Oʻzbekiston Respublikasi Oliy Kengashi Rayosati qaror qiladi:

1. Oʻzbekiston Respublikasi Milliy parlament guruhining Qoidalari tasdiqlansin. (Ilova qilinadi).

2. Oʻzbekiston Respublikasi Oliy Kengashining 1992-yil 3-iyuldagi Qarori bilan tashkil etilgan Parlamentlararo Ittifoq Milliy guruhining kengashi bundan buyon Oʻzbekiston Respublikasi Milliy parlament guruhining Ijroiya qoʻmitasi deb atalsin.

3. Ushbu Qaror Oʻzbekiston Respublikasi Oliy Kengashining navbatdagi sessiyasi tasdigʻiga kiritilsin.

Oʻzbekiston Respublikasining Milliy parlament guruhi parlamentining barcha aʼzolaridan iborat boʻlib, u Oliy Kengashning qarori bilan tuziladi.

Milliy parlament guruhi oʻz faoliyatida Parlamentlararo Ittifoqning, oʻzi aʼzo boʻlgan boshqa parlamentlararo tashkilotlarning tartib-qoidalariga amal qiladi, ularning Ustavlari va Qoidalariga rioya etadi.

Oʻzbekiston Respublikasi Oliy Kengashining Raisi Milliy parlament guruhining Rahbari hisoblanadi.

Parlament guruhi aʼzolarining umumiy yigʻilishi Milliy parlament guruhining rahbar idorasi hisoblanadi, bu yigʻilish zaruratga qarab oʻtkaziladi. Milliy parlament guruhining yigʻilishi, basharti unda parlament jami aʼzolarining uchdan ikki qismidan koʻpi ishtirok etsa, vakolatli hisoblanadi.

Umumiy yigʻilish Milliy parlament guruhining Ijroiya qoʻmitasini saylaydi, Ijroiya qoʻmitasi ishiga doir hisobotlarni tinglaydi, Oʻzbekiston Respublikasi Milliy parlament guruhining faoliyati bilan bogʻliq eng muhim masalalarni qarab chiqadi.

Umumiy yigʻilishni Milliy parlament guruhining rahbari, Ijroiya qoʻmitasi chaqiradi.

Umumiy yigʻilish qaror va murojaatnomalar qabul qiladi, noma va maktublar yoʻllaydi.

Basharti, yigʻilishda ishtirok etayotgan parlament aʼzolarining yarmidan koʻpi yoqlab ovoz bersa, yigʻilish qarori qabul qilingan hisoblanadi.

Milliy parlament guruhining Ijroiya qoʻmitasi tarkibi Rais, kotib va qoʻmita aʼzolaridan iborat boʻladi.

Ijroiya qoʻmitasi:

— ish rejasi tayyorlaydi va uni tasdiqlash uchun taqdim etadi;

— Ijroiya qoʻmitasining har bir aʼzosiga aniq ish jabhasini biriktirib qoʻyadi;

— Oʻzbekiston Respublikasi Milliy parlament guruhi aʼzo boʻlgan parlamentlararo tashkilotlarning qarorlarini amalda roʻyobga chiqarish uchun chora-tadbirlar koʻradi;

— parlamentlararo tashkilotlar faoliyat koʻrsatishini taʼminlash uchun maʼmuriy va moliyaviy masalalarga doir zarur chora-tadbirlar koʻradi hamda bu tashkilotlarning Kotibiyatlari bilan muntazam aloqa bogʻlaydi;

— Parlamentlararo Ittifoq va boshqa parlamentlararo tashkilotlarning tadbirlarida qatnashish uchun Milliy parlament guruhi aʼzolari yuborilishini taʼminlaydi, delegatlarning vazifalarini belgilab beradi, ishlarida koʻmaklashadi hamda tadbir oʻtkazilayotgan mamlakatda boʻlishlari bilan bogʻliq barcha zarur choralarni koʻradi;

— qabul qilingan qarorlar yuzasidan Milliy parlament guruhining tutadigan mavqeyini belgilaydi, ana shu mavzular boʻyicha materiallar (bayonnoma, rezolyutsiya loyihasi, qoʻshimchalar, tuzatishlar) taqdim etadi, hukumat tasarrufidagi va hukumat tasarrufida boʻlmagan tegishli tashkilotlar bilan maslahatlashish zarurligi toʻgʻrisida qarorlar qabul qiladi;

— kundalik faoliyatga doir masalalarni oʻrganadi va parlamentlararo tashkilotlarning faoliyatiga, Ustavi, tuzilishi va budjetiga oʻzgartishlar kiritishga, ular oʻtkazadigan tadbirlarning kun tartibiga qoʻshimcha bandlar kiritishga doir takliflarni ilgari suradi;

— parlamentlararo uchrashuv oʻtkaziladigan mamlakat parlamenti rahbariyati va delegatsiyasi bilan ikki tomonlama aloqalar oʻrnatadi.

Parlamentlararo tashkilotlarning qarorlaridan Milliy parlament guruhi, shuningdek zaruratga koʻra Oʻzbekiston Respublikasining Prezidenti va Hukumati ham xabardor etiladi.

Oʻzbekiston Respublikasi Milliy parlament guruhining parlamentlararo tadbirlarda ishtirok etayotgan delegatsiyasi yozma ravishda hisobotlar tayyorlaydi va Ijroiya qoʻmitasining majlislarida, zaruratga koʻra parlament guruhining umumiy yigʻilishlarida axborot beradi.

Delegatsiyaning hisoboti parlamentning rasmiy hujjati sifatida eʼlon qilinishi ham mumkin.

Oʻzbekiston Respublikasining Parlamentiga navbatdagi saylov oʻtkazilganidan keyin Milliy parlament guruhining yangi tarkibi tuzilib, uning umumiy yigʻilishida Ijroiya qoʻmitasining yangi aʼzolari saylangunga qadar avvalgi tarkibdagi Ijroiya qoʻmitasi oʻz ishini davom ettiraveradi.

Ushbu Qoidalarga doir har qanday tuzatish umumiy yigʻilishda ovoz berish yoʻli bilan qabul qilinishi lozim.

Parlament guruhining barcha aʼzolari kiritiladigan tuzatishlar bilan ular yigʻilishda muhokama qilinishidan oldin tanishib chiqishlari lozim.