Oʻzbekiston Respublikasi Vazirlar Mahkamasining 2004-yil 1-martdagi 96-sonli qarori bilan tasdiqlangan “Elektr energetikada nazorat boʻyicha davlat inspeksiyasi (“Oʻzdavenergonazorat” inspeksiyasi) toʻgʻrisidagi nizom”ga asosan buyuraman:

1. Ilova qilinayotgan “Isteʼmolchi obyektlarini elektr taʼminoti loyihalarining kelishuvini oʻtkazish tartibi toʻgʻrisidagi nizom” tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilganidan soʻng oʻn kundan keyin kuchga kiradi.

Mazkur Nizom Oʻzbekiston Respublikasi Vazirlar Mahkamasining 2004-yil 1-martdagi 96-sonli qarori bilan tasdiqlangan “Elektr energetikada nazorat boʻyicha davlat inspeksiyasi (“Oʻzdavenergonazorat” inspeksiyasi) toʻgʻrisidagi nizom”ga muvofiq, elektr energiyasi isteʼmolchilarining yangidan ishga tushirilgan va rekonstruksiya qilingan obyektlarini ishlashining ishonchliligini, xavfsizligini va texnikaviy shartlarga muvofiqligini taʼminlash maqsadida elektr taʼminoti loyiha hujjatlari (keyingi oʻrinlarda elektr taʼminoti loyihalari deb yuritiladi) kelishuvini oʻtkazishning tartibi va muddatlarini belgilaydi.

1. Elektr taʼminoti loyihalarining elektr energiyasini ishlab chiqarish, uzatish va isteʼmol qilish xavfsizligini taʼminlash borasidagi kelishuvini oʻtkazish isteʼmolchilarning yangidan ishga tushirayotgan va rekonstruksiya qilinib, elektr taʼminoti tashkilotining tarmoqlariga ulanayotgan obyektlari, texnologiyalari va uskunalarini (keyingi oʻrinlarda obyektlar deb yuritiladi) uchun majburiydir va “Oʻzdavenergonazorat” inspeksiyasi (keyingi oʻrinlarda Oʻzdavenergonazorat deb yuritiladi) hamda uning hududiy boʻlimlari tomonidan amalga oshiriladi.

2. Faoliyati elektr energiyasini ishlab chiqarish, uzatish va isteʼmol qilish bilan bogʻliq boʻlgan isteʼmolchilarning yangidan ishga tushirilayotgan va rekonstruksiya qilinayotgan obyektlari ixtisoslashtirilgan loyiha tashkilotlari tomonidan ishlab chiqilgan loyiha hujjatlari boʻyicha barpo etilishi kerak.

3. Obyektlarning elektr taʼminoti loyihalarini ishlab chiqish Vazirlar Mahkamasining 2009-yil 22-avgustdagi 245-son qarori (Oʻzbekiston Respublikasi qonun hujjatlari toʻplami, 2009-y., 35-son, 382-modda) bilan tasdiqlangan “Elektr energiyasidan foydalanish qoidalari”, “Elektr uskunalarining tuzilishi qoidalari”, qurilish meʼyorlari va qoidalarining (keyingi oʻrinlarda QMQ deb yuritiladi) elektr taʼminotiga taalluqli qismini va boshqa normativ hujjatlarning talablarini eʼtiborga olgan holda bajarilishi lozim.

4. Elektr taʼminoti loyihalarining kelishuvini oʻtkazish energetika sohasidagi qonun hujjatlari hamda mazkur Nizom talablariga muvofiq amalga oshirilishi lozim.

5. “Oʻzdavenergonazorat” yoki uning hududiy boʻlimlari tomonidan isteʼmolchi obyektlarining elektr taʼminoti loyihalari kelishuvi oʻtkazilganidan soʻng ularga xulosa beriladi.

6. Ulangan quvvati 750 kVA gacha boʻlgan elektr taʼminoti obyektlarining loyihalari boʻyicha xulosalar Oʻzdavenergonazoratning hududiy boʻlimlari (Toshkent viloyati va Toshkent shahar hududiy boʻlimlari bundan mustasno), 750 kVA va undan yuqorilari Oʻzdavenergonazorat tomonidan beriladi.

Toshkent viloyati va Toshkent shahrida joylashgan elektr taʼminoti obyektlarning loyihalari boʻyicha xulosalar berish Oʻzdavenergonazorat tomonidan amalga oshiriladi.

7. Quvvati 10 kilovattgacha boʻlgan obyektlarning elektr taʼminoti loyihalari “Oʻzdavenergonazorat” bilan kelishuvdan oʻtkazilmaydi.

8. “Oʻzbekenergo” DAK obyektlarining elektr taʼminoti loyihalari kelishuvi elektr taʼminoti tashkilotining vakili (eksperti) bilan birgalikda oʻtkaziladi.

9. Isteʼmolchida elektr taʼminoti loyihasini kelishuvi toʻgʻrisida “Oʻzdavenergonazorat” yoki uning hududiy boʻlimlari tomonidan berilgan xulosa boʻlmagan taqdirda, obyektni elektr tarmoqlariga ulash man etiladi.

10. Elektr taʼminoti loyihalari boʻyicha xulosani olish uchun “Oʻzdavenergonazorat”ga yoki uning hududiy boʻlimlariga isteʼmolchi yoki loyihani ishlab chiqqan loyiha tashkiloti tomonidan quyidagi hujjatlar taqdim etiladi:

elektr taʼminoti loyihasini kelishish toʻgʻrisidagi ariza;

elektr taʼminoti loyihasi;

obyektni elektr tarmoqlariga ulash uchun elektr taʼminoti tashkiloti tomonidan berilgan texnik shartlar;

elektr taʼminoti tashkilotining tashqi elektr taʼminoti loyihasini kelishilganligi toʻgʻrisidagi xulosasi.

Koʻrsatib oʻtilgan roʻyxatdan ortiqcha qoʻshimcha materiallar soʻrab olish qatʼiyan taqiqlanadi.

11. Elektr taʼminoti loyihalari kelishuvini oʻtkazish muddati loyiha hujjatlarining hajmiga qarab belgilanadi va 30 kundan oshmasligi kerak. Juda katta va murakkab obyektlarning loyihalari kelishuvini oʻtkazishda, ushbu muddat istisno tariqasida, “Oʻzdavenergonazorat” boshligʻi tomonidan bir oyga, lekin undan ortiq boʻlmagan muddatga arizachini xabardor qilgan holda uzaytirilishi mumkin.

Bunda tadbirkorlik faoliyati subyektlarining quvvati 50 kVt gacha boʻlgan elektr taʼminoti obyektlarining loyihalari kelishuvini oʻtkazish muddati 3 ish kunidan oshmasligi kerak.

12. Obyektlarning elektr taʼminoti loyihalari boʻyicha xulosa Oʻzdavenergonazorat va uning hududiy boʻlimlarining qarorlari koʻrinishida rasmiylashtiriladi.

13. Obyektlarning elektr taʼminoti loyihalari, ularning kelishuvni oʻtkazish davomida quyidagi hollarda qayta ishlab chiqilishi uchun qaytariladi:

kelishuvni oʻtkazish uchun kerakli hujjatlar toʻla hajmda taqdim etilmaganda;

elektr taʼminoti tashkiloti tomonidan berilgan texnik shartlarning talablari bajarilmaganda;

elektr energiyasini ishlab chiqarish, uzatish va isteʼmol qilish sohasida Vazirlar Mahkamasining 2009-yil 22-avgustdagi 245-son qarori (Oʻzbekiston Respublikasi qonun hujjatlari toʻplami, 2009-y., 35-son, 382-modda) bilan tasdiqlangan “Elektr energiyasidan foydalanish qoidalari” hamda “Elektr uskunalarining tuzilishi qoidalari”, QMQ hamda boshqa normativ-huquqiy hujjatlarga nomuvofiqliklar aniqlanganda.

14. “Oʻzdavenergonazorat” yoki uning hududiy boʻlimlari tomonidan birlamchi koʻrib chiqishda berilgan eʼtirozlar bartaraf etilib, loyiha qayta ishlab chiqilganidan soʻng, obyektlarning elektr taʼminoti loyihasi takroran koʻrib chiqish uchun taqdim etiladi.

15. Qayta ishlab chiqilgan obyektning elektr taʼminoti loyihasining takroriy kelishuvini oʻtkazish muddati ularning murakkabligidan qatʼi nazar, 15 kundan oshmasligi lozim.

Hujjatlarni takroran koʻrib chiqishda ilgari arizachiga yozma ravishda bayon qilinmagan yangi kamchiliklar bildirilishiga yoʻl qoʻyilmaydi.

16. Isteʼmolchi obyektlarining elektr taʼminoti loyihalarining kelishuvini oʻtkazishda yuzaga keladigan nizolar qonunchilikda belgilangan tartibda hal etiladi.

17. Mazkur Nizom “Oʻzbekenergo” davlat aksiyadorlik kompaniyasi, Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi va Oʻzbekiston Respublikasi Davlat arxitektura va qurilish qoʻmitasi bilan kelishilgan.