Oʻzbekiston Respublikasi Prezidentining “Respublika davlat boshqaruvi organlari tizimini takomillashtirish toʻgʻrisida” 2003-yil 9-dekabrdagi PF-3358-son Farmonini bajarish yuzasidan va turizm sohasida boshqaruvning samarali tizimini taʼminlash maqsadida Vazirlar Mahkamasi qaror qiladi:

1. Quyidagilar “Oʻzbekturizm” milliy kompaniyasining asosiy vazifalari etib belgilansin:

turizm sohasida yagona davlat siyosati oʻtkazilishini taʼminlash, turistik xizmatlar infratuzilmalarini shakllantirishga koʻmaklashish;

turizmni rivojlantirish davlat dasturlarini, turistlarning muhofaza qilinishini va xavfsizligini taʼminlash dasturlarini amalga oshirish, turistik faoliyatni tarmoqlararo va mintaqalararo muvofiqlashtirish;

turistik xizmatlarni sertifikatlashtirish;

turizm sohasida reklama-axborot siyosatini amalga oshirish;

turizmni rivojlantirish sohasiga xorijiy kreditlar va investitsiyalarni jalb etish, xorijiy mamlakatlar, shuningdek xorijiy kompaniyalar bilan hamkorlikning uzoq muddatli dasturlarini rivojlantirish;

turizm sohasi uchun kadrlarni tayyorlash, qayta tayyorlash va ularning malakasini oshirish chora-tadbirlari kompleksini amalga oshirish, turizm tarmoq fanini rivojlantirishga koʻmaklashish.

2. Quyidagilar:

“Oʻzbekturizm” milliy kompaniyasining tashkiliy tuzilmasi va markaziy apparat xodimlarining cheklangan umumiy soni 45 nafar, shu jumladan boshqaruv xodimlari 30 nafar boʻlgan markaziy apparati tuzilmasi 1 va 2-ilovalarga muvofiq;

“Oʻzbekturizm” milliy kompaniyasi toʻgʻrisidagi nizom 3-ilovaga muvofiq;

“Oʻzbekturizm” milliy kompaniyasi mintaqaviy boʻlimining namunaviy tuzilmasi 4-ilovaga muvofiq tasdiqlansin.

“Oʻzbekturizm” milliy kompaniyasi raisiga zarurat boʻlganda kompaniya markaziy apparati tuzilmasiga xodimlarning belgilangan cheklangan umumiy soni doirasida oʻzgartirishlar kiritishga ruxsat berilsin.

3. 5-ilovaga muvofiq mehmonxona xoʻjaligi korxonalaridagi davlat ulushlari professional boshqaruvchi kompaniyalarga ishonchli boshqaruvga berilgungacha yoki toʻliq sotilgungacha boʻlgan davrda ularni boshqarish huquqi “Oʻzbekturizm” milliy kompaniyasida saqlab qolinsin.

“Oʻzbekturizm” milliy kompaniyasi “Otel Oʻzbekiston” qoʻshma korxonasini xorijiy kompaniyaga tashqi menejment asosida boshqaruvga 2004-yil oxirigacha berish yuzasidan bir oy muddatda Vazirlar Mahkamasiga taklif kiritsin.

4. Belgilansinki, “Oʻzbekturizm” milliy kompaniyasining markaziy apparati, mintaqaviy boʻlimlari taʼminoti xarajatlarini moliyalashtirish litsenziyalar berish toʻgʻrisidagi arizalarning koʻrib chiqilganligi, litsenziyalarning qayta rasmiylashtirilganligi va litsenziyalar dublikatlari berilganligi uchun yigʻimdan, oʻz xoʻjalik faoliyatidan tushumlar, budjetdan tashqari Turizmni rivojlantirish jamgʻarmasi mablagʻlarining bir qismi hamda qonun hujjatlarida taqiqlanmagan boshqa manbalar hisobiga amalga oshiriladi.

5. “Oʻzbekturizm” milliy kompaniyasi:

Oʻzbekiston Respublikasi Iqtisodiyot vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, boshqa manfaatdor vazirliklar va idoralar bilan birgalikda 2004-yil 1-dekabrgacha boʻlgan muddatda 2010-yilgacha boʻlgan davrda turizmni rivojlantirish davlat dasturini ishlab chiqsin va Vazirlar Mahkamasiga kiritsin;

manfaatdor vazirliklar va idoralar bilan birgalikda sayyohlarning Oʻzbekiston Respublikasiga kelishi va ketishi tartibi toʻgʻrisidagi nizomni bir oy muddatda ishlab chiqsin va belgilangan tartibda tasdiqlasin.

6. “Oʻzbekturizm” milliy kompaniyasi, Oʻzbekiston Respublikasi Iqtisodiyot vazirligi va Moliya vazirligining budjetdan tashqari Turizmni rivojlantirish jamgʻarmasini tashkil etish haqidagi taklifiga rozilik berilsin.

Oʻzbekiston Respublikasi Moliya vazirligi, “Oʻzbekturizm” milliy kompaniyasi Turistik yigʻim hamda Turizmni rivojlantirish jamgʻarmasi mablagʻlarini shakllantirish va ulardan foydalanish tartibi toʻgʻrisidagi nizomni bir oy muddatda ishlab chiqsinlar va belgilangan tartibda tasdiqlasinlar, bunda Jamgʻarmaning mablagʻlaridan reklama faoliyatida, jalb etiladigan kreditlarni qaytarishda va turizm infratuzilmasini rivojlantirishda maqsadli foydalanilishini nazarda tutsinlar.

7. Vazirlar Mahkamasining “Oʻzbekturizm” milliy kompaniyasining Ustavini tasdiqlash toʻgʻrisida” 1993-yil 15-fevraldagi 82-son qarori (Oʻzbekiston Respublikasi QT, 1993-y., 2-son, 5-modda) oʻz kuchini yoʻqotgan deb hisoblansin.

Oʻzbekiston Respublikasi Hukumatining 6-ilovaga muvofiq ayrim qarorlariga oʻzgartirishlar kiritilsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari A.A. Azizxoʻjayev va R.S. Azimov zimmasiga yuklansin.

1. “Oʻzbekturizm” milliy kompaniyasi (keyingi oʻrinlarda Kompaniya deb ataladi) turizm sohasidagi vakolatli davlat organi hisoblanadi va oʻz faoliyati toʻgʻrisida Oʻzbekiston Respublikasi Vazirlar Mahkamasiga hisob beradi.

2. Kompaniya tizimiga quyidagilar kiradi:

Samarqand, Buxoro, Xorazm mintaqaviy boʻlimlari;

Oʻzbekiston Respublikasi viloyatlari markazlaridagi Sayohat va ekskursiyalar byurosi davlat korxonalari;

“Respublika ilmiy-oʻquv konsalting markazi” davlat korxonasi;

“Distpecherlashtirish va xizmat koʻrsatish markaziy boshqarmasi” davlat korxonasi;

tasarrufidagi boshqa tashkilotlar.

3. Kompaniya oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi qarorlariga va boshqa hujjatlariga, Oʻzbekiston Respublikasi Prezidenti farmonlari, qarorlari va farmoyishlariga, Oʻzbekiston Respublikasi Vazirlar Mahkamasi qarorlari va farmoyishlariga, shuningdek ushbu Nizomga amal qiladi.

4. Kompaniya oʻz faoliyatini davlat boshqaruvi boshqa organlari, mahalliy davlat hokimiyati organlari, jamoat birlashmalari va boshqa tashkilotlar bilan oʻzaro hamkorlikda amalga oshiradi.

5. Markaziy apparat, mintaqaviy boʻlimlar taʼminoti xarajatlarini moliyalashtirish litsenziyalar berish toʻgʻrisidagi arizalarning koʻrib chiqilganligi, litsenziyalarning qayta rasmiylashtirilganligi va litsenziyalar dublikatlari berilganligi uchun yigʻimdan, oʻz xoʻjalik faoliyatidan tushumlar, budjetdan tashqari Turizmni rivojlantirish jamgʻarmasi mablagʻlarining bir qismi hamda qonun hujjatlarida taqiqlanmagan boshqa manbalar hisobiga amalga oshiriladi.

6. Kompaniya va uning mintaqaviy boʻlimlari yuridik shaxs hisoblanadilar, Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga ega boʻladilar.

7. Quyidagilar Kompaniyaning asosiy vazifalari hisoblanadi:

turizm sohasida yagona davlat siyosati oʻtkazilishini taʼminlash, turistik xizmatlar infratuzilmalarini shakllantirishga koʻmaklashish;

turizmni rivojlantirish davlat dasturlarini, turistlarning muhofaza qilinishini va xavfsizligini taʼminlash dasturlarini amalga oshirish, turistik faoliyatni tarmoqlararo va mintaqalararo muvofiqlashtirish;

turistik xizmatlarni sertifikatlashtirish;

turizm sohasida reklama-axborot siyosatini amalga oshirish;

turizmni rivojlantirish sohasiga xorijiy kreditlar va investitsiyalarni jalb etish, xorijiy mamlakatlar, shuningdek xorijiy kompaniyalar bilan hamkorlikning uzoq muddatli dasturlarini rivojlantirish;

turizm sohasi uchun kadrlarni tayyorlash, qayta tayyorlash va ularning malakasini oshirish chora-tadbirlari kompleksini amalga oshirish, turizm tarmoq fanini rivojlantirishga koʻmaklashish.

8. Kompaniya oʻziga yuklangan vazifalarga muvofiq quyidagi funksiyalarni amalga oshiradi:

Oʻzbekiston Respublikasida turizmni rivojlantirishning asosiy strategik yoʻnalishlarini ishlab chiqadi;

turizmni rivojlantirish boʻyicha normativ-huquqiy hujjatlar loyihalarini ishlab chiqishda qatnashadi;

turistik faoliyatni litsenziyalash boʻyicha ishchi organ funksiyasini amalga oshiradi;

“Turizm toʻgʻrisida”gi Qonunga muvofiq turistik xizmatlarni sertifikatlashtirishni amalga oshiradi;

turizm sohasida statistik hisobot tizimini takomillashtirish boʻyicha takliflar ishlab chiqadi;

turizm sohasida marketing tadqiqotlarini tashkil qiladi;

tahliliy ishlarni amalga oshiradi va respublikada turizmni rivojlantirishning asosiy tendensiyalari va prognozlarini belgilaydi;

turizmni rivojlantirish boʻyicha takliflar tayyorlaydi hamda maqsadli, tarmoq va mintaqaviy dasturlar bajarilishini muvofiqlashtirishni tashkil qiladi;

turistik xizmatlarning amalga oshirilishini reklama-axborot bilan taʼminlash faoliyatini amalga oshiradi;

xorijiy davlatlarning milliy turistik maʼmuriyatlari va ularning Oʻzbekiston Respublikasidagi vakolatxonalari bilan hamkorlikni amalga oshiradi;

Jahon turizm tashkiloti hamda turizm bilan bogʻliq boshqa xalqaro tashkilotlar bilan oʻzaro hamkorlikni taʼminlaydi, ularda respublika manfaatlarini ifodalaydi;

turizm industriyasini rivojlantirishga investitsiyalar jalb etish ishlarida qatnashadi;

turizm infratuzilmasini rivojlantirish sohasidagi investitsiya loyihalarini ishlab chiqadi;

tashqi bozorda Oʻzbekiston Respublikasi manfaatlariga rioya etilishini tahlil qiladi hamda uning asosida turizm sohasidagi salbiy holatlarni bartaraf etish boʻyicha takliflar tayyorlaydi;

turizm sohasi uchun kadrlar tayyorlash boʻyicha xalqaro dasturlarni amalga oshiradi.

9. Kompaniya oʻziga yuklangan vazifalar va funksiyalarni bevosita, shuningdek mintaqaviy boʻlimlar, tasarrufidagi boshqa tashkilotlar orqali bajaradi.

10. Kompaniya oʻziga yuklangan vazifalar va funksiyalarni bajarish uchun quyidagi huquqlarga ega:

tegishli vazirliklar va idoralardan turizm faoliyati masalalari boʻyicha axborotlarni soʻrash va olish;

xorijiy davlatlarning vakolatli organlari bilan belgilangan tartibda axborotlar ayirboshlashni amalga oshirish;

oʻz vakolatlari doirasida konferensiyalar, yigʻilishlar, seminarlar, simpoziumlar oʻtkazish, koʻrgazmalar va boshqa tadbirlarni tashkil qilish, shuningdek boshqa tashkilotlar tomonidan oʻtkaziladigan shu kabi tadbirlarda qatnashish;

turizmni rivojlantirishga yoʻnaltirilgan loyihalarni birgalikda ishlab chiqish, tajriba almashish maqsadida xalqaro, xorijiy va respublika tashkilotlari bilan amaliy aloqalar oʻrnatish;

xalqaro normalar asosida otellar, mehmonxonalar, kempinglar, shuningdek turistlarga xizmatlar koʻrsatuvchi boshqa obyektlar klassifikatsiyasini ishlab chiqishda qatnashish.

11. Kompaniya oʻziga yuklangan vazifalarning samarali bajarilishi uchun javob beradi.

12. Kompaniyani qonun hujjatlarida belgilangan tartibda lavozimga tayinlanadigan va lavozimdan ozod qilinadigan rais boshqaradi.

Raisning ikki nafar, shu jumladan bir nafar birinchi oʻrinbosari boʻladi.

Rais maqomiga koʻra vazirga, rais oʻrinbosarlari — vazir oʻrinbosarlariga tenglashtiriladi.

13. Kompaniya raisi:

Kompaniya faoliyatiga yakkaboshchilik asosida umumiy rahbarlikni amalga oshiradi;

Kompaniya vakolatiga kiradigan masalalar boʻyicha qarorlar qabul qiladi hamda Kompaniyaga yuklangan vazifalar va funksiyalarning bajarilishi uchun shaxsan javob beradi;

oʻz oʻrinbosarlarining vakolatlarini belgilaydi, ular oʻrtasida vazifalarni taqsimlaydi, Kompaniya tizimidagi boshqa mansabdor shaxslarning vakolatlarini, oʻz oʻrinbosarlarining va boshqa mansabdor shaxslarning Kompaniya faoliyatining alohida uchastkalariga rahbarligi hamda tasarrufidagi tashkilotlar ishlari uchun javobgarlik darajasini belgilaydi;

Kompaniya tizimi xodimlarining bajarishi majburiy boʻlgan buyruqlar chiqaradi va koʻrsatmalar beradi;

Kompaniya markaziy apparati tuzilmasiga xodimlarning belgilangan umumiy soni doirasida oʻzgartirishlar kiritadi, shtat jadvalini, shuningdek Kompaniya markaziy apparati, tasarrufidagi tashkilotlar xarajatlari smetalarini tasdiqlaydi;

Kompaniyaning tarkibiy boʻlinmalari va mintaqaviy boʻlimlari toʻgʻrisidagi nizomlarni, oʻz tizimiga kiradigan tasarrufidagi boshqa tashkilotlarning ustavlarini belgilangan tartibda tasdiqlaydi;

Kompaniya markaziy apparati xodimlarini, mintaqaviy boʻlimlarning, Kompaniya tizimiga kiruvchi tasarrufidagi boshqa tashkilotlarning rahbarlarini belgilangan tartibda lavozimga tayinlaydi va lavozimdan ozod qiladi.

Rais qonun hujjatlariga muvofiq boshqa vakolatlarni amalga oshiradi.

14. Kompaniyada rais (hayʼat raisi), uning oʻrinbosarlari (lavozimiga koʻra), shuningdek Kompaniya faoliyatining asosiy yoʻnalishlarini muvofiqlashtiruvchi tarkibiy boʻlinmalari rahbarlaridan iborat tarkibda hayʼat tashkil etiladi.

Hayʼatning aʼzolari soni va shaxsiy tarkibi raisning taqdimnomasiga binoan Oʻzbekiston Respublikasi Vazirlar Mahkamasi tomonidan tasdiqlanadi.

Hayʼat quyidagilar bilan bogʻliq masalalarni koʻrib chiqadi:

Kompaniya faoliyatining turizm sohasida yagona davlat siyosati oʻtkazilishini taʼminlashni davom ettirish, turistik xizmatlar infratuzilmalarini shakllantirishga koʻmaklashish, shuningdek turizmni rivojlantirish davlat dasturlarini, turistlarning muhofaza qilinishini va xavfsizligini taʼminlash dasturlarini amalga oshirish boʻyicha ushbu Nizomda belgilangan asosiy yoʻnalishlarini tayyorlash va amalga oshirish;

“Oʻzbekturizm” milliy kompaniyasi nomenklaturasiga kiradigan lavozimlarga kadrlarni tanlash, joy-joyiga qoʻyish, tayyorlash va qayta tayyorlash;

Oʻzbekiston Respublikasi Prezidentining farmonlari, qarorlari va farmoyishlarida, Oʻzbekiston Respublikasi Vazirlar Mahkamasi qarorlari va farmoyishlarida belgilangan vazifalarni amalga oshirish boʻyicha ijro intizomini mustahkamlash, ularning oʻz vaqtida va sifatli amalga oshirilishini taʼminlash uchun Kompaniya rahbarlari va xodimlarining shaxsiy javobgarligini oshirish.

Hayʼat Kompaniya vakolatiga taalluqli boshqa masalalarni ham koʻrib chiqish huquqiga ega.

Hayʼat majlisiga Kompaniya vakolatiga kiradigan masalalar boʻyicha boshqa vazirliklar, davlat qoʻmitalari, idoralar, mahalliy davlat hokimiyati organlari, korxonalar, muassasalar, tashkilotlar rahbarlari taklif etilishi mumkin.

Hayʼat uning majlisida tarkibining yarmidan koʻpi qatnashgan taqdirda vakolatli boʻladi. Koʻrib chiqilayotgan masalalar boʻyicha qarorlar oddiy koʻpchilik ovoz bilan qabul qilinadi.

Hayʼat qarorlari raisning buyruqlari bilan amalga oshiriladi. Rais va hayʼat aʼzolari oʻrtasida kelishmovchiliklar paydo boʻlgan taqdirda rais paydo boʻlgan kelishmovchiliklar toʻgʻrisida Oʻzbekiston Respublikasi Vazirlar Mahkamasiga axborot bergan holda mustaqil ravishda qaror qabul qiladi. Hayʼat aʼzolari ham oʻz fikr-mulohazalarini Oʻzbekiston Respublikasi Vazirlar Mahkamasiga xabar qilishlari mumkin.

Hayʼat faoliyati tartibi uning hayʼat tasdiqlaydigan reglamentida belgilanadi.

15. Mintaqaviy boʻlimlar oʻz faoliyatini tegishli viloyatlarning hokimlari bilan kelishgan holda Kompaniya tomonidan tasdiqlanadigan nizomlarga muvofiq amalga oshiradilar.

Kompaniyaning mintaqaviy boʻlimlari rahbarlari lavozimga tegishli viloyatlar hokimlarining taqdimnomasiga binoan rais tomonidan tayinlanadi.

1. Vazirlar Mahkamasining ““Oʻzbekturizm” milliy kompaniyasi faoliyatini tashkil etish masalalari toʻgʻrisida” 1992-yil 20-oktabrdagi 484-son qarorining 2—5-bandlari oʻz kuchini yoʻqotgan deb hisoblansin.

2. Vazirlar Mahkamasining “Oʻzbekiston Respublikasida xalqaro turizmning zamonaviy infrastrukturasini barpo etish chora-tadbirlari toʻgʻrisida” 1995-yil 3-iyundagi 210-son qarorining (Oʻzbekiston Respublikasi QT, 1995-y., 6-son, 20-modda) 5, 7 va 8-bandlari oʻz kuchini yoʻqotgan deb hisoblansin.

3. Vazirlar Mahkamasining “Sayyohlik tashkilotlari faoliyatini tashkil etishni takomillashtirish toʻgʻrisida” 1998-yil 8-avgustdagi 346-son qarorida (Oʻzbekiston Respublikasi QT, 1998-y., 8-son, 29-modda):

1-bandning birinchi xatboshidagi “uning “Oʻzbekturizm” milliy kompaniyasiga qoʻshilgan aʼzo sifatida kirishi” soʻzlari chiqarib tashlansin;

2-bandning ikkinchi va uchinchi xatboshi, 3-band oʻz kuchini yoʻqotgan deb hisoblansin.