“Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida” 2013-yil 30-apreldagi OʻRQ-352-son Oʻzbekiston Respublikasi Qonuniga muvofiq, shuningdek xalqaro prinsiplar va standartlarga muvofiq auditorlik faoliyatini yanada takomillashtirish, auditorlik tekshirishlar rolini oshirish maqsadida Vazirlar Mahkamasi qaror qiladi:

1. Vazirlar Mahkamasining 2000-yil 22-sentabrdagi 365-son qarori (Oʻzbekiston Respublikasi QT, 2000-y., 9-son, 62-modda) bilan tasdiqlangan Auditorlik faoliyatini amalga oshirish uchun auditorlik tashkilotlariga litsenziya berish tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Oʻzbekiston Respublikasi Moliya vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. 2-bandning beshinchi xatboshidagi va 26¹-bandning uchinchi xatboshidagi “ochiq” soʻzi chiqarib tashlansin.

2. 6-bandning birinchi xatboshidagi “toʻlov” soʻzi “litsenziyalovchi organga ariza taqdim etilgan” soʻzlari bilan almashtirilsin.

3. 8-bandning ikkinchi xatboshidagi “litsenziya bitimi loyihasi ilova qilingan holda” soʻzlari chiqarib tashlansin.

4. 22-band quyidagi tahrirda bayon qilinsin:

“22. Litsenziyani qayta rasmiylashtirish litsenziyalovchi organ tomonidan tegishli hujjatlar ilova qilingan holda ariza olingan kundan boshlab besh ish kuni mobaynida amalga oshiriladi”.

5. 25-band quyidagi tahrirda bayon qilinsin:

“25. Litsenziya qayta rasmiylashtirilgunga qadar auditorlik tashkiloti oʻz faoliyatini ilgari berilgan litsenziya asosida amalga oshiradi. Mazkur Nizom 21-bandining birinchi xatboshi talablari buzilgan holda auditorlik faoliyatini amalga oshirish litsenziyasiz faoliyat bilan shugʻullanganlik uchun qonun hujjatlarida belgilangan javobgarlikka sabab boʻladi”.

6. 26-band quyidagi tahrirda bayon qilinsin:

“26. Quyidagilar auditorlik faoliyatini amalga oshirishda litsenziya talablari va shartlari hisoblanadi:

“Auditorlik faoliyati toʻgʻrisida”gi Oʻzbekiston Respublikasining Qonuniga, auditorlik faoliyati standartlari, shuningdek boshqa qonun hujjatlari talablariga rioya qilish;

litsenziya olinayotganda va auditorlik faoliyati amalga oshirilayotganda mazkur Nizomda nazarda tutilgan tartibda toʻliq shakllantirilgan ustav kapitaliga ega boʻlish;

faqat auditorlik faoliyatini amalga oshirish;

auditorlik tashkiloti masʼuliyatini sugʻurta qilish polisiga ega boʻlish;

auditor tomonidan auditorlik faoliyatini faqat bitta auditorlik tashkilotida amalga oshirish;

shtatda auditorlar sonining mazkur Nizomda nazarda tutilgan miqdorda boʻlishi;

litsenziya turiga muvofiq shtatdagi auditorlarda xalqaro buxgalter sertifikatining boʻlishi;

auditorlik tekshiruvi oʻtkazish chogʻida olingan axborotning sir saqlanishini taʼminlash;

auditorlik xizmatlari koʻrsatishda shartnoma majburiyatlarini oʻz vaqtida bajarish;

auditorlik tashkiloti rahbari lavozimiga faqat ushbu auditorlik tashkiloti asosiy ish joyi hisoblangan auditorni tayinlash;

auditorlik tashkiloti rahbarining uch yilda bir marotaba litsenziyalovchi organda attestatsiyadan oʻtishi;

auditorlik faoliyatini amalga oshirishda mustaqillikni taʼminlash;

auditorlik faoliyati standartlariga muvofiq auditorlik hisoboti tuzish va auditorlik xulosasi berish;

auditorlik tashkilotlarida ichki standartlarning mavjudligi;

oʻz pochta manzili oʻzgargani toʻgʻrisida litsenziyalovchi organni 10 kun muddatda xabardor qilish;

auditorlik faoliyati toʻgʻrisidagi maʼlumotlarni bir yilda bir marta, belgilangan shaklda litsenziyalovchi organga taqdim etish, shuningdek auditorlik faoliyatini amalga oshirish bilan bogʻliq boshqa axborotlarni litsenziyalovchi organ talabi boʻyicha taqdim etish;

auditorlar ishlari sifatining nazoratini taʼminlash;

auditorlarning bir yilda bir marta malaka oshirish kurslaridan oʻtishini taʼminlash;

auditorlik tashkiloti rahbari almashganligi va (yoki) auditorlar tarkibi oʻzgarganligi toʻgʻrisida litsenziyalovchi organni 5 kun muddatda xabardor qilish;

auditorlik tekshiruvlarini amalga oshirishda qonun hujjatlarida nazarda tutilgan cheklovlarga rioya qilish”.

7. 34-bandning yettinchi xatboshi quyidagi tahrirda bayon qilinsin:

“auditorlik faoliyatini amalga oshirishda auditorlik tashkiloti masʼuliyatini sugʻurta qilish polisining mavjud emasligi”.