Oʻzbekiston Respublikasi Hukumati tomonidan taqdim etilib, muhokama qilish mobaynida qonunchilik palatasi deputatlarining fikr-mulohazalari va takliflari hisobga olingan holda maromiga yetkazilgan Oʻzbekiston Respublikasining 2011-yilgi Davlat budjeti loyihasini koʻrib chiqib, Oʻzbekiston Respublikasi Oliy Majlisining qonunchilik palatasi qaror qiladi :

1. Oʻzbekiston Respublikasining 2011-yilgi Davlat budjeti hamda soliq va budjet siyosatining asosiy yoʻnalishlari Davlat budjeti taqchilligining eng yuqori darajasi yalpi ichki mahsulot hajmiga nisbatan 1,0 foiz miqdorida belgilangan holda qabul qilinsin.

2. Oʻzbekiston Respublikasi Hukumati:

mamlakatda olib borilayotgan ijtimoiy-iqtisodiy siyosatni va makroiqtisodiy barqarorlikni taʼminlash, iqtisodiy oʻsishning barqaror yuqori surʼatlariga, iqtisodiyotning va jamiyat ijtimoiy hayotining muvozanatli rivojlanishiga, aholi farovonligi va turmush darajasini oshirishga erishish yuzasidan zarur chora-tadbirlar koʻrsin;

samarali investitsiya siyosatini olib borish hamda strategik jihatdan ahamiyatga molik loyihalarni amalga oshirish, iqtisodiyotning eng muhim tarmoqlarini texnik va texnologik jihatdan qayta jihozlash orqali iqtisodiyotdagi tarkibiy oʻzgarishlarni va uning diversifikatsiya qilinishini davom ettirsin;

xoʻjalik yurituvchi subyektlar faoliyatini qoʻllab-quvvatlashga qaratilgan soliq maʼmuriyatchiligi takomillashtirilishi va uning samaradorligi oshirilishini taʼminlasin, budjet mablagʻlaridan maqsadli foydalanilishi va ularning asossiz sarflanishiga barham berish ustidan qatʼiy nazorat qilinishini taʼminlasin;

ish haqi, stipendiyalar, ijtimoiy nafaqalar va pensiyalar miqdorlarini inflatsiya surʼatlariga nisbatan ildam oshirib borish orqali aholi farovonligini izchil yaxshilashga qaratilgan chora-tadbirlar amalga oshirilishini bundan buyon ham davom ettirsin;

taʼlim muassasalarini rekonstruksiya qilish, kapital taʼmirlash va jihozlash hamda Oliy taʼlim muassasalarining moddiy-texnika bazasini mustahkamlash dasturini amalga oshirishni taʼminlasin;

2011-yilda Ish oʻrinlari yaratish va aholining bandligini taʼminlash dasturini bajarish yuzasidan zarur chora-tadbirlarni koʻrsin;

Davlat budjeti taqchilligini respublika budjetining zaruriy aylanma kassa mablagʻlari hajmidan ortiq boʻlgan boʻsh qoldiqlari hamda boshqa noinflatsiyaviy manbalar hisobiga moliyalashtirilishini nazarda tutsin.

3. Mahalliy davlat hokimiyati organlari Davlat budjeti daromadlarining tasdiqlangan koʻrsatkichlari bajarilishini taʼminlasin, mintaqalarning soliq solinadigan bazasini kengaytirish va moliyaviy salohiyatini mustahkamlash yuzasidan zarur chora-tadbirlarni amalga oshirsin, budjet mablagʻlaridan maqsadli foydalanilishi ustidan qatʼiy nazorat oʻrnatsin.

4. Ushbu qaror Oʻzbekiston Respublikasi Oliy Majlisining Senatiga yuborilsin.

5. Ushbu qaror qabul qilingan kundan eʼtiboran kuchga kiradi.