Aholini oʻsimlik yogʻi bilan hamda chorvachilikni toʻlaqonli yem-xashak bilan taʼminlashni yaxshilash maqsadida Vazirlar Mahkamasi qaror qiladi:

1. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Moliya vazirligi, Iqtisodiyot vazirligi hamda Yogʻ-moy va oziq-ovqat sanoati korxonalari uyushmasining 2009-yildan boshlab har yili Braziliya Federativ Respublikasidan 50,0 ming tonna soya donlarini olib kelish toʻgʻrisidagi taklifiga rozilik berilsin.

2. Shunday tartib oʻrnatilsinki, unga muvofiq:

soya donlarini sotib olish asosan bahor-yoz mavsumida Oʻzbekiston Respublikasi Tashqi iqtisodiy aloqalar, investitsiyalar va savdo vazirligining tashqi savdo kompaniyalari tomonidan soya yetishtiruvchi braziliyalik yetkazib beruvchilar oʻrtasida tender (tanlov) asosida ularni tashish uchun optimal marshrutlarni tanlashni hisobga olgan holda amalga oshiriladi;

Braziliya Federativ Respublikasi bilan hamkorlik faoliyati doirasida 2009 — 2013-yillar davomida olib kelinadigan soya donlari bojxona toʻlovlaridan ozod qilinadi;

soya sotib olishni moliyalashtirish tijorat banklarining tegishli yogʻ-moy korxonalariga yillik 8 foizli imtiyozli stavkada belgilangan tartibda konvertatsiya qilingan milliy valyutadagi kredit mablagʻlari hisobidan amalga oshiriladi..

3. Belgilanadiki:

Braziliya Federativ Respublikasidan har yili olib kelinadigan soya donlari hajmi ushbu qarorga muvofiq sanoatning yirik, moliyaviy barqaror yogʻ-moy korxonalarida ilovaga muvofiq roʻyxat boʻyicha qayta ishlanadi.;

soyadan yogʻ chiqishi normativlari “Oʻzpaxtasanoateksport” xolding kompaniyasi tomonidan Oʻzbekiston Respublikasi Iqtisodiyot vazirligi va “Oʻzstandart” agentligi bilan kelishilgan holda, Braziliya Federativ Respublikasidan olib kirilayotgan soya donlarining har bir partiyasining yogʻliligi va boshqa haqiqiy sifat koʻrsatkichlarini hisobga olgan holda belgilanadi.

4. “Oʻzpaxtasanoateksport” xolding kompaniyasi Braziliya Federativ Respublikasidan olib kelingan soya donidan maqsadli va samarali foydalanishni va ularni qayta ishlash mahsulotlarini quyidagi tartibda sotishni taʼminlaydi:

soya yogʻi yoki soya va paxta yogʻini aralashtirish yoʻli bilan olingan “Oʻzbekiston Yogʻi” yogʻini — belgilangan tartibda birja savdosi orqali;

Soya unining 90 foizini — ixtisoslashtirilgan yirik parrandachilik xoʻjaliklariga yopiq birja savdolari orqali va soya unining 10 foizini — toʻgʻridan-toʻgʻri shartnomalar boʻyicha, amaldagi birja narxlari boʻyicha chorva mollari uchun konsentrlangan ozuqa ishlab chiqarish boʻyicha ixtisoslashtirilgan ozuqa korxonalariga.

5. Mazkur qarorga ilovasiga kiritilgan yogʻ-moy korxonalariga xizmat koʻrsatuvchi tijorat banklariga soya sotib olish uchun imtiyozli kredit resurslari ajratish tavsiya etilsin.

Oʻzbekiston Respublikasi Markaziy banki Braziliya Federativ Respublikasidan soya sotib olishning oʻz vaqtida moliyalashtirilishi ustidan nazorat oʻrnatsin.

6. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimovga yuklatilsin.