Suv xoʻjaligi qurilishini tashkil etishni yanada takomillashtirish, alohida muhim suv xoʻjaligi obyektlari qurilishining sifatini hamda xavfsizligini oshirish maqsadida Vazirlar Mahkamasi qaror qiladi:

1. Oʻzbekiston Respublikasi Suv xoʻjaligi vazirligi tomonidan “Bektemirdavsuvmaxsuspudrat” davlat unitar korxonasi negizida davlat korxonasi shaklidagi alohida muhim suv xoʻjaligi obyektlarida qurilish-montaj ishlarini bajarish boʻyicha “Oʻzmaxsussuvqurilish” ixtisoslashtirilgan kompaniyasi (keyingi oʻrinlarda “Oʻzmaxsussuvqurilish” kompaniyasi deb ataladi) tashkil etilganligi maʼlumot uchun qabul qilinsin.

2. “Oʻzmaxsussuvqurilish” kompaniyasi ijro etuvchi apparatining tuzilmasi ilovaga muvofiq tasdiqlansin.

3. Belgilansinki, “Oʻzmaxsussuvqurilish” kompaniyasi:

oʻz faoliyatini alohida muhim suv xoʻjaligi obyektlarida qurilish-montaj ishlarini bajarish boʻyicha tuzilgan shartnomalarga muvofiq oʻzini oʻzi mablagʻ bilan taʼminlash asosida amalga oshiradi;

kompaniyaning asosiy xoʻjalik faoliyatidan olingan sof foydani, muassis bilan kelishgan holda, oʻzining ustav fondini toʻldirishga hamda moddiy-texnika bazasini mustahkamlashga yoʻnaltiradi;

alohida muhim suv xoʻjaligi obyektlari qurilishi doirasida Davlat budjeti hisobiga xarid qilinadigan maxsus texnika, mashina va mexanizmlarni qurilish tugallangandan keyin belgilangan tartibda oʻz balansiga qabul qiladi;

alohida muhim suv xoʻjaligi obyektlarida qurilish-montaj ishlarining tuzilgan shartnomalarga qatʼiy muvofiq ravishda oʻz vaqtida va sifatli bajarilishi, Davlat budjeti va boshqa manbalar hisobiga xarid qilinadigan maxsus texnika, mashina va mexanizmlardan maqsadli va samarali foydalanilishi, ularning saqlanishi, ularga oʻz vaqtida texnika va profilaktika xizmati koʻrsatilishi, ularning zarur ish holatida boʻlishi uchun javob beradi.

4. “Oʻzmeliomashlizing” davlat lizing kompaniyasi “Oʻzmaxsussuvqurilish” kompaniyasi buyurtmalariga binoan uning moddiy-texnika bazasini rivojlantirish uchun lizing asosida maxsus texnika, mashina va mexanizmlarning oʻz vaqtida yetkazib berilishini taʼminlasin.

5. “Oʻzbekneftgaz” milliy xolding kompaniyasining “Oʻzneftgazqurilishinvest” aksiyadorlik kompaniyasiga Fargʻona viloyatida alohida muhim suv xoʻjaligi obyektlarini qurish boʻyicha subpudrat asosida qurilish-montaj ishlarini bajarish yuzasidan “Oʻzmaxsussuvqurilish” kompaniyasi bilan belgilangan tartibda shartnomalar tuzish tavsiya etilsin.

6. Oʻzbekiston Respublikasi Suv xoʻjaligi vazirligi:

bir oy muddatda “Oʻzmaxsussuvqurilish” kompaniyasini, maxsus oliy maʼlumotga va alohida muhim suv xoʻjaligi obyektlari qurilishida hamda ulardan foydalanishda kamida 5 yil amaliy ish tajribasiga ega boʻlgan rahbar va muhandis-texnik xodimlar mavjud boʻlishini nazarda tutgan holda, yuqori malakali kadrlar bilan taʼminlasin;

kadrlar malakasini doimiy ravishda oshirib borish chora-tadbirlarini koʻrsin;

kompaniyaning texnika parkini zarur miqdorda texnika, mashinalar, mexanizmlar va transport bilan yangilash borasida yordam koʻrsatsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.