 09/18/253/0994-son, 26.09.2018-y., 09/18/760/1959-son; 19.03.2019-y., 09/19/230/2785-son; Qonunchilik maʼlumotlari milliy bazasi, 31.08.2022-y., 09/22/477/0781-son)